Markus 14

Yesu niaku: nipatei

(Mat. 26:1-5, Luk. 22:1-2, Yoh. 11:45-53)

1Idua kang àlona màli: na mintama perayaang Paska pang Roti Dang Nipasumangkaꞌ. Kapala-kapala imang pang ung si manarangna i aluku tu Yahudi mangokaꞌ dalang mantingkang mimbuni Yesu mangking nipatei. 2Sàbaꞌ na konai:‑i se teꞌ, “Hau ta pukauꞌ se tempona tau muPaska, mampabùruꞌa kamarituang.”

Yesu nitoloi: hingkùrang

(Mat. 26:6-13, Yoh. 12:1-8)

3Dea ti Yesu, one: i lipu: Betania, i rasangna Simon ung kisai balala dolu. Tarrang‑i se maturu manne:, bùruꞌ ti besa bahine mao i Dea. Bahine to mambaha besa pontu nai hatu pualam ung kilarana hingkùrang narwastu, ung masuliꞌ tungka balaꞌna. Na pùleꞌna‑mi ti barakona pontu to, màli: na pantoloi:‑ing bakàna Yesu. 4Hampoꞌ pira-pira tau i anto lalaka pang silàha:-làha: teꞌ, “Aka ti palleona hingkùrang to nipeang-peang mène: to? 5Belo:‑da sule: àla: nibalok‑i, nikorai: ti balaꞌna mitàra itàlu atuꞌna seeng peraꞌ,*#14:5 itàlu atuꞌna seeng peraꞌ sibaliang sarona tau sammeaꞌ. pang seengna nikàlaꞌ-kàlaꞌ‑ing mao i tau ung mase-mase!” Na killainna‑mi se ti bahine to.

6Hampoꞌ musua: ti Yesu moa teꞌ, “Eloꞌna‑da! Aka pu u sussai‑ko dosse:? Sàbaꞌ mampukauꞌ‑da ung belo: mao i Koi:. 7Sàbaꞌ tau ung mase-mase, lupu ara i àlaꞌ-àlaꞌmu se, pang mading u dului se ìna u kapelai: se. Hampoꞌ Koi:, ha lupua‑Kaꞌko sola: dio se. 8Bahine tee mampukauꞌ‑da aka ti ung hela na pukauꞌ. Ha tempona‑miko Ku nikaburuꞌ, dolu‑moda manghingkùràngi‑Kaꞌ. 9Matantu te ung Ku pusua: matung e teꞌ Iaka-aka pòteng i lino tee nikaonei: mampakareba Kareba Belo: nai Puang, aka ti ung na pukauꞌ bahine tee mao i Koi: nipatidolua ho, nibabe mangkalehai‑i.”

Yudas mambaloko Yesu

(Mat. 26:14-16, Luk. 22:3-6)

10Lumanna‑mi ti Yudas tu Kariot, besanna nai sampulo: idua pasikolaNa, i kapala-kapala imang mambaloko Yesu mao i dei: se. 11Haka:‑i se tungka mampisàdìngi, pang mangkadoi‑i se manghengi‑ing seeng peraꞌ mao i Yudas. Mangokaꞌna‑mi kanàha: ung belo: ti Yudas mampehea Yesu.

Yesu manne: Paska sola: pasikolaNa

(Mat. 26:17-25, Luk. 22:7-14, 21-23, Yoh. 13:21-30)

12Tòna àlo parara i perayaang Roti Dang Nipasumangkaꞌ ung na kaonei: tau marrereꞌ anaka domba ung nipake i laling manne: Paska, pasikolana Yesu mingkutiki mao i Dea moa teꞌ, “Iaka ti kaoneang ung Ta kapelai: ki mampatokana manne: Paska?”

13Na pantuyunna‑mi ti idua pasikolaNa moa teꞌ, “Nao: se i Yerusalem. I anto u sikoraia se besa muane ung mangkoha: pangànaang uhai. Ulaꞌ‑ko se 14pang ongi‑ingko se mao i ampunna tamming ung na pintamaia moa teꞌ, ‘Pipasangna Tungguru mène: tee, Iaka ti kaoneang ung nipatokana‑mingNaꞌ Ku kaoneia manne: Paska sola: pasikolaKu?’ 15Tau to manturoing‑ko se besa kaoneang ung baluaꞌ one: iaho pang tokana‑mo. I anto parallu u mampasadia‑ingke se manne: Paska.”

16Kakarangna‑mi se ti idua pasikolaNa to, pang tòna bùruꞌ‑mi se i Yerusalem, na korai:‑i se nasang mène: ung na pusua: Yesu. Na pasadianna‑mi se ti manne: Paska.

