Matius 12

Tu Parisi mampasala: pasikolana Yesu sàbaꞌ mingkamaꞌ i àlo kapillìheang

(Mrk. 2:23-28, Luk. 6:1-5)

1Ara sangàlo, àlo kapillìheang, Yesu sola: pasikolaNa mangola: i kinete: gandum, pang dea ti pasikolaNa burorang. Mampùruꞌna‑mi se gandum, na anne:‑i se. 2Hampoꞌ na ita‑i se tu Parisi. Musuana‑mi se mao i Yesu teꞌ, “Hele‑mi! PasikolaMu mampukauꞌ ung nipimalii i àlo kapillìheang.”

3Hampoꞌ na sùmui Yesu teꞌ, “Ha u basa‑mo: se naꞌ aka ti ung na pukauꞌ dolung Daud pang solana, to na lampiꞌ burorang?*#12:3 Hele i 1Sam. 21:1-6. 4Mintama ti Daud i pangàloangna Tenda Kabussùngang mampalau roti. Hampoꞌ hari: roti sangadi roti ung nipinomba‑ming, ung nipimalii na anne: tau sangadi imang-imang. Na anne:‑i se. Moi na mène: to, hang niàna:‑i ung masala:, sàbaꞌ kamasussaang. 5Dea‑raka ha u basa‑mo: se naꞌ i Suraꞌ Musa moa teꞌ tumpuꞌ àlo kapillìheang, imang-imang i Tamming Kabussùngang mingkamaꞌ tempo àlo kapillìheang? hampoꞌ hang masala:‑i.*#12:5 Hele i Bil. 28:9-10. 6Hampoꞌ Ku pusua: matung teꞌ, I ante ara‑da ti ung milàbi nai Tamming Kabussùngang. 7I Suraꞌna Puang nironno: mène: tee, ‘Ung Ku kapelai:, lammoroꞌ besa dea‑mo sipulemu, handei:‑Ko teng pimmalaꞌ.’*#12:7 Hos. 6:6. Àla: tongang-tongang‑mo: se mangìsang ti palleona suana Puang to, àla: hang mampasala:‑ko dosse: tau ung dang kasalaang. 8Sàbaꞌ Anaka Tulino makuasa mao i àlo kapillìheang.”

Yesu mampumatalete: tau tempona àlo kapillìheang

(Mrk. 3:1-6, Luk. 6:6-11)

9Ara ho sangàlo, Yesu lumao i tamming kapinombaangna‑i se. 10I anto ara besa tau ung mate sammaliang kangkangna. Pira-pira tu Parisi ung mangkakaꞌi Yesu nai pingkutìkangna‑i se teꞌ, “Mading naꞌ mampumatalete: tau tempo àlo kapillìheang?”

11Hampoꞌ na sùmui Yesu teꞌ, “Ìna arammu se ung mangampu besa domba, pang àlo kapillìheang, domba to marèneꞌ mao i hàlo: ung kaladung, ara naꞌ i àlaꞌmu se ung dang mallantoing domba to nai hàlo:? 12Deaa‑mo kang tulino ung làbi kianggaꞌna nai domba! Jadiꞌ, ìna mène: to, manassa mading‑da mampukauꞌ ung belo: mao i tau tempo àlo kapillìheang.”

13Musuana‑mi ti Yesu mao i tau to teꞌ, “Ànaꞌ ti kangkangmu.” Na ànaꞌna‑mi, pang belo:‑mo mène: kangkangna sammaliang. 14Hampoꞌ missòhong‑i se ti tu Parisi, pang silàha:-làha: mangokaꞌ dalang mangking mampatei Yesu.

Pangaena Yesu siulaꞌ ung nipupihuyang mampatu: Datu: Pipasalamaꞌ

15Hampoꞌ na ìsang Yesu ti patuna‑i se tu Parisi ung kadetu. Jadiꞌ, malai nai kaoneang to ti Yesu pang boso: tau ung mangulaꞌ‑I. MampumataleteNa‑mi nasangna‑i se ung mipanaꞌ. 16Hampoꞌ Na apuꞌ tungka ti tau mampupiìsang isai‑i ti Dea. 17Nipukauꞌ ti to mangking tikannaꞌ ti suana Puang mampatu: Datu: Pipasalamaꞌ ung na padeaꞌ nabi Yesaya teꞌ,

18“Dea‑mo te ti KaunangKu ung Ku pilei,

Tau ung Ku pulemu pang ung mampumasannang pinanahangKu.

Ku hengiing PinanahangKu

mampakareba kamahuloang mao i nasang tau.

19Hang seroI:‑da dea‑raka mikei: mao i isai-sai,

dea‑raka musua:-sua: pai batantana.

