I LUKASI 7

Ondae i Yesu mokotompao atano aasa petewawa sorodadu i Kapenau

7:1-10

(Mat. 8:5-13; Yoh. 4:46-53)

1Mansa-Do umari i Yesu mepau i arodo mia hadio, mewinso Iramo i Kapenau. 2I tu'ai kongko aasa petewawado sorodadu anu hinao asa mia atano, anu tedoa ituduo. Ata atuu kontongaano mahaki me'isei ka ilawu mate. 3Tempono irongeo petewawado sorodadu atuu mongkona Ondae i Yesu, itena ira ba opia mia mota'u to Yahudi me'emao ndi Ondae ka Do'aiwa mokotompao atano. 4Me'aiwa ira ndi Ondae i Yesu ka tedoa ira pepetulungi ndi Ondae, dompotae, ”Onae tekona Itulungio, 5hangano ipehohawao tongkuto ka onaemo anu wanguo raha tepumpuamami.” 6Ka Do'amba i Yesu lumako meronga saru ondae. Tempono nami Do'olai mbo'u inso a rahano petewawado sorodadu atuu, petewawado sorodadu atuu tumena ira sambe'eno ka domempauako Ira, ”Ue, siimo Ipe'i'isei, hangano nahi pototoku tumarima Komiu i laro rahaku; 7onaemo pu'uno ongkue mbo'u tumuduo koroiku nahi pototoku aiwa ndi Omiu. Sine Ipepaumo koa te'asa mpali pau, asalakono ataku atuu ta tompa. 8Hangano ongkue andio mia i totono, ka i totoku hinao mbo'u sorodadu. Tewala kupotaeakono aasa sorodadu atuu: Lako!, asalakono onae lumako, ka a aasa mia mbo'u: Aiwa!, asalakono onae aiwa, ke maupo a ataku: Anggao andio!, asalakono i'anggao.” 9Mansa-Do rumongeo i Yesu pau atuu, Dokohali-haliakono, ka saru mewolili a mia hadio anu tumonda Ira, Dopotae, ”Kupauakomiu, pompe'ala-ala anu kanandio langkaino nahi Kuhori mohawe, maupo i olodo to Isaraeli!” 10Ka mansado mpekule i raha mia mentinena atuu, domehaweomo ata atuu tompaomo.

Ondae i Yesu wanguo mangalitau i kota Nai

7:11-17

11Ka Do'amba i Yesu lumako a aasa kota anu meneeako Nai. Ana guru-Do melako saru Ondae, ka hadio mbo'u mia ntehuhu tumonda Ira. 12Mansa-Do umpeda a mpewowa langkaino kota, hinao mia mate kinati winawa meluarako, ana ntama, ana asa-asano ineno anu tuwu beineomo, ka hadio mia inso a ngkota atuu tumondao tuwu beine atuu. 13Ka mansa-Do kumitao i Ue tuwu beine atuu, teleluomo aroa-Do mehohawao, ka Do'amba motaeakono, ”Si pengese!” 14Saru rumangkuhio kati atuu Dodanggio, ka anu mengkatio mpenaa-naa, Dopotae, ”Hei mangalitau, Kupauakomu, pewangumo!” 15Ka mewanguomo mia atuu ka ipentoro ka mompu'u mepau, ka Dopeweengakono i Yesu a ineno. 16Luwuno mia atuu medoito ka dome'unde-unde Ira Ue Ala, saru mpotae, ”Aasa nabi langkai mesabaako i tonga-tongato,” ka ”hawe Iramo Ue Ala kumita-kita ira bawaa-Do.” 17Ka tepaleleomo lele mongkona Ondae i Yesu i asa wawo wita Yudea ka luwuno petengi-tengino.

Ondae i Yesu ka i Yohane Puu Mpobaho

7:18-35

(Mat. 11:2-19)

18Mansano mohawe lele i Yohane mongkona luwuno anu gagi atuu inso a ana guruno, 19i poboio orua mia inso i olodo ka itena ira mesikeno ndi Ondae i Ue, ”Omiumoke anu Ira hawe atuu ke asalakono kami mposikori asa mia susua?” 20Mansado hawe ndi Ondae i Yesu mia orua ira atuu, dopotae, ”Itena kami i Yohane Puu Mpobaho mesikeno ndi Omiu: Omiumoke anu Ira hawe atuu ke asalakono kami mposikori aasa mia susua?” 21I tempo atuu Ondae i Yesu mompokotompa hadio mia inso a luwuno haki ka marasaia ka inso a onitu nsa'o, ka mokompongkita ira hadio mia morawu. 22#Yes. 35:5-6; 61:1Ka Dosangki ira i Yesu, ”Ilakomo, ka ipauakono i Yohane hapa anu kinitamiu ka rinongemiu. Mia morawu mongkita, mia pungku melempa, mia haki ngkuli mesaki gagi toompa, mia mobongo moronge, mia mate winangu ka a mia memongkokolaro pinaleleako lele moiko. 23Ka me'uraomo mia anu nahi gagi tepataa ka nahi tarima Aku.”

