Markus 12

Yavup anggur awi yago malogo welagagwa wene

(Matius 21:33-46; Lukas 20:9-19)

1Yugirigya lagagirik, it imam-imam enasini inim, it Ala wene vagago welagagwa menda inim, it ap ombok-ombok inim Yesus en wene il wakhegek yugeragagi. Yugirigya dugwit, “Ap ambien anggur awi yakbaluk, leget wigya, owangga mbetalogo yanggadumenda walup mendagya, eke, suam watu dogopwak yiluk, mbeda leyanggya, okbagya lagagirik, enggen mbalek ako nin it hidugwi, nin at wogugwis, ogagu dogopwak yiluk, at eyavup yago ako ap malogo dogomenda mondok okbisiluk, o adumu hunogoma lagagi.”

2“Lagya lagagirik, andoma dugwit, anggur enggen yugup ako mbalup amor agya lagagimu, it at eyavup malogo dogopwak yiluk bisiluk lagagi akoen enggen yugup nin at angge ako mbalogo woknirupwak en yiluk, at ayeloman ambi enadema lakba wagagi. 3Lakba wagagi ako wagya lagagimu, it at eyavup malogo welagagwa akoen at ayeloman ako vakbaluk, yo yawi vaga wakbagu lagagwarik, enggen wogigitek un ovadik eyami vaga lakbagagwa. 4Warogo lakbagu lagagwama, hivis avoloma ayeloman ambi enadema lakba wagagi. Lakba wagya lagagimu, it akoen yo yawi vaga unggul nggagalogo wakbagu lagagwarik, anggadi watugwa. 5Anggadi wakbagu lagagwama, amwa lagya lagagimu, ambetaga ambi lakba wagagi. Wagya lagagimu, mondok watu lagagwama, andi okbaluk, iya erogo lakbisa wagagirikmu, it akoma en nin un yo yawi vaga initwis, nin mondok min-at initwis, ogarit lagagwa.”

6“Ovok initu lagagwama, abut ambiat endawi hunik ako lakbagetek, iperen welagagwarik, ‘An nabut yi, agayuk wutu dugwit, hai warogo wasogom ai,’ yiluk, enadema lakba wagagi.”

7“Lakbagagi wagya lagagimu, it at eyavup yago malogo welagagwa akoen ir-it wene mbanggu dugwit, ‘Abut mavorangge hedaup yi atma, mondok wakbaluk, mavorangge nirat hedasogom o,’ yiluk, yagagwa. 8Yugu lagagwarik, eyave vakbaluk, watu lagagwarik, wolok anggur yavup ogarekma leget weram andoma-at bawunggugwa,” yiluk, wene andi At Yesus en wakhegek yugeragagi.

9Yugirigya lagagirik, “At it enasin awen werek akoen nggarogo oginivisogon embetep? At wagya dogomindik, yavup malogo welagagwa ako enarogo bisiluk, enavoloma ap adik menda malogo dogopwak yiluk, mondok bisayogon o. 10-11#Mazmur 118:22-23 yokhanes. Ala wene dirup warek ambi yi:

“It helep vaga o valisagwi menda akoen o vanggu dugwit,

helep ambi mbobagagwa ako andi,

mondok-mondok helep owak ndalaga o.

Nenasin Inis Ombok en ogagagi atma,

mondok iya adigat hugu lagurik,

‘Wi!’ yiluk, vok yagalagwi o,’

yiluk, Ala wene dirup warek ako hinil hegetek dugwit, yagalagwi?” yiluk, yugeragagi.

12Yugirigya lagagimu, it imam-imam enasini inim, it Ala wene vagago welagagwa menda inim, it ap ombok-ombok inim, enaruk hunggu lagagwarik, “Wene wakhegek yi nit niniselok, yagaliga ai,” yiluk, yedok hugu lagagwarik, vagaruguluk ogagagwa ovara, avakwa wisane iniselok, enalon en hekbaluk lagagwa.

Ap Kaisar ake baup wene

(Matius 22:15-22; Lukas 20:20-26)

13Hekbaluk, lagu lagagwarik, it Varisi menda nin inim, it Herodes menda nin inim, Yesus ane yupum-ndupum iri halok, andi vaga yidilogo baguluk lakbogogwa. 14Lakbogogwa ako, At Yesus adema wagu lagagwarik, “Ngguru wai. Hat andi avyarat adigat ogasiga menda atma, Haren ap enelosema dombabigitek, ambi iya ambi meyan embetetek dugwit, Ala wene avyarat des erogo yugirigya heyagyo. Ap inis ombok Pemerintah Oroma enasin Kaisar andi ake yoparip pajak baup sek a, weyak a? Hekbaup sek a, weyak a? Haren yukneran!” yiluk, yugogogwa.

