Yohanes 19
19
1Asogo egesema re, at Pilatus pobuk ʼgwegeitik e, Yesus ʼgoʼbu woruagoluk wogentesi. 2Asogo wogentesimu, is ap tentara aʼge en ap ʼgaindek aʼge eneʼgare-ʼgare ʼbuktak onobogwi ai ʼgelaʼge, orlok aʼbik aʼge hwanesogo Yesus aʼgul pam ʼbuktak pogulat, sum orogole wibeʼgen werak aʼge ʼgelaʼge, ap ʼgaindek ʼbuktak onobogwi aʼge ʼgelaʼge ʼbuktak pogulat, tigisa. 3Asogo tigisarik e, enebe hopha ʼgugulat e, disogo moʼgulegisa,
“Aphwami Yahudi aʼge onue ʼgain onuk logo aʼge ano harat hegi o, ohuk!” oluk moʼgulogulat orogole pam eneʼgik sapu aʼge en worogu legesa. 4Asogo worogu legesema, at Pilatus ano pobuk is ap Yahudi aʼge il entil liplau wagarik e, disogo moʼgulentesi,
“Ap yu logwe. Yethemit! At wene ebam pegep aʼge ʼbeleʼgegis aʼge re, at wiak mesik tegeimu hegi modok erlak ai his henaluk emagoluk lebikpou wegi o,” oluk moʼgulentesimu, 5at Yesus ʼgare-ʼgare ʼgelaʼge orlok aʼge ano aʼgul pam ʼbuksogoat, ye, sum orogole wibeʼgen werak aʼge ʼgelaʼge ano ogo ʼbuksogoat, liplau wagama, at Pilatus en e,
“Ap yu henil yethau manis!” oluk moʼgulentesimu, 6is ap Allah eiye aʼge onuelak ʼgaindek emin, is ap Allah owi werik ʼgwelakharok welagai aʼge emin, Yesus ebe enil hegesarik eniak loksogoat ngai-wai ogulat e,
“At ebe e pam edikpoluk werip a! E pam edikpoluk werip a!” oluk eniak ningsogoat moʼgulegisema, at Pilatus en e, disogo moʼgulentesi,
“An en, at wiak tegei aʼge mesik hegi modok erlak ai en e, his honuʼgwarek honumu en at ebe wik-wok e pam edikpoluk werip o,” oluk moʼgulentesimu, 7is ap Yahudi aʼge ebano en e, disogo moʼgulegisa,
“At en eselat e,
An nebe Allah omlogo, egei ai en, wene Allah en nenesaʼgo weregei wene, nis en togu lege ai hegitsogo, at ebe woru elirat o. Holuk e, woru opogu lege o,” oluk moʼgulegisa. 8Wene asogo moʼgulegisema, at Pilatus esaʼgo hwelegeitik e, ebenagaikmu ogorlok modok aga. 9Asogo ogorlok modok agarik e, Yesus woluk togolik o wene enebam pogulat, noʼgorlogulat, tugumu ebano ʼgwegeitik, disogo moʼgulentesi,
“Hat howi edip o ʼgeba,” oluk moʼgulesi aʼgeat de, at Yesus en oʼgo u erlakma en mo egei. 10Iak erlak mo egeimu, at Pilatus en pobuk disogo moʼgulesi,
“Hat an nemin weneane u hebit a? Hat herle hebilogo ukhobo emin, ye, e pam edikhoboluk wathobu emin, an eiye welegi ano, hat heperlak a?” oluk moʼgulesimu, 11at Yesus en e, disogo moʼgulesi,
“At Allah en e,
Hat en wene aphwami enebam pasulat, noʼgorliselat, taga lomup o, oluk hat eiye hebelep erlakma re, hat en wene nebam po miayat o. Ai en e,
Hat wiak tigen, oluk wene hebam weiyat ʼgelaʼge oruak aʼgeat de, at ap mesik en an nebe wokho hat heʼgik pam nobou waga aʼge ai nak e, wiak tegei, oluk wene lok ʼgelaʼgeat ebam oruak o,” oluk moʼgulesimu, 12at Pilatus esaʼgo hwelegeitik e, Yesus herle hebilogo paigoluk walhesi aʼgeat de, is ap Yahudi aʼge ebano eniak loksogoat ngai-wai ogulat e, disogo moʼgulegisa,
“Sa en,
An nebe ʼgain onuk logo aʼge, oluk uʼgwarek en oso holuk e, ap ʼgain Kaisar emin il ʼbelak aʼgeat o. Holuk e, hat en at ai herle hebilogo lebikpagun holuk e, hat ʼgain Kaisar emin ʼbali aʼge puk o. Il ʼbelak aʼgeat oluk, hopul o,” oluk moʼgulegisema, 13at Pilatus esaʼgo hwelegeitik, Yesus ebe woluk liplau wagarik e, o seli ebe onuk Helep Delakma ogwi aʼge ai, is aphwami Ibrani aʼge eniak pam e, onuk Gabata ogu legesema eba e delakma hweriogo welat, wene enebam pogulat, noʼgorlogulat, tugumu ebano huraga. 14Huraga ai erlige re, hubet oʼgwe seni Paskah nil louwogoluk, di aʼge yu aʼge odoksogo pogukhwe, jam 12 ʼgelaʼge erlige ʼbirl-ʼburl huraga. Huragarik, aphwami Yahudi aʼge disogo moʼgulentesi,
“Logwe. Ap yema his honue ʼgain onuk logo aʼge yu henil hemit o!” oluk moʼgulentesimu, 15is en eniak ningsogo ngai-wai ogulat e,
“At ebe werip o! Werip o! E pam edikpoluk werip o!” oluk moʼgulegisema, at Pilatus en e, disogo moʼgulentesi,
“An en his honue ʼgain onuk logo aʼge yu, e pam edikpoluk woru opogu legep a?” oluk moʼgulentesimu, is ap Allah eiye aʼge onuelak ʼgaindek en e, disogo moʼgulegisa,
“Nis nonue ʼgain onuk logo aʼge mesik erlak o. We, Kaisar emategat o,” oluk moʼgulegisema, 16at Pilatus en e, Yesus ebe e pam edikpoluk woruagoluk wogentesi. Asogo wogentesimu re, Yesus ebe woluk liplau wegesa.
