I LUKASI 4

Po'ara-arahakoa i pada one

4:1-13

(Mat. 4:1-11; Mrk. 1:12-13)

1Ondae i Yesu, anu bukeako Penaa Mempori, mekule inso a ngkoro Yarade, ka i'amba Penaa Mempori wawa Ira i pada one. 2I tu'ai Dopo'ia pato pulu oleo tehineno ka i Mosa'o umara-arahako Ira. Tempono i tu'ai nahi Dopongkaa hapa-hapa ka umarino tempo atuu mokoninggo Ira. 3Ka i'amba motaeomo i Mosa'o ndi Ondae, ”Tewala Omiu ana-Do Ue Ala, tenaomo watu andio ka igagi roti.” 4#Win. 8:3 Dosangkio i Yesu, ”Hinao teburi: Mia tuwu komba butu inso a roti.”

5Ka i'amba wawa Ira i asa po'ianga anu mantande ka i larono asa mpiniro ipopokitaako Ira luwuno poparentaa i wawontolino. 6Motae i Mosa'o ndi Ondae, ”Luwuno pabawa atuu saru marambano aku weea-Komiu, hangano luwuno atuu pineweengakoomo ndi ongkue ka kuweeakono isemamo koa anu ineheku. 7Gagi tewala Ipesombai aku, luwuno atuu ta Omiu gagi me'ueo.” 8#Win. 6:13 Sine motae Ira i Yesu ndi onae, ”Hinao teburi: Asalakono ka upesombai Ira i Ue, Ue Alamu, ka butu koa ndi Ondae upesomba!”

9Ka i'amba wawa Ira i Yesu i Yerusale ka numaa Ira a mbumbungeno Raha-Do Ue Ala, ka i'amba motaeako Ira, ”Tewala Omiu Ana-Do Ue Ala, Ipedontaiakomo inso i ndi'ai ngkoloane, 10#Pud. 91:11-12 hangano hinao teburi: Mongkona Omiu, Ira montena mala'eka-Do kumadudui Komiu, 11ka Ira mensenea-Komiu kaedo, ka si tetidu karu-Miu a watu.” 12#Win. 6:16 Sumangki Ira i Yesu, Dopotae, ”Hinao pinau: Si ara-arahako Ira i Ue, Ue Alamu!”

13Umarino mokotampulao i Mosa'o luwuno po'ara-arahako atuu, onae monsuka inso ndi Ondae ka monsikori tempo anu moiko.

Ondae i Yesu mekule i Galilea

4:14-15

(Mat. 4:12-17; Mrk. 1:14-15)

14A laro pabawano Penaa Mempori mekule Iramo i Yesu i Galilea. Ka tepaleleomo lele mongkona Ondae i asa wawo wita atuu. 15Kontongaano atuu Ondae mompaguru a luwuno raha tepumpua i tu'ai ka luwuno mia umunde-unde Ira.

Ondae i Yesu nahi Dotinarima i Nasare

4:16-30

(Mat. 13:53-58; Mrk. 6:1-6)

16Hawe Ira i Nasare a mpo'ianga Dopinokolangkai, ka montonda gau-Do a oleo Saba mewinso Ira a raha mpesombaa, ka Do'amba mentade Ira mobasa Wunta Tutulu. 17Wineeako Ira wuntano i Yesaya ka mansa-Do wileo, Dohaweo pau anu binuri,

18 # Yes. 61:1-2 ”Penaa-Do i Ue kongko ndi Ongkue,

hangano Do'urapi Akumo, ka Kupohaweo lele moikono tuwua a luwuno mia memongkokolaro;

ka Dotena Akumo

19ka Kupaleleo tepotolaado mia mentinawa,

ka pongkitado mia memorawu,

ka Kupotola ira mia anu tepokonsii,

ka Kupaleleo ta'u pompehohawa-Do i Ue haweomo.”