17Tòna hengi‑mo, bùruꞌ‑mi se ti Yesu sola: sampulo: kang pasikolaNa. 18Tarrang‑i se maturu manne:, musua: ti Yesu moa teꞌ, “Matantu te ung Ku pusua: matung e teꞌ Besa nai àlaꞌmu se tee ung Ku pasola: manne: e, mampeheaa‑Kaꞌ.”

19Makadainna‑mi ti pinanahanna‑i se pang si besa-besa mingkutiki mao i Dea moa teꞌ, “Koi: naꞌ?”

20Na sùmui moa teꞌ, “Tau to besanna nai dio se sampulo: idua tee, dea‑mo sipingkuꞌKu panganne:. 21Anaka Tulino ìnang matea‑da mène: ung nironno: i Suraꞌna Puang mampatu:‑I, hampoꞌ masolang ti tau ung mampehea‑I. Làbi belo:‑da sule: mao i tau to àla: dang nikianak‑ing.”

Pararanna ung nikonai: perjamuang

(Mat. 26:26-30, Luk. 22:15-20, 1Kor. 11:23-25)

22Tòna tarrang‑i se manne:, Yesu mangala roti pang musumbayang mukurusumangaꞌ. Na tòpe-tòpekèna‑mi, màli: Na àdo:‑ing mao i pasikolaNa Na pasianu musua: moa teꞌ, “KalaeKu ti te. Ala pang anne:‑ko se.” 23Ladu nai anto, mangala ho enùngang anggoroꞌ pang musumbayang mukurusumangaꞌ, màli: Na àdo:‑ing mao i pasikolaNa. Na enungna‑mi se. 24Musua: ti Yesu moa teꞌ, “RaaKu ti te, ung mampapàraꞌ pangàluꞌ ung màle, ung nibolang mao i boso: tau. 25Matantu te ung Ku pusua: matung e teꞌ Hang Ku enùngi: hura: ti anggoroꞌ nai i latenna deaꞌ tempona Ku mangenung anggoroꞌ ung màle i laling kadatuangna Puang.”*#14:25 Hele i Mat. 26:29 ung mangkonai: teꞌ, “…deaꞌ tempona Ku mangenung anggoroꞌ ung màle sola: dio se i laling kadatuangna AmangKu.”

26Mampuhontana‑mi se honta: pudi-pudiang, màli: na kakarang‑i se mao i Mungku Saitun.

Yesu mangongi‑ing Petrus teꞌ, “U Mi pissangkaꞌing.”

(Mat. 26:31-35, Luk. 22:31-34, Yoh. 13:36-38)

27Musuana‑mi ti Yesu mao i pasikolaNa teꞌ, “U marèneꞌa se nasang. Sàbaꞌ i laling Suraꞌna Puang Na konai: teꞌ, ‘Ku mampatatànga pikuyaꞌ nipatei, mambùruꞌ‑ing domba-dombanna sisara-saraka.’*#14:27 Sak. 13:7. 28Hampoꞌ to Ku nipatuho:‑mo pole, Ku dolùnga deaꞌ i Galilea.”

29Hampoꞌ na sùmui Petrus teꞌ, “Moi lòsoꞌ‑i se marèneꞌ, hampoꞌ koi: ìnang harai:‑ko.”

30Musuana‑mi ti Yesu teꞌ, “Matantu te ung Ku pusua: matung e teꞌ Hengi i latenna ho pòteng, ha moni‑mi ti manoko ung kapindua, u pintàlùnga‑mo Mi pissangkaꞌ‑ing.”

31Hampoꞌ na kìting teng Petrus ti massùmui teꞌ, “I parallu‑i, moi ku nipatei‑ko ho, harai:‑ko ku musua: moi pimbesa teꞌ ha ku ìsang‑Kodo!” Pang nasang pasikolaNa sintàna: musua: ho mène: to.

Yesu musumbayang i Getsemani

(Mat. 26:36-46, Luk. 22:39-46)

32Deaꞌ‑mi se i kinete: ung nikonai: Getsemani, pang musua: ti Yesu mao i pasikolaNa teꞌ, “Mesong‑mo:kang se inne: ti sintàna:. Ku mao‑kang musumbayang.” 33Na bahaꞌinna‑mi ti Petrus, Yakobus pang Yohanes mao sola:. Na rara‑mo masussa tungka pang mitadòsang ti Yesu. 34Musua: mao i dei: se moa teꞌ, “Masussa tungka ti pinanahangKu, mène: ung Ku matea‑mo teng. Inne:‑mo: se, pang toka:-tokana‑ko se!”

