Lakbogogi Wene 5

Ananias ogwa Savira iperen ogagagwa wene

1Ap ambi inis Ananias, at ogwa Savira inim it enawen ambi werekma, at Ananias en it enawen ako onggo hunggigi. 2Onggo hunggu lagagirik, yoparip ako, at ogwa ilup hegek, agun akoen nin higirogo it batugu lagagwarik, nin wolok lakbigik menda ako enadema bawagagi.

3Bawagya lagagimu, at Peterus en, “Ananias wai. Hawen onggo wokhigao nin higirogo hekbategen ako andi, hat nggarogo yiluk Sile hendawima nunggwigya lagarik, hat hane huluk Averiniki ambukmu enggen? 4Hawen andi, onggo wokhigitek hegek, hat hawen-at welaga akora? Eke, yoparip wegen ako andi, hat hayoparip atma, hat ogarup embeten-at ogarup sek ovara, hegek, venak vikit adigat wolok wagya dugwit, ovok bawaga nombarupwak yiluk, nggarogo yiluk nin higirogo bawagen? Nit avakwa ninambukmu enggenbuk. Ata, Ala-at ambukmu enggen,” yiluk, yugogogi.

5Yugogogi ako Ananias aruk hobaluk, wen vaga nggilinggu dugwit, andenam-at hombagagi. “Hombagas o,” yagagwa ako enaruk hunggugwarikmu it ovok en, “Wi!” yiluk, enalon wisane agagwa. 6Eke, hombagagi ako it apsawe wagu lagagwarik, eyave yum vaga dinggibaluk, wolok wunggu lagagwarik, wen sabelagagwa.

7Sabelagagwa inigik, mo il henggam welagagwarik, ogwa ako agun hombagagi inggut dugwit, ugun nunggu wagya lagagimu, 8Peterus en hwa ako yugugu dugwit, “Savira wai. Hit henawen onggo hunditip ako, yoparip yerogoat wokheraga? Iru.”

Yugugu lagagimu, “Yu. Anderogoat wokneraga,” ane hulugat yugogogi.

9Yugugu lagagimu, Peterus en at yugugu dugwit, “Hagun hiperen wene ambiat mbabagu lagipik, nggarogo yiluk Nenasin Averiniki ambukmu enggep? Hiperen Averiniki ambukmu enggep atma, it ap hat hagun wen sabelagao akoen yogak hat ogo wokhombolok laguluk, sup mbanggutmu nunggu wendagwi yi yogisin.”

10Ao yugugu hegek, hwa ako Peterus adema andenam-at nggilinggu lagagirik, hombagagi. Hambigya lagagimu, it apsawe akoen nunggugu lagagwarik, nggorak hagagwa. Nggorak hugu lagagwarik, eyave wolok, agun adema akonam wen sabelagagwa. 11Ala aburi inim, it anderogo aga yugwi hunggugwarikmu ako inim, it ovok erogo, “Wi!” yiluk, enalon wisane oginipigi.

Nggarogo ogarubuk menda ogarit nagu lagagwa wene

12It lakbigik menda akoen avakwa wisane enanggelekma inilup arup enalon werek menda inim, nggarogo ogarubuk menda inim, wisane-at ogagu lagagwa. Eke, it avakwa Yesus avyarat umbutugwa menda ako ovok erogo Ala awi valekma awi ogarek inis Salomo sanggugwarikmu akoma, homari lagek ogagu dugwit, enendawi ambiat welagagwa. 13It avakwa nin akoen, “It yi andi segat ogasagwi o,” yiluk, enadenggen umbutu lagagwa ovara, enalon en inim homagetek-at welagagwa. 14Anderogoat ovara, it ap inim, akwa inim, Nenowa Yesus ovaga vanggabaluk avyarat umbutu lagagwarik, ambi hondo yi nonggegek adigat ogagu dugwit, eneyave wisane agagwa.