20Hang mampuleleàngI:‑da tau ung malammaꞌ kapatongangangna mène: tuyu: ung tuho: pang mabare:, sangadinna Na patèdeꞌ,

pang hang manghùlìngiI:‑da tau ung toyang kapatongangangna mène: pallita ung sampiuꞌ podaꞌ, sangadinna Na babe,

deaꞌ mampabùruꞌ kamahuloang. 21Pang tau ung dang dea tu Yahudi misasarea mao i Dea.”*#12:18-21 Yes. 42:1-4.

Yesu nitannaꞌ mampake kuasanna Beelsebul

(Mrk. 3:20-30, Luk. 11:14-23)

22Ladu nai anto, nibaha mao i Yesu ti besa tau ung na pabuta pang na pabebe dihata bulituku. Na pumataletena‑mi ti tau to, dea pùna hela musua: pang paita. 23Nasang tau mimàha pang mangkonai: teꞌ, “Dea‑mo màka: te ti hatiꞌna Daud ung niàluꞌ to.”

24Hampoꞌ to na sàding‑mi se tu Parisi, na sùmui‑i se teꞌ, “Tau tee hela teng mampasahu dihata bulituku sàbaꞌ Beelsebul, dea‑mo Datuna dihata bulituku mampanghengi‑ing kuasa.”

25Hampoꞌ Yesu mangìsang tangaꞌna‑i se tu Parisi to. Jadiꞌ, musua: mao i dei: se teꞌ, “Ìna besa kadatuang sikeboꞌ-keboꞌi pang siponi:, kadatuang to hang masaii: pang hùlìnga. Mène: ho, ìna i laling besa lipu: dea‑raka tanandapoꞌ hari: kamamesaang, sangadinna sikeboꞌ-keboꞌi sule:, lipu: dea‑raka tanandapoꞌ to ha tinnai:. 26Mène: ho to ti i kadatuangna Iblisiꞌ. Ìna Datuna dihata bulituku mampasahu solana nai tulino, palleona siponi: solana pang marràba: kadatuangna. 27U konai: se moa teꞌ Ku mampasahu dihata bulituku mangola: kuasanna Beelsebul. Ìna mène: to, baꞌ mangola: kuasanna isai ti pasikolamu se mampasahu dihata bulituku? Deanna‑mo to, pasikolamu kalenanna se ti ung mampatidolua passabiinna moa teꞌ u sala: dosse:. 28Hampoꞌ ìna Ku mampasahu dihata bulituku mangola: kuasanna Pinanahanna Puang, palleona to moa teꞌ kadatuangna Puang bùruꞌ‑mo i àlaꞌ-àlaꞌmu se.

29Mangaka ho ti tau hela mintama i tammingna tau ung pabuu:*#12:29 tau ung pabuu: i rampeang te manturo: Datuna dihata bulituku. pang marrampaꞌi kasukiꞌangna, i dang na pungu‑kàngi ti tau to? Ladu to màli: na hela marrampaꞌi kasukiꞌangna.

30Tau ung dang mangulaꞌ‑Kaꞌ, sitongangna tau to mamponi:‑Kaꞌ. Pang tau ung dang mandului‑Kaꞌ mangkungku dombangKu, sitongangna tau to mampatisahuꞌ ung Ku kungku. 31Deanna‑mo to, Ku pusua: matung moa teꞌ, Nasang dosanna tulino hela nipantengkai:‑ing, moi mampusua: kadetu ung niàna: malìsong, sangadi, ìna mantumpaꞌ pingkamaꞌna Pinanaha Malìsong, hari: dalang nipantengkai:‑ing. 32Pang isai-sai ti ung mampusua: sua: ung mangeba Anaka Tulino, hela nipantengkai:‑ing, hampoꞌ ìna mampusua: sua: ung mantumpaꞌ Pinanaha Malìsong, hang hela‑i nipantengkai:‑ing, belo: i latenna, belo: i lino i hunni.”

Lòpo: pang hoana

(Luk. 6:43-45)

33Nai anto, Na pusua: kang ho teꞌ, “Ìna besa lòpo: manghoa:‑ing hoa: ung belo:, baꞌ konai:‑ko se belo:, pang ìna besa lòpo: manghoa:‑ing hoa: ung kadetu, baꞌ konai:‑ko se kadetu. Sàbaꞌ nai hoana‑da ti niìsang‑i. 34Hampoꞌ dio se ung sibali talubammaꞌ, mangaka u helaa se mampusua: ung belo: nai pinanahammu se ung kadetu? Sàbaꞌ aka ti ung sòhong nai tako:, dea‑mo to ti ung nai pinanaha. 35Tau ung belo: mampusua:‑da ung belo: nai pinanahanna ung pùno: kabeloang. Sàri laing‑da tau ung kadetu, mampusua:‑da ung kadetu nai pinanahanna ung pùno: kakadetuang. 36Hampoꞌ Ku pusua: matung teꞌ, Nasang sua: ung dang ara palleona ung na pusua: tau, parallu na pumakàso: i àlo i hunni. 37Sàbaꞌ nai sua:-suamu dosse: ti u nikàtuia se, u masala: se‑raka hari:‑rika.”

