Lakbogogi Wene 9

At Saulus asam hagagi wene

1Anderogo ogagya hegek, at Saulus en it Nenowa Inis Ombok Yesus ane wogogwa menda ako enarigiluk aninis ane yagan lagya lagagimu, at imam inis ombok winimen agarik ako adema lagya lagagirik, 2yugugu dugwit, “Nasin wai. O kota Ndamasik it Yakuri samban ogasagwima enasini en inil hapwak yiluk, haren it avakwa Yesus ane musek laguselok, vagago heda magenombolok Yerusalem warigiluk, dirup ambi warogo wokniru.”

3Yugogogi ako, wogugu lagagimu, lagya lagagirik, o kota Ndamasik vanggo yi lagya lagagimu, yukdekma mbogot vaga en abya yovalogo at adema wombaba wagagi. 4Wombaba wagya lagagimu, at Saulus ako wema ndun iri lagagimu, ane ambi yugugu dugwit, “Saulus, Saulus. Hat nggarogo yiluk anggin-mbanggin okbanilin landiga?”

Yugugu ako aruk hunggu lagagirik, 5“Ai, Nasin, Hat sa o?”

Yugugu lagagimu, “Dek. Hat anggin-mbanggin okbanilin landiga andi An Yesus aro. 6An atma, hat mondok iri dogomindik o kota ombokma andoma lagya heyalok ogarup wene yukhirisogon atma, andoma elak,” yiluk yugogogi.

7At aswei inim lagagwa akoen ap eyave hegetek ovara, un ane iris adigat hunggu lagagwarik, enanedek mbuverek werekma, 8at Saulus ako mendek iri lagagirik, il venggenek ovara, yi menda ndi menda il haup meyan atma ininggis vagarogo wolok o kota Ndamasik balagagwa. 9Balagagwarikmu akoma dugwit, il mbuk hegek, ndugwis henggam erom inim, is inim, nenggetek-at welagagi.

10O kota Ndamasik andoma ap Yesus ane wogogi menda ambi inis Ananias. At abi higya dugwit, At Nenowa Yesus akoen, “Ananias wai.”

Yugugu lagagimu Ananias en “Yukniru o, Nasin.”

11Yugugu lagagimu, At Nenasin akoen at yugugu dugwit, “Mondok yiluk, sup inis ‘Mot-Mot’ yagalagwima ap Yudas amwa andoma ap ambi inis Saulus awi Tarusus menda belalilak. Aren samban ogagyama, 12hat Ananias en at adema nunggwigya dogomindik, unggul hinggis vakbaluk, il mbuk aga ako sek ogagya nogo heda abi heda higyama, andoma elak.”

13Yugugu lagagimu, at Ananias akoen, “Nasin. At ap ako andi Hat haburi adik denek menda o Yerusalem weyak oginivit landiga yagalagwi ako an naruk hunggwis. 14Eke, yogak it hinis vaga samban ogasagwi menda ovok erogo ‘Vaginivit laik en,’ yiluk, it imam-imam enasini yugirigya lagama, ‘E o,’ yagarwikmu, waga.”

15Yugogogi ovara, Nenasin en at Ananias yugugu dugwit, “Elak! Ap andi it weram Yakuri dek menda inim, it enasini ap ombok ininis werek menda inim, it Iserali ovok erogo inim, An ninis inilup erogo yugirigya dogopwak yiluk, nayeloman denogo bagirikmu, yugirilak. 16Eke, at Saulus ako, An ninis yugeregek lagyaim, anggin-mbanggin okbagu dogop ako Anen yugugu dogosogon,” yiluk, abi vaga yugugu hagagi.

17Yugugu lagagimu, o andoma lagagi. Lagya lagagirik, ap ako amwa nunggwigya lagagirik, inggis Saulus unggul vakbaluk, yugugu dugwit, “Naswe Saulus wai. Hat hil sek agya, Averiniki hendawima des yi nunggwigya, ogagya hanok yiluk, hat suvaga yoma wagyama At Nenowa Yesus hegen akoen, lakbani waga o,” yiluk, yugogogi. 18Ao yugugu hegek, il agur-agut agagi lobalek ako bonggo erogo wambigya dugwit, il sek agagi. Il sek agya lagagirik, mondok iri lagagimu, ima wombabagagi. 19Ima wombabagya lagagimu, erom ninggya lagagirik anye agagi.

Saulus en o Ndamasik Ala wene yugeragagi wene

Saulus ako it Yesus ane wogogwa menda o Ndamasik akoma welagagwa ako ndugwis wane erogo inim welagagwa. 20Inim dugwit, at mbikit ‘Yesus andi Ala Abut aro,’ yiluk, it ap Yakuri samban ogasagwima akoma wene yugeregek nagu lagagi. 21Yugeragagi ako it ovok enaruk hunggu lagagwarikmu, “Wi,” yiluk vok yugu dugwit, “Avyak! O Yerusalem it Yesus inis vaga samban ogasagwi menda ovok enarit lagya laga ako, yogak o yoma it anderogo menda haoen, heda maginiviluk it ap imam-imam enasini enadema bisalagiluk waga akoen yagaliga yi helagwi a?” yiluk, yugu lagagwa.

22Anderogoat yugu lagagwa ovara, at Saulus akoen, wene yugirigya dugwit, ‘Yesus andi Nenowa Inis Ombok Ala en denogo bagagi Keretus aro,’ yiluk, avyarat ombarupwak yiluk, ‘Anderogo ogagya lagagi o,’ yiluk, yagan nagu lagagi ako adigat mbigalit lagu dugwit, it Yakuri menda o Ndamasik welagagwa ako enane nggarogo yuk erogo okbogogi.

