Lakbogogi Wene 7

Sepanus en wene onggo yugeragagi wene

1Eke at ap imam inis ombok akoen Sepanus yugugu dugwit, “Ap wene yagas andi, hat avyarat yegen yi?”

Yugugu lagagimu, 2at Sepanus akoen wene onggo yugirigya dugwit, “Nowa-nasin, henaruk holek dogop. Nenombao Averakam ako o Haran wagetek dugwit, ao o Mesopotamia werekma, at mondok siyalek agarik Ala ako adema wagya lagagirik, Averakam yugugu dugwit, 3‘Hawen inim, howa-hasin inim, hekbugu dogomindik, hat dogopim ambi yukhugu neyalok, andoma-at elalo,’ yugogogi.”

4“Yugugu lagagimu, at Averakam ako avakwa o Kasim enamwa o Mesopotamia akoma nggelabisiluk, o adumu Haran akoma ari lagagi. Ari lagya lagagirik werekma, asin hombagagi. Hambigya lagagimu, o Haran hekbaluk yogak nit Iserali werekma yoma Ala en at lakba wagagi. 5Wagya lagagirik werekma, At Ala en Averakam andok dogopwak yiluk wen endak ambi mbalogo wogugu, horok ambukumat ogo wogugu, ogagetek-at ovara, at abut ambi mondok dek hegek, yugugu dugwit, ‘Wen yi, hat inim, hat vaga wigalek inim, henandok dogosogon o,’ yiluk, wene avyarat nggatuk erogo yugogogi.”

6“Yugugu lagagirik, Ala en ambi inim yugogogi ako yerogo: ‘Hat hombawi ako, o avakwa hunogo enamwa andoma ap huru ovagak akluk nagusim, it enayeloman okbisiluk, anggin-mbanggin enovaga bugusigik, 400 tahun ogarugup. 7Anderogo oginivusogom ovara, it avakwa hat hombawi enayeloman oginivusogom ako, Anen enowak dilogo anggin enovaga bugu neyalok, nin wisane enamwa akoma en wulu wagu dogomundik, o yoma wakluk, An ninis siyabanunggu dogosogon o,’ yiluk, Ala en Averakam yugogogi.”

8“Yugugu lagagirik, Ala en ‘Wen yi, hat inim, hat vaga wigalek inim, andok dogogup,’ yiluk, wene avyarat nggatuk erogo Averakam yugogogi ako inilup dogopwak yiluk, enagamut mbanggu dogop wene ako yugogogi. Yugogogi vaga Isak endaklagya lagagimu, nogo 7 yikbaluk, hutun agamut mbanggigi. Andi okbaluk, hivis Isak en Yakup endagya, eke, at Yakup en nit nenombawi 12 ako endaginipu, ogagagwa.”

9“Nit nenombawi en yugu dugwit, ‘Nenasin en nenaot Yusup adigat sek okbaliga yi, Nenanggon!’ yiluk, it Mesir menda enayeloman arupwak yiluk, onggo hunggu lagagwama, o Mesir wolok lagagwa. Wolok lagu lagagwama, o andoma Ala inim hegek, 10anggin-mbanggin higya ako Ala en degerogo bagagi. Eke, at Yusup ako ap inis ombok o Mesir vagago welagagi Viraon ivaga sek adigat ogarit lagya hegek, ‘Avyak yi, endawi werek atma,’ yiluk, Viraon endawi sek hapwak yiluk, Ala en yonggat-higya lagagi. Andi halok, at Yusup ako ap Viraon avema o Mesir vagago dugwit, at Viraon awi ombok valek ako vagago dogopwak yiluk Viraon en Yusup ako mendok okbagagi.”

11“Mendok okbagya lagagimu, werekma, o Mesir yi awi ndi awi andoma inim, o Kanaan inim, o hivi adigat dugwit wen mbuk agya halok erom uvup en enovalenggen nde erogo bugu lagagimu, it ap nenombawi akoen erom belanggugwa ovara, mondok dek halok, 12at Yakup akoen o Mesir erom gandum werek aruk hunggu lagagirik, at aburi nit nenombawi ako erom hundiri lapwak yiluk o Mesir andoma lakbogogi.”

