Matius 13

Rampeang besa tau ung sumahuꞌ

(Mrk. 4:1-9, Luk. 8:4-8)

1Àlo to ho teng Yesu missòhong nai tamming to pang mao i minanaꞌ tasiki mesong. 2Boso: tungka tau mukobu: mangkaropo‑I, dea pùna millanto i lemmang pang mesong i anto, pang dea ti tau boso: tèdeꞌ i kàdaꞌ.

3Pang Yesu mampusua: boso: pipaturo: mao i tau to‑i se mampake rampeang. Ung parrara mène: tee, “Ara besa tau ung lumao sumahuꞌ. 4Tempona sumahuꞌ, sinahuꞌ sintàna: toang i dalang. Bùruꞌna‑mi ti kudaꞌ manganne: deaꞌ lòsoꞌ. 5Sintàna: toang i tampo: ung kihatu i hoiꞌna, ung dang boso: tampona, pang sinahuꞌ to tuho: masàraꞌ sàbaꞌ manipa: ti tampona.*#13:5 I pira-pira kaoneang i lino, ara tempo mirarung. Tempo to, tampo: miluhali sàle:. Hampoꞌ mangkonai: tempo mikehiꞌ, nilamùngi pole. Iaka tampo: ung manipa:, i anto masàraꞌ mikehiꞌ, mambùruꞌ‑ing linamung masàraꞌ tuho:. Hampoꞌ bùruꞌ ti kùlaꞌ kaung, tampo: i anto masàraꞌ màlo pang linamung malaso deaꞌ mate. Kapodiꞌna, masàraꞌ tuho:, masàraꞌ ho mate. 6Hampoꞌ tòna mikehiꞌ‑mo ti kùlaꞌ, malaso pang miluhali màlo, sàbaꞌ hang kaladung‑i ti pioaꞌna. 7Sintàna: kang ho toang i tampo: ung madàli makàrang, pang sa: baraꞌ-baraꞌna ti làmaka to, mangkàràngi deaꞌ mate. 8Pang sintàna: toang i tampo: ung malompo:. Hoana‑mi. Haseleꞌna ara ung miluhali sangatuꞌ lùpiꞌna, ara ung miluhali ùnung pulona, ara ho ung miluhali itàlu pulona lùpiꞌna. 9Deanna‑mo to, isai ti ung kitalinga, na pisàdìngi‑i!”

Aka pùna mampake rampeang ti Yesu

(Mrk. 4:10-12, Luk. 8:9-10)

10Mindùkuꞌna‑mi ti tau ung si mangulaꞌ‑Mi pang mingkutiki teꞌ, “Aka pu Ta musua:‑da mao i dei: se i laling rampeang?”

11Na sùmui Yesu teꞌ, “Sàbaꞌ aka ti ung dang niìsang‑kang nai dolung, u nihengi‑ming se tangaꞌ mangking mangìsang mangaka ti Puang muparenta, hampoꞌ mao i dei: se, hari:. 12Sàbaꞌ isai-sai ti ung ara‑mo na ampu, nipakànaꞌia kang ho, urungang milàbi. Hampoꞌ isai-sai ti ung mangampu sangkìdoꞌ‑i, niala hèraꞌa nai kalaena. 13Dea pùna Ku mampake rampeang ìna musua: mao i tau boso:. Sàbaꞌ

na ita‑i se, hampoꞌ hang na ìsang‑i aka ti ung Ku pukauꞌ.

Na sàding‑i se, hampoꞌ mène: tau ung dang massàding pang dang mampahang.

14Mangola: aka to, tikannaꞌ ti ung na pupihuyang nabi Yesaya teꞌ, ‘Puang musua: teꞌ,

Na moi‑rika na sàding‑i se ti suaKu,

hampoꞌ hang na pahang‑i.

Na moi‑rika na ita‑i se,

hampoꞌ hang na ìsang‑i.