15It lakbigik menda anderogo ogasagwima, Peterus wagya halok at agur-agut enovaga arupwak yiluk, avakwa aup warek suvaga wogonombolok wagu lagagwarik, nogo yilagwi menda vaga ndalogo bogogwa. 16It kota Yerusalem avilis ambot en avakwa wisane homakluk wagu dugwit, it aup warek inim, it madis enendawima nonggagagi inim, wogonombolok bisa wagu lagagwa ako, ovok erogo sek agu lagagwa.

Lakbigik menda anggin-mbanggin enovaga bogogwa wene

17Andi okbaluk, at ap imam inis ombok winimen agarik ako inim, aori ap Saduki menda ovok erogo inim en, “A! It avakwa en it Yesus ane welagwi menda vok yugurugu dugwit, nit ako vok yukneralagwidek andi nenanggon!” yiluk, enaninis en 18it lakbigik menda ako vaginipu lagagwarik, lembaga mabogogwa. 19Mabogogwarikmu o hup akoma werekma, Ala yonggo lakbisa wandiga menda malaikat ambi wagya lagagirik, lembaga sogop hurogo wibisiluk yugirigya dugwit, 20“Hit Ala awi valekma andoma lagu dogomundik, Yesus avyarat umbutuselok, mondok iniluk dogop wene ako ovok erogo avakwa yugerano,” yiluk, yugeragagi.

21Yugirigya lagagimu, o hutun en Ala awi valekma nunggugu lagagwarik, malaikat en wene yugeragagi wane-wane avakwa wene mamulirugu lagagwa.

Mamulirugusim, ap imam inis ombok ako aori inim, it Iserali enasini wene amburup mbalisagwi menda ovok erogo homari warupwak yiluk, yonggo lagagwa wagu lagagwama, it lakbigik menda lembaga werekma ako wogonombolok warupwak yiluk, ap Ala awi valekma malogo welagagwa menda ako lakbogogwa. 22Lakbogogwa ako lagu lagagwarik, lembaga andoma belalinipugwa ovara, eneyave dek agu lagagwama, wagu lagagwarik, yugurugu dugwit, 23“O lembaga sogop mondok larik higyo, eke, it ap sup malogo agarwik menda ogo, sup mbanggutmu mendek werekma inugup ovara, sup hurogo yoginugu lagurik, eneyave degat inugup o,” yiluk, it wene amburup mbalisagwi menda ako yugeragagwa.

24Wene ako hunggu lagagwarik, At Ala awi valekma malogo welagagwa menda enowa inim, it imam-imam enasini ap ombok-ombok inim, enendawi obak dugwit, “Eneyave nggarogonggan winggao?” yiluk, yugusim, 25ap ambi wagya lagagirik, it yugirigya dugwit, “Avyak wai! Ap heda marogo lembaga mabigip ako, Ala awi valekma lagu lagarwik, wene mamulirugusigik, wagi o,” yiluk, yugeragagi.

26Yugirigya lagagimu, ap Ala awi valek malogo welagagwa menda enowa aori inim en it lakbigik menda ako woginivi lagu lagagwarik, “Avakwa en helep vaga ninitu saoen,” yiluk, enalon en inititek eneve enewogo-at wogonombolok wagagwa.

27Wogonombolok it wene amburup mbalisagwi menda enadema bisa wagu lagagwama, at ap imam inis ombok akoen hemerinipu dugwit, 28“Ap andi inis vaga mamuleraup moga, yiluk, mbet yukhirugu ninigik, hit wene mamuleregep vaga o Yerusalem ovok enaruk hulit lagao andi, ap watugwa ako nit nenovaga dogopwak yiluk, yugeregek lendagwi yi?”