13“Eke, hivis ndugwis ambi vaga lakbogogi lagu lagagwama, Yusup akoen, ‘Henaot ako an aro,’ yiluk, owai inilup okbugu lagagimu, at Viraon ako ogo, ‘At Yusup owa-aot yiat inigis,’ ilup agagi. 14Anderogo ogagu lagagwarik, Yusup en at asin Yakup inim, at aburi-ombawi inim ovok dambulik eneyave 75 atma, ‘Woginivi elales o,’ yiluk, lakbogogi. 15Lakbogogi ako wagu lagagwarik, at Yakup aburi inim o Mesir-at lagagwa andoma dugwit, at inim, at aburi nit nenombawi inim, hambugu lagagwa. 16Hambugu lagagwa ako enowak wolok, o Sikem wagu lagagwarik, ap Sikem menda ambi inis Hemor aburi enadema, Averakam ap hambuguselok wimu mabiselagwima, yoparip vaga onggo bagagirikmu akoma, mabisa wagagwa.”

17“Andi okbaluk, Ala en Averakam wene avyarat nggatuk erogo yugogogi ako#7:17: Wene avyarat nggatuk erogo yugogogi ako andi, ayat 5 bikhanes. ogarup hudi horok vanggo yi wagya hegek, nit nenombawi ako o Mesir andoma dugwit, eneyave wisane wigalagagwa. 18Wigalarit lagusigik, enasin inis ombok Viraon adik ambi en Yusup ogagya lagagi ako inggut hegek, o Mesir andoma vagago dogogiluk mondok yagagi. 19Mondok iri lagagirik, nit nenombawi wigalagagwa ako ane huluk yugirigya, anggin enovaga bugu, ogagya dugwit, ‘Avyak endaklaguselok, hambupwak yiluk, weram mbobigik ogagu dogop o,’ yiluk, yugeragagi.”

20“O andi vaga Musa endaklagagi, avyak ako mondok segedok endago hugu lagagwarik, asin amwa hwilago hegek saut henggam okbaluk, 21weram belagagwarikmu, hwa ndugum Viraon abut akoen heyakbagya lagagirik, ‘An neyak-at okhedayogon o,’ yiluk, amwa bawagya lagagirik, sawe okhedagagi. 22Avyak ako sawe agya dugwit, it Mesir menda enendawi werek dugwit ogagu lagagwa ovok erogo mamulhedagagi atma, ane iri halok iya umbutwi, ogarit lagya halok, ‘Wi,’ yiluk, vok yugwi, ogagu lagagwa.”

23“At umur 40 tahun ogagya dugwit, ‘Nowa-nasin Iserali menda bigisa layogon o,’ yiluk, 24biginisa lagya lagagirik, andoma inim werekma, ap Mesir menda ambien at Musa it menda ambi ugun watya higya lagagirik, avikit agya dugwit, ap Mesir menda ako mondok watigi. 25At endawi imbita dugwit, ‘An Viraon inim agirik atma, it Iserali menda en an nowa-nasin enagap wendarupwak yiluk Ala en lakbani wagagi nombarumwi a?’ imbitigi ovara, anderogo embetetek-at welagagwa.”

26“Nogo ambi yikbaluk, hutun en at aori Iserali menda mberen yambok apwis ako inugu lagagirik, wendarinipu dugwit, ‘Naori o. Hiperen naswe-haswe-at ovara, nano yiluk yerek-warek yagalagwi o?’ yiluk, yugirigya lagagimu, 27it yambok apwis ako ambien at Musa vedalogo baluk, yugugu dugwit, ‘Hat nenasin dugwit, nit ogasagwi amburup mbanggya dogop, saen mondok okbagagamu, yagaliga yi? 28Hat son ap Mesir menda watin ako hak, an narigiluk yagaliga yi?’ 29Yugugu ako aruk hunggu lagagirik, o Mesir hekbaluk, o Midian hoda winggigi. Hoda wunggu lagagirik, ap huru hak andoma dugwit, aburi mberen endaginipigi.”