15Sàbaꞌ sumpìring ti tangaꞌna‑i se,

pidaꞌ‑i se,

pang sikapuꞌ ti matanna‑i se.

Àla: tuhangka‑i ti pinanahanna‑i se, àla: paita‑i se,

pasàding‑i se,

pahang‑i se,

mingkatobaꞌ‑i se, pang Ku mampumatalete:‑i se.’*#13:13-15 Yes. 6:9-10.”

16Na pusua: Yesu mao i tau ung mangulaꞌ‑Mi moa teꞌ, “Hampoꞌ dio se, hang makàdaꞌ‑ida maupaꞌmu se sàbaꞌ u tongang mangita se pang massàding. 17Sàbaꞌ matantu te ung Ku pusua: matung e teꞌ Nai lùlung boso: nabi pang tau ung mahulo: i heleꞌna Puang mangkapelai: mangita te ung nu ita se i latenna, hampoꞌ hang pakala‑i se mangita. Na kapelai:‑i se ti massàding aka ti ung nu sàding se i latenna, hampoꞌ hang pakala‑i se massàding.”

Yesu mampumakàso: to rampeang besa tau ung sumahuꞌ

(Mrk. 4:13-20, Luk. 8:11-15)

18“Deanna‑mo to, pisàdìngi‑ko se ti palleona rampeang ung sumahuꞌ to. 19Sinahuꞌ ung toang i dalang, niala rampeang suana Puang mampatu: kadatuangNa ung na sàding tau hampoꞌ hang na pahang‑i. Bùruꞌ ti Datuna dihata bulituku pang marrampaꞌi aka ti ung nisahuꞌ‑mo i pinanahanna. 20Sinahuꞌ ung toang i tampo: ung kihatu i hoiꞌna, niala rampeang suana Puang ung na sàding tau pang pàtu: haka: mantarima. 21Hampoꞌ suana Puang hang mioaꞌ‑i i pinanahanna, dea pùna hang tàraang‑i. Ìna bùruꞌ ti kamasussaang dea‑raka kamaparriꞌang nai padanna sàbaꞌ suana Puang, madàli mingkeboꞌ. 22Sinahuꞌ ung toang i tampo: ung madàli makàrang, niala rampeang suana Puang ung na sàding tau, hampoꞌ mantangaꞌ teng katuhoang i lino tee, mangkapelai: kasukiꞌang ung mi tangkasi:. Dea‑mo to ti ung mangkàràngi suana Puang pu dang na hoa:. 23Hampoꞌ sinahuꞌ ung toang i tampo: ung malompo:, niala rampeang suana Puang ung na sàding tau pang na pahang, dea pùna mahoa:. Ara ung miluhali sangatuꞌ, ara ung miluhali ùnung pulona, pang ara ung miluhali itàlu pulona.”

Rampeang làmaka musandeanna gandum

24Yesu mampatidolu kang ho besa rampeang mao i tau boso: mène: tee, “Kadatuang suruga niala rampeang besa tau ung massahuꞌ sinahuꞌ ung belo: i kinetena. 25Hampoꞌ tòna maturu‑mo nasang ti tau, bùruꞌ ti ponina massahuꞌ hoana làmaka musandeanna gandum pai àlaꞌna gandum to, màli: na malai. 26Tòna tuho:‑mo ti gandum to pang marrara kibantaangna, mumasang‑moda ho ti musandeanna to. 27Bùruꞌna‑mi ti ung mingkamaꞌna tau ung sumahuꞌ to, mangkonai: teꞌ, ‘O Tuang, handei:‑da naꞌ sinahuꞌ ung belo: ti ung ta sahuꞌ i kineteta? Nai iaka‑da ti làmaka to?’

28Hampoꞌ na sùmui tau to teꞌ, ‘Poni:‑da ti ung mampukauꞌ to.’

Mingkutikìna‑mi pole ti ung mingkamaꞌna tau to teꞌ, ‘Baꞌ u mio: naꞌ ki lumao mambokaꞌ làmaka to?’