24Mansado lumako tinenano i Yohane atuu, mompu'u Iramo i Yesu mepauako ira mia hadio atuu mongkona i Yohane, ”Pombioke ka imelako i pada one? Mpongkita intowu anu lineluno angi ngkoraane ngkoramai? 25Ke pombioke ka imalako? Mpongkita mia anu mesangka alusu? Mia anu mesangka tekosi ka anu tuwu mare'e, po'iangano a langkanaeno mokole. 26Gagi pombioke ka imelako? Mpongkita nabi? Mentee, ka Kupauakomiu, tendeano laluaopo sekono nabi. 27#Mal. 3:1 Hangano mongkona onae hinao teburi:

Kitaomo, Kutenao tinena-Ku mese'elungi-Komiu,

onae ta patindao pesalaa-Miu i aro-Miu.

28Kupauakomiu: I olodo anu pine'anaakodo beine nahina anu langkaiopo sekono i Yohane, sine anu lalu kodei a Poparentaa-Do Ue Ala langkaiopo sekono onae.” 29#Mat. 21:32; Luk. 3:12 Luwuno mia hadio anu rumongeo pinau-Do, tewinso luwuno puu popumpu sima'ulu, dompementee Ira Ue Ala, hangano ibaho iramo i Yohane. 30Sine to Parisi ka anu mponto'ori Taura nahi domentarimao tinoo-Do Ue Ala a ngkoroido, hangano nahi domebehe ibaho ira i Yohane.

31Dopotae i Yesu, ”Saru hapake Kupotundaako ira mia andiodo ka saru hapake pengkenado atuu? 32Ondae atuu pinotundaako nana'ote anu mpentoro a olu ka anu pada mpebooliako:

Kimpesiloliakomiu, sine nahi melumense,

kimpenaniako penani pompemasusa, sine nahi mpengese.

33Hangano hawe i Yohane Puu Mpobaho, nahi pongkaa roti ka nahi po'inu anggoro, ka impotae: Onae ipewinsokio onitu nsa'o. 34Ka i'amba hawe i Ana Manusia, Ondae mongkaa ka mo'inu, ka mpotae komiu: Kitaomo, Ondae asa mia modoko mongkaa ka mo'inu, sambe'edo puu popumpu sima'ulu ka mia ntehala. 35Sine ponto'ori mentee dompementeeo luwuno mia anu tumarimao.”

Ondae i Yesu i'urapi Ira beine tehala

7:36-50

36Aasa to Parisi umolu Ira i Yesu ka Do'aiwa mongkaa i rahano. Aiwa Ira i Yesu a rahano to Parisi atuu, ka Do'amba mentoro mongkaa. 37#Mat. 26:7; Mrk. 14:3; Yoh. 12:3 I kota atuu hinao aasa beine anu teto'ori asa mia tehala. Mansano rumongeo beine atuu, nine Ondae i Yesu kontongaa-Do mongkaa a rahano to Parisi atuu, aiwaomo mowawa aasa pido-pido puala me'ihi mina-mina. 38Kontongaano mengese ka ilako mentade i bungku-Do i Yesu umpeda a ngkaru-Do, ka i'amba bahoakono uwoi matano karu-Do atuu ka ipahihiakono wuuno, ka i'amba woo-wooo karu-Do ka ilanaiakono mina-mina atuu. 39Tempono to Parisi anu umolu Ira i Yesu kumitao anu gagi atuu, ipotae i laro aroano, ”Tewala Ondae andio nabi, manasa Doto'orio, isema ka mia hapake beine anu umanggao karuDo andio; manasa Doto'orio, nine beine atuu mia tehala.” 40Ka Do'amba motaeakono i Yesu, ”Simo, hinao anu Aku pauakomu.” Sumangki i Simo, ”Ipauomo Guru.”

41”Hinao orua mia anu mepasua a aasa mia anu mompesaboako doi. Anu asa mia mepasua lima etu dinare, anu aasa mbo'u lima pulu. 42Hangano nahi dopoko'owahio, onaemo ka nami singao pasuado mia orua ira atuu. Isemake i olodo anu ta lalu mehohawao?” 43Sumangki i Simo, ”Potaeku onae anu lalu hadio pasuano nami singao.” Dopotae i Yesu ndi onae, ”Mentee pohawemu atuu.” 44Ka kontongaa-Do mewolili a beine atuu, Dopotaeakono i Simo, ”Ukitao beine andio? Kupewinso a rahamu, sine nahi upowee Aku uwoi pewo'ohi ngkaru-Ku, sine onae uwoi matano ibahoakono karu-Ku ka ipahihiakono wuuno. 45Nahi uwoo-woo Aku, sine onae mompu'u Kupewinso nahi penaa-naa woo-wooo karu-Ku. 46Nahi ulanaiakono lana ulu-Ku, sine onae karu-Ku ilanaiakono mina-mina. 47Onaemo pu'uno Kupauakomu, Halano anu hadio atuu inampuniomo, hangano hadioomo pompehohawa wineweuno. Sine mia anu tedei inampuni, tedei koa mbo'u pompehohawa wineweuno.” 48Ka Do'amba motaeakono beine atuu, ”Halamu inampuniomo.” 49Ka ondae anu mpentoro mpongkaa saru Ondae, mpompewowolo i laro aroado, ”Isemake Ondae andio, ranta ka Dopokompo'ampuni hala?” 50Sine Dopotae i Yesu a beine atuu, ”Ikaduduikomo pompe'ala-alamu, lakomo temoiko!”

Currently Selected:

I LUKASI 7: XMZ

Highlight

Copy