30“Akoma dugwit, 40 tahun-at welagagi. Okbaluk, ndugwis ambi vaga harumu ndom Sinai akoma werekma, yo adok werek vaga, hali abya inggya anggelekma Ala yonggo lakbisa wandiga menda malaikat ambi hagagi. 31At Musa en hali abya inggya ako il higya lagagirik, ‘Wi! Nano en ogagya hami?’ yiluk, bikhagiluk horok-horok ari lagya lagagimu, Nenasin Ala ane iri dugwit, 32‘Hat hombawi Averakam inim, Isak inim, Yakup inim, Enasin Ala ako An aro,’ yugugu ako Musa aruk hunggu lagagirik, alon en owak wuruk iri dugwit, il bikhaup mbup yagagi.”

33“Mbup iri lagagimu, Nenasin Ala en, ‘Wen hat agindikmu andenam o mogama atma hisok sepatu yirik andi nggolalogo bain. 34An naburi o Mesir agarwik ako anggin-mbanggin enovaga bugwis nil inugu, enane, ‘Ai-au,’ yugwi ako naruk hunggu, ogasiga atma, enagap wendarogo bisagiluk wambu wagi o. Hat o Mesir lakbagaliga atma, oma,’ yiluk, yugogogi.”

35Wene andi yugirigya lagagirik, Sepanus en adem vagalogo yugirigya dugwit, “It ap Iserali menda en, ‘Nenasin dugwit, nit nenawene amburup mbanggya dogop, saen mondok okbagagas? yiluk, Nenanggon,’ yugu lagagwa ako andi, at Musa-at. It Iserali enasin dugwit, enagap wendarupwak yiluk malaikat en yo adok werek adema yugogogi vaga Ala en lakba wagagi ako andi, at Musa aro. 36At ako, ninombawi o Mesir akomaen wogonombolok wulu wagya dugwit, o Mesir inim, Is Laut Merah yanggadek embet vaga inim, o harumu andoma lagu dugwit 40 tahun ogagagi inim, nggarogo ogarubuk menda ogagya, inilup arup enalon werek menda ogagya, ogarit lagagi.”

37“At ‘Henasin Ala en an lakbani wagagi hak, ap navi Ala en yugugu hegek yukheraliga menda ambi, hit menda-at, henake henadema lakba warisogon o,’ yiluk, it Iserali menda yugeragagi ako andi, at Musa-at. 38O harumu it Iserali homarek werekma enanggelekma welagagi inim, ndom Sinai vaga malaikat en wene yugogogi ako inim, nit nenombawi o andoma inim, welagagi ako andi, at Musa aro. Eke, nit yuknirigya dogopwak yiluk Ala wene mondok-mondok dogop wene wogogi ako andi, at Musa adigat.”

39“Anderogoat ovara, nenombawi akoen, ‘At yukneraliga ako hulup nenanggon,’ yiluk, hekbagu lagagwarik, eneyami vaga o Mesir laup enendawi wenggelek adigat dugwit, 40at Musa ao ndom Sinai vaga andoma inggigi hegek at Harun yugugu dugwit, ‘At o Mesir en woknenombolok waga Musa ako, nggoma laga ninunggut atma, nit woknenombolok lapwak yiluk, nenagavuwak ambi okneran,’ yugogogwa. 41Yugugu lagagwama, huvuwak sapi eyak agur-amolok okbaluk, anggom watu dugwit, it ininggi-vaga ogarek ako agayuk wutwis, adenggen ogagwi, ogagagwa. 42Ogagu lagagwama, At Ala endawi hologo baluk, mo il inim, saut inim, dadiwap inim, mbogot vaga menda ovok erogo, siyabagek ogagu dogopwak yiluk hekbogogi. Andi ogagagwa ako, Ala en it navi-navi yugirigya hegek dirup watugwa ako wane-wane-at ogagagwa. It dirup watugwa andi yerogo:

‘Hit Iserali menda andi, o harumu wokhenombolok wagya dugwit,

40 tahun ogagya hegek,

henanggom warogo An nake bagagup,

yagalagwi yi?

43 # Amos 5:25-27 bikhanes. Dek ovara, henagavuwak Molok awiravo valek inim,

henomadis Erepan dadiwap agur-amolok ogarek ako inim,

siyabagek wolok nagwis hinigigirikmu,

Anen wokhenombolok o Babel adumu andoma mbobigiga layogon o,’

yiluk, yugeragagi dirup watugwa ako wane-wane-at haryogo wibogogi.”