15Yugugu lagagwama, it enendawi enagavoval ovagak dugwit yugwi ako yedok inugu lagagirik, “Nggarogo yiluk, ‘At yagaliga vaga yidilogo basogom,’ umbutu dugwit, yuknisagwi? Yoparip enggen mbusi ambi An nil hagiluk, wokneres.”

16Yugirigya lagagimu, wogogogwa. Wogugu lagagwama, At akoen “Elese ovagak ogarek inim, inis dirup warek inim, sa helagwi?”

Yugirigya lagagimu, it akoen, “Dek o. Andi Kaisar aro,” yiluk, yugogogwa.

17Yugugu lagagwama At Yesus akoen, “Andi halok, Kaisar angge halok andi, Kaisar-at wogugwis, eke, Ala angge halok andi, Ala-at wogugwis, ogagu dogwes o,” yiluk, yugirigya lagagimu, it akoen “Wi” yiluk, vok yagagwa.

Avakwa hambisagwi ako, “Hivis iniluk arusogom a, dek a,” yiluk, yugogogwa wene

(Matius 22:23-33; Lukas 20:27-40)

18Vok yugu lagagwama, it Saduki menda ako, avakwa hambisagwi menda andi iniluk erogo mendok yusogombuk yagalagwi menda en Yesus adema wagu lagagwarik, hemetu dugwit, 19#Ulangan 25:5 yokhanes. “Ngguru wai. At Musa en dirup watya dugwit, ‘Ap ambi hwa wokbaluk abut endagetek dugwit hambigya halok, at owa avoloma, aburi endarupwak yiluk, at owa sogwa ako at aot en hedapwak,’ yiluk, dirup watigirikmu, 20ap ambi aburi eneyave 7 endaginipigirikmu, at manggum ako hwa ambi wigya lagagirik, abut endagetek dugwit, hombagagi. 21Hambigya lagagimu, at aot manggum ambetaga menda en hwa ako wigya lagagirik abut endagetek dugwit hombagagi, hambigya lagagimu, at aot ambetaga menda ambi wogogi ako, anderogoat endagetek dugwit hombagagi.

22It eneyave 7 ako enaburi endaginipitek dugwit, adigat hombagagwarikmu, at hwa ako ogo eyave hivis hombagagi. 23It ap eneyave 7 ako hwa ako wugwi, hambugwi, adigat ogagu lagagwarikmu, avakwa hambuluk iniluk erogo mendok okbisaup hudi vaga, hivis ap sa ogwa arisogon ombasiga?” yiluk, yugogogwa.

24Yugugu lagagwama, At Yesus en, “Hit Ala wene dirup warek inim, At Ala anye inim, dibagetek dugwit, wene andi, adik hunogo umbutu dugwit yagalagwi? 25Hivis avakwa hambuluk lendagwima en iniluk erogo mendok okbisagwi andi vaga, ap en akwa woginipwis, akwa en ap woginipwis, ogagu dogogupuk. It malaikat mbogot vaga agarwik ako ovagak dogogup o. 26#Keluaran 3:6 yokhanes. Eke, it avakwa hombagagwa ako iniluk erogo mendok okbisayogon ako andi, mbuku Musa wene warek yo aik werek adema hali abya hagagi wene ako vaga Ala en Musa yugugu dugwit:

‘Hat hombawi Averakam inim, Isak inim, Yakup inim, Enasin Inis Ombok Ala An aro,’

yagagi, dirup watigi ako yokhegetek agipik yi? 27At Ala andi, it ap hambuluk dek asagwi menda Enasin Ala dek o. Ata, it avakwa hambuluk iniluk agarwik menda Enasin Ala aro, yiluk, hit henendawi apik hinisaliga o,” yiluk, yugeragagi.

“Wene adem ombok eve yi,” yiluk, yugogogi wene

(Matius 22:34-40; Lukas 10:25-28)

28Yugirigyama, ap Ala wene vagago welagagi menda ambi enadema wagagi. Wagya lagagirik, it wene mbanggwis aruk hobaluk, At Yesus en wene onggo sek erogo yugirigya il higya lagagirik, “Yesus wai. Ala wene yerogo ogarup, nderogo ogarup avok wene ovok dambulik yukneragagi ako, wene adem ombok ngga haliga?” yiluk, hemethagagi.

29Hemethigya lagagimu, At Yesus en yugugu dugwit, “Wene adem ombok ako yi o:

‘Hit ap Iserali yi, henaruk sek erogo hunggu dogwes o.

Nenasin Inis Ombok Ala andi, Ala ambiat agarik.