29Yugirigya lagagimu, at Peterus inim, it lakbigik menda nin ako inim, iren wene onggo yugurugu dugwit, “Nasini. Avakwa en yuknerelagwi andi, nit hulusogombuk. Ala en yuknirigya halok adigat hulusogom. 30Hit Yesus yo vaga lobalogo watugup ako, nenombawi Enasin Ala en hambisagwima en, iluk erogo mendok okbagagi o. 31Mondok okbagya lagagirik, nit Nenowa Inis Ombok, nit nenagap wendarisiga menda ako, At Ala inggis amotkan dogopwak yiluk siyabagagi. Nit avakwa Iserali menda weyak ogasagwi ako, nenasam helok weyak ako mbobagu dogomundik, Yesus ambetaga lagu niniselok, nenomaduk degerogo bininapwak yiluk siyabagagi o. 32Ala en yuknirigya ako nit des erogo ogagu niniselok, Averiniki wokneragagi. At Averiniki ako ninim dugwit, nit wene yi ovok erogo vagalogo yukherelagwi o,” yiluk, yugeragagwa.

33Wene andi hunggu lagagwarik, enendawi weyak en enaninis ane yugu dugwit, ‘Mondok inarusogom,’ umbutugwa. 34Umbutugwa ovara, ap Varisi ambi Ala wene vagago welagagi, avakwa ovok en agayuk wutu lagagwa, inis Nggamaliel. Aren it ap wene amburup mbalisagwi menda inivaga mondok iri lagagirik, yugirigya dugwit, “It sidok dukluk nunggu warupwak yiluk, wulupwak.” 35Yugirigya lagagimu, Peterus Yohanes wunggusigik, it wene amburup mbalisagwi menda ako yugirigya dugwit, “Hit ap Iserali menda yi, wene ambi yukherayogon. Ap yi, okbisaup ako henendawi des erogo wenggenggu dogones.”

36“O endak en ap Teudas ako mendek iri lagagirik, ‘An iya atma, vok yuknirupwak,’ imbita dugwit, yagan wagya lagagimu, ap eneyave 400 at ane waguluk amusek lagagwa ovara, at ako watwis, eke, at amusek lagagwa ako sak okbugwis, ogagu lagagwama, ane ako dek agagi.”

37“Hivis, avakwa ovok ininis dirup warupwak yiluk ogagusim, ap Galilea menda ambi inis Yudas, wagya lagagirik, ap nin at ane hulupwak yiluk nomalinipigi ovara, watu lagagwama, at ane wogogwa ako hoda sak yagan lagagwa.”

38“Anderogo atma, ap yogak mendek yagao yi, hekbisavovok yiluk, yukheraliga o. Enendawi hologo ogarit nagwis ako andi, un avakwa enendawi ombasagwi menda ogasagwi halok andi, mondok dek arisogon. 39Eke, Ala ombasiga menda ogasagwi halok andi, it enane sagalup meyan atma, Ala en, ‘An ninim ogorek dugwit ogasagwi,’ hinimbita haoen, hekbisenes, yiluk, yukheraliga o,” yugeragagi.

40Yugirigya lagagimu, it wene amburup mbalisagwi menda en, “Avyarat yagas,” yiluk, it lakbigik menda ako, yanggup yugeragagwa wagu lagagwama, yugurugu dugwit, “Yesus inis avakwa yugeregek laup mondok moga o,” yiluk, yo nabirok initu lagagwarik, wibogogwa.

41Wene amburup mbalisagwima akomaen wibugu lagagwama, lagu dugwit, “Nit At Yesus inis yagan nelagwi vaga nenanggadi warogo bininggao andi, sek aro,” yiluk, enendawi adenggen wisane embetek lagagwa. 42Lagu lagagwarik, Ala awi valekma en, umwa en, ovok erogo ndugurek-ndagarek wene mamulirugwi, “Nenowa Inis Ombok Ala en denogo bagagi Keretus ako andi, Yesus aro,” yiluk, Sek Wene ako yugurugwi, ogarit nagu lagagwa.

Currently Selected:

Lakbogogi Wene 5: nbq2013

Highlight

Copy