Markus 10
10
Ap hwa hekbiselagwi wene
(Matius 19:1-12; Lukas 16:18)
1Yugirigya lagagirik, o andoma hekbaluk, sup o Yudea vaga en is Yorodan mbalogo elavikit lagagi. Lagya lagagirik, avakwa iya erogo At adema homari wagagwarikmu, At wene mamuleraliga ako wane-wane, mamuleragagi.
2Mamulirigyaim, it ap Varisi menda ako At adema wagu lagagwarik, avut mbaluguluk yugugu dugwit, “Ap ambi ogwa wogoma ‘Nanggon o,’ yiluk, hekbaup andi moga a, dek a?”
3Yugugu lagagwama, At Yesus en iri dugwit, “Musa en wene nggarogo yukheragagi?” yiluk, yugeragagi.
4 #
Ulangan 24:1 yokhanes. Yugirigya lagagimu, it akoen yugugu dugwit, “At Musa en, ‘Ap en at ogwa hekbaguluk, “Hat hwa yi an nanggon, yiluk, hekbagaliga,” wene dirup warogo wogirup halok andi, ndak hekbaup,’ yiluk, yagagi.”
5Yugugu lagagwama, At Yesus en, “Henendawi lakot hiniselok, wene andi dirup warogo yukheragagi ovara,
6 #
Kejadian 1:27; 5:2 yokhanes. ‘At Ala en o endak yi menda ndi menda ogagya dugwit, ap ogagya, hwa ogagya,’
ogagagirikmu, 7andi halok,
‘Ap en asin-isa hekbisiluk ogwa iperen eneyave ambiat akluk,
8 #
Kejadian 2:24 yokhanes. it eneyave mberen ovara
ambiat arusogom o,’
Ala wene dirup warek atma, it eneyave mberen dek, ambiat dogosogom. 9Andi halok, At Ala en mondok-mondok hondabigigirikmu, avakwa en weralogo bisaup andi, mondok moga o,” yugeragagi.
10Yugirigya lagagirik, umwa nunggwigya lagagimu, At ane welagwi menda akoen wene yugeragagi ako, ambi inim hemetugwa. 11Hemetu lagagwama, Yesus en yugirigya dugwit, “Ap en ogwa hekbaluk, hwa adik ambi hidigya halok, ap en hwa endak ako alyak waliga. 12Eke, hwa en agun hekbaluk ap adik ambi hidigya halok andi, hwa en agun endak ako alyak waliga,” yiluk, yugeragagi.
Yesus en avyak mariduk adenggen enovaga bogogi wene
(Matius 19:13-15; Lukas 18:15-17)
13Yugirigya lagagimu, avyak mariduk At Yesus inggis inunggul vakbisiluk enadenggen enovaga bisapwak yiluk, At adema woginiviluk wagu lagagwama, At ane welagwi menda en avakwa ako mbereragagwa. 14Mberirugu lagagwama, At Yesus en aninis wisane agya lagagirik, “Hekbisines! Ala avema dogop andi, it avyak mariduk yerogo hak atma, An nadema wagusim moga yugerabuk. 15Dibas! It avyak mariduk Ala avema dogopwak yiluk nunggwisagwi anderogo hak, hit anderogo nunggegetek hiniselok andi, nunggusogom dek o,” yiluk, yugeragagi. 16Anderogo yiluk yugirigya lagagirik, avyak mariduk ako elola okbugu lagagirik, inggis inunggul vakbisiluk, adenggen enovaga bogogi.
Ap inggis werek wene
(Matius 19:16-30; Lukas 18:18-30)
17Enovaga bugu lagagirik, sup ambi inim lagiluk ogagya lagagimu, ap ambi At adema vupuk wagya lagagirik, erambo yunggubaluk Yesus yugugu dugwit, “Ngguru. Hat sek adigat agindik yi, Hat sek adigat agindik yi, an mondok-mondok niluk dogogiluk, nggarogo ogarik?” yiluk, yugogogi.
18Yugugu lagagimu, At Yesus akoen, “Nano yiluk An sek adigat agirik yiluk yuknigin? Ap ambi sek adigat agarik andi dek, Ala adigat sek agarik,” yugugu lagagirik, 19#Keluaran 20:12-16; Ulangan 5:16-20 yokhanes. “At Ala en wene yagagi ako hat ovok hilup.
‘Ap warup moga.
Ap ogwa werek hegek, hwa agun werek hegek, ogarup moga.
Ap enangge enonggop waup moga.
Henane huluk avakwa enovaga bisaup andi moga.
Ap enangge nomalup moga.
