I LUKASI 19

I Sakeu

19:1-10

1Ondae i Yesu mewinso a ngkota Yeriko ka melempa mpiha lumaloo kota atuu. 2I tu'ai kongko asa mia meneeako i Sakeu, petewawado puu popumpu sima'ulu, ka onae asa mia kaea. 3Onae mo'ungke pesalaano ta kumitao to hapake Ondae i Yesu atuu, sine nahi pokokita Ira hangano mia hadio, nde koroino owowa. 4Ka meluluomo mese'elungi ira mia hadio, ka i'amba momaru a ngkeu ara ka ikita Ira i Yesu anu Ira telalo i tu'ai. 5Tempono Dohawe i Yesu a mpo'ianga atuu, mentombu Ira ka Dopotae, ”Sakeu, pontuturakomo petii, hangano oleo andio asalakono Aku merato i rahamu.” 6Ka i'amba i Sakeu montuturako metii ka itarima Ira i Yesu mawongko aroano. 7Sine luwuno mia anu mengkitao anu gagi atuu mpewuruki, dompotae, ”Ondae merato a rahano mia tehala.” 8Sine i Sakeu mentade ka ipotae ndi Ondae i Ue, ”Ue, entonga inso a arataaku aku weeako ira mia mongkokolaro ka ba mansa hinao anu rinontuku inso a mia te'asa aku mokuleo meluka pepanto.” 9Motae Ira i Yesu ndi onae, ”Oleo andio gagiomo tekaduduia a raha andio, hangano mia mbo'u andio anano i Burahima. 10Hangano hawe-Do i Ana Manusia Ira mo'ungke ka mongkadudui mia anu tetadi.”

Potundaano mongkona doi mina

19:11-27

(Mat. 25:14-30)

11Tiado anu mperorongeako Ira i tu'ai, Ondae i Yesu motilaloakono pau-Do a aasa potundaano, hangano umpeda Iramo i Yerusale ka domengko'aro-aroa, nine Poparentaa-Do Ue Ala ira ronga mengkitao. 12Onaemo ka Dopotae, ”Hinao aasa inuleno mokole melungka lumako a aasa wita anu olai ta pinotoro gagi mokole i tu'ai ka umarino atuu ka i'amba mekule. 13Ipoboi ira hopulu mia atano ka ipoweeako ira hopulu mina, ipotae: Imempakeomo andio mpebalu-baluako ranta ka kupekule. 14Sine mia pe'asa tongkuno me'o'aliaakono, ka do'amba mpotena mia tumonda lembuio mempauo, Nahi kimebehe mia andio gagi mokolemami. 15Ka gagiomo, tempono ipekule, umarino pinotoro gagi mokole, metenaomo moboi ira atano, anu ipoweeako iramo doi atuu, ta tumo'orio ba opia hasilino pebalu-baludo singge mia. 16Mia amba-ambano hawe ka ipotae: Ue, Minamiu anu aasa atuu mehasiliomo hopulu mina. 17Ipotaeakono mia atuu: Moiko ntu'u wineweumu atuu, hei ata anu moiko; metenunukomo a wineweu anu kodei, onaemo pu'uno tarimaomo ka upabawaio hopulu kota. 18Haweomo anu ko'orua ka ipotae: Ue, minamiu mehasiliomo olima mina. 19Ipotaeakono mia atuu: Ka omue pabawaiomo olima kota. 20Ka ata anu ko'otolu hawe ka ipotae: Ue, ndiomo minamiu, kunaao a laro lenso. 21Hangano kudoitoakomiu, nde omiu mia anu motea aroa; mo'ala komiu hapa anu komba hori komiu numaao ka omiu monsowi hapa anu komba rinawomiu. 22Ipotaeakono mia atuu: Hei ata anu mosa'o, aku bitarako montonda pinaumu omuemu. Uto'oriomo nine ongkue mia motea aroa, anu mo'ala hapa anu komba hori aku numaao ka monsowi hapa anu komba rinawoku. 23Tewala kanandio, tembio doiku atuu nahi uweeako ira mia anu mompesaboako doi? Ka pekuleku ku'alao saru bungano? 24Ka i'amba motaeako ira mia mpentade i tu'ai: Alaomo mina anu aasa atuu inso ndi onae ka imeweeakono mia anu hinao hopulu mina atuu. 25Dompotaeakono: Ue, onae hinaomo hopulu mina. 26#Mat. 13:12; Mrk. 4:25; Luk. 8:18 Sangkino: Kupauakomiu: Sompo mia anu hinao, ndi onae ta pinowee, sine isema anu nahina, inso ndi onae ta inala, saru hapa mbo'u anu hina ndi onae. 27Sine luwuno anu umewai aku andio, anu nahi behe ba kugagi mokoleno, wawa iramo ramai ka impepate iramo i arono mataku.”

