Markus 15
15
Yesu i heleꞌna Pilatus
(Mat. 27:1-2, 11-26, Luk. 23:1-5, 13-25, Yoh. 18:28~– 19:16a)
1Mingkakaꞌ i miluhengi kapala-kapala imang sola: ung si matua:-tua: pang ung si manarangna i aluku tu Yahudi, dea‑mo nasang Ung si Nipiama: i tu Yahudi, mamesa sua:‑mo. Na pungunna‑mi se ti Yesu, màli: na baha‑i se mao i Pilatus. 2Mingkutikìna‑mi ti Pilatus mao i Yesu moa teꞌ, “Tongang naꞌ U datuna tu Yahudi?”
Na sùmui Yesu moa teꞌ, “Mène:‑mo ti ung ta pusua:.”
3Boso: mannang laoangna nipantannaꞌ‑ing nai kapala-kapala imang. 4Mingkutiki ho pole ti Pilatus moa teꞌ, “Hang misùmuO: naꞌ? Hele! Boso: tungka ti nipantannaꞌ‑ingKo.”
5Hampoꞌ hang na sùmui‑i hura: Yesu, dea pu na kallei‑I Pilatus.
6-8Bùruꞌna‑mi ti tau boso: mampalau mao i Pilatus mangking kabiasaang nitoroꞌi. Sàbaꞌ, miluhali‑mo kabiasaang tempo perayaang Paska, mangholi‑ing se besa tau ung nitarungkuꞌ, isai-sai ti ung na palau tau boso:. Pang tempo to, ara besa tau ung nikonai: Barabas tarrang nitarungkuꞌ sola: pira-pira solana sintàna:, sàbaꞌ papateang‑i se i laling kara-kara mangeba ung muparenta.
9Na sùmuinna‑mi Pilatus ti tau boso: moa teꞌ, “U kapelai: se naꞌ mangking ku holi‑ingko se te datuna tu Yahudi tee?” 10Na kapelai: Pilatus ti mangholi Yesu mao i tau boso:, sàbaꞌ na ìsang moa teꞌ kapala-kapala imang mampehea Yesu, ha umma‑i to, mapanaꞌ pinanaha‑i se.
11Hampoꞌ kapala-kapala imang massùsung‑ing tau boso: moa teꞌ, “Palau‑ko se mangking Barabas‑ra: ti ung niholi‑ingke se!”
12Pimbesa kang ti Pilatus mingkutiki moa teꞌ, “Ìna mène: to, mangaka ti Tau tee ung nu konai: se datuna tu Yahudi? Aka ti ung parallu ku pukauꞌ mao i Dea?”
13Mikakoangna‑mi se ho moa teꞌ, “Pai oròngang‑I!”
14Musua: ti Pilatus moa teꞌ, “Hampoꞌ aka ti kasalaangNa?”
Hampoꞌ sa: na pilabu:-labuina‑i se ti mikakoang moa teꞌ, “Pai oròngang‑I!”
15Jadiꞌ, na holi Pilatus ti Barabas, sàbaꞌ na kapelai: teng mampatosang pinanahanna tau boso:. Hampoꞌ dea ti Yesu na pisuo:‑ing nisasa: mampake pisasa: ung mène: diu:, màli: na pehea‑I nipai oròngang.
Yesu na òhoꞌ-òhoꞌi tantara Roma
(Mat. 27:27-31, Yoh. 19:2-3)
16Na bahanna‑mi tantara ti Yesu mao i pangàloang ung na pai laling tamming dea to, dea‑mo pangkaoneina gubernur, pang manghàngo nasang pasukang mukobu: mangòhoꞌ-òhoꞌi Yesu. 17Na pakei‑i se kayaꞌ ung ungu, ung mène: pakeangna datu:, pang malliko:‑i se oaꞌ ung kisura, pang na pantalii‑ing Yesu, 18màli: na sangadi‑i se moa teꞌ, “O Datuna tu Yahudi, salamaꞌ!” 19Na kunnong‑i se doke: ti bakàNa, pang na tangkudui‑i se, pang mukalimuntuꞌ‑i se mingka na pinomba-nombai. 20aLadu na òhoꞌ-òhoꞌi‑i se, na esing‑i se ti kayaꞌ to, pang na pakei‑i se kayaꞌNa hon‑da.
Yesu nipai oròngang
(Mat. 27:32-44, Luk. 23:26, 33-43, Yoh. 19:16b-24)
20bNa bahanna‑mi se tantara ti Yesu missòhong mao nipai oròngang. 21Tempo to, sikorai:‑i se besa tau ung nikonai: Simon tu Kirene, dea‑mo amanna Aleksander pang Rupus, ung màli: mintama i Yerusalem. Na parukunna‑mi se mangkoha: oròngangna Yesu. 22Na baha‑i se ti Yesu mao i Golgota, palleona i Karurung. 23NihenginNa‑ming anggoroꞌ nilaoko pakuli: nai damaꞌ mur, hampoꞌ hang mio:‑I. 24Na pai oròngangNa‑mi se, màli: na kàlaꞌ-kàlaꞌ‑i se ti pakeangNa mangola: mantammo undi mampatantu pantang-pantang kàlaꞌna. 25Tempo nipai oròngang ti Yesu, mulummu: tumukaꞌ kùlaꞌ. 26Dea ti ung nipampakasalaang‑ing, nironno: i papang iahona bakàNa moa teꞌ, Datuna tu Yahudi. 27Tempo to, ara ho idua gorombolang nipai oròngang sitere Yesu, besa mui konangNa, besa mui kairinNa. [28Mène:‑mo to, tikannaꞌ‑mo ti sua: i Suraꞌna Puang mampatu: Datu: Pipasalamaꞌ moa teꞌ, “Nipènea tau ung làsi:.”]*#15:28 Yes. 53:12.