20Ka Do'amba lumupio wunta atuu, wali weeakono anu hinao potorono, ka Do'amba mentoro; ka matado luwuno mia a laro raha tepumpua atuu te'aro ndi Ondae. 21Ka Do'amba mompu'u paguru ira, Dopotae, ”A oleo andio inihiiomo pau andio tempono imerongeo.” 22Ka luwuno mia atuu mpementee Ira ka domengkohali-haliakono luwuno pau anu tekosi pinau-Do, ka do'amba mpotae, ”Kombake Ondae andio anano i Yusupu?” 23Onaemo ka Dopotaeako ira, ”Asalakono komiu mempaua-Kune potundaano pau andio: Hei sando, Ipokotompaomo koroi-Miu. Weweuomo mbo'u i ndi'ai, a mpo'ianga insoa-Miu andio, luwuno anu rinongemami anu gagiomo i Kapenau!” 24#Mat. 13:57; Mrk. 6:4; Yoh. 4:44 Ka Dopotae mbo'u, ”Kupauakomiu, menteeano nahina nabi anu tinudu a mpo'ianga insoano. 25#1Mok. 17:1, 8-16 Ka Kupauakomiu, ka pinau-Ku andio mentee. Tempono i Elia hadio hinawe tuwu beine i Isaraeli tempono itepii langi i larono otolu nta'u ka onoo wula ka tempono mokoninggoa langkai anu umaluo asa wawo wita. 26Sine i Elia tinena komba a asa mia inso ndi ondae, tendeano a aasa tuwu beine i Sarapati, i wita Sidoni. 27#2Mok. 5:1-14 Ka tempono Nabi Elisa hadio mia haki ngkuli mesaki i Isaraeli ka nahina maupo te'asa mia pinokomorina, sangkadio i Na'ama, to Siria atuu.” 28Rumongeo atuu tedoa iramo ntekuda luwu mia anu a raha tepumpua atuu. 29Mentade ira, ka do'amba mensaari Ira i Yesu a bungkuno kota ka domewawa Ira a ngkorimbino torukuno, po'iangano kota atuu, ira mpetadiako Ira inso a ngkorimbino atuu. 30Sine melempa Ira i tonga-tongado, ka Do'amba lumako.

Ondae i Yesu a laro raha tepumpua i Kapenau

4:31-37

(Mrk. 1:21-28)

31Ka Do'amba i Yesu lumako i Kapenau, a aasa kota i Galilea, ka Do'amba mompaguru i tu'ai a luwuno oleo Saba. 32#Mat. 7:28-29; Mrk. 1:22 Mengkohali-hali ira merongeo pompaguru-Do, hangano pau-Do buke pabawa. 33Alaro raha tepumpua atuu hinao asa mia anu pinewinsokino onitu nsa'o ka kumora meroku, 34”Hei Omiu, Yesu to Nasare, Komiu aiwa mombioke ndi omami? Nde Komiu aiwa mepate kami? Kuto'orio isema Omiu: Anu Mempori inso ndi Ondae Ue Ala.” 35Sine Dotekudaakono i Yesu, Dopotae, ”Si pepau, peluarakomo inso ndi onae!” Ka onitu nsa'o mbo'u atuu motolao mia atuu i tonga-tongano mia hadio, ka i'amba meluarako inso ndi onae ka komba ipokomahakio. 36Ka luwuno mia mengkohali-hali, ka do'amba mpepau-pau pada ondaedo, dompotae, ”Mongkokongiri ntu'u pau andio! Hangano bukeako roso ka pabawa Dotena ira onitu nsa'o ka onaemo ka dompeluarako.” 37Ka tepaleleomo lele mongkona Ondae i sua-suamo koa i wita atuu.

Ondae i Yesu mokotompao ponino beine i Simo Peturu ka mia mehano

4:38-41

(Mat. 8:14-17; Mrk. 1:29-34)

38Ka Do'amba bintao raha mpesombaa atuu ka Dolako a rahano i Simo. Tempo atuu ponino beine i Simo tedoa mokula ka dome'emao ndi Ondae i Yesu ka Dotulungio. 39Onaemo ka Dopentade i horino beine atuu, ka Do'amba sumaario mokula atuu, ka haki atuu bintao inso ndi onae. Mompari-pari beine atuu mewangu ka ipekakaako ira.

40Mansano sumoo oleo, luwuno mia mewawa ira mia memahaki ndi Ondae, anu mperupa-rupa hakido. Dodampoakono kae-Do i wawodo nte'o'asa mia ka mokotompa ira. 41Inso a hadio mia mpeluarako mbo'u hadio onitu nsa'o saru mengkora, ”Omiumo Ana-Do Ue Ala.” Ka Do'amba umonto ira ntu'u ka nahi Dobehe ira mpepau, hangano domento'orio nine Ondaemo i Mesia.

Ondae i Yesu mompaguru a hadio kota susua

4:42-44

(Mrk. 1:35-39)

42Mansano meene, Ondae i Yesu melungka ka Dolako a aasa po'ianga anu boni-boni. Sine dome'ungke Ira mia hadio, ka do'amba humawe Ira ka dome'emao ka si Dobinta ira. 43Sine Dopotaeako ira, ”A hadio kota susua asalakono Aku koa mbo'u paleleo Lele Mawongkoa Poparentaa-Do Ue Ala hangano onaemo Kutinenaako.” 44Ka Dopaleleo Lele Mawongkoa a laro luwuno raha tepumpua i Yudea.

Currently Selected:

I LUKASI 4: XMZ

Highlight

Copy