Lakbogogi Wene 3

Peterus Yohanes en ap isok weyak ambi sek ogagagwa wene

1Ndugwis ambi vaga o howam jam 3 it samban ogasagwi atma, samban ogaruguluk, Peterus Yohanes iperen Ala awi valekma unggugwa. 2Ala awi valekma sup mbanggutmu ambi inis ‘Sup Sek,’ sanggugwarikmu akoma, ap erambo yidugup endaklagagi ambi en, it avakwa Ala awi valekma nungguguselok, ambenggino iri dogopwak yiluk, ndugurek-ndagarek at wolok balagu lagagwa. Ndugwis andi vaga vage balagagwa andoma werekma, 3it Peterus Yohanes Ala awi valekma nunggugwi inugu lagagirik, “Yoparip wokneres,” yiluk, nggino yugeragagi. 4Nggino yugirigya lagagimu, Peterus Yohanes en ap ako inil vurogo yokhugu dugwit, Peterus en, “Hil yoknisin,” yugugu lagagimu, 5“It nano woknirumwi?” yiluk, il vurek welagagi.

6Il vurek halok, at Peterus akoen, “Ninayoparip mbusi perak inim, emas inim, mondok dek ovara, an nandok agarik andi, ambi werek atma, wokhirisogon o,” yugugu lagagirik, “At Nasaret menda Yesus Keretus inis vaga mondok iri dogomindik lagya dogwen.” 7Yugugu lagagirik, at Peterus akoen inggis amotkan vakbaluk ao mondok okbagya hegek, ap ako isok inim, erambo inim, mbikit anye agya lagagimu, 8soklok erogo mondok iri lagagirik, akoma nagu-wagu lagagi. Nagu-wagu dugwit, soklok enggek wambegek yagan Ala siyabagek ogarit lagya dugwit Peterus Yohanes inim Ala awi valekma nonggagagi. 9Nunggwigya lagagimu, avakwa ovok erogo ap ako isok manivaga lagya dugwit, Ala inis siyabagya inil hugu lagagwarik, 10“Ap yi, Ala awi valekma sup mbanggutmu inis Sup Sek sanggugwarikmu akoma dugwit, ambenggino iri laga ako sek aga yi, wi!” yiluk, vok yagagwa.

Peterus en Ala awi valekma Ala wene yugeragagi wene

11At ap akoen Peterus Yohanes ininggis vagago werekma, it avakwa ovok erogo Ala awi ombok valek awi ambi adik ogarek ilim andoma inis Salomo sanggugwarikmu vupuk enadema ari lagu dugwit, “Wi!” yiluk, vok yagagwa. 12Homari wagwi ako at Peterus il inugu lagagirik, it yugirigya dugwit, “Hit ap Iserali menda yi wai. Ap yi sek aga andi, nggarogo yiluk vok yagalagwi? Nit nenanye vaga sek ogagetek, ata, nit sek ogasagwi menda vaga sek ogagetekma, vok yuknerabuk! 13Ninombawi Averakam inim, Isak inim, Yakup inim, Enasin Ala ayeloman Yesus ako, at Pilatus en hekbaup imbita hegek, hiren, henanggon umbutu dugwit warupwak yiluk, wogeragagup ovara, Ala en vage siyabagagi. 14At Endawi Mot, Sek Adigat Denek Agarik ako, “Nenanggon o,” yiluk, avoloma ap enasiga menda ambi hekbaup yiluk yagagup ako, hit Iserali menda aro. 15Niniluk okninivisiga menda adem ako Arat hegek hirenen watugup ovara, Ala en hambisagwima en iluk erogo mendok okbagagi ako ninil hagagup atma, vagalogo yukherelagwi o. 16‘Yesus en ogarup sek o,’ yiluk, nenendawi At ova vanggabaluk avyarat imbito ako vaga ap isok weyak hit hinilup hinil helagwi yi ako, ovok isok anye okbagas. Nenendawi Yesus avyarat imbito vaga at sek aga hinim agarik yi, hit ovok hinil hegep.”

17“Ai, nowa-nasin. Henasini ap ombok-ombok hinim ogagagup ako andi, hinunggut dugwit ogagagup an nilup. 18O muk Ala en iri dugwit, ‘An Henowa Inis Ombok denogo bagagis Keretus ako, edup-mbedup erogo yagan warisogon o,’ yiluk, yagagi ako, atma agetek hegek it ap navi-navi Ala yugirigya hegek yugu lagagwa ako, hit ogagagup ako vaga atma des yagagi. 19-20Des iri lagagimu, Henasin Ala en hit henomaduk degerogo bugugu halok, henendawi adenggen ugun dogovovok yiluk, henasam helok henomaduk mbobagu dogomundik Yesus ambetaga lagu dogwes. Anderogo ogagu hiniselok, henake denogo bagagi Keretus ako andi, Yesus atma, lakba wasogon.”

21“O muk erogo At Ala en, ‘Anderogo ogarisogon o,’ yiluk, it navi-navi At ane yugurugu lagagwa menda mondok adik denek yugu lagagwa ako, atma des yupwak yiluk, At Ala en wen-mbogot, yi menda ndi menda, ovok erogo adik swi menda ogarup ao helan, At Yesus mbogot vaga andoma dogosogon. 22At Musa en iri dugwit:

‘Henasin Ala en an lakbani wagagi hak, ap Ala en navi yugugu hegek yukheraliga menda ambi, hit menda-at, henake henadema lakba warisogon. Lakba warisogon akoen yi wene ndi wene yukhirigya halok, henaruk des erogo hunggu dogop o. 23#Ulangan 18:15, 18, 19. At yukherayogon ako hit ambien henaruk des erogo hunggitek dogosogon halok, henanggelekma en denogo baluk elose degerogo bayogon o,’

yiluk, yugeragagi.”

24“It ap navi-navi Ala en yugirigya hegek yugu lagagwa menda, Samuel en yugirigya lagagi hudien, at ambetaga wene yugurugu lagagwa, it ako ovok erogo yogak Yesus eyave vaga oklandiga yi,#3:24: Yogak Yesus eyave vaga oklandiga yi: Adem andi, Yesus wagagi hudien, At hivis warisogon hudi ovok erogo oklandiga yi aro. agetek hegek, yugu lagagwa. 25It navi-navi Ala en yugirigya hegek yugu lagagwa ako, enombawi hit aro. Ala en at Averakam yugugu dugwit, ‘Yi avakwa ndi avakwa o wen vaga yoma ako ovok erogo hat endaginivisogon vaga enadenggen hugu dogosogom o,’ yiluk, wene avyarat nggatuk erogo henombawi yugeragagi ako, hit menda mavorangge-at yugeragagi. 26Andi halok, At Ala en At ayeloman mondok okbagya lagagarik, hit henovavut weyak ogasagwi akomaen henadik-henadik wokhiniviluk wulu wagya dugwit, adenggen henovaga bigigapwak yiluk, endak hirat henadema lakba wagagi o,” yiluk, wene anderogoat at Peterus en yugeragagi.

Currently Selected:

Lakbogogi Wene 3: nbq2013

Highlight

Copy