Ondae i Yesu tinotowo i Yerusale

19:28-44

(Mat. 21:1-9; Mrk. 11:1-10; Yoh. 12:12-15)

28Ka mansa-Do pauo luwuno atuu ondae i Yesu mese'elungi ira ka motilaloakono pelempaa-Do lumako i Yerusale.

29Mansano umpeda Iramo i Betipage ka Betania, anu po'iangano a ntorukuno anu meneeako Pongku Saitu, Dotena ira i Yesu orua ana guru-Do 30saru pe'oliwi, ”Ilakomo a inia anu i aromiu atuu: Tempono ipewinso i tu'ai, komiu humaweo aasa kalide mongura tinanggo, anu napi hori dompesawikio mia. Ipotolaomo kalide atuu ka iwawao ramai. 31Ka tewala hinao mia sumikenokomiu: Tembio ka ipotolao? Isangkiomo kanandio: Ondae i Ue kumereo.” 32Ka i'amba lumako iramo anu tinena atuu, ka dohaweo luwuakoano kana anu Dopauomo i Yesu. 33Tempono dopotolao kalide atuu, motaeomo mia anu me'ueo kalide atuu, ”Tembio ka ipotolao kalide atuu?” 34Dopotae, ”Ondae i Ue kumereo.” 35Dowawao kalide atuu ndi ondae i Yesu, ka do'amba melampiakono sangkado ka moposawi Ira i Yesu. 36Ka kontongaa-Do i Yesu mesawikio kalide atuu domewileo sangkado a nsala. 37Mansa-Do umpeda i Yerusale, a nsala pontindulua inso a Pongku Saitu, mpompu'u iramo luwuno ana guru anu tumonda Ira memawongko ka me'unde-unde Ira Ue Ala meroku suarado hangano luwuno kinohali-haliako anu domengkitaomo. 38#Pud. 118:26 Dompotae,

”Rinonso Iramo anu hawe gagi Mokole a nee-Do i Ue, rodoa i suruga ka marambaa a mpo'ianga anu i wawono ntu'u!”

39Ba opia ira to Parisi anu mpetonda saru mia hadio atuu mpotaeako Ira i Yesu, ”Guru, Ikuahako iramo ana guru-Miu atuu.” 40Dosangki ira, ”Kupauakomiu: Tewala ondae andio mengkomino, asalakono watu andio ta mebooli.”

41Ka tempono umpeda Iramo i Yesu ka Dokitao kota atuu, Dopengeseio, 42Dopotae, ”Anai, tedoa moiko tewala a oleo koa mbo'u andio upokonto'orio hapa anu kinere tiano rodoamu! Sine kanandio-andio mongkona atuu tewuni a matamu. 43Hangano ta hawe oleono, nine iwalimu ira melimbuakomu bente, ka do'amba mengkaduko ka me'asiko inso a luwuno siuno, 44ka ira mpepateko saru palilimu ka a rere watumu nahi ira mpo'ineeo maupo te'asa watu mo'ia a wawo watu anu susua, hangano nahi uto'orio tempo, ba te'ipia Do'aiwa kumitako Ue Ala.”

Ondae i Yesu mokomemporio Raha-Do Ue Ala

19:45-48

(Mat. 21:12-13; Mrk. 11:15-18; Yoh. 2:13-16)

45Ka Do'amba i Yesu mewinso a Raha-Do Ue Ala ka mompu'u Iramo sumaari ira luwu anu mpebalu-balu i tu'ai, 46#Yes. 56:7; Yer. 7:11 Dopotaeako ira, ”Hinao teburi: Raha-Ku onaemo raha pekakaia. Sine omiu mpokogagio po'iangado mia mperontu.”

47 # Luk. 21:37 Sompo-sompo oleo Dopompaguru a laro Raha-Do Ue Ala. Luwuno petewawado sando mpesomba ka anu mponto'ori Taura saru mia mempinemota'u inso a tongku Isaraeli mpo'ungke sala ira mpepate Ira, 48sine nahi domento'orio, ba kana'umpe asalakono domeweweuo, hangano luwuno palili mpe'ala-ala Ira ka mingki mperorongeako Ira.

Currently Selected:

I LUKASI 19: XMZ

Highlight

Copy