Lakbogogi Wene 8

1At Saulus ogo Sepanus wasagwi andi segat imbitigi.

Saulus en Ala aburi anggin-mbanggin oginivit lagagi wene

Eke, at watugwa andi hudi, it Ala aburi o Yerusalem welagagwa ako, iniruguluk, anggin-mbanggin eve iya erogo oginivit nagu lagagwama, it ovok o Yudea Samaria avilis ambot andoma hoda sak yagan lagagwa ovara, it lakbigik menda ako hoda winggitek enamwa mbup yagagwa. 2Eke at Sepanus ako watu lagagwama, it ap Ala enalon ombasagwi menda en Sepanus warek ako wolok hambuguselok, bisa lendagwima balagu lagagwarik, abwa en, ayup ombok erogo yagagwa.

3Ayup yagusigik ovara, at Saulus en it Ala aburi ako ap inim akwa inim dek okbisilin lagya dugwit, o ambima nunggwigya, nggigilogo bisa wulu wagya, ambima nunggwigya, nggigilogo bisa wulu wagya, ogarit wogonombolok heda marogo lembaga mabiselagwima akoma bisa lagek ogagya lagagi.

Pilipus en o Samaria yugeralagagi wene

4It Ala aburi hoda sak yagan lagagwa akoen, yi awi ndi awi andoma Sek Wene yugeregek nagu lagagwa. 5Eke at Pilipus ako o Samaria kota ambima lagya lagagirik, Ala en denogo bagagi Mesias avok it avakwa andoma menda yugeragagi. 6Yugirigya hegek, avakwa wisane homagu lagagwarik, Pilipus en yugirigya ako enaruk hunggwis, inilup arup enalon werek menda ogagya ako inil hugwi, ogagu lagagwarik, wene yugeragagi ako enendawima sek erogo dibagagwa. 7It madis agoda werek menda enendawima nonggagagi ako, na hunik yugusigik nggigilogo wibugu, ininggis-inisok yidugup menda inim, enerambo weyak inim sek okbugu, ogagya halok, 8it o kota andoma menda enendawi adenggen wisane agagi.

9Eke, o kota andoma ap ambi inis Simon, o endak erogo madis inis vaga oginivit lagya halok, it Samaria menda akoma en, “Ap ogasiga yi, wi!” yiluk, vok yugu lagagwa. “An nadigat iya,” yiluk, wogobatigya halok, 10it avakwa ovok erogo ininis werek ininis dek iren at ogagya dibaluk yugu dugwit, “At Ala Anye Wisane Agarik yagalagwi ako andi ap yi atma, wi!” yiluk, vok yugu lagagwa. 11O muk erogo madis inis vaga oginivit lagya halok, vok yugu dugwit at ane adigat hunggu lagagwa ovara, 12at Pilipus akoen Ala avema bisaup Sek Wene ako inim, Yesus Keretus wene inim, yugeragagi ako enendawi avyarat umbutu lagagwama, ap inim, akwa inim ima wombabigigi. 13At Simon ogo endawi avyarat imbitigi halok, ima wombabagya lagagimu, at Pilipus inim lagya dugwit, Pilipus en inilup arup enalon werek menda ogagya, nggarogo ogarubuk menda ogagya, ogarit lagya ako il higya lagagirik, “Wi!” yiluk, vok yagagi.

14Eke, “It Samaria menda en Ala wene avyarat ombakluk wagao,” yiluk, yugwi ako, it lakbigik menda o Yerusalem agarwik ako enaruk hunggu lagagwarik, Peterus Yohanes iperen enadema lakbogogwa. 15Lakbogogwa ako lagu lagagwarik, it avakwa Samaria menda ako Averiniki wapwak yiluk, enake samban ogagagwa. 16It ako Nenowa Yesus inis vaga adigat ima wombabogogwa ovara, Averiniki ao enovaga wambu wagetekma, 17ininggis inunggul vakbugusigik Averiniki wogeragagi.

18It lakbigik menda en avakwa ininggis inunggul vakbugusigik Averiniki wogirugwi ako, at Simon inugu lagagirik, onggo yoparip wogeragiluk ogagya dugwit, 19“Ninggis inunggul vakbisiluk Averiniki wogorigya dogogiluk, an hit ogasagwi anderogo wane-wane ogagya dogoigen henawene andi, an ambi yukneres,” yiluk, nggino yugeragagi.

20Nggino yugirigya lagagimu, Peterus akoen at yugugu dugwit, “Ala en onggodek un wokneraliga menda hegek, hayoparip vaga onggo hunigiluk, hat yagaliga yi? Hayoparip andi, inim dinggilik hedelok hambinogen. 21Ala endawi sek hombasigadek atma, wene yi menda ambi hat handok arisogon mondok dek aro. 22Hat weyak ogarup embeten andi hasam helok, hekbaluk, hat hendawi embeten Hasin Ala en degerogo bagapwak yiluk yuguru. 23Homaduk hovaga durik hegek, wam amumudi eda ovagak hane weyak iri heyagi.”

