I LUKASI 6

Ana guru mpo'opu gandu a oleo Saba

6:1-5

(Mat. 12:1-8; Mrk. 2:23-28)

1 # Win. 23:25 Pohona a oleo Saba, tempono Dopelempa i Yesu telalo a lere gandu, ana guru-Do mpo'opu tonggino gandu, ka domempilohiakono kaedo ka domengkaano. 2Sine ba opia ira to Parisi mpotae, ”Tembio ka iweweuo anu inonto a oleo Saba?” 3#1Sam. 21:1-6 Ka Do'amba i Yesu sumangki ira, ”Nahi mebasaoke hapa anu wineweuno i Daudi, tempono imokoninggo saru ondae anu mentondao, 4#Ima. 24:9 kana'umpe ipewinso a laro Raha-Do Ue Ala ka ipo'ala roti pesomba, ka ikaano ka moweeako ira anu mentondao, kahinaano roti atuu nahi moiko ikinaa sangkadio sando mpesomba.” 5Motae Ira mbo'u i Yesu ndi ondae, ”I Ana Manusia onaemo Ueno oleo Saba.”

Ondae i Yesu mompokotompa a oleo Saba

6:6-11

(Mat. 12:9-14; Mrk. 3:1-6)

6Pohona a oleo Saba susua, Ondae i Yesu mewinso a laro raha tepumpua, ka Do'amba mompaguru. I tu'ai hinao aasa mia anu nggaape kae ngkoanano. 7Anu mponto'ori Taura ka to Parisi moporoo Ira i Yesu, ba mansa Ira mompokotompa mia a oleo Saba, ka ihina koa anu dompokonsalaako Ira. 8Sine Doto'orio pinewowolodo, ka Do'amba motaeakono mia anu nggaape ngkae atuu, ”Pewangumo ka pentademo i tongano!” Ka mewanguomo mia atuu ka ipentade. 9Ka Do'amba i Yesu motaeako ira, ”Aku mesikeno ndi omiu: Isua anu ineheako a oleo Saba, moweweu moiko ke moweweu mosa'o, mongkadudui penaano mia ke mepateo?” 10Umarino atuu Dolimbu mata ira luwu, ka Do'amba motaeakono mia mahaki atuu, ”Tasiakono kaemu!” Kanatuumo iweweuo mia atuu ka tompaomo kaeno. 11Ka ntekuda iramo ntu'u, ka do'amba nteriso, ba hapa anu ira meweweuo ndi Ondae i Yesu.

Ondae i Yesu mompoboi hopulu ka orua tinena

6:12-16

(Mat. 10:1-4; Mrk. 3:13-19)

12I tempo atuu lumako Iramo i Yesu a pongku ka Dopekakai ka asa wongi atuu Dopekakai ndi Ondae Ue Ala. 13Mansano meene, Dopoboi ira ana guru-Do, ka Do'amba mobiniki inso i olodo hopulu ka orua mia, anu Doneeakono tinena: 14I Simo anu Doneeako mbo'u i Peturu, ka i Andarea pepaekompono i Simo, i Yakobu ka i Yohane, i Pilipu ka i Batolomeu, 15i Matiu ka i Toma, i Yakobu anano i Alipeu, ka i Simo anu pinau to Seloti, 16i Yudasi anano i Yakobu, ka i Yudasi Karioti anu lembuino meweengako Ira i Yesu.

Ondae i Yesu mompaguru ka mompokotompa hadio mia

6:17-19

(Mat. 4:23-25)

17Ka Do'amba metii saru ondae ka dompenaa-naa i asa po'ianga anu melembo: i tu'ai dompepumpu hadio ana guru-Do ka hadio mia susua anu mehawe inso i asa wawo wita Yudea ka inso i Yerusale ka inso i wita wiwi ntahi Tirusi ka Sidoni. 18Ondae me'aiwa ka doronge Ira, ka domempinokotompa inso a hakido; ondae mbo'u anu pinewinsokino onitu nsa'o mempinokotompa. 19Ka luwuno mia hadio atuu mpopete'umala umangga Ira, hangano hinao pabawa anu meluarako inso ndi Ondae ka luwuno mia atuu Dopokotompa ira.

Pinau me'ura ka pompopoto'ori

6:20-26

(Mat. 5:1-12)

20Ka Do'amba i Yesu mengkita a ana guru-Do ka Dopotae,

”Meme'ura komiumo, hei omiu anu memongkokolaro, hangano omiumo anu mpe'umbuo Poparentaa-Do Ue Ala.

21Meme'ura komiumo, hei omiu anu kanandio-andio memokoninggo, hangano komiu mempinotende.

Meme'ura komiumo, hei omiu anu kanandio-andio mpengese, hangano komiu mpengingisi.

22 # 1Pet. 4:14 Meme'ura komiumo, tewala hangano i Ana Manusia ka dome'o'aliaakomiu mia, ka tewala domentadi komiu, ka mentata komiu saru mpokomosa'oo neemiu.

23 # 2Taw. 36:16; Tin. 7:52 Impo'undemo i tempo atuu ka imemawongkomo, hangano menteeano, tambomiu langkai i suruga; hangano kanatuu koa mbo'u uempu'udo doweweu ira nabi.

24Sine memasola komiumo, hei omiu anu mengkaea, hangano a laro ngkaeamiu imehaweomo tareromiu.

25Memasola komiumo, anu kanandio-andio memowohi, hangano komiu memokoninggo.

