Lakbogogi Wene 4

Peterus Yohanes enanggadi waginipugwa wene

1Peterus Yohanes en it avakwa ao yugurugusigik, it ap imam-imam agama Yakuri vagago welagagwa menda inim, Ala awi valekma suam watu lagagwa menda enowa inim, it Saduki menda inim, enadema wagagwa. 2“At Yesus hambuluk lendagwima en iluk erogo mendok okbagagi o,” yiluk, Peterus Yohanes en avakwa hambuguselok, Yesus vaga iniluk erogo mondok okbisaup wene ako mamulirugu lagagwama, enaninis en 3eneyave vaginipu lagagwarik, o hup agya lagagimu, hutun en yugeraguluk wogonombolok lagu lagagwarik heda marogo lembaga mabogogwa. 4Mabogogwa ovara, it wene ako yugurugusigik hunggugwa ako eneyave wisane Yesus Ala abut denek avyarat umbutugwa. It ap adigat avyarat umbutugwa andi eneyave ovok dambulik 5.000 hudi agagwa.

5Nogo yiluk, hutun en it Yakuri enasini inim, ap ombok-ombok inim, it Ala wene vagago welagagwa menda inim, homagagwa. 6At imam inis ombok winimen agarik Hanas inim, Kayapas inim, Yohanes inim, Alesander inim, at Hanas ako owa-aot nin inim, it ovok erogo o Yerusalem homakbaluk, 7Peterus Yohanes enadema bisa wagu lagagwarik, yugurugu dugwit, “Hiren ap sek ogagep ako, sa inis vaga ogagep? Sa anye vaga ogagep?” yiluk, enaigwakma wogogwa.

8Enaigwakma wugu lagagwama, Ala Averiniki Peterus endawima des iri lagagirik, aren yugirigya dugwit, “Hit avakwa Yakuri enasini inim, ap ombok-ombok inim, wene ambi yukheraliga. 9Ap isok weyak abwa umbutu dugwit, sek ogagyo ako andi, ‘Nggarogonggan sek ogagep?’ yiluk, hit yogak nenaigwakma welagwi andi, 10hit inim, avakwa Iserali menda ovok erogo inim, hinilup arovovok yiluk adem des erogo yukherayogon. At ap sek aga henadema mendek agarik yi, At Yesus Keretus Nasaret menda hit yo winik vaga lobalogo watu lagagupmu, Ala en hambuluk lendagwima en iluk erogo mendok okbagagi ako inis vaga ovok sek aga o, yiluk, yukheraliga. 11#Mazmur 118:22 bikhanes. Ala en iri dugwit:

‘Hit o valisagwi menda en helep vaga vanggu dugwit,

helep ambi mbobagagwa ako,

mondok-mondok helep owak ndalaga o,’

yiluk, yagagi andi, At Yesus-at yiluk yagagi.”

12“It avakwa yi awi ndi awi o wen vaga yoma menda ovok erogo, ‘Ap yienat henagap wendarisogon o,’ yiluk, inis ambi adik yukneregetek. Ata, ‘At Yesus adik enat, henagap wendarisogon,’ yiluk, yukneragagi.”

13Yugirigya lagagimu, it homagagwa en Peterus Yohanes ako, sekolah ogagetek it ap ugun menda welagagwa ovara, enalon dek dugwit, yugurugwi ako yedok inigu lagagwarik, “Yesus inim nagu lagagwa yiat inigup o,” yiluk, vok yugeragagwa. 14Ap sek aga ako Peterus Yohanes enadema mendek hugu lagagwarik, “Wene onggo nggarogo yuguruk?” yiluk, mbup yagagwa. 15Mbup yugu lagagwarik, “Wene amburup mbalisagwima en weram wilitales,” yugurugu lagagwama, wunggusigik, enadikmu wene mbanggu dugwit, 16“Ap yi, nggarogonggan okbisamwi? Nggarogo ogarubuk menda iya ogagao ako it Yerusalem menda ovok erogo inilup agarwikmu, niren, ‘Ap sek ogagetek,’ yup andi, meyan. 17Ata, ombokma mbigali laguven, ‘Ap andi inis vaga ambi inim yugeregek nagu dogop andi mondok moga. Ambi inim yugeregek nagu hiniselok, weyak erogo okbigigasogom,’ yugerasogom,” yiluk, yagagwa.

18Yugu lagagwarik, yanggup yugeragagwa wagu lagagwama, yugurugu dugwit, “At Yesus inis ambi inim yugurugwi, mamulirugwi, ogarit laup mondok moga,” yiluk, mbereragagwa. 19Mbereragagwa ovara Peterus Yohanes en it yugurugu dugwit, “Nit Ala ane hulup a, ata hit henane hulup a? Ala ivaga hiren wene nggatul hanes. 20Nenaruk hunggwis, ninil hugwi, ogagagup wene ako, yugeregetek mbup yup meyan okninivisiga atma, yugurugu dogosogon o.”

