Lakbogogi Wene 2
2
Ala Averiniki wambu wagagi wene
1O Pendakota ogarup ako ari wagya lagagimu, it avyarat umbutugwa menda ako ovok erogo ambekma homakbaluk, 2o akoma horaik werekma, mbikit supuk erogo mbogot vaga en havut ovagak avolok ane werek umwa akoma hobo-hobo ari nonggagagi. 3Nunggwigya lagagirik, hali abya ovagak higirogo it enadik-enadik enovaga ari wagya hagagwa. 4Enovaga ari wagya hugusigik, ovok erogo Ala Averiniki enendawima hobo yi nunggwigya lagagirik, yugirigya hegek, it avakwa enane inggut adik-adik menda mbikit inilup agya halok yugurugu lagagwa.
5O andi vaga, it ap Yakuri Ala enalon ombasagwi menda, o yi awi ndi awi ovok erogo en o Yerusalem wagu lagagwarik, werekma, 6ane iris ako enaruk hobaluk, homari wagu lagagwarik, it andi enane adik-adik vaga yugwi ako enaruk hunggu dugwit, “Wi! Yi andi nggarogonggan aga u!” yiluk, enendawi obak agagi. 7It ovok erogo enalon en, “Wi!” yiluk, vok yugu dugwit, “It ap Galilea menda en adigat enane adik-adik yagalagwi yira? It Galilea menda-at ovara, 8nit nenane vaga adik-adik yagalagwi hulisagwi yi, nggarogonggan wokbaluk yagalagwi embetep? 9Nit Paratia menda inim, Media menda inim, Elam menda inim, Mesopotamia agarwik menda inim, o Yudea en, Kapadokia en, Pondus en, Asia en, 10Virigia en, Pambilia en, Mesir en, o Libia kota Kirene avilis ambot andoma en, it Oroma menda wagao inim, 11nit Yakuri menda inim, it Yakuri menda dek ovara, Yakuri enawene wokbaluk it ogasagwi menda inim ogarit lagagwa inim, Kereta menda inim, Arap menda inim, nit ovok erogo Ala nggarogo ogarubuk menda ombok ogaga ako nenane adik-adik vaga mbilinogo yuknirugwi ovok hulisagwi o,” yiluk, yagagwa. 12It enalon en, “Yi nggarogo ogarup ova yagalagwi?” yiluk, at ambi yugigik ogagu lagagwama, 13it ninen, “Dek o. Is anggur agas nunggu lagarwik, nenek-nenek yagalagwi hak yagan nagwis yi hinil bigisenes,” yiluk enaganda yagagwa.
Peterus en Ala wene yugeragagi wene
14Enaganda yagu lagagwama, at Peterus aswei 11 menda inim mendek yugu lagagwarik, ane ombok vaga avakwa yugirigya dugwit, “Hit nowa-nasin Yakuri menda inim, hit o Yerusalem agipik menda ovok erogo inim, wene ambi yukherayogon atma, henaruk hunggu dugwit, dibagu dogwes.” 15Yugirigya lagagirik, “Hutun mo ao daga wagya hegek, jam 9 vaga-at it ap yi, anggur agas nelok nenek-nenek ovagak yagan nagwis ombasagwi andi dek. 16Nit nenane adik-adik yagalagwi yi, at Navi Yoel en Ala yugugu hegek yagagi ako atma asiga o. Andi,
17‘Ala en iri dugwit:
O hivis andi vaga, yi avakwa ndi avakwa ovok erogo An Naveriniki enovaga wombabisa warisogon.
Henaburi ap inim akwa inim enendawima yugirigya neyagek, An nane ako yugeregek nagwis,
henaburi apsawe en yugirigya neyagek nogo heda enabi heda hugwi,
henasini enanggok en yugirigya neyagek enabi vaga hugwi,
ogarusogom o.
18O hivis andi vaga, it An nayelomani akwa inim, ap inim,
it ogo ovok erogo An Naveriniki enovaga wombabisa warisogon atma,
An nane yugeregek nagu dogosogom.
19Mbogot vaga eloma en elose adik-adik menda ogagya,
o wen vaga yagamu en nggarogo ogarubuk menda ogagya,
ogagya dugwit,
enamuya inim, yuvuk ombok inim, hali abya inim, ogarisogon.
