YouVersion Logo
Search Icon

Markus 13

13
Yesu mampusua: kamaronnòngangna Tamming Kabussùngang
(Mat. 24:1-2, Luk. 21:5-6)
1Tòna missòhong nai kaoneang Tamming Kabussùngang ti Yesu, besa nai pasikolaNa musua: teꞌ, “O Tungguru, U ita naꞌ nasang ti pampatèdeꞌ too? Pumahele belo: ti hatu-hatunna! Si lammuꞌ! Ha makàdaꞌ‑ida matairingna!”
2Na sùmui Yesu teꞌ, “U ita nasang ti pampatèdeꞌ ung nipirerèngi too le? Harai:‑da moi besa hatu nai pampatèdeꞌ to ung leta: i kaoneangna. Nironnònga‑da nasang.”
Pararanna kamasussaang
(Mat. 24:3-14, Luk. 21:7-19)
3Lumanna‑mi i heteꞌna i Mungku Saitun ti Yesu pang mesong i kaoneang ung mallummàngi Tamming Kabussùngang. Bùruꞌna‑mi ti Petrus, Yakobus, Yohanes pang Andreas mingkutiki mao i Yesu moa teꞌ, 4“Paìsàngi‑kangka, i sangkannaa ti tempona aka to deꞌ? Pang aka ti tanda ung manturo: teꞌ temponaa‑mo nikannaꞌi nasang.”
5Na sùmui Yesu moa teꞌ, “Toka:-tokana‑ko se, pakala‑rang ara tau ung mampahùling‑ko se mampatu: aka ti ung bùruꞌa. 6Sàbaꞌ boso: tau ung bùruꞌa mampake konaKu teꞌ, ‘Koi:‑mo ti Datu: Pipasalamaꞌ,’ pang mampahùlìnga boso: tau. 7Ìna u massàding se moni kaputudaang pang kareba kaputudaang, hau tipadàlaꞌ se pang mariaꞌ. Sàbaꞌ nasang to parallu nipaara, hampoꞌ handei:‑da palleona teꞌ tempona‑mo ti Àlona Puang. 8Sàbaꞌ suku besa situdaa suku sintàna:, pang mène: ho ti kadatuang besa mao i kadatuang sintàna:. Pang iaka-aka araa pidodaꞌ pang kaburoràngang. Nasang to, pararanna‑da maang kamaparriꞌang, mène: pipanaꞌna bahine ung marrara na kekiꞌi.
9-10Kareba Belo: nai Puang parallu nipadeaꞌ dolung mao i lìliꞌna lino. Jadiꞌ, dio se, hele-hele‑ko se ti kalaemu, sàbaꞌ u nitingkànga se pang nibaha mao i ung si nipiama: pang nisasa: i tamming-tamming kapinombaang. U nibahaa se mao i pengadilang, nitannaꞌ i heleꞌna ampu parenta pang datu:-datu:, sàbaꞌ u pasikolaKu se, pang dea‑mo to ti kanàha: mao i dio se mampatidolu passabiimmu se mao i dei: se. 11Pang hau mariaꞌ se aka ti ung nu konaia se i anto. Tempona u musuaa se, konai: teng aka ti ung nipaìsàngi‑ingko se, sàbaꞌ sua: ung nu pusua: se to, handei:‑da suamu se pòteng, sangadinna ung bùruꞌ‑da nai Pinanaha Malìsong. 12-13Araa tempona tau ung dang mupatongang mampehea pulengkeꞌna ung mupatongang nipatei. Mène: ho ama: mao i anakàna, pang anaka mao i tudolunna. Boso: tau mampukàràngo: se sàbaꞌ konaKu. Hampoꞌ tau ung mantokaꞌ pàraꞌ kapatongangangna deaꞌ i katampàkangna, nipasalamaꞌa.”
Kamasussaang ung bùruꞌa pang nabi-nabi ung dang tongang
(Mat. 24:15-28, Luk. 21:20-24)
14“Hampoꞌ u mangitaa se tau mampukauꞌ ‘Kauꞌ ung Burere ung na Pudàku Puang’ i Kaoneang Malìsong.*#13:14 Hele i Dan. 9:27, 11:31, 12:11. Sua: te, parallu na tangaꞌ belo:-belo: tau ung mambasa. Tempo to, tau ung one: i Yudea parallu mampalai‑ing kalaena mao i mungku. 15Tau ung tarrang iaho atuꞌ ung marante,*#13:15 atuꞌ ung marante. Hele catatan kaki i Mat. 24:17. hau na mintama hura: i rasang mangala aka-aka. 16Tau ung mingkamaꞌ i kinete:, hau na mao hura: mangala jekeꞌna dea‑raka komoꞌna. 