Lakbogogi Wene 6

Yonggaragak eneyave 7 denogo mondok okbogogwa wene

1O andi hudi Yesus ane wapwak yiluk ambi hondalari nonggegek adigat ogagu dugwit, it ap Yakuri menda ovara, Yunani enane yugu lagagwa menda en, “Ndugurek-ndagarek erom sumburirugu dugwit, nit ninisai akwa sogwa nggarogo yiluk erom wogerelagwidek?” yiluk, it Yakuri enawerek Iberani enane yugu lagagwa menda ako inim naburuk-haburuk yugu lagagwa. 2Anderogo yugwi ako it ap 12 menda enaruk hobaluk, Yesus ane wogogwa menda ovok erogo homakbugu lagagwarik, yugurugu dugwit, “Naswei o. Nit Ala wene mamulherelagwi ako hekbaluk, erom wogirugu dogop meyan atma, 3it ap Averiniki enendawima des yi nonggagagi inim, enendawi werek dugwit yagalagwi inim, hinilup atma, henanggelekma en ap eneyave 7 denogo mondok okbisines. Mondok okbisasogom yi, iren ogagusigik, 4nit andi, Ala wene adigat yugurugwi, samban adigat ogagwi, ogagu dogosogon o,” yiluk, yugeragagwa.

5Yugeragagwa ako it avakwa ovok erogo homagagwa enaruk hobaluk, “Segat yegep o,” yugu lagagwarik, denogo mondok okbogogwa ako, ininis yi:

Ap ambi endawi avyarat imbitigi ako vaga yunggur-wanot yegetek, Averiniki endawima des yi nonggagagi Sepanus inim,

Pilipus inim,

Porokorus inim,

Nikanor inim,

Timon inim,

Paremenas inim,

ap ambi Yakuri menda dek, awi adem Andiyokia welagagi ovara, it Yakuri enawene wokbaluk it ogasagwi menda inim ogarit lagagi, inis Nikolaus inim,

6denogo bugu lagagwarik, it lakbigik menda ako enadema bisa wagu lagagwama, inunggul ininggis vakbisiluk samban okbogogwa.

7Eke, Ala wene ako ombogat wigalarit lagya hegek, o Yerusalem andoma it At ane wapwak yiluk ambi hondo yi nonggegek adigat ogagu dugwit, wisane-at agwi, eke, it ap imam-imam agama Yakuri vagago welagagwa menda ogo wisane-at, “Wene wasogom o,” yiluk, Yesus Ala Abut denek menda avyarat umbutwi, ogagagwa.

Sepanus vagatugwa wene

8At Sepanus ako Ala en amunggat ovaga bagya, anye wogugu, ogagya hegek, nggarogo ogarubuk menda ogagya, inilup arup enalon werek menda ogagya, ogarit lagagi. 9Ogarit lagya hegek ovara, it Yakuri samban ogasagwima ambi inis Heda Visilogo Bogogirikmu sanggugwarikmu akoma, it Yakuri menda o Kirene en, Alesandiria en, Kilikia en, Asia en, akoma homagu lagagwa. Ndugwis ambi vaga homari wagu lagagwarik, Sepanus inim wene watugwa. 10Inim wene watugwa ovara, at Sepanus ako Ala Averiniki en hologo yugugu hegek endawi werek dugwit, yugeragagi vaga iren onggo yugurup meyan agya lagagimu, mbup yagagwa.

11Wene onggo yugurup meyan agya lagagimu, it andien, “At Sepanus ako, Ala inim, Musa inim, ininis wiyiknom-weyaknom erogo bagya higyo,” yiluk, ako enane huluk yugeregek nagu dogopwak yiluk, it ap nin onggo wogeragagwa.

12Wogurugu lagagwama, wene andi yugurugu dugwit it avakwa inim, ap ombok-ombok inim, it Ala wene vagago welagagwa menda inim, enendawima mali wagu lagagwama, enaninis en ap Sepanus ako vagakluk, ap wene amburup mbalisagwi menda enadema balagagwa. 13Balagu lagagwama, it huluk wene molalogo yugerapwak yiluk, onggo wogeragagwa akoen, ap wene amburup mbalisagwi menda akoma yugurugu dugwit, “Ap yi, hutun-howam mbup yegetek Ala awi valek mogama inim, Ala wene Musa en dirup watigi ako inim, weyak erogo bagya higyo. 14At ap yien iri dugwit, Yesus Nasaret menda akoen Ala awi valek yi, masalogo bagya, eke, Musa wene yerogo ogarup nderogo ogarup yukneragagi ninitok hunik ogasagwi menda ako adik okbagya, ogarisogon o, yiluk, iri higyo.”

15Yugurugu lagagwama, it wene amburup mbalisagwima horaik welagagwa ako ovok erogo en, at Sepanus eyave inil vurogo yokhugu dugwit, at elose andi, malaikat elose ovagak hagagwa.

Currently Selected:

Lakbogogi Wene 6: nbq2013

Highlight

Copy