29Hampoꞌ na sùmui teꞌ, ‘Hàni: se, sàbaꞌ, ìna nibokaꞌ ti làmaka to, hangkàliꞌ polaa‑da ho ti gandum tibokaꞌ. 30Kamànaꞌi teng tuho: sola: deaꞌ tempo mangkìtiꞌ. One:‑rang i anto ku konai:‑i mao i tau ung mangkìtiꞌ teꞌ, Kobu: sala:‑kangko se ti làmakàna pang seaꞌ, mangking tokana nisohe. Ladu to, kobu:‑mo: se ti gandum to, pang àna:‑i i talukung.’ ”

Rampeang hatunna tanammong

(Mrk. 4:30-32, Luk. 13:18-19)

31Mampusua: kang ho besa rampeang ti Yesu moa teꞌ, “Mène:‑mo te ti kadatuang suruga, Niala rampeang hatunna tanammong ung na sahuꞌ tau i kinetena. 32Hatunna to ìnang kàle: ung supina nai nasang lamùngang sintàna:. Hampoꞌ ìna tuho:‑mo, miluhali lammuꞌ nai nasang sinnaꞌ sintàna:. Millòpo:, dea pùna hela na kaonei: kudaꞌ muhengi ti karumpenganna.”

Rampeang ragi

(Luk. 13:20-21)

33Ara besa rampeang ung laing ung na patidolu Yesu mao i dei: se, mène: tee, “Kadatuang suruga to niala rampeang sangkìdoꞌ ragi ung na ala besa bahine pang na laoko sangkanduꞌ tarigu, urungang sumangkaꞌ.”*#13:33 Palleona, kadatuang suruga ung na patèdeꞌ Yesu mangola: pasikolaNa sangkìdoꞌ‑i, hampoꞌ sumangkaꞌa, pang i tampakàna nasang lino massàdìnga.

Aka pùna mampake rampeang ti Yesu

(Mrk. 4:33-34)

34Nasang to, na padeaꞌ Yesu mao i tau boso: mampake rampeang. Hari:‑da dang Na mampake rampeang, 35mangking tikannaꞌ ti suana Puang ung mangola: nabi moa teꞌ,

“Ku mampakea rampeang ìna Ku musua: mao i dei: se.

Ku mampatidolua aka ti ung dang na pupiita‑kang Puang songka: aranna lino.”*#13:35 Mas. 78:2.

Yesu mampumakàso: rampeang làmaka musandeanna gandum

36Ladu nai anto Yesu mampalii: tau boso: to, pang mintama i tamming ung Na kaonei:. Mindùkuꞌna‑mi ti pasikolaNa pang mingkutiki moa teꞌ, “Pumakàso:‑ingnang ti palleona rampeang làmaka musandeanna gandum.”

37Na sùmuinna‑mi teꞌ, “Tau ung massahuꞌ sinahuꞌ ung belo: to dea‑mo Anaka Tulino. 38Kinete: to dea‑mo lino. Sinahuꞌ ung belo: to dea‑mo tau ung miluhali‑mo taunna Puang. Làmaka to dea‑mo tau ung miluhali taunna Datuna dihata bulituku. 39Poni: ung massahuꞌ làmaka to dea‑mo Datuna dihata bulituku. Tempo mangkìtiꞌ dea‑mo katampàkangna lino tee, pang tau ung mangkìtiꞌ to dea‑mo malaikaꞌ-malaikaꞌ. 40Jadiꞌ, mène: ti làmaka ung nikobu: pang nisohe, mènea‑da ho to ti i katampàkangna lino. 41Anaka Tulino mampantuyua malaikaꞌ-malaikaꞌNa massaràki nai kadatuangNa nasang ti ung mampabùruꞌ tau mampukauꞌ dosa, pang nasang tau ung mampukauꞌ kakadetuang. 42Nitibei: se nasang mao i pantuheang ung hùrong baraꞌ apinna. I anto mantalihuhui: se kumàraka pang sikùriki ti sisena. 43Hampoꞌ tau ung mampukauꞌ pampuinahanna Puang tumpanaa mène: kùlaꞌ i laling kadatuangna Amanna‑i se. Isai ti ung kitalinga, na pisàdìngi‑i!”