20An Henasin Ninis Ombok warup ako amor ari wagya neyagek,
mo il hwis iris, saut andi muya ovagak agya,
ogarimindikmu,
An niris novagangge dikduk ogakluk wagya neyalok, “Wi!” yiluk, siyabanusogom o.
21 #
Yoel 2:28-32 bikhanes. Andi ogagya dogomima, ap ambi saen, “Nenasin Inis Ombok o,” yiluk, An neyanggup iri halok,
agap wendarisogon,’
yiluk, at Navi Yoel en yugeragagi ako ari wandiga yiat.”
22“Hit ap Iserali menda yi, wai. An yukheraliga yi, des erogo hunggu dogones. Ala en At Yesus Nasaret menda denogo lakba wagagi hit dibavovok yiluk, Ala en anye ovaga bagya hegek, At hinim dugwit nggarogo ogarubuk menda ogagya, enalon werek menda ogagya, elose adik menda ogagya, ogagya lagagi ako hinilup. 23At Ala en hivis ogarup imbitigi musek Yesus ako vagago hit Iserali menda wokhurugu lagagwama, hambupwak yiluk, it ap weyak ogasagwi menda hinim eyave yo vaga lobalogo bagagup ovara, 24At hambisagwima andoma mondok sovalek dogop meyan atma, hambuluk lendagwima andoma yagan watigi ako agap wendarogo Ala en iluk erogo mendok okbagagi,” yiluk, Peterus en yugeragagi. 25Yugirigya lagagirik, it Yesus hambisagwima en iluk erogo mendok yagagi avyarat ombarupwak yiluk, Ndawi Wene ambi yugirigya dugwit, “O endak erogo at inis ombok Daut en Yesus hivis ogarup wene iri dugwit:
‘An Nasin Ala mondok-mondok nelosema agarik higi o.
Nasin ninim atma, an mondok wadokdek-at agirik o.
26-27Anderogo atma, an nendawi vaga adenggen imbita,
nane vaga siyabagagya,
ogasiga o.
An hambisagwima lagiluk hekbaninggya,
Habut Endawi Sek Adigat Denek ako ogo, hambuluk, vidis agya neyagek, hekbaninggya,
ogarisogonbuk atma,
an neyave hambisogon halok,
nape wenggelek dugwit, nendawi seyalek-at dogosogon o.
28 #
Mazmur 16:8-11 bikhanes. Niluk dogogiluk, sup yi o, yuknogogin,
Hat ninim werekma nadenggen ombok erogo okbanugun o,’
yiluk, yagagi wene ako andi, eyave Yesus en ogarup yiluk avok vagalogo yagagi.”
29“Nowa-nasin. Nit nenombao Daut ogagagi wene an vagalogo yukheraliga. At Daut ako hambigya lagagimu, wimu mabagagwarikmu akoma ninil helagwi. 30At Daut ako andi, Ala en yugugu hegek yugeraliga menda navi atma, Ala en wene hanum mbalogo Daut yugugu dugwit, ‘Daut wai. Hat hombawi ambi wene yugeraligama havoloma dogopwak yiluk Anen mondok okbayogon o,’ yiluk, yugogogi. Yugogogi wene ako ilup dugwit, 31At Ala denogo bagagi Keretus ako hambigya halok iluk erogo mendok okbayogon, Daut ilup atma iri dugwit:
‘An hambisagwima lagiluk hekbaninggya,
An hambuluk, vidis agya neyagek, hekbaninggya,
ogarisogonbuk o,’
yiluk, yagagi.”
32“Yesus warogo bagagup ako andi, Ala en iluk erogo mendok okbagagi nit ovok ninil hagagup atma, nit sigamat yukherelagwi. 33Ala en iluk erogo mendok okbagya lagagirik, inggis amotkan dogopwak yiluk, siyabagagirikmu, Asin en, ‘Averiniki wokherayogon o,’ yiluk, yagagi ako wigya lagagirik, woknera wagagi yi vaga nit ogasagwi hinil ninugwis, yugwi henaruk hunggwis, ogasagwi o. 34-35#Mazmur 110:1 bikhanes. At Daut ako mbogot vaga enggetek ovara, aren iri dugwit:
‘At Nenasin Inis Ombok Ala en, an Nasin Inis Ombok yugugu dugwit,
it hinim ndup ogorek menda ako,
An sovalogo havema bigitek neyagek,
ninggis amotkan hora yima’
yiluk, yagagi.”
