Markus 13
13
Ala awi valekma masalarugwi wene
(Matius 24:1-2; Lukas 21:5-6)
1At Yesus Ala awi valekma akoma en wulu wagyaim, At ane welagwi menda ambi en, “Ngguru wai. Helep ombok inim, o valek inim, mondok sek yi hil okhanen, wi,” yiluk, vok yagagi.
2Vok iri lagagimu, At Yesus en iri dugwit, “O helep vaga valek yi iya helagwi ovara, helep ovaga dambuk ogarek iligik andi ambiat ogo dogosogonbuk. Ovok erogo masalarugwi o,” yiluk, yugeragagi.
Hivis anggin-mbanggin okninivup wene
(Matius 24:3-14; Lukas 21:7-19)
3Yugirigya lagagirik, hivis, Yesus ndom Saitun vaga hora iri lagagirik, Ala awi valek amor-amot werekma, it Peterus Yakobus inim, Yohanes Andereas inim, enadikmu en hemekhugu dugwit, 4“Nenowa. Hat yukneregen ako, o mera oklarimi? Anderogo ogarup yukneregen ako, horok ari wagya hegek, ninilup arup menda nenendawi dibaguluk nano ogagya hagup?” yiluk, yugogogwa.
5Yugugu lagagwama, At Yesus akoen, “Avakwa henendawi wokhinipu saoen henova hwalogo dogones. 6It avakwa wisane en An ninis vaga yagan wagu dugwit, ‘At Keretus ako andi, an aro,’ yiluk, avakwa wisane erogo enendawi woginuvusogom. 7Ndup silis bagwi, ndup sumbutwis, ogasagwi ovok henaruk hulumwi ovara, henalon habuk. Andi avyarat oklarisogon ovara, ‘Yi hivis arup ako vage ari wandiga o,’ yiluk, umbutu dogobuk. 8Ap ininis unggul adik-adik ndup sumbutwis, ap inis ombok ambi aori en ap inis ombok ambi aori inim ndup ombok ogagwi, ogarugup. Ogagusigik, o wadok ombok erogo iris, o yi awi ndi awi erom uvup agya, ogarugwi ako, akwa eneyak endaruguluk yavul wasagwi hak, anderogo wane-wane andi menda ovok erogo endak ogagya hagup o.”
9“Avakwa en it wene owak dilisagwima vakhiniviluk lagwi, Yakuri samban ogasagwima en nabirok vaga henatwis, okhinivugup atma, avakwa enendawima dibisiluk, henova hwalogo dogones o. Hiren adem An nane wagagup vaga, it ap ombok-ombok inim, ap ininis werek inim, enadema wokhenombolok lagup. Wokhenombolok laguselok, hiren ‘Yugeraup nanonggal aga o,’ yiluk, An ogagya neyagep ako sigam vagalogo yugeraup. 10O hivis ogarup ao hegek, Sek Wene yi endak akwa ap ininis unggul adik-adik menda ovok erogo yugeregek lagu dogop. 11Wene owak dilisagwima wokhenombolok laguselok, wene ngga yup henendawi anggin habuk. Hit henadik henendawi hobaluk yugeragupuk. Ata, o andi vaga At Averiniki en yukhirigya hegek yugeragup.”
12“Aswe en aswe-at warupwak yiluk, vagago wogirigya, asin en abut warupwak yiluk vagago wogirigya, eke enaburi en enasin-inisa inim ogot baluk inirupwak yiluk, wogurugwi, ogarugup o. 13Adem An nane wagagup vaga it avakwa ovok erogo enanggon-at henombarugup ovara, o hivis atok vaga henendawi wadokdek dogomwi halok, henagap wendakhinivugwi o,” yugeragagi.
Ala aburi enovaga anggin-mbanggin arup wene
(Matius 24:15-28; Lukas 21:20-24)
14 #
Daniel 9:27; 11:31; 12:11 yokhanes. Hit Ala wene dirup warek yi bikhelagwi menda andi, henendawi dibagu dogwes!
Yesus en iri dugwit “‘Agoda werek weyak okbisaliga menda,’ o mogama mendek hinil hugu dugwit, ‘Wi’ yiluk, it o Yudea agarwik menda hoda o ndom vaga andoma hwilaklari lapwak. 15Eke hoda wunggu dugwit, it o viril vaga ugun agarwik ako, enangge umwa ilim agarik ako, heda nunggubuk.” 16“It eneyavumu agarwik ako, eneyami vaga enasum enamwa hedalabuk. 17O andi hudi anggin iya agya halok, it akwa enavula inim, eneyak idak wogerelagwi inim, hoda wulup meyan atma, enabwa o! 18O soges mbeda ogagya haoen samban ogagu dogwes. 19At Ala yi menda ndi menda ogagagi hudien mbikit, yogak hudi avakwa enovaga anggin-mbanggin okbugu lagagwa ako andi, horok madugat okbugu lagagwa. Hivis ogo, madugat okbisasogom ovara, o andi hudi adik alonedok erek adigat anggin-mbanggin enovaga okbugu sagup o. 20O andi vaga Ala en anggin-mbanggin ako hudi balipuk en ap enagap mondok wendaklaklipuk ovara, avakwa mikbisiluk enogo bogogi ako enake hudi bagwi.”