35Mingkarao: sangkìdoꞌ, màli: na mingkabongka i tampo: pang musumbayang. I laling pusumbayangNa Na palau, ìna mading, hau Na ola: ti kamaparriꞌang. 36Na konai: moa teꞌ, “O Abba, o Ama:, hari:‑da ung dang hela nai Ama:. Pakarao:‑ingNaꞌ ti enùngang*#14:36 enùngang. Hele catatan kaki i Mat. 26:39. ung Ku heleꞌi tee. Hampoꞌ hau na mangulaꞌ pampuinahangKu, sangadinna pampuinahamMu‑ra:.”

37Ladu nai anto, sumule: mao i itàlu pasikolaNa to, Na kabùruꞌi tarrang leto. Na kutiki ti Petrus teꞌ, “Simon! Oꞌ, u leto naꞌ? Ha hela‑ko se naꞌ mimata sanjaang teng? 38Toka:-tokana‑ko se pang lupu musumbayang mangking ìna u nikakaꞌi se, ha marèneꞌ‑ko se. Mio:‑da ìnang ti pinanaha mampukauꞌ ung tongang, hampoꞌ malammaꞌ ti kalae:.”

39LumanNa‑mi pole musumbayang, musua: mène: ung Na pusua: i langena:. 40Ladu nai anto, sumule: pole mao i pasikolaNa to, pang Na kabùruꞌi leto‑i se ho pole, sàbaꞌ pakaleto‑i se tungka, mambùruꞌ‑ing hari: aka ung na ìsang‑i se na pusua: mao i Yesu.

41Tòna sumule: mao i dei: se ti Yesu ung kapintàlungna, Na konai: teꞌ, “U lupu se naꞌ millìhe pang leto? Kànaꞌ‑mo! Hele! Tempona‑mo ti Anaka Tulino nipehea mao i tulino ung madosa. 42Tèdeꞌ‑mo: se! Hàme:‑mo se! Hele! Bùruꞌ‑mo ti tau ung mampehea‑Kaꞌ!”

Yesu nitingkang

(Mat. 26:47-56, Luk. 22:47-53, Yoh. 18:1-11)

43Tòna tarrang maang musua: ti Yesu, bùruꞌ‑mo ti Yudas, besanna nai sampulo: idua pasikolaNa, pang sipolai: tau boso: ung mambaha sulampaka pang kayu pibalobo:, na suo: kapala-kapala imang, ung si manarangna i aluku tu Yahudi, pang ung si matua:-tuana tu Yahudi. 44Tau ung mambaloko Yesu mampaìsàngi pupidolung‑mo tau boso: moa teꞌ, “Tau ung ku udùnga dea‑mo to. Tingkang‑mo: se, baha, pang kuyaꞌ belo:‑ko se.” 45Tòna bùruꞌ ti Yudas, mindùkuꞌ sahe: i Yesu pang musuana‑mi moa teꞌ, “Rabi!” Na udungNa‑mi.*#14:45 Na udung mantoroꞌi kabiasaangna tu Yahudi. 46Na tingkangna‑mi se tau boso: ti Yesu. 47Hampoꞌ ara besa tau i anto mannonoko pisona. Na ae:‑ing mao i kaunangna Kapala Imang, urungang lumpong ti talinganna.

48Musuana‑mi ti Yesu mao i dei: se moa teꞌ, “U Mi àna: se naꞌ gorombolang ti te? pu u mai se mambaha sulampaka pang pibalobo:, mai mantingkang‑Kaꞌ? 49Àlo-àlo Ku ara nene i àlaꞌmu se mupaturo: i kaoneang Tamming Kabussùngang pang ha u tingkang‑Kaꞌ se. Hampoꞌ pu Ku nitingkang mène: tee, mangking tikannaꞌ ti ung nironno: i Suraꞌna Puang.”*#14:49 Hele i Yes. 53:12, Mrk. 14:27, Sak. 13:7.

50Ladu nai anto, nasang pasikolaNa malai mampalii:‑I. 51Ara besa anaka muane,*#14:51 Anaka muane to, nitannai: moa teꞌ Markus‑da, ti ung marronno: suraꞌ tee. tempo to mikomoꞌ teng, mangulaꞌ Yesu. Tau boso: marroko‑i, 52hampoꞌ na lòsoꞌi ti komoꞌna pang mibelang malai.

Yesu i heleꞌna Ung si Nipiama: i tu Yahudi

(Mat. 26:57-68, Luk. 22:54-55, 63-71, Yoh. 18:12-14, 19-24)

53Nibahanna‑mi ti Yesu mao i Kapala Imang. Nasang kapala-kapala imang, ung si matua:-tuana tu Yahudi, pang ung si manarangna i aluku mukobu: i anto. 54Petrus mangulaꞌ tùrung Yesu nai karaona, deaꞌ ho mintama i pangàloangna Kapala Imang. I anto, mesong sola: pumpukuyaꞌ pang mamminnu.

