Markus 11
11
Yesus o Yerusalem nonggagagi wene
(Matius 21:1-11; Lukas 19:28-40; Yohanes 12:12-19)
1At Yesus inim lagagwa ako o Yerusalem horok ari lagu dugwit nungguguluk, o Betepage inim, Betania inim, ndom Saitun andi avema ari lagagwarik, andoma en At ane welagwi menda eneyave mberen lakbugu dugwit, 2“O valekma akilisim ari lamwira, wam keledai eyak ap ao ovaga hora yegetek menda ambi hugu dogomundik, yunggwi yidugup akom veralogo wolok omano. 3Eke, it avakwa andoma en, ‘Hit nggarogo yiluk wam keledai veralisagwi,’ yukhiruguselok, hiren ‘Nit Nenowa wam keledai hogop en, “Walales o,” yukneragamu, wolok lagu dogomundik, avoloma bawarusogom,’ yiluk, yugerano,” yiluk, yugeragagi.
4Yugirigya lagagimu, it ako lagu lagagwarik, wam keledai eyak mbanggutmu sup alilimu yunggwi yidugup inil hugu lagagwarik, veranggu lagagwama, 5it ap andenam un mendek werekma, “Hit wam keledai eyak nggayok ogaruguluk veralisagwi?” yugeragagwa.
6Yugurugu lagagwama, it akoen At Yesus en anderogo yugerano yugeragagi akoat yugurugu lagagwama, iren “E o,” yiluk, yugu lagagwama, wolok lagagwa. 7Wam keledai ako wolok Yesus adema lagu lagagwarik, it ako enasum sogwesum nggolalogo wam keledai ambot vaga ndabagu lagagwama, Yesus ako andi vaga hora yagagi. 8Hora iri lagagimu, avakwa wisane enasum sogwesum mbigalogo sup ombok vaga ndalit lagwi, it ninen yoangga-hedangga yavup wadimu en mbalogo ndalit lagwi, okbaluk, 9#Mazmur 118:25-26 yokhanes. At ako lagya hegek, it nin enendak lagwi, nin ambetaga lagwi, ogarit lagu dugwit,
“Hosana!” #11:9: Nit nenane vaga andi, “Wa, wa!” yiluk, yugu lagagwa.
“Nenasin Ala inis vaga wandiga yi,
inis siyabelagwi o!”
10“Nenombao Daut avema sek welagagup ako wane-wane, At avema bininagiluk wandiga atma,
inis siyabelagwi o.”
“Ala o mbogot vaga winimen agarik ako,
wa, wa, hosana,”
yiluk, amitmit yagan lagagwa.
11Amitmit yagan o Yerusalem nunggugu lagagwarik, Ala awi valekma nonggagagwa. Nunggugu lagagwarik, At Yesus ako yi menda ndi menda yenaga wegek nagu hegek, o hup agya halok it ap 12 menda ako inim, eneyami vaga o Betania lagagwa.
Yesus en yo widis vudilogo bagagi wene
(Matius 21:18-19)
12Nogo yikbaluk, hutun o Betania en suvaga lagu dugwit, Yesus erom uvup ogagagi. 13Ogagya lagagimu, andenam en yo widis #11:13: Yo widis andi, Indonesia enane vaga yo ara yagalagwi. Eke, yo ara andi yo widis wane-wane ovara enggen ai weyak. ambi angga savulik il higya lagagirik, yo ako enggen yugup a, dek a, yiluk adema ari lagya lagagirik, enggen yugubeda ao ari wagatek atma, angga adigat hagagi. 14Angga adigat halok, yo ako yugugu dugwit, “Yogak yi hudien, hat henggen avakwa ambi nunggu dogosogom mondok dek o,” yugugu ako At ane welagwi menda en enaruk hunggugwa.
Yesus en Ala awi valekma en haryogo wibogogi wene
(Matius 21:12-17; Lukas 19:45-48; Yohanes 2:13-22)
15At Yesus ane welagwi menda inim o Yerusalem ari lagu lagagwarik, Ala awi valekma mbumbumu nunggwigya lagagirik, it Ala awi valekma yi menda ndi menda onggo hunggik yagalagwi menda akoma, haryogo wibugu dugwit, it yoparip onggo-onggo ogagu lagagwa menda ako, enameja ndalek inim, it swa suwa onggo hunggu lagagwa menda, enombanggu horaik agarwik menda inim, avut endenogo mbombo hagagi. 16Mbombo higya lagagirik, “Hit Ala awi valekma yoma, yi menda ndi menda wolok nunggugwi, wunggwis, ogarubuk,” yugeragagi. 17#Yesaya 56:7; Yeremia 7:11 yokhanes. Yugirigya lagagirik, wene mamulirigya dugwit,
“An nawi valek yi, yi ap ndi ap ininis unggul adik-adik menda en,
‘Samban ogasagwima yiat,’
yugu dogosogom o,”
yiluk, yagagi dirup warek agarik akora? Dirup warek agarik ovara, o yi, hiren, ap enonggop wokbaluk, hwilaklari nunggwisagwima ovagak ogagep o,” yiluk, yugeragagi.