21Yugirigya lagagirik, “O andi vaga ap ambien ‘Yokhanes, Keretus ako yoma agarik,’ eke, ap ambien ‘Yokhanes, Keretus ako andi ilumu agarik,’ yukhiruguselok, henendawi avyarat ombarubuk. 22It ninen huluk wene yukhirugu dugwit, ‘An Keretus aro,’ eke, ‘An navi Ala wene yukheraliga menda aro,’ yiluk, yagan wagu dogomundik, avakwa Ala aburi enogo bogogi ako enendawi wokhinivuguluk, enalon werek menda inim, nggarogo ogarubuk menda inim, ogarugup ovara, dek. 23Andi halok, henendawi suam watu dogwes. Ogarup ako ao ogagetek hegek, wene endak ovok erogo sigamat yukhirigi o,” yiluk, yugeragagi.
An Ap-At Endaklagagis ako warugwis wene
(Matius 24:29-31; Lukas 21:25-28)
24Yugirigya lagagirik, “O andi vaga anggin-mbanggin ako okbaluk,
‘Mo il hwis iris,
saut abya dek agya,
25 #
Yesaya 13:10; 34:4 yokhanes. dadiwap mbogot vaga en wema wambu wagya,
mbogot vaga enanye werek menda ako wadok-wadok iris,
ogarugwi o,’
26ogagya hegek, An Ap-At Endaklagagis ako mondok nabinak werek niris novagangge yikhedelok, nagayuk werek dugwit, hena anggelekma wambu wagya neyagup. 27Wagya dogogurik, it malaikat mbogot vaga yonggo nelagwi menda ako o adem venak-venak lakbugu dogogurik, An naburi enogo miginipigis ako o atok-atok andoma en wonggalogo bisaguluk warugup o,” yiluk, yugeragagi.
Yo widis wakhegek yugeragagi wene
(Matius 24:32-35; Lukas 21:29-33)
28Yugirigya lagagirik, ambi yugirigya dugwit, “Yo widis angga savuligiluk ogasiga ako wene henendawi dibas o. Elaklak vaga aruknuk mban iri dugwit, angga savuligiluk ogagya halok, ‘O vage hivi bagiluk ogagya higi o,’ yagalagwi ako hak, 29‘Anderogo ogarugwi o,’ yiluk, yukhirigi ako ogagya hinil hugu dogogupik, ‘Wi! Horok vanggo yagas atma, vage ari wagya higi o, yiluk, ombarugup.”
30“Hit avakwa yogak agipik yi, ao dek agetek hinigik, hivis ogarup avok yukhirigi ako, ovok erogo atma des iri hagup o, yiluk, avyarat yukheraliga. 31Mbogot inim, wen inim andi, dek arugwi ovara, An nane andi dek arisogonbuk mondok-at dogosogon o,” yiluk yugeragagi.
Enendawi suam watu dogop wene
(Matius 24:36-44)
32Wene ambi inim yugirigya dugwit, “An Ap-At Endaklagagis yi, o ngga hudi warup inim, mo il maren vaga warup inim, ako avakwa mondok ininggurat. It mbogot vaga nelagwi menda malaikat ogo, ininggurat. Eke An Ala abut ogo, ninggurat. Ilup andi, An Nasin Ala adigat agarik,” yiluk, yugeragagi.
33Yugirigya lagagirik, “O mera hudi oklarup andi hit hinunggut atma, henendawi dibagu dugwit suam watu dogwes o. 34Ap ambi o adumu lagiluk, ogagya dugwit, at ayeloman o malogo dogopwak yiluk, yavup adik-adik ogagu dogopwak yiluk enogo bugu, at sup mbanggutmu dogopwak yiluk, yugugu, ogarogo bisiluk wilisiga ako hak, 35at awi werek ako howam warimi a, hup agako warimi a, o yanggok swa ane irisim warimi a, mo nggao irisim warimi a, o andi vaga warisogon hinunggut atma, henendawi suam watu dogwes.”
36“At warisogon ako hit ambi ugun nogo yugusim supuk erogo wagya haoen, henendawi dibaluk, suam watu dogwes, 37yiluk, An wene henendawi suam watu dogop yukheraliga yi, avakwa ovok erogoat yugeraliga o,” yiluk, yugeragagi.
Currently Selected:
Markus 13: nbq2013
Highlight
Share
Copy
Want to have your highlights saved across all your devices? Sign up or sign in