55Kapala-kapala imang pang nasang Ung si Nipiama: sintàna: mangokaꞌ katong mangking Yesu nipatei, hampoꞌ hari: na korai:‑i se. 56Sàbaꞌ boso: tau mampatarai: mantannaꞌ Yesu, hampoꞌ hari: ung sibali ti patidoluangna‑i se. 57Aranna‑mi pira-pira tau tèdeꞌ mampusua: passabiinna ung dang tongang moa teꞌ, 58“Ara ki sàding‑i ti Tau tee musua: moa teꞌ, ‘Ku ronnònga ti Tamming Kabussùngang pambabe tulino tee, pang i laling itàlu àlona Ku patèdeꞌa pole ung laing, ung dang dea pambabena tulino.’ ” 59Sabi dea ho to hang sibali‑i besa na besa.

60Tèdeꞌna‑mi ti Kapala Imang i heleꞌna kasikobuang, mao mandùkuꞌi Yesu pang mangkutiki moa teꞌ, “Hari: naꞌ sùmumMu ti ung nipantannaꞌ‑ingKo?” 61Hampoꞌ lupu teng mimmànaꞌ. Hang musua:-sua:‑I. Mingkutiki kang pimbesa to Kapala Imang mao i Yesu moa teꞌ, “U Datu: Pipasalamaꞌ naꞌ, dea‑mo Anakàna Ung Nipinombai?”

62Na sùmuinna‑mi Yesu moa teꞌ, “Koi:‑mo ti To, pang araa tempona u ita‑ko se ti Anaka Tulino mesong mui konangna Ung Makuasa*#14:62a Mas. 110:1. muparenta, pang bùruꞌ mangola: kahung.”*#14:62b Dan. 7:13.

63To na sàding‑mi Kapala Imang ti pusuana Yesu, na seu: ti kayaꞌna*#14:63 Kabiasaangna tu Yahudi masseu: kayaꞌ manturo: kaladungna kamasussaang. na pasianu musua: moa teꞌ, “Aka kang ti niparallui‑ing sabi? 64U sàding kalenanna‑mo se ti Tau tee mampaihoiꞌ Puang Matua, mangakui kalena moa teꞌ, ‘Ku Puang.’ Mangaka dosse: ti pantangaꞌmu se?” Mamesa tangaꞌ‑mi se mangkàtui moa teꞌ, “Tau tee, ìnang parallu nihukung mate.”

65Na raranna‑mi se ti pira-pira tau mantangkudui‑I pang mampotoꞌ matanNa pang mantakuruꞌ‑I, màli: na musua: mao i Yesu moa teꞌ, “O Nabi, konai: deꞌ isai ti mampanaꞌi‑Ko!” Ung mangkuyaꞌ‑I ho, pola: mampalepai:‑I.

Petrus mampissangkaꞌ‑ing Yesu

(Mat. 26:69-75, Luk. 22:56-62, Yoh. 18:15-18, 25-27)

66Tempo to, one: maang i hoiꞌ i pangàloang ti Petrus, bùruꞌna‑mi ti besa bahine pangkoringna Kapala Imang. 67Pang to na ita‑mi bahine to ti Petrus tarrang mamminnu, na pumahele belo: ti silanna pang musua: moa teꞌ, “Dio ho ti lupu sola: Yesu tu Nasareꞌ to.”

68Hampoꞌ missangkaꞌ moa teꞌ, “Hang ku ìsang‑iko aka ti ung na patu: suamu.” Lumanna‑mi ti Petrus i bambangang [pang moninna‑mi ti manoko].

69To na ita‑mi ho pole bahine to ti Petrus, musua: ho pole mao i tau pai anto moa teꞌ, “Tau tee besanna nai dei: se.”

70Hampoꞌ missangkaꞌ ho ti Petrus.

Hang masai‑i nai anto, tau i anto musua: ho mao i Petrus moa teꞌ, “Matantu u besanna‑do ho nai dei: se, ha umma‑i to, dio ho tu Galilea!”

71Musumpanna‑mi ti Petrus mantunna: kalaena pang musua: moa teꞌ, “Hang ku ìsang‑iko ti Tau ung nu konai: se!” 72Tempo to, moni‑mo ti manoko ung kapindua. Na kalehainna‑mi Petrus aka ti ung ladu na pusua: Yesu mao i dea moa teꞌ, “Ha moni‑mi ti manoko ung kapindua, u pintàlùnga‑mo Mi pissangkaꞌ‑ing.” Sùsuꞌna‑mi kumàraka ti Petrus.

Currently Selected:

Markus 14: skx

Highlight

Copy