Hinisa-henasin enagayuk wutu dugwit, enane des erogo hunggu dogwes o,’
20yugugu lagagimu, at akoen, “Dek o, Nasin Ngguru. Wene andi an madukma en des erogo ogagya lagagis,” yiluk, yugogogi.
21Yugugu lagagimu, At Yesus il vu erogo yokhigya lagagirik, abwa imbita dugwit, “Wene ambiat andi ao ogagetek heyagi. Hat hangge ovok erogo onggo hunogo it ap ininggidek menda ako wogerelak. Wogirigya heyalok, hat hangge eve sek menda andi hivis mbogot vaga en ombogat hedayogon. Anderogo ovok wogirigya dogomindik, ninim nagu dogoguluk, omano,” 22yugogogi ovara, at angge-angge wisane ako vaga endawi hunik atma, wogeraup anggon imbita dugwit, endawi mondok wakhedegek amwa lagagi.
23Lagya hegek, At Yesus ako il ambukmu dagalogo, At ane welagwi menda ako yoginipu dugwit, “It ap ininggis werek menda ako, At Ala avema bisaligama andi nggarogo nunggup erek higi o,” yugeragagi.
24Yugirigya lagagimu At ane welagwi menda en vok yugu lagagwama, At Yesus en yugirigya dugwit, “Naburi. At Ala avema bisaligama andi nggarogo nunggup erek higi o.” 25Yugirigya lagagirik, “Wam unta eyave ombok hegek, yarum elo maduk vodalek andi nunggup ndagat ovara, ap ininggis werek halok andi, Ala avema bisaligama nggarogo nunggup erek higi o,” yugeragagi.
26Yesus ane yagagi ako enaruk hunggu lagagwarik, vok yugu dugwit, “Andi halok, it sani enagap wendarimi?” yiluk, yugogogwa.
27Yugugu lagagwama, At Yesus en il yoginugu dugwit, “Anderogo ogarup ako, it avakwa en ogarup mondok meyanat ovara, At Ala en andi, yi menda ndi menda ovok erogo sek adigat ogarup haliga.”
28Yugirigya lagagimu, at Peterus en iri dugwit, “Nita, yi menda ndi menda ovok erogo hekbaluk, Hat hinim nagu dogoguluk wagyo atma,” yiluk, yugogogi.
29Yugugu lagagimu, At Yesus en, “An wene avyarat ambi yukherayogon o. An ninis inim, Sek Wene ako inim, ombok arupwak yiluk, henawi valek inim, henowa-henaot inim, henasin-hinisa inim, henaburi inim, heneyavup ogarek inim, ovok erogo hekbisiluk wagu hiniselok, 30yogak avoloma henawi valek inim, henowai-henaori inim, hinisai inim, heneyavup ogarek inim, 100 hudi hedasogom ovara, hegek, avakwa en anggin henovaga bigigasogom. Eke, hivis atok vaga mondok-mondok hiniluk dogosogom o,” 31yugirigya lagagirik, “Ap wisane enendak lendagwi ako andi, hivis arusogom. Eke, hivis lendagwi ako andi, enendak arusogom,” yiluk, yugeragagi.
Yesus ambi inim “An narusogom o,” yugeragagi wene
(Matius 20:17-19; Lukas 18:31-34)
32Yesus At ane welagwi menda ako inim o Yerusalem suvaga lagu dugwit, At Yesus endak lagyaim, it At eyaganggom ako enendawi anggin agya, it avakwa nin enambetaga lagagwa ako enalon agya, agya lagagimu At Yesus en ambi inim it ap 12 ako enadikmu wogonombolok lagya lagagirik, At hivis nano arup wene akoat yugeragagi. 33Yugirigya dugwit, “Avyak. Nit ako vage Yerusalem dagasagwi atma, An Ap-At Endaklagagis ako, neyave vagarogo, it ap imam-imam enasini inim, it Ala wene vagago agarwik menda inim, woguruguselok, it ap akoen narupwak yiluk, wene yusogom o. Wene yugu dogomundik, it ap weram Yakuri dek menda wogerasogom. 34Wogurugu dogomwima nanggadi wakbanunggwi, enowaris novaga suvurogo banunggwi, nabirok nggotalogo natwis, okbaniluk, mondok narusogom. Natu dogomwima, ndugwis mberen dukluk ndugwis ambi vaga niluk akluk mendek yisogon o,” yiluk, yugeragagi.