21Yugurugu lagagwama, ap ako sek agya halok, it avakwa ovok en Ala siyabagwi inigu lagagwarik, enalon en, “Adem nano vaga yidilogo weyak okbisamwi o?” yiluk, un enalon ombarupwak yiluk enane anye vaga mbererugu lagagwarik, heda visilogo wibogogwa. 22At ap nggarogo ogarubuk menda vaga sek ogagagwa ako, endago hegek 40 tahun-at ogagagi.

Ala aburi en samban ogagagwa wene

23Visilogo wibugu lagagwama, Peterus Yohanes ako enaswei enadema lagu lagagwarik, it ap imam-imam agama Yakuri vagago agarwik menda enasini inim, ap ombok-ombok inim, yugeragagwa wene ako mbilinogo enaswei yugeragagwa. 24Yugurugwi ako it enaruk hunggu lagagwarik, it inim enendawi ambiat akluk samban ogagu dugwit, “Nenasin Ala wa. Wen-mbogot inim, is ombok yanggadek inim, yi menda ndi menda ovok erogo Harenen hadigat ogagagin o. 25Ninombao Daut Hat hayeloman ako Averiniki endawima des iri lagagimu, Hat Ala en yugugu heyagek, aren Yesus oklarisogon avok iri dugwit:

‘It yi avakwa ndi avakwa naninis-haninis yagan lagu dugwit, weyak erogo bigik nagwis,

ap ininis unggul adik-adik menda enam warogo wene mbauk erogo mbalit nagwis,

ogasagwi andi,

nggarogo yiluk ogasagwi?

26 # Mazmur 2:1, 2 bikhanes. At Nenasin Ala inim,

At denogo bagagi ako inim,

weyak okbisaguluk,

ap ininis ombok yi awi ndi awi en dikduk ogagwi,

avakwa enasini ap ombok-ombok homakbaluk, wene hologo bagwi,

ogasagwi o.’”

27“Yagagi ako, o kota yoma it Herodes inim, Pondius Pilatus inim, it weram Yakuri dek menda inim, it Iserali menda inim, iren Hat hayeloman Endawi Sek Adik Denek Yesus, Hat denogo mondok okbagagin ako, At warogo bapwak yiluk avyarat o kota yoma homagagwa. 28Hat hinggis anye vaga yi ogagek ndi ogagek ogarup endak hologo bagagin ako, ogarusogom yiluk ogagagwa. 29Nenaruguluk ogasagwi andi hil bigisin o, Nenasin. Inugu dogomindik, nenalon dek dugwit Hat hane yugurugu dogoguluk, nit hayelomani nenendawi modo erogo okbininin.”

30“It aup warek ambi iniselok, sek arupwak yiluk hinggis vakbisin. Eke, hayeloman Endawi Sek Adik Denek Yesus ako inis vaga nggarogo ogarubuk menda inim, inilup arup enalon werek menda inim, ogasiga ako, nit ogaruguluk okbininin,” yiluk, samban ogagagwa.

31Samban ogagu lagagwama, o it werekma ako wadok iri dugwit, Ala Averiniki it ovok erogo enendawima des iri lagagimu, inugutek dugwit, Ala wene yugeregek nagu lagagwa.

Ala aburi enendawi ambiat dambulik dugwit ogagu lagagwa wene

32It avakwa Yesus avyarat umbutugwa menda ako ovok erogo enendawi ambiat dambulik dugwit, enangge-enangge ako, “Yi hat menda o. Yi an menda o,” yegetek ovara, un, “Nit ovok nenangge o,” yugu lagagwa. 33It lakbigik menda akoen, “Nenowa Yesus hambigya lagagirik, iluk akluk mendok yagagi o,” yiluk, enalon embetetek enane anye vaga wene ako vagalogo yugeregek nagu lagagwa. Yugeregek lagusigik, Ala en adenggen wisane enovaga bugu lagagi. 34-35It enawen werek halok, ata it enawi valek werek halok, onggo hubaluk, yoparip ako it lakbigik menda enadema bawaguselok, it ambi enanggedek halok man erogo wogurugu lagagwa vaga, it enanggedek ambi welagetek.

36Anderogo ogagusim, ap Lewi menda ambi inis Yusup, awi adem Sipurus menda atma, it lakbigik menda en inis ambi Mbarenabas yugu lagagwa. Nit nenane vaga inis andi, “Enendawi Aik Wakbisaliga o,” yagalagwi. 37At ap ako awen yavup yasigama ambi werekma, onggo hunggu lagagirik, yoparip ako wolok it lakbigik menda enadema bawagagi.

Currently Selected:

Lakbogogi Wene 4: nbq2013

Highlight

Copy