18Yugirigya lagagimu, it avakwa ovok homago ako Yesus wene mamulirigya ako vok yuguselok, it imam-imam enasini inim, it Ala wene vagago welagagwa menda inim, Yesus yagagi ako enaruk hunggu lagagwarik, enalon agya dugwit, “Nggarogo heda okbaluk warup embetep,” yiluk, avok mbinggugwa.
19O andoma en, howam agya lagagimu, At Yesus ane welagwi menda inim, o Yerusalem en wunggugwa.
Yo widis mbuk agagi wene
(Matius 21:20-22)
20Wunggu lagagwarik, nogo yiluk, hutun suvaga lagu dugwit, yo widis ako omanggen inim, eyave inim, ovok erogo mbuk agagi inil hagagwa. 21Inil hugu lagagwarik, Peterus en yo yugugu hagagi ako, ape wenggelagya dugwit, “Nasin Ngguru wai. Yo widis vudilogo bagen ako ovok mbuk aga yi, hil yokhanen.”
22Yugugu lagagimu, At Yesus en iri dugwit, “Henendawi Ala ovaga vanggabaluk, avyarat umbutu dogwes. 23Henendawi yunggup yegetek, henane yagalagwi andi ndatak arisogon avyarat umbutu dugwit, ‘Ndom ombok yi legogo inamutmu nunggwilak,’ yugu hiniselok, anderogoat oklagya hasogom o, yiluk, avyarat yukheraliga. 24Andi halok, hit samban ogagu dugwit, yi menda ndi menda Ala nggino yugugu dugwit, ‘Vage hedigi o,’ yiluk, avyarat ombasagwi andi vaga wokhirigya hasogom. 25Hit mendek yiluk, samban ogagu dugwit, ap ambi inim ogorek agipik halok, Henasin mbogot vaga agarik akoen, hit weyak menda degerogo bigigapwak yiluk, at inim ogorek agipik ako weyak menda andi hiren hinunggut akluk dogwes o,” yiluk, yugeragagi. 26Eke, hiren avakwa enomaduk hinunggut erogo bigitek hiniselok andi, Henasin en hit henomaduk inggut erogo bigigayogon mondok dek o,” yiluk, yugeragagi.
Sa inis vaga ogasiga? yugogogwa wene
(Matius 21:23-27; Lukas 20:1-8)
27Andien, o Yerusalem nunggugu lagagwarik, At Yesus ako Ala awi valekma nunggwigya lagagirik, andoma naguma, it imam-imam enasini inim, Ala wene vagago welagagwa menda inim, it ap ombok-ombok inim, At adema wagu lagagwarik, 28“Hat yi ogagek ndi ogagek ogasiga ako sa inis vaga ogasiga? Saen yukhogogirikmu ogasiga?” yiluk, yugogogwa.
29Yugugu lagagwama, At Yesus en iri dugwit, “An ogo, ambi hemekhinisayogon. Onggo yuknugu hiniselok andi, sa inis vaga ogasiga ako sigam erogo yukherayogon.” 30Yugirigya lagagirik, “At Yohanes ima wombabugu lagagi andi, Ala mbogot vaga menda en yugogogirikmu wombabugu lagagi a, ata avakwa en yugogogwarikmu wombabugu lagagi a? Hit yukneres!” yiluk, yugeragagi.
31Yugirigya lagagimu, ir-it wene mbanggu dugwit, “Niren, ‘Ala mbogot vaga menda en yugogogirikmu ima wombabugu lagagi o,’ yugu niniselok, Aren iri dugwit, ‘Eke, andi halok, hit hinilup helan, nggarogo yiluk hit henendawi At avyarat embetetek welagagup,’ yiluk, yuknerayogon. 32Eke, niren ‘Yohanes andi avakwa en yugogogwarikmu ogagagi o,’ yup andi nggarogo yup erek,” yagagwa. It ‘Nggarogo yup erek’ yagagwa andi, it avakwa ovok erogo en Yohanes andi navi Ala ane yugeraliga menda avyarat umbutugwa atma, enalon wisane welagagwa. 33Andi halok, irenen Yesus yugugu dugwit “Nit ninunggut o,” yiluk, yugogogwa.
Yugugu lagagwama, Yesus en “Andi halok, An ogasiga yi ogo, saen yuknogogirikmu ogasiga andi yukherayogonbuk,” yugeragagi.
Currently Selected:
Markus 11: nbq2013
Highlight
Share
Copy
Want to have your highlights saved across all your devices? Sign up or sign in
