I LUKASI 20

Pesikeno mongkona pabawa-Do i Yesu

20:1-8

(Mat. 21:23-27; Mrk. 11:27-33)

1Pohona tempono Ondae i Yesu mompaguru mia hadio a Raha-Do Ue Ala ka mompalele Lele Mawongko, mehawe iramo i tu'ai petewawado sando mpesomba ka anu mponto'ori Taura saru mia memota'u, 2ka dompotaeako Ira i Yesu, ”Ipauakamimo saru pabawa inso isuake Iweweu ira luwuno atuu, ka isema anu moweea-Komiu pabawa atuu!” 3Sumangki Ira i Yesu ndi ondae, ”Aasa mbo'u Aku mesikenoakono ndi omiu. Imempaua-Kune: 4Pobahono i Yohane atuu inso i suruga ke inso a mia?” 5Dompepau-pauakono i olodo, ka dompotae, ”Tewala mpotae kita: Inso i suruga, Ira motae: Tembio ka nahi mpe'ala-alao? 6Sine tewala mpotae kita: Inso a mia, luwuno palili ira mewunoakita watu, hangano dompe'ala-alao, nine i Yohane onaemo aasa nabi.” 7Ka do'amba mesangki, nine nahi domento'orio ba inso i sua pobaho atuu. 8Ka motae Ira i Yesu ndi ondae, ”Tewala kanandio, komba Aku pauakomiu mbo'u saru pabawa inso i sua Kuweweuo luwuno atuu.”

Potundaano mongkona anu mempo'angga lere anggoro

20:9-19

(Mat. 21:33-46; Mrk. 12:1-12)

9 # Yes. 5:1 Ka Do'amba i Yesu pauako ira mia hadio potundaano andio, ”Asa mia melere anggoro, ka i'amba metamboakono a mia mpo'angga lere ka i'amba melungka lumako i wita susua a tempo anu tehine. 10Ka mansano haweakoomo tempo po'opua, itenao aasa atano lumako a mia mpo'angga lere atuu, ka dompeweengakono ndi onae asa ntia inso a hasilino lere anggoro atuu. Sine mia mpo'angga lere atuu mentunduhio ata atuu ka domentenao mekule saru kae mooa. 11Umarino atuu itenao aasa atano anu susua, sine atano atuu domentunduhio koa mbo'u ka dompokoko'iio, ka i'amba tinena mekule saru kae mooa. 12Itenao mbo'u aasa atano anu ko'otolu, sine mia mbo'u atuu domebelaio, ka do'amba mpetendeakono a bungku lere atuu. 13Ka ipotae umbu lere anggoro atuu: Hapake asalakono kupoweweu? Aku tumenao anaku anu pinehohawaku; manasa ira me'ondahao. 14Sine mansado mengkitao anu mpo'angga lere anano atuu, nteriso ira, dompotae: Onaemo anu ta me'umbuo, aiwa ka tompepateo, ka i gagimo ontae mpe'umbuo. 15Ka do'amba mpetendeakono i bungkuno lere anggoro atuu ka dompepateo. Kanandio-andio hapa anu ta weweuo umbu lere anggoro atuu ndi ondae? 16Onae ta aiwa ka mepate ira anu mpo'angga lere atuu, ka me'ala-alaakono lere anggoro atuu a mia susua.” Rumongeo atuu dompotae, ”Osi'i ntu'u!” 17#Pud. 118:22 Sine Ondae i Yesu mengkita ndi ondae ka Dopotae, ”Tewala kanandio hapake pengkonaano pau andio:

Watu anu tinadido mia mperaha

gagiomo watu empehino a nsiuno?

18Ba isema tedonta a wawo watu atuu, onae ta tepuro, ka ba isema dinunsino watu atuu, ta tepe'awu.”

19Ka do'amba anu mponto'ori Taura ka petewawado sando mpesomba mpo'ungke sala rumako Ira i tempo koa mbo'u atuu, hangano domento'orio, nine ondaemo anu tinoo-Do a mpotundaano atuu, sine domedoitoako ira mia hadio.

