Lakbogogi Wene 1

1-2Teovilus wai. At Yesus en yi ogagek ndi ogagek ogagya, wene mamulirigya, ogarigiluk wagagi ako asinggigi hudien Averiniki endawima dugwit, At aori denogo lakbogogi ako wene enovaga bugu lagagirik, mbogot vaga wolok inggya hegek ogagya lagagi ako ovok erogo mbuku endak ako vaga dirup watigis. 3At watu lagagwama, hombagagi ako iluk agya lagagirik, “It naori en An avyarat niluk agi, inilup arupwak,” yiluk, sigam agya, eke, Nenowa Inis Ombok Ala en denogo bagagi ako avema bininaup wene ako yugirigya, ogagya hegek, ndugwis 40 hudi welagagwa.

4-5Ndugwis ambi vaga At aori inim erom nunggu dugwit, it yugirigya, “At Yohanes en avakwa weyak ogasagwi ako enasam huguselok, ima wombabugu lagagi ovara, Nasin en Averiniki vage horok yiat wokhera wambu warisogon atma, hit o Yerusalem hekbaluk labuk. Nasin en, ‘Avyarat wokherayogon o,’ yiluk, yagagi An yukhirigya lagi ako, wokherapwak yiluk, abyam dogop,” yiluk, yugeragagi.

Yesus mbogot vaga wolok inggigi wene

6It ako Yesus inim homakbaluk dugwit, At yugugu, “Nenasin wai. Endak nit Iserali menda nenasin inis ombok Daut avema ninigik, nenendawi ugun seyalek welagagup hak, nit yogak anderogo it ap Oroma menda en sovabininelagwi ako wibisiluk nit sek okbininaup a?” yiluk, yugogogwa.

7Yugugu lagagwama, Yesus en wene onggo it yugirigya dugwit, “O ndugurek-ndagarek ogagu dogop Nasin Ala adigat andok dugwit, hit Iserali menda sek okbigigaup hologo bagagi andi, hit hinilup arup meyan. 8Hit ako Averiniki henovaga wambu wagya dugwit, At anye okbugugu hegek, o Yerusalem inim, o Yudea ovok erogo inim, o Samaria inim, yi awi ndi awi atok-atokma andoma ovok erogo inim, An ogarit nagu lagagis hinil neyagu lagagup wene ako yugeregek nagu dogop,” yiluk, yugeragagi.

9Wene andi yugirigya lagagirik, inil iligik inigik, wolok inggya lagagimu, hena anggelekma en hwilagagi.

10At mbogot vaga inggya hegek, it inil ao iligik werekma, ap mberen yum mudu yanggwi ovagak yirik supuk erogo enadema mendek yi wagya lagagirik, 11yugurugu dugwit, “Hit ap Galilea menda yi wai. Nggarogo yiluk hit mbogot vaga hinil iligik adigat agipik? At Yesus eyave hit hinil hinigik mbogot vaga wolok inggya hegep andi, wane-wane hivis At eyave anderogoat wambu wagya hagup,” yiluk, yugeragagwa.

Yudas avoloma mondok okbagagwa wene

12Yugurugu lagagwama, it lakbigik menda ako o ndom Saitun vaga en o Yerusalem horok satu kilometer-at eneyami vaga wambu wagagwa. 13O kota Yerusalem nunggu wagu lagagwarik, it agarwikmu handimen akoma unggugwa. It unggugwa ako eneyave andi, Peterus, Yohanes, Yakobus, Andereas, Pilipus, Tomas, Batolomeus, Matius inim. Alepeus abut Yakobus ako inim, at Simon ap Selot menda inim,#1:13: Ap Selot andi it ap Yakuri menda enadik dogop ogagu lagagwa menda. Yakobus ambi abut Yudas inim, akoat unggugwa. 14It akwa nin inim, At Yesus isa Maria inim, Yesus aori ambetaga menda inim, andoma inim dambulik dugwit, enendawi ambiat akluk samban adigat ogagu lagagwa.