At Yesus e pam edikpoluk werigisa wene
(Matius 27:32-44; Markus 15:21-32; Lukas 23:26-43)
17Woluk liplau womogoluk e, e Yesus ebe edikpoluk woru aʼge ano uʼgwarek en woluk louwagoluk emarlo pam pegesarik, duk nis neniak pam e, onuk Enaʼguluak ʼBelak duk pam u ʼgelaʼge, is aphwami Ibrani aʼge eniak pam e, onuk Golgota ai liplau wegesa. 18Wegesarik e, ebano Yesus ebe e pam ʼburl edikpoluk e, is ap muon ʼbiren eminat abel pema-pema edigenebegesa. 19Asogo edigenebegesema re, at Pilatus en e, pelal disogo oluk wesi,
“YESUS OWI O NAZARET AʼGE APHWAMI YAHUDI AʼGE ONUE ʼGAIN ONUK LOGO AʼGE,” oluk pelal wokho wogentesimu re, e Yesus edikpegesa aʼge ano pam dopnorak pegesa. 20Pelal ai re, aphwami Ibrani aʼge emin, Roma aʼge emin, Yunani aʼge emin, eniak pam wokho pesimu oruakma re, o kota en e, Yesus e pam edikpoluk werigisema ebano walek puk. We, horogatma oluk e, aphwami Yahudi aʼge aʼbigat pelal wogo aʼge ano onuk moʼgulogu legesa. 21Asogo pelal wesimu, is ap Allah eiye onuelak ʼgaindek en Pilatus disogo moʼgulegisa,
“Aphwami Yahudi aʼge onue ʼgain onuk logo aʼge oluk, pelal wasu puk o. We, disogo wemen,
Ap yu en eselat e,
An aphwami Yahudi aʼge onue ʼgain nonuk logo aʼge, egei, oluk wemen o,” oluk moʼgulegisa aʼgeat de, 22at Pilatus en e, disogo moʼgulentesi,
“An pelal wegi aʼge aiat wogo welemak o!” oluk moʼgulentesi. 23Asogo moʼgulentesimu, is ap tentara aʼge en, Yesus ebe e pam edikpegesarik e, osum noʼgorlak enebe loʼbok mesik-mesik soʼbusogo horlouwogoluk, sum ebe uganatma re, meʼgisogo pegesa. Ye, osum oʼborl oʼgwe aʼge daksogo egeik aʼge puk. At e, yat ʼbekhit luktak egeik aʼge ʼbuktak welaga aʼge horlouwogoluk e, 24is-is nak agaikhe en e, agaikhe moʼguleselat e,
“Sum yu ʼbalul erlak o. We, sa ʼgelaʼge horlouwa oluk helebeʼgen hwik hwik aʼge tuok o,” oluk egesa. Asogo egesa ai re, Allah iak pelal wokho pegesema, disogo oruak o,
“An nosum noʼgorlak soʼburontoluk e,
nosum oʼborl oʼgwe aʼge horlouwogoluk helebeʼgen hwik hwik tigisa o,” (Mazmur 22:18=TB 22:19)
oluk egesema pelal wokho pegesa aʼge oruak hegitsogo, is ap tentara aʼge en asogoat tigisema demat aga ai o. 25Asogo tugukhwe, Yesus ia emin, ia ot emin, hwe Maria ap Klopas ugwe emin, hwe Maria owi o Magdala aʼge ano emin, e Yesus ebe edikpoluk werigisema eragam edik welegesa. 26At ia emin, osi iak wogu legesa aʼge mesik ede hwedik modok welago aʼge ano emin, eragam asogo edik oruakma il entesirik, at ia moʼguleselat e,
“Hwe yu nia. Hat homlogo aiat o,” oluk moʼgulesirik, 27at ot ano moʼguleselat e,
“Not. Hat hia aiat o,” oluk osokhwe erianoat Yesus ia ano, at ot ano emin welemagoluk owi pam woluk laga.