Yakobus Yohanes mbereragagwa wene
(Matius 20:20-28)
35Yugirigya lagagimu, at Sevedius aburi, Yakobus Yohanes iperen At Yesus adema wagu lagagwarik, “Ngguru wai. Nit nenendawi wenggebaluk, yukhurusogom andi okbininanok yiluk, wagyo,” yugogogwa.
36Yugugu lagagwama, At Yesus en, “An nggarogo okbigigapwak yiluk wagep?” 37Yugirigya lagagimu, it akoen “Hat hivis hiris hovagangge yikhedelok wagya heyalok, nit Hat hinggis venak-venak vaga horakbininanok yiluk, yukhiri wagyo,” yiluk, yugogogwa.
38Yugugu lagagwama, At Yesus en, “Hit nggino yuknisagwi andi, hinunggut dugwit nggino yuknisagwi. An nagas nudik nayogon andi, hit hinim naup sek embetep? An anggin-mbanggin okbanusogom ako andi, hit hinim okbigigaup sek embetep?”
39Yugirigya lagagimu, it akoen, “E o. Ninim naup andi sek aro,” yugugu lagagwama, At Yesus en iri dugwit, “An nagas nudik naup hit ninim naup-at. Eke, An anggin-mbanggin okbanusogom andi, hit hinim okbigigaup ovara, 40neyave venak-venak bigigaup andi, Anen okbigigayogonbuk. An neyave venak-venak horakbisaup ako, Nasin en o muk erogo enogo bogogi ako adigat Aren okbisayogon o,” yiluk, yugeragagi.
41Yugirigya lagagimu, it eneyave 10 ako enaruk hunggu lagagwarik, it Yakobus Yohanes mbereragagwa. 42Mbereragagwa ovara, At Yesus en it ovok erogo yanggup yugeragagi, wagu lagagwama, yugirigya dugwit, “It avakwa weram menda enasini vagenombogo agarwik andi, avakwa enavema sovabugwis, eke, it enasini ap ombok en yerogo ogarup, nderogo ogarup enane anye vaga yugurugwi, ogasagwi hinilup ovara, 43-45hit andi anderogo ogarup moga. An Ap-At Endaklagagis yi, hiren An nake ogagu dogovovok yiluk, wagatek. Ata, Anen hit henake ogagya dugwit, hit avakwa wisane An henake hambisogon vaga henonggo mbabaluk, heda visilogo bigigagiluk wagagis ako wane-wane, hit ap yi ambi ombok arup ombasagwi halok, enayelomanat arupwak. Hit ambi en, ‘An nendak ap ombok dogosogon o,’ imbita halok andi, at henavema dugwit, henake ogagya dogopwak,” yiluk, yugeragagi.
Yesus en Batimeus il sek ogagagi wene
(Matius 20:29-34; Lukas 18:35-43)
46Andoma en, it ako o kota Yeriko ari lagagwa. Hivis, Yesus At eyaganggom inim, avakwa wisane inim, o andoma en wunggusim ap ambi il mbuk ambenggino yagaliga menda suvaga horaik welagagi. Ap ako inis Batimeus, at asin inis andi Timeus. 47At Yesus Nasaret menda wandiga, aruk hunggu lagagirik, “Yesus wai. Daut ombao wagen yi, an nabwa hanen,” yiluk, ane ombok erogo yugogogi.
48Yugugu lagagimu, it avakwa en mbup yupwak yiluk, mberogogwa ovara, hegek, aren iri dugwit, “Daut ombao wai. Nabwa nombaru o,” yiluk, ane ombok vaga ambi inim yugigik adigat ogagya lagagimu, 49At Yesus ako mbup iri dugwit, “Eyanggup eres,” iri lagagimu, iren ap il mbuk ako eyanggup yugugu dugwit, “Heyanggup yukhisigama, hendawi sek vaga mendek iru,” yiluk, yugogogwa.
50Yugugu lagagwama, asum sogwesum menda nggolalogo hekbaluk, yiluguluk mondok iri lagagirik, Yesus adema wagagi.
51At adema wagya lagagimu, At Yesus en, “An hat nggarogo okbanupwak yiluk, embeten?” Yugugu lagagimu, at il mbuk akoen, “Nasin ngguru, nil sek okbaninok yiluk, yukhisiga,” 52yugugu lagagimu, At Yesus en, “Hat hendawi avyarat nembeten ako vaga, hil sek agindikmu, hamwa elak.”
Yugugu lagagimu, il mbuk welagagi ako sek agya lagagirik, At Yesus inim suvaga lagagwa.
Currently Selected:
Markus 10: nbq2013
Highlight
Share
Copy
Want to have your highlights saved across all your devices? Sign up or sign in