15It andoma inigik, ndugwis ambi vaga it avakwa Yesus Ala Abut denek menda avyarat umbutugwa menda ako eneyave 120 hudi homagagwa enanggelekma en, at Peterus ako mendek iri lagagirik, 16-17yugirigya dugwit, “Nowa-nasin. At Yudas ako ninim Yesus ane wokbaluk, At eyavup ogagu dogopwak yiluk denogo mondok okbininggigi ovara, at Yudas ogarup wene ako o endak erogo Averiniki en Daut yugugu hegek yagagi Ala wene dirup warek ako, atma des yupwak yiluk, at Yudas en yugirigya lagagimu, Yesus eyave vagatugwa o,” yiluk, yugeragagi.

18(At Yudas weyak ogagagi onggo yoparip wogogogwa ako vaga wen onggo bagagirikmu andenam at ape samup yi wambigya lagagirik, agaum bulagya dugwit, alor ovok erogo hudilogo wulu wagagi. 19Hudilogo wulu wagagi yagagwa ako, it Yerusalem menda ovok enaruk hunggugwarikmu wen onggo bagagi ako inis it enane vaga andi, “Akendama-at,” yugu lagagwa. Eke nit nenane vaga andi, Amuya Wombagagirikmu, yagalagwi.)

20 # Mazmur 69:25 bikhanes. At Peterus akoen wene andi yugirigya lagagirik, Ndawi Wene vaga Ala wene ambi yugirigya dugwit,

“At welagagirikmu avakwa winggik-nonggegek yegetek werekma,

o andi um dogopwak,”

yiluk, yagagi. Eke, ambi iri dugwit:

“At avoloma ogagya dogopwak yiluk, ap adik ambi mondok okbapwak o,”#Mazmur 109:8 bikhanes.

yiluk, mbuku Ndawi Wene ako vaga dirup warek agarik. 21-22Agarik atma, ap ambi Yesus iluk akluk mendok yagagi il hagagi halok, ninim Yesus Ala Abut hambigya lagagirik iluk akluk mendok yagagi wene ako vagalogo yugeregek nagu dogoguluk, denogo baup agarikmu, okbasogom. Ap andi at Yohanes en avakwa ima wombabugu lagagi hudien Yesus nenanggelekma en mbogot vaga wolok inggigi hudi ndugurek-ndagarek Nenowa Yesus ninim nagu lagagup ako menda ambi mondok okbasogom,” yiluk, yugeragagi.

23Yugirigya lagagimu, ap ambi denogo basogom yiluk ap mberen endak denogo bogogwa. Ap ambi denbagagwa ako inis Yusup. Yusup andi inis henggam, inis ambi Mbaresabas, inis ambi hivis salek andi Yustus. At ako denogo bagwi, eke, ap ambi inis Matias denogo bagwi, 24-25okbugu lagagwarik, samban ogagu dugwit, “Nenasin o. At Yudas ninim Hat heyavup ogarit nagu dogosogom yiluk denogo bininggigin ovara, hekbininiluk at laup embetarikmu akoma-at ari lagarikmu, yi avakwa ndi avakwa enendawi ombasagwi ovok hilup atma, it ap mberen denogo bugup yi, at avoloma denogo baup embeten ako, yuknerano,” yiluk, samban ogagagwa. 26Samban okbagu lagagwarik, helep enggen vaga enavut mbanggu dugwit, ‘Avut endenogo lagya halok, Yusup mondok okbaup. Eke, avut endenogo lagatek halok, Matias mondok okbaup,’ yiluk, ogagu lagagwama, avut endenogo lagatek halok, it ap 11 lakbigik menda ako inim dogopwak yiluk Matias-at denogo mondok okbagagwa.

Currently Selected:

Lakbogogi Wene 1: nbq2013

Highlight

Copy