36“Daut en anderogo yagagi atma, At yo winik vaga hit lobalogo bagagup Yesus ako andi, Ala en hit Henasin Inis Ombok dogopwak yiluk, okbagya, eke, An denogo bagagis Keretus yi aro, yiluk, yukhirigya, ogagagi ako, hit Iserali menda ovogat, ‘Yi avyarat,’ hinilup arovovok yiluk yukheraliga o,” yiluk, yugeragagi.
37Yugirigya ako hunggu lagagwarik, “Yesus watugup andi, nit weyak ogagagup atma,” yiluk, enendawi wakhidugu lagagwarik, Peterus inim, it lakbigik menda nin inim, hemerinipu dugwit, “Ayai, nenaswei. Nit weyak ogagagurikmu, nit nggarogo ogaruk o?”
38Yugurugu lagagwama, at Peterus akoen, “Henomaduk degerogo bigigapwak yiluk, hit henadik-henadik weyak ogasagwi ako henasam helok mbobagu dogomundik, Yesus ambetaga lagu dogwes. Mbobagu hiniselok, Yesus Keretus inis vaga ima wombabigigaup. Eke, andi ogagu hiniselok, Ala en Averiniki ako un onggodek wokherayogon o. 39Ala en, ‘Henasam hugu dugwit henomaduk mbobaluk, Yesus ambetaga lagu hiniselok, Ala Averiniki wokherayogon o,’ yiluk, avyarat nggatuk erogo yukheragagi ako andi, hit inim, hit henaburi inim, it ap adumu menda inim, hivis Nenasin Ala en yanggup yisogon ako ovok henake-at yukheragagi,” yiluk, yugeragagi.
40Yugirigya lagagirik, wene nin wisane erogo yugirigya dugwit, “It ap Iserali o yogak endago menda weyak ogasagwi Yesus ane wegetek menda ako, hinim weyak okhinivuguven yiluk, henagap wendakhedomanes,” yiluk, ane avuput vaga enaruk watya dugwit yugeragagi.
41Yugirigya lagagimu, it avakwa en at ane wogogwa ako ima wombabogogwa. O andi vaga inim hondalari nonggagagwa ako, eneyave dambulik ap wisane 3.000 hudi agagwa. 42It andien enendawi ambiat dambulik dugwit, it lakbigik menda en wene mamulirugwi ako des erogo hunggwis, inim erom amburup nunggwi, samban ogagwi, anderogo adigat ogagu lagagwa.
It avyarat umbutugwa menda en o Yerusalem ogagu lagagwa wene
43It lakbigik menda akoen nggarogo ogarubuk menda ogagwi, inilup arup enalon werek menda ogagwi, ogaguselok, it avakwa ako ovok en, “Wi! Ninigut o,” yiluk, vok yugu lagagwa. 44It avakwa Yesus avyarat umbutugwa menda ako ovok erogo enendawi ambiat dambulik dugwit, yi menda ndi menda ako, “Nit ovok nenangge aro,” yiluk, 45it ambi enanggedek halok, it enangge-enangge ako, onggo hubaluk, man erogo wogurugu lagagwa. 46It ako enendawi ambiat akluk, ndugurek-ndagarek Ala awi valekma mbumbumu homari nunggugwi, enendawi sagain vaga adenggen dugwit enamwa adik-adik erom ugurogo baluk nunggwi, 47Ala siyabagwi, ogagusigik avakwa Yesus ao avyarat embetetek menda ovok en it Ala aburi andi, enendawi adenggen umbutu lagagwa. Eke, Nenasin Inis Ombok akoen ndugurek-ndagarek it avakwa enagap wendarogo ambi hondabigik lagagi.
Currently Selected:
Lakbogogi Wene 2: nbq2013
Highlight
Share
Copy
Want to have your highlights saved across all your devices? Sign up or sign in