29Tau ung liung i anto mampibìsiꞌ‑ing, na pasianu mingiling,*#15:29 mingiling. Hele catatan kaki i Mat. 27:39. pang musua: moa teꞌ, “He Tau ung marronnònga Tamming Kabussùngang pang mampatèdeꞌa pole i laling itàlu àlona, 30ìna U makuasa‑do, minguluꞌ‑Ko nai oròngang! Pasalamaꞌ ti kalaeMu!”
31Mène:‑da ho ti kapala-kapala imang sola: ung si manarangna i aluku tu Yahudi mampenge:‑I, silàha:-làha:‑i se moa teꞌ, “Tau sintàna: Na pasalamaꞌ, hampoꞌ kalaeNa hang hela‑i Na pasalamaꞌ! 32Àla: ung tongang‑i Mesias, Datuna tu Israel, na minguluꞌ‑mo nai oròngangNa, mangking ta ita pang ta patongang!” Nai idua tau ung nipai oròngang sola: Yesu, pola: ho massalai:‑I.
Yesu mate
(Mat. 27:45-56, Luk. 23:44-49, Yoh. 19:28-30)
33Na làsuku kùlaꞌ, nasang i pangalanna lipu: to miluhali makarinning deaꞌ mulummu: sumòloꞌ kùlaꞌ. 34Tòna mulummu:‑mo sumòloꞌ ti kùlaꞌ, mikakoangna‑mi musua: ti Yesu moa teꞌ, “Eloi, Eloi, lema sabaktani?” palleona, “PuangKu, PuangKu, aka pu U Mi palii:‑do?”
35Massàding to, pira-pira tau ung tèdeꞌ pai anto musua: moa teꞌ, “Ei, manghàngo‑Da nabi Elia.”
36Aranna‑mi besa tau ung masàraꞌ mangala ung mène: lomoꞌ-lomoꞌ,*#15:36 ung mène: lomoꞌ-lomoꞌ dea‑mo bunga karang i laling sua: Malayu. na tonang i uhai ung nilaoko anggoroꞌ mihiaꞌ, màli: na pingàna:‑ing i sallengkeꞌ musandeanna sairang pang na pampaenung‑ing Yesu. Musuana‑mi moa teꞌ, “Hele‑ke se, bùruꞌa‑raka ti Elia manguluꞌ‑I.”
37Mikeina‑mi ti Yesu pang mangkàtu. 38Tempo to, ihanang pisapaꞌ i laling Tamming Kabussùngang marèbaka lummu: nai iaho deaꞌ i hoiꞌ. 39Tempona mate ti Yesu, komandang kompi tèdeꞌ siheleꞌi. Manghele mangaka ti mateNa, musuana‑mi moa teꞌ, “Ìnang Anakàna‑da Puang ti Tau tee!”
40Ara ho pira-pira bahine ung mihele nai karaona, dea‑mo Maria tu Magdala, Salome, pang Maria inanna Yakobus Mangura pang Yoses. 41Nasang‑i se to, mangulaꞌ‑mo Yesu pang mallayani‑I tòna one:‑i se maang i Galilea. Pang boso: ho bahine sintàna: i anto ung bùruꞌ i Yerusalem sola: Yesu.
Yesu nikaburuꞌ
(Mat. 27:57-61, Luk. 23:50-56, Yoh. 19:38-42)
42Tòna lìlia‑mo ti kùlaꞌ pang tempona‑mo nikaonei: sadia mintama i àlo kapillìheang, 43bùruꞌ ti besa tau tu Arimatea ung nikonai: Yusup mampingkaharanii mao i Pilatus mampalau hatang puntinna Yesu.*#15:42-43 Hele catatan kaki i Mat. 27:57-58. Dea ti Yusup, tau ung nisangadi nai àlaꞌna Ung si Nipiama: i tu Yahudi, pang tau ung mangahong-ahong‑da ho bùruꞌna kadatuangna Puang. 44Tipadàlaꞌ ti Pilatus to na sàding moa teꞌ mate‑mo ti Yesu. Manghàngona‑mi komandang kompi pang mangkutiki moa teꞌ, “Mate‑mo naꞌ ti Yesu?” 45To na sàding‑mo nai komandang to, na kanàhai:‑ming ti Yusup mangala hatang puntinna Yesu. 46Mambalaꞌna‑mi ihanang lenang ti Yusup, màli: na uluꞌ‑i ti hatang puntinna Yesu nai oròngang pang na babaꞌi ihanang to. Ladu na babaꞌi, na loling i laling liokoꞌ ung niboboko i mungku hatu. Na palloliinna‑mi hatu ti babana kaburuꞌ to. 47Pang, iaka ti niloling‑i ti hatang puntinna Yesu, na ita‑i se Maria tu Magdala pang Maria inanna Yakobus pang Yoses.
Currently Selected:
Markus 15: skx
Highlight
Share
Copy

Want to have your highlights saved across all your devices? Sign up or sign in