Memasola komiumo, anu kanandio-andio mpengigisi, hangano komiu mpopemasusa ka mpengese.

26Memasola komiumo, tewala dome'unde-unde komiu luwuno mia; hangano kanatuu koa mbo'u doweweu iramo uempu'udo nabi mpegaupi.”

Pehohawaomo iwalimu

6:27-36

(Mat. 5:38-48)

27”Sine ndi omiu, anu mperorongea-Kune, Kupauo: Impehohawa iramo iwalimiu, impoweweuomo temoiko a mia anu umo'aliaakomiu; 28impo'emaako ira ronso mia anu tumotonaa komiu; impekakaiako iramo mia anu mpepaukiakomiu. 29Ba isema pedeo kombisimiu anu asambali, imeweeakono mbo'u anu i asambalino, ka ba isema umalao lemba meloemiu, imeweeakono mbo'u lembamiu. 30Impoweeako iramo mia anu mpo'ema ndi omiu; ka si wali me'emao inalano mia ndi omiu. 31#Mat. 7:12 Ka ba kana'umpe inehemiu ka domeweweuo mia ndi omiu, kanatuumo mbo'u imeweweuo ndi ondae. 32Ka tewala impehohawao mia anu mehohawa komiu, hapake tuduno ndi omiu? Hangano maupo mia ntehala dompehohawa ira koa mbo'u anu mpehohawa ira. 33Hangano tewala mpoweweu komiu moiko a mia anu moweweu moiko ndi omiu, hapake tuduno ndi omiu? Mia mbo'u ntehala mpoweweu kanatuu. 34Ka tewala hinao pinesaboakomiu a mia, hangano mpomperorohi hinao komiu mpohawe inso ndi onae, hapake tuduno ndi omiu? Mia mbo'u ntehala mpopesaboako a mia ntehala, ka dowali mpohawe mengkena hadiono. 35Sine omiu, impehohawa iramo iwalimiu ka impoweweumo temoiko ndi ondae ka impoweeako ira mponsabo nahi mpomperorohi sulono, ka tambomiu ta langkai ka komiu megagi ana-Do Ue Ala Anu Lalu i Wawono, hangano moiko Ira a mia anu nahi domponto'ori mpontarimakasi ka a mia memosa'o. 36Asalakono ka impe'aroa, kana pe'aroa-Do Amamiu.”

Mongkona pobitara

6:37-42

(Mat. 7:1-5)

37”Si mpobitara, ka nahi komiu mbo'u mebinitara. Ka si mpohuku, ka nahi komiu mbo'u mehinuku; ampuniomo ka komiu me'inampuni. 38Impompoweemo ka komiu mempinowee: aasa ponsa'u anu moiko, anu pinokomodato, anu hineho ka anu te'uwu i bungkuno ta tinawa a laro mpo'awiamiu. Hangano ponsa'u anu imponsa'uako, komiu mensina'uako.”

39 # Mat. 15:14 Ondae i Yesu mompauako ira mbo'u aasa potundaano pau, ”Polioke mia morawu montaate mia morawu? Kombake ira tedonta orua ira a laro aa?

40 # Mat. 10:24-25; Yoh. 13:16; 15:20 Aasa ana guru komba ta lumaloio guruno, sine ba isema anu umariomo pepaguruno ta mengkena saru guruno.

41Tembioke ka ukitao mopuli a laro matano pepaekompomu, sekono sobo a laro matamu omuemu nahi uto'orio? 42Kana'umpeke ka upokompotaeakono pepaekompomu: Pepaekompo, po'ineeomo ka ku'oninio mopuli anu a laro matamu, kahinaano sobo anu a laro matamu nahi ukitao? Hei mia mpo'onde-onde, oniniomo ari sobo inso a matamu, asalakono tamomengkaa ukitao umoninio mopuli atuu inso a matano pepaekompomu.”

Keu ka wuano

6:43-45

(Mat. 12:33-35)

43”Hangano nahina keu anu moiko anu mewuaako wua anu nahi moiko, ka nahina mbo'u keu anu nahi moiko anu mewuaako wua anu moiko. 44#Mat. 12:33-34 Hangano sompo keu tino'ori inso a wuano. Hangano inso a ntonga ewo rui nahina mia mo'opu wua ara ka inso a laro rui nahina mo'opu wua anggoro. 45Mia anu moiko moluarako anu moiko inso i laro aroano anu moiko ka mia anu mosa'o moluarako anu mosa'o inso i larono anu mosa'o. Hangano anu pinauno wiwino, lulua inso i aroano.”

Orua rupa pondasi

6:46-49

(Mat. 7:24-27)

46”Tembio ka impebooli ndi Ongkue: Ue, Ue, kahinaano nahi meweweuo hapa anu pinau-Ku? 47Sompo mia anu aiwa ndi Ongkue ka merorongeakono pinau-Ku saru weweuo — Aku mokomengkaao ndi omiu saru isema ipinongkenaako —, 48onae mengkena saru asa mia anu mowangu raha: Mia atuu kumekeo onda-ondalo ka inaao pondasino a wawo watu. Tempono hawe mowo ka irumpao raha atuu, nahi telelu raha atuu, hangano raha atuu moroso iwinangu. 49Sine ba isema rumongeo pinau-Ku, sine nahi weweuo, onae mengkena saru mia anu mowangu raha a wawo wita nahina pondasino. Tempono irumpao mowo, raha atuu moruana itebangku ka tedoa masola.”

Currently Selected:

I LUKASI 6: XMZ

Highlight

Copy