24Yiluk, mberugu lagagimu, at Simon en, “Ai! Hit yegep ako an oknitya haoen, Henasin Ala yugugu dogones o,” yiluk, yugeragagi.

25It Peterus Yohanes akoen, Nenowa Inis Ombok Ala en denogo bagagi Yesus ako vagalogo yugurugwi, Ala wene yugurugwi, ogagu lagagwarik, enamwa Yerusalem eneyami vaga wagu dugwit, o Samaria asoragoma wisane akoma Sek Wene yugeregek ya nonggegek nda nonggegek wagagwa.

Ap Etiopiya menda ima wombabagagi wene

26Yugeregek wagusim, Nenasin Ala yonggo lakbisa wandiga menda malaikat ambien at Pilipus ako yugugu dugwit, “Sup o Yerusalem en o Nggasa lendagwima o selatan vikit, avakwa dekma andoma elak,” yiluk, yugogogi.

27Anderogo yugugu lagagimu, at ako anderogo lagyama, ap pegawai ambi owadi wogo Etiopiya menda inim avuk agagi. O negara Etiopiya akoma it ovok inisa inis ombok Handake avema welagagwa, eke, ap ako hwa Handake ayoparip vagago welagagi. At o Yerusalem Ala siyabagya lagagirik,#8:27: It ap Yakuri menda inim, eke it ap Yakuri dek ovara Ala enalon umbutu lagagwa menda inim, Ala awi valekma o Yerusalem akoma Ala ake bagwi, Ala siyabagwi, ogagu lagagwa. Andi halok, at ap Etiopiya menda ako o adumu wen Etiopiya en o Yerusalem Ala siyabagiluk wagagirik umwa lagyama Pilipus ako inim avuk agagi. 28eyami vaga amwa wunggu lagagimu, kuda kereta vaga horaik dugwit, mbuku navi Yesaya en dirup watigi ako dombalit lagyama, Pilipus inim avuk agagi. 29Avuk agya lagagimu, Ala Averiniki akoen Pilipus yugugu dugwit, “Kuda kereta andi adema lagya dogomindik hinim elak.”

30Yugugu lagagimu, Pilipus akoen at adema vupuk lagya lagagimu, navi Yesaya dirup watigi dombanggya ako aruk hunggu lagagirik, “Nasin wai. Hat mbuku warek dombalit landiga yi, dibaliga a, dek a?”

31Yugugu lagagimu, “Ap en sek erogo mamuliruguselok adigat dibelagwi atma an nadik nggarogo dibaup. Dek atma, yuknirinok yiluk nadema hora yi dagama,” yugogogi.

32-33 # Yesaya 53:7, 8 bikhanes. Dirup warek dombanggigi ako eyave yi:

Ndomba waruguluk wolok lagusigik, mbuverek agarik hak,

eke ndomba eyak iris mbanggusigik,

anedek mbauk agarik hak,

At mbauk anedek-at welagagi.

At anggadi warogo bagu dugwit, ogaga wane-wane okbagetek enane yendok-hondok erogo wolok lagagwa.

Eke At vaga wigalek ako dek atma,

At awene yegetek aro.

Avakwa agarwikmu o wen vaga yoma elokwe degat aga o,

yiluk dirup warek ako dombangguma, hora yi inggigi.

34Inggya lagagimu ap akoen Pilipus yugugu dugwit, “Ala en yugugu hegek navi yugirigya akoen yagagi yi, aren ogagagirikmu yagaliga a, ata ap adik en ogagagirikmu yagaliga a? Yukniru o,” 35yiluk, yugugu lagagimu, at Pilipus en “Yukhirisogon,” yugugu lagagirik, wene dirup warek andi vaga At Yesus avok Sek Wene ako mbilinogo yugogogi.

36Yugirit iperen suvaga lagu dugwit, inamut yanggadekma ari lagu lagagwarik, ap akoen, “Inamut yi hil yokhanen! An ima wombabanup ndak a, dek a?” 37[Yugugu lagagimu, Pilipus en, “Hat hendawi nggatuk erogo Yesus avyarat embeten halok ima wombabagaup sek aro.” Yugugu lagagimu, at ap Etiopiya menda akoen, “Yesus Keretus andi Ala Abut avyarat ombasiga o,” yiluk, yugogogi.] 38Yugugu lagagirik, kuda ako mbup yupwak yiluk yugogogi, mbup iri lagagimu, iperen ima nunggugu lagagwarik, Pilipus en ap ako ima wombabagagi. 39Wombabagya lagagirik, wulu wagyama, at Pilipus ako Ala Averiniki en supuk erogo wolok wunggu lagagimu, ap akoen Pilipus ako ambi inim il hegetek ovara, endawi sek vaga amwa lagagi. 40Eke, at Pilipus ako o Asotus akoma sigam ari lagya lagagirik, yi awi ndi awi o kota ovok erogo andoma Sek Wene ako yugeregek o Kaisarea lagagi.

Currently Selected:

Lakbogogi Wene 8: nbq2013

Highlight

Copy