23Andi halok, hivis it Yakuri menda en, ‘Saulus warusogom o,’ yiluk, avok mbilogo bagagwa. 24Avok mbinggugwa ako at Saulus aruk hunggu lagagirik werekma, ndugwis ambi vaga waruguluk, o kota nunggwisagwima hup dingga hanjalek welagagwa. 25Welagagwa ovara, at Saulus aori en o hup mburiyum elola yedogo baluk, heda yidilogo leget ovasugorok weram wibagagwa.

Saulus o Yerusalem lagagi wene

26Wibagu lagagwama, o Yerusalem wagya lagagirik, it Yesus ane wogogwa menda ako inim dambularigiluk ogagagi ovara, it ovok en At Yesus ane waliga menda dek atma yiluk, enalon en, ‘Oma,’ yugigitek mbup yagagwa. 27Mbup yugu lagagwama, at Mbarenabas akoen wolok it lakbigik menda ako enadema lagya lagagirik, at Saulus suvaga lagya dugwit, Nenowa Yesus il hagagi wene inim, At Nenasin en yugogogi wene inim, eke, Ndamasik andoma alon dek dugwit Yesus inis vaga yugirigya lagagi wene inim, mbilinogo yugeragagi. 28Yugirigya lagagimu at inim dambulik dugwit, at mondok alon dek, Nenowa Yesus inis vaga o Yerusalem wene vagalogo yugeregek lagya lagagi. 29Yugeregek lagya dugwit, it ap Yakuri menda ovara, Yunani enane yagalagwi menda ako inim enane yugu dugwit, wene onggo-onggo yuguselok, it akoen at waruguluk ogagagwa. 30‘Warusogom,’ yagagwa ako, it nenaswei Ala aburi enaruk hunggu lagagwarik, Saulus wolok, Kaisarea lakluk, andoma en o Tarusus lakbagagwa.

31Lakbagu lagagwarik, it Ala aburi o Yudea menda inim, o Galilea menda inim, o Samaria menda inim, enendawi ugun seyalek dambulik dugwit, enendawi modo agagwa. Eke Ala Averiniki en yonggar-inipu hegek Nenowa Yesus ako enalon umbutu dugwit, eneyave wisane erogo wigalagagwa.

Peterus o Lida o Yope dugwit ogagagi wene

32Andi okbaluk, at Peterus ako yi awi ndi awi andoma yogonigik lagya dugwit, Ala aburi adik denek o Lida agarwik ako bigisa lagagi. 33Bigisa lagya lagagirik, andoma dugwit, ap ambi inis Eneas inggis-isok yidugup nggilik adigat hegek 8 tahun okbaluk werekma, il hagagi. 34Higya lagagirik, Peterus en at yugugu dugwit, “Eneas wai. Yesus Keretus en sek okhetarikmu, mondok iri dogomindik, ndalek nogo yiliga menda andi yunggul hedoman,” yiluk, ao yugugu hegek, mondok yagagi. 35At mondok yagagi ako, it o Lida menda inim, o Saron menda inim, ovok erogo inil hugu lagagwarik, it enasam helok, Nenowa Yesus ane wogogwa.

36Eke, hwa Yesus ane wogogi ambi inis Tabita o Yope welagagi. (Hwa inis andi Yunani enane vaga, Ndorokas.) At hwa ako avakwa sek adigat ogarit lagya, ininggidek iniselok yonggar-inipu, ogagya lagagi. 37Ogagyaim, eyave aup edup agya lagagirik hombagagi. Hambigya lagagimu, nggamo warogo handimen kamar higirekma hombalogo bagagwa. 38O Lida en Yope horok atma, “Peterus waga o Lida agarik,” yiluk, yugwi it Yesus ane wogogwa menda enaruk hunggu lagagwarik, at ako yiluguluk warupwak yiluk ap mberen yonggo lakbogogwa.

39Lakbogogwa yugiri lagu lagagwama, at Peterus inim wagu lagagwarik, wolok handimen kamar higirek ap nggorakma akoma unggugwa. Akoma it akwa sogwa akoen, “Hwa Ndorokas yi, ninim dugwit, yum ilim inim, weram inim manggatu laga yi hil o,” yiluk likhugu dugwit, yup yagagwa.

40Yup yagusim Peterus en, “Hit ovok erogo wilitales,” yugirigya lagagirik, erambo yunggubaluk, samban ogagagi. Samban okbaluk, at hombagagi ako avikit bikhigya dugwit, “Tabita wai. Mendek iru,” yugugu lagagimu, il huvunik ako venggenogo Peterus il bikhigya lagagirik, nggilik ako mendek yiluk hora yagagi. 41Mendek iri lagagimu, at Peterus akoen inggis vagago mondok okbagya lagagirik, it akwa sogwa ako inim, it avyarat umbutugwa ako inim, “Omanes,” yiluk, yugeragagi wagu lagagwama, “Iluk aga yi, bikhanes,” yugeragagi.

42At Peterus hwa iluk erogo mendek okbagagi wene o Yope andoma ovok erogo wigalarit lagya lagagimu, avakwa wisane enendawi Nenowa Yesus ovaga vanggabaluk avyarat umbutugwa. 43Eke, at Peterus ako, o Yope andoma ap sapi agamut bunggulik sek ogasiga menda inis Simon inim dugwit, ndugwis wisane welagagi.

Currently Selected:

Lakbogogi Wene 9: nbq2013

Highlight

Copy