44“Ala ninim agarik umbutu dogovovok Ala awiravo valupwak yiluk, Ala en, ‘Agut wakhegek hil hegen ako wane-wane valup,’ yiluk, Musa yugogogi ako, wane-wane vabaluk, nenombawi harumu wolok nagu dugwit, ya vabagek nda vabagek ogarit nagu lagagwa. 45Eke, awiravo valek ako nit nenombawi hivis andok agu lagagwarik, ap Yosua it inim Ala en ap weram Iserali dek menda haryogo wibogogirikmu yoma sovabigik nunggu wagu dugwit, o valek ako wolok ba nonggagagwa ao hegek at Daut inis ombok welagagi. 46Dugwit, at Daut ogarit lagya vaga Ala en sek imbita lagagi atma, Daut en iri dugwit, ‘Yakup Asin Ala dogopim awi valisogon o,’ yiluk, yugogogi ovara, 47aren vanggitek, at Salomo en Ala awi vanggigi.”

48“Ala awi vanggigi ovara, At Mondok Siyalek Adigat Agarik ako, avakwa enawi valekma agarikbuk. Ala en yugugu hegek at navi en it yugirigya dugwit:

49‘Nenasin Ala en,

“Mbogot vaga andi, An nane yugeraligama aro,

eke, wen vaga andi, navema bisaligama aro.

An nawi nggarogonggan valup yiluk yagalagwi?

Eke, An nambot sat yangganggu dogop, o nggoma?

50 # Yesaya 66:1-2 bikhanes. Yi menda ndi menda ogagagis helagwi yi, Anen adigat ogagagis akora?”’

yiluk, yugeragagi ako wane-wane, avakwa enawi valekma agarikbuk.”

51Yugirigya lagagirik, Sepanus en it wene amburup mbalisagwi menda ako ambi inim yugirigya dugwit, “Henendawi anye lakot dugwit, Ala ane hulisagwidek hirat. Henombawi Ala ane saganggu lagagwa ako hak, Ala Averiniki ane sagalisagwi hirat. 52Hit henombawi en it endak Ala yugirigya hegek yugu lagagwa navi-navi ako ambi wiyiknom-weyaknom okbigitek andi sa embetep? Dek o. It navi en yugu dugwit, ‘At Endawi Mot Sek Adigat Agarik ako warisogon o,’ yiluk, wene avok sigam yugurugu lagagwa ako initu lagagwa. Eke, yogak At eyave wagagirikmu hirenenat onggo mbabaluk watugup! 53Ala wene Musa en dirup watigi ako it malaikat enat yukhera wagagwa wogogup ovara, ogagetek agipik hit aro,” yiluk, Sepanus en it wene amburup mbalisagwi menda enadema yugeragagi.

Sepanus helep vaga watugwa wene

54Yugirigya lagagimu, it wene amburup mbalisagwi menda ako enaruk hunggu lagagwarik, enaninis ane yagan lagu dugwit, enabis maum hambubaluk inigik, 55at Sepanus ako Averiniki endawima des iri lagagimu, elose mbogot vaga ilik lagya dugwit, Ala mondok siyalek agarikmu andoma Yesus inim inggis amotkan mendek inigigi. 56Inugu lagagirik, yugirigya dugwit, “Hinil yokhanes! Mbogot elo heyatas anggelekma At mbogot vaga en Ap-At Endaklarupwak yiluk lakba wagagi ako Ala inggis amotkan agarik haliga o,” yiluk, yugeragagi.

57Yugirigya lagagimu, it akoen enaruk nggedalhedelok enane ombok erogo yandyak-handyak yagan lagu dugwit, at Sepanus mbikit vagari lagagwarik, 58o kota weram nggigilogo wibaluk, helep vaga watugwa. It enane at ovaga bagagwa akoen sogwesum weram menda nggolalogo apsawe ambi inis Saulus adema bagu lagagwarik, 59helep vaga watusigik, at Sepanus akoen, “Nasin Yesus wai, an nendawi woman o,” 60yiluk, erambo yunggubetaluk ane ombok vaga iri dugwit, “It weyak ogasagwi yi, onggo it enovaga bisabuk! Hekbisin o, Nasin!” yiluk, yugugu lagagirik, hombagagi.

Currently Selected:

Lakbogogi Wene 7: nbq2013

Highlight

Copy