Tu Parisi mampalau tanda kalle-kalleang

(Luk. 11:29-32)

38Nai anto, pira-pira ung si manarangna i aluku pang tu Parisi massùmui Yesu teꞌ, “Tungguru, ki kapelai: ti mangita tanda kalle-kalleang ung nai Puang mangola: Kinta:.”

39Hampoꞌ Na sùmui teꞌ, “Tau ung kadetu pinanaha pang ung dang minumpu‑da ti ung mampalau tanda kalle-kalleang. Hampoꞌ hang nihengiing se, sangadi tanda nabi Yunus. 40Sàbaꞌ nabi Yunus leta: i laling balammangna urung ung lammuꞌ itàlu àlona itàlu henginna. Mène:‑da ho to ti Anaka Tulino, letaa i laling tampo: itàlu àlona itàlu henginna. 41Tempona àlo i hunni, tu Ninewe tèdeꞌa sola: te tau i latenna e pang mampatidolu passabiinna mampatu: hukungangmu se. Sàbaꞌ tu Ninewe to, mingkatobaꞌ nai dosa-dosanna‑i se tòna nabi Yunus mampakareba suana Puang mao i dei: se. Hampoꞌ i latenna, inne:‑moDa ti ung làbi iaho nai nabi Yunus! 42Tempona àlo i hunni, datu: bahine ung muparenta lùlung i Selatang, tèdeꞌa nai kamateang pang niparessaa sola: te tau i latenna e. Tempo to, nipupiitaa nai passabiinna datu: bahine to moa teꞌ sala: te tau ung ara i latenna e. Sàbaꞌ dolung, datu: bahine to bùruꞌ mai nai karaona i tampakàna lino mangking mampisàdìngi pipaturona Salomo ung kitangaꞌ belo:. Hampoꞌ i latenna, inne:‑moDa ti ung làbi iaho nai Salomo!”

Sumulena dihata bulituku

(Luk. 11:24-26)

43“Pang ìna dihata bulituku missòhong nai besa tau, dihata bulituku to kalao-lao pai kaoneang ung tunini ung dang ara uhai, mangokaꞌ kaoneangna leta:, hampoꞌ hang na korai:‑i. 44Musuana‑mi moa teꞌ, ‘Ku sumulea mao i rasang ung ku kaonei: dolung.’ Tòna deaꞌ‑mo i anto, rasang to mapassi pang niatoroꞌ belo:, hampoꞌ lupu salokaꞌ.*#12:44 mapassi pang niatoroꞌ belo: manturo: tau ung mampukaenàngi mangatoroꞌ katuhoangna nai mantoroꞌi atorang-atorang aluku. lupu salokaꞌ manturo: moa teꞌ hari: ampunna ti rasang to. Palleona, dea ti Puang ha makuasa‑i i laling tau to. Kapodiꞌna, hari: palleona mao i tau mualuku dea‑raka tuho: belo:-belo:, i dang ara‑i ho Pinanahanna Puang leta: i anto miluhali ampunna. 45Lumanna‑mi pang mambaha pitu dihata bulituku sintàna: ung làbi kadetu kang ho nai dea. Mintamanna‑mi se i tau to pang leta: i anto, mambùruꞌ‑ing tuhona tau to làbi kadetu kang nai dolung. Mène:‑moda ho to ti ung bùruꞌa mao i tau ung si kadetu pinanahanna tee.”

Inanna pang mantàdina Yesu

(Mrk. 3:31-35, Luk. 8:19-21)

46Tòna tarrang maang musua: ti Yesu mao i tau boso:, bùruꞌ sangka: ti inanNa pang mantàdi:-tàdiNa. One:‑i se i sòhongna tèdeꞌ mangkapelai: mampampasikorai:‑ing. 47Musuana‑mi ti besa tau mao i Yesu teꞌ, “Hele! InanTa pang mantàdi:-tàdiTa one:‑i se i sòhongna. Palea:‑i se mampampasikorai:‑ingKe.”

48Hampoꞌ na sùmui Yesu moa teꞌ, “Isai ti inangKu pang isai ti mantàdiKu?” 49ManturoNa‑mi tau ung mangulaꞌ‑Mi Na pasianu musua: teꞌ, “Dea‑mi dasse: tee ti inangKu pang mantàdiKu. 50Sàbaꞌ isai-sai ti ung mampukauꞌ pampuinahanna AmangKu i suruga, dea‑mo to ti mantàdiKu muane, mantàdiKu bahine, pang inangKu.”

Currently Selected:

Matius 12: skx

Highlight

Copy