30 # Ulangan 6:4-5 yokhanes. Heneyave henanye inim, henendawi henanggela inim,

ovok erogo Henasin Ala adigat henendawi hunik ogagu dogwes,’

wene adem ombok ako andi, andi aro. 31#Imamat 19:18 yokhanes. Eke, wene aswe ambetaga andi:

‘Hit heneyave henendawi hunik okhedelagwi ako hak,

it hinim agipik ogo anderogoat henendawi hunik oginipu dogwes o,’

yiluk, wene mberen yagagi yi nin ambi iya erogo agarikbuk o,” yiluk, yugogogi.

32Yugugu lagagimu, at Ala wene vagago welagagi menda akoen, “E o Ngguru. Segat yegen. Ala ambiat agarik. Ala adik ambi mondok dek. 33Eke, neneyave nenanye inim, nenendawi nenanggela inim, ovok erogo Nenasin adigat nenendawi hunik dogop. Neneyave nenendawi hunik okhedelagwi andi hak, ninim agurik ogo anderogoat nenendawi hunik oginipu dogop andi, mondok ombok. Ala anggom warogo hali ovok napwak yiluk, hali hunbagwi, Ala ake bagwi, ovok erogo ogasagwi andi, horok maduk atma, Hat yegen andi avyarat,” yugogogi.

34Yugugu lagagimu, At Yesus en ap ako endawi werek en iri higya lagagirik, “Hat heyave Ala avema vanggabetaliga higi o,” yugugu lagagimu, it ovok akoen, ambi inim At hemethaup enalon en mbup yagagwa.

“At Keretus andi sa?” yugeragagi wene

(Matius 22:41-46; Lukas 20:41-44)

35At Yesus ako Ala awi valekma andoma en, Ala wene ambi inim mamulirigya dugwit, “It Ala wene vagago agarwik menda akoen ‘At Ala en enogo lakba wagagi Keretus ako andi, Daut ombao,’ yagalagwi andi, nggarogo yiluk yagalagwi ombasagwi?” yiluk, 36#Mazmur 110:1 yokhanes. “O endak, At Daut Averiniki endawima en iri dugwit:

‘At Nenasin Inis Ombok en an Nasin Inis Ombok yugugu dugwit:

“It hinim ndup ogorek menda, An sovalogo havema bigitek neyagek,

An ninggis amotkan hora yima,”’

yiluk, at Daut en yagagi. 37yiluk, yagagi. At Daut adik en iri dugwit, ‘An Nasin Inis Ombok,’ yagagi ako halok andi, nggarogo yiluk hiren Mesias andi Daut ombao menda yagalagwi? Anderogo yup meyan o,” yiluk, yugeragagi.

It avakwa wisane homago akoen wene iris ako enendawi mondok sek umbutugwa.

“It Ala wene vagago agarwik menda henambukmu unggu saoen, suam watu dogwes,” yugeragagi wene

(Matius 23:1-36; Lukas 20:45-47)

38Enendawi sek umbutusim, mamulirigya dugwit, “It Ala wene vagago agarwik menda ako henambukmu unggu saoen, hit henendawi suam wakhidugu dogwes. Enasum adup segedok yikbetaluk, avakwa pasar ogasagwima andoma en vok yuknerapwak yiluk nagwis, 39it Yakuri samban ogasagwima akoma ap ombok-ombok hora yagalagwima hora yugwi, isogo isagu dugwit, ap ombok-ombok hora yagalagwima hora yugwi, ogarup adigat enendawi sek ombasagwi. 40It ap andi en, akwa sogwa enangge dek okbugwis, avakwa iya nenombarupwak yiluk, samban adup erogo ogagwi, ogasagwi andi vaga it avakwa nin enomaduk onggo horogat enovaga bugu dugwit, it ap andi ako, enomaduk onggo ombok erogo enovaga bisayogon,” yiluk, yugeragagi.

Hwa sogwa en Ala ake bagagi wene

(Lukas 21:1-4)

41Yugirigya lagagirik At Yesus Ala awi valekma yoparip belagwima akoma horaik dugwit avakwa wisane yoparip belagwima, bawagwi il inigigi. It ap ininggis werek menda yoparip wisane bagusigik, 42hwa sogwa ambi inggidek menda yoparip mbusi enggen mariduk mberen Ala ake belagwima bagya hagagi. Ako andi seratus angga ndatak bagagi.

43-44Bagya il higya lagagirik, Yesus At eyaganggom enadoma “Omanes,” yugirigya lagagirik, wagu lagagwama yugirigya dugwit, “Dibas! It avakwa enangge wisane hegek bawagao ovara, hwa sogwa inggidek menda yi, at agarom hunogo naup dek hegek ovok erogo betagarikmu, it avakwa ininggis werek menda un horok madugat bagao ovara, at hwa sogwa anggedek dugwit bawaga yi andi, eve ombogat bagas o,” yiluk yugeragagi.

Currently Selected:

Markus 12: nbq2013

Highlight

Copy