Mongkona mo'owahi sima'ulu a Datu

20:20-26

(Mat. 22:15-22; Mrk. 12:13-17)

20Anu mponto'ori Taura ka petewawado sando mpesomba mempoporoo Ira i Yesu. Mpotena ira mia moporoo Ira anu mpelelu mpo'onde-onde kana mia moleo, ka dompongko'ala Ira saru aasa pesikeno ka meweengako Ira a mpo'eheno ka pabawano petewawa i wita atuu. 21Luwuno mia atuu mempauo pesikeno andio ndi Ondae, ”Guru, kimento'orio, nine luwuno pau ka pompaguru-Miu mentee ka nahi pobiniki mia, tendeano moleo Ipompaguruako sala lumako ndi Ondae Ue Ala. 22Moiko koake ba kimpo'owahi sima'ulu a Datu ke naahi?” 23Sine Doto'orio i Yesu tinoodo anu pande mpe'akala atuu, ka Do'amba motaeako ira, 24”Impopokitaa-Kune te'asa dinare; gambara ka binurino isemake kongko ndi onae?” Mesangki ira, ”Gambara ka binurido Datu.” 25Ka Do'amba i Yesu motaeako ira, ”Tewala kanatuu imeweeakono Datu hapa anu asalakono komiu meweeakono Datu ka ndi Ondae Ue Ala hapa anu asalakono komiu weeako Ira Ue Ala!” 26Ka nahi dompongko'ala Ira a mpepau-Do i arodo mia hadio. Domengkohali-haliakono sangki-Do atuu ka mengkomino iramo.

Pesikenodo to Saduki mongkona pewangua

20:27-40

(Mat. 22:23-33; Mrk. 12:18-27)

27 # Tin. 23:8 Ka mehawe iramo ba opia to Saduki ndi Ondae i Yesu, anu nahi dompe'ala-alao pewangua. Mpesikeno ira ndi Ondae, 28#Win. 25:5 ”Guru, I Musa burio parenta andio tiato: Tewala asa mia, anu hinao pepaekompono tama, mate sekono beineno da kongko, sine nahina anado, pepaekompono asalakono kumombiao beineno atuu ka iwanguo inuleno pepaekompono atuu. 29Hinao opitu ira mia mpepaekompo. Anu amba-ambano mekombiaako aasa beine ka i'amba mate ka nahi dope'ana. 30Ka i'amba beine atuu ikombiao anu ko'orua, 31ka anu ko'otolu ka kanandiomo dompetonda-tonda opitu ira mpepaekompo atuu, luwudo memate ka nahina anado. 32Poko'ariano beine mbo'u atuu mate. 33Kanandio-andio kana'umpemo beine atuu, isemake i olodo mia atuudo anu gagi tamano a oleo pewangua? Hangano opitu ira dompekombiaakonomo.” 34Sumangki Ira i Yesu ndi ondae, ”Mia i wawontolino andio mpekombia ka mempinopokombia, 35sine ondae anu kinita tekona dompohawe tia a wawontolino anu susua atuu ka a mpewangua inso i olodo mia mate, nahi ira mpekombia ka nahi domempinopokombia. 36Hangano nahi ira mpokomate mbo'u; mpekena ira kana mala'eka ka ondae ana-Domo Ue Ala, hangano mewinangu iramo. 37#Pel. 3:6 Mongkona pewangudo mia mate, ipauomo i Musa a mpau mongkona laro ewo rui, Ondae i Ue pinau Ue Alano i Burahima, Ue Alano i Saki ka Ue Alano i Yako. 38Ondae komba Ue Alado mia mate, tendeano Ue Alado mia mentuwu, hangano i aro-Do luwuno mia mentuwu.” 39Rumongeo atuu ba opia ira anu mponto'ori Taura mpotae, ”Guru, sangki-Miu atuu kona ntu'u.” 40Hangano nami domensapa mbo'u mpopesikenoako hapa-hapa ndi Ondae i Yesu.

Penggoea-Do i Yesu ka i Daudi

20:41-44

(Mat. 22:41-46; Mrk. 12:35-37)

41Sine Dopotaeako ira i Yesu, ”Kana'umpe ka dompokompotae mia, nine i Mesia anano i Daudi? 42#Pud. 110:1 Hangano i Daudi isa'a pauo a wunta Po'unde-unde:

Mepau Iramo i Ue ndi ondae ueku:

pentoromo i koana-Ku,

43hawe ka Kuweweu ira iwali-Mu gagi pelandaano karu-Mu.

44Gagi i Daudi moboiako Ira ueno, kana'umpe mbo'u ka ipe'ana Ira?”

Patudu-Do i Yesu ka dompetangkoro ia anu mponto'ori Taura

20:45-47

(Mat. 23:5-7; Mrk. 12:38-40)

45Mansado merongeo luwuno mia hadio, Motae Ira i Yesu a luwuno ana Guru-Do, 46#Luk. 11:43 ”Imetangkoro ira anu mponto'ori Taura anu inehedo mpelempa-lempa melemba meloe ka inehedo mempinelangkai a olu, anu inehedo mpentoro i arono ntu'u a raha tepumpua ka a mpo'ianga pompelangkaia a mpelimbua, 47anu mporontu rahado tuwu beine ka anu mopo'oo ira mia mpekakai me'o'ondau. Ondae atuu manasa ira mehinuku lalu mobea.”

Currently Selected:

I LUKASI 20: XMZ

Highlight

Copy