At Yesus ebe waraga wene
(Matius 27:45-56; Markus 15:33-41; Lukas 23:44-49)
28Arat asogo tolukmu en, at Yesus ogola en e,
“Di wene yu wene ʼberlek arat ologun wusogo tegis o,” oluk alukmu no oluk e, Allah iak pelal wokho pegesa aʼge demat emagoluk,
“An ik nele o,” egei. 29Asogo egeimu, eba en ik eʼbe pam anggur eʼgen aʼbosu esik wiak aʼge naʼgogo oruakma, hwali sabus ʼgelaʼge pam udalogo e paiyo pam dongtak poluk e, Yesus emdema pei ligegesa. 30Asogo wogegisema, oduk nekhesirik e, disogo egei,
“Arat tegis o!” oluk, odogun ʼgonu otluk ebe arat lebeksogo waraga.
At Yesus abel akhit waʼgun dainsogo werigisa wene
31Ai erlige re, hubet oʼgwe agauwa sabit aʼge pam Allah paget weat wolomogoluk tigisa. Aʼgeat de, agauwa sabit aʼge pam Allah paget weat nin hwedik nan hwedik welagai ʼgelaʼge puk. We, muat logo aʼge wolomogoluk no oluk e, disogo egesa,
“Agauwa Allah paget weat oruakhwe is enebe e pam edigenebegesa aʼge ai werak aʼge e pamat wolom e, nenebit o,” oluk, ap werak ebano onuak porloksogo poluk, hebilogo ʼbelabonobo ʼbumogoluk, is ap Yahudi aʼge en, at Pilatus ʼgonu moʼgulesi legesa. 32Asogo ʼgonu moʼgulesi legesema, is ap tentara aʼge ebano wegesarik e, is ap Yesus emin e pam edigenebegesa aʼge ebano mesik oyuk porloksogo pogulat, mesik ogo oyuk porloksogo pogulat, tigisa. 33Asogo tigisarik e, Yesus enil ʼgwelakhegesa ʼgal arat waragama re, oyuk porlok tu erlakma en ukpegesa. 34Asogo ukpegesa aʼgeat de, is ap tentara ebano aʼge mesik en e, Yesus abel akhit waʼgun dainsogo weregeimu, eleʼgwe en emep emin, ik emin, liplau waga. 35Asogo tegei aʼge ai, his pobi tuagoluk, ap mesik il welaga aʼge en wene ai obok ʼbaksogo oso yo. Ye, at en ogo re,
“Demat nil dokhumsogoat hegirik obok ʼbaksogo moʼgulentegis o,” oluk e, at alugat o. 36Wene asogo aga ai re, Allah iak pam pelal disogo oluk wokho pegesema oruak o,
“At uak porlok tua modok erlak o,” (Keluaran 12:46; Bilangan 9:12; Mazmur 34:20=TB 34:21)
oluk egesa. 37Ye, mesik e,
“At ebe waʼgun pam dainsogo werak poluk enil welema o,” (Zakharia 12:10)
oluk, egesema Allah iak pam pelal wokho pegesa aʼge oruakma demat emagoluk asogo tigisa ai o.
At Yesus ebe werak owikmu pei legesa wene
(Matius 27:57-61; Markus 15:42-47; Lukas 23:50-56)
38Asogo tigisema, ap Yusuf, owi o Arimatea aʼge, Yesus eragam ʼgwegeitik, ap Yahudi aʼge ogorlok en e, iak hisakho wasu laga aʼge ai en, Yesus werak waigoluk ʼgain Pilatus ʼgonu moʼgulesi laga. Asogo ʼgonu moʼgulesimu, at Pilatus en e,
“I o. Op o,” oluk moʼgulesimu, at Yusuf en Yesus werak ano wau waga. 39Asogo wau wagama, at Nikodemus, naduk hubaʼgo Yesus eʼbek waga aʼge ano en, e mur eʼgen aʼbosu emin, e mesik aʼbosu eʼben op aʼge emin, neʼgarlok-heʼgarlok takpoluk eʼgin e, 30 kilo ʼgelaʼge woluk Yusuf emin wegesa. 40Asogo emin wegesarik e, is aphwami Yahudi aʼge en werak aʼge salonobogwi ʼgelaʼgeat aʼbosu egilogo sum lenan aʼge pam eʼgirlogo pegesa. 41At Yesus e pam edikpoluk werigisema eragam ebano yabuk e owi yogo aʼge mesik welaga. Yabukmu ebano owik mesik ʼgerat ebale heliʼgogo pegesa aʼge werak mesik owan po erlak aʼge welaga. 42Asogo oruakma, hubet oʼgwe, is aphwami Yahudi aʼge agauwa sabit aʼge pam Allah paget weat wolomogoluk, owik ano horoksogoatma oluk e, werak ano owikmu ano pegesa.
Currently Selected:
Yohanes 19: WUL
Highlight
Share
Copy
Want to have your highlights saved across all your devices? Sign up or sign in