17Hang makàdaꞌ‑ida masussannaa ti bahine ung kaleang pang ina: ung mupasusu maang anakàna tempo to! 18Musumbayang‑ko se mangking ha nipaara‑i tempo paraurang. 19Sàbaꞌ tempo ung dang makàdaꞌ mipaiꞌna to, dea‑mo besa kamaparriꞌang ung dang ara‑kang niola:‑i songka: Puang mantampa lino deaꞌ i latenna. Pang liung nai anto, ha nipaarai: hura: ti ung mène: to. 20Àla: da na pakapodiꞌ‑ida Puang ti temponaa kamaparriꞌang to, baꞌ harai:‑da moi besa tau ung lupu tuho:. Hampoꞌ na pakapodiꞌ Puang ti tempo to, sàbaꞌ mangkalehai tau ung Na pirarai: miluhali taunNa.
21Tempo to, ìna ara tau ung musua: matung teꞌ, ‘Hele, inne:‑da ti Datu: Pipasalamaꞌ e!’ dea‑raka, ‘Hele, one:‑Da i antoo!’ hau patongang se ti tau to. 22Sàbaꞌ araa ti tau ung si mangkonai: kalaena Datu: Pipasalamaꞌ dea‑raka nabi, pang mampukauꞌi: se tanda kalle-kalleang mangking mampahùling taunna Puang ìna hela. 23Jadiꞌ, hele-hele‑ko se! Sàbaꞌ nasang to, ha nipaara‑mi, Ku pusua:‑mo ìnang matung.”
Kabùruꞌangna Anaka Tulino
(Mat. 24:29-31, Luk. 21:25-28)
24-25“Hampoꞌ ladu kamaparriꞌang to, nasang i langiꞌ mabàlia, dea‑mo kùlaꞌ miluhalia makarinning, hulang ha tumpanai: hura:, pang ana-anaka hulang maràsànga. 26Tempo dea‑mo to, Anaka Tulino niitaa bùruꞌ i laling kahung sìnang kuasa pang kamalabiꞌang ung lammuꞌ. 27Tempo to, mampantuyua malaikaꞌ-malaikaꞌNa lumao mangkungku taunNa nai lìliꞌna lino, hari: ung Na pakaliung.”
Pasakiꞌ mangking lupu toka:-tokana
(Mat. 24:32-44, Luk. 21:29-33)
28“Ala‑ko se pipaturo: nai lòpo: ara. Ìna maràsang ti daungna pang na olaing milolo:, niìsang teꞌ kùlaꞌ kaùnga‑mo. 29Mène: ho to ìna u mangita se kamasussaang to ung Ku konai:‑mo, u ìsànga‑mo se teꞌ dùkuꞌ‑mo ti bùruꞌna Anaka Tulino, one:‑mo i baba:. 30Matantu te ung Ku pusua: matung e teꞌ Hang tempona‑mi mate ti tau ung si mangita tanda-tanda to, ìnang bùruꞌa‑mo ti Anaka Tulino. 31Moi langiꞌ pang lino hùlìnga, hampoꞌ suaKu tontònga deaꞌ tùrungna.
32Hampoꞌ moi mène: to, hari:‑da ung mangìsang i sangkannaa ti àlona pang jaangna, moi malaikaꞌ-malaikaꞌ i suruga pang Anaka. Ama:‑da teng i suruga ti ung mangìsang. 33Deanna‑mo to, toka:-tokana‑ko se, sàbaꞌ ha u ìsang‑ko se i sangkanna ti tempona! 34Nasang to, niala rampeang, mène: tau ung mangkuyaꞌ rasang. Ìna ampunna besa rasang mampaliia rasangna lumao i kaoneang ung karao:, mampantuyu pangkoringna leta: mangkuyaꞌ rasang, pang na papantàngi kamaꞌang. Mao i pumpukuyaꞌ baba:, na pasakiꞌ mangking lupu matangking. 35Dea‑mo to, lupu‑ko se toka:-tokana, sàbaꞌ ha u ìsang‑ko se i sangkanna ti ampu rasang sumulea — i malenaa‑rakada, mulummua‑rakada hengi, masìkiꞌa‑rakada hengi, dea‑raka mingkakaꞌ. 36Ìna bùruꞌ sangka:‑da teng, maa‑rang u na kabùruꞌi se tarrang leto. 37Aka ti ung Ku pusua: tee matung, Ku pusua: ho mao i nasang tau teꞌ, ‘Toka:-tokana‑ko se!’ ”

Currently Selected:

Markus 13: skx

Highlight

Share

Copy

None

Want to have your highlights saved across all your devices? Sign up or sign in