Idua rampeang kasukiꞌang

44“Kadatuang suruga niala rampeang kasukiꞌang ung tilamung i kinete:, ung na korai: besa tau. Na tampoina‑mi pole, pang lumao mambaloko nasang aka ti ung na ampui sàbaꞌ hakana, màli: na mambalaꞌ kinete: to.

45Kadatuang suruga niala rampeang ho besa pumpubaloko ung mangokaꞌ hatu mutiara ung matairing tungka pang masuliꞌ. 46To na korai:‑mo ti mutiara ung kianggaꞌna tungka, pàtu: sumule:‑kang pang mambaloko nasang aka ti ung na ampui, màli: na mao mambalaꞌ mutiara to.”

Rampeang pukaꞌ

47“Kadatuang suruga niala rampeang kang ho pukaꞌ ung niuluꞌ i tasiki. Mialanna‑mi marupa-rupa urung. 48Tòna maranga‑mo ti ung na ala pukaꞌ, na lemmang‑mi se pumpiurung mao i kàdaꞌ. Mesongna‑mi se mampirarai: urung to. Urung ung belo: nianne:, niàna: i pangànaang, hampoꞌ ung dang belo: nianne:, nitibe. 49Mènea‑da ho to ti i katampàkangna lino tee. Malaikaꞌ-malaikaꞌ nipantuyua massaràki tau ung bulituku nai tau ung tongang. 50Pang tau ung bulituku, nitibea mao i pantuheang ung hùrong baraꞌ apinna. I anto mantalihuhui: se kumàraka pang sikùriki ti sisena.”

Yesu mampusua: pipaturo: ung màle pang ung nai lùlung

51Mingkutiki ti Yesu mao i pasikolaNa teꞌ, “U pahang se naꞌ nasang ti rampeang to?”

Na sùmui‑i se teꞌ, “Ayyo, ki pahang.”

52Musuana‑mi ti Yesu teꞌ, “Baꞌ belo:, sàbaꞌ nasang ung si pahang‑mo i Suraꞌna Puang ung miluhali‑mo taunna Puang, niala rampeang besa ampu tamming ung mangaro nai pangànaangna aka-aka ung màle pang ung masai‑mo.”

Kanabiangna Yesu ha nitarima‑i i Nasareꞌ

(Mrk. 6:1-6a, Luk. 4:16-30)

53Tòna ladu‑mo mampatidolu nasang rampeang to ti Yesu, kakarang‑mi se nai anto, 54pang mao i lipuNa. I anto mupaturo: i tamming kapinombaang, pang mimàha‑i se. Musuana‑mi se teꞌ, “Nai iaka‑da Na korai:‑i ti kamanaràngang pang kuasa mampukauꞌ kalle-kalleang te? 55Handei:‑Da naꞌ anakàna to tukang ti te? Handei: naꞌ Maria ti inanNa, pang mantàdi:-tàdiNa dea‑mo Yakobus, Yusup, Simon pang Yudas? 56Pang ha inne:‑i se ho naꞌ ti nasang mantàdi:-tàdiNa bahine? Oꞌ, nai iaka‑da Na korai:‑i ti nasangna te?” 57Na tumpaꞌna‑mi se ti Yesu.

Deanna‑mo to, musua: ti Yesu teꞌ, “Nabi na sangadi‑da tau iaka-aka. Hampoꞌ i tanandapoꞌna pang i lipuna, hari:.” 58Dea pùna hang mampukauꞌ‑i boso: kalle-kalleang ti Yesu i anto sàbaꞌ hang mupatongang‑i se.

Currently Selected:

Matius 13: skx

Highlight

Copy