Matius 26
26
Pangkewo Yesus kaopo ngkanina nangkambelai bewa-'I mei mamate
1Nahudupi Yesus nanguli humawee patudu-Na lauria, iulika-Naramo ana guru-Na, 2“Laincanimimi ane roeopi rababeimi huha eo bohe Paskah to Yahudi#26:2 Eo bohe Paskah to Yahudi nampalinga tempo Alatala nampaliu dola houra to Israel i Mesir pade nampatehi humawee ana ulumbuara to Mesir. Napu ee laikeni-Na to Israel nehuwu lako Mesir, rau i tana to laitipaka-Na hi Abraham, Ishak pade Yakub (hilo Kel. 12:1-27). Rara baha Ibrani eo bohe ee mai laikahangai Pesakh, batuana: Nampaliu Dola.. Tempo ee mei Ana Manuhia rapopewai hi bali-bali-Na bona rasalib.”
Liwo mopatehi Yesus
(Mrk. 14:1-2; Luk. 22:1-2; Yoh. 11:45-53)
3Tempo ee mai, nahiromuramo imam to i matana pade totua-totua ngata to Yahudi i hou Kayafas, Imam Bohera to Yahudi. 4Laipolibuira bewa akalara bona mamalara mampahoko Yesus pade mampatehi-'I. 5Naupawee iulira mui, “Nemo tempo eo bohe Paskah to Yahudi, bona nemo mei maria pogehoa i lentongora todea.”
Hadua bangkele notuahi woo Yesus hante lana wongi
(Mrk. 14:3-9; Yoh. 12:1-8)
6Tempo Yesus i ngata Betania, i hou Simon to ilodo nohaki kusta, 7naratami hadua bangkele hi Yesus nangkeni butolo to laibabei lako watu pualam, to laikahini hante lana wongi to nahuli olina. Bula Yesus noncuna nangkoni, bangkele ee notuahi woo Yesus hante lana ee mai halaku pebilana.
8Nampahilo lauria, ana-ana guru-Na nahodo pade iulira, “Napa pade laipadaana motodi lana ee? 9Lana ee nahuli mpuu olina. Mamala rapobalu pade doina rapopewai hi to nakahiahi.”
10Naupawee laincani-Na Yesus napa to ipekirira, pade iuli-Na, “Napa pade laipakahuhami rara bangkele ei mai? Hia ei mai nobabei gau to nabelo hi Aku. 11Apa to nakahiahi maria moto oara dohemi, naupawee Aku moma-'A maria oa dohemi. 12Bangkele ei notuahi woo-Ku hante lana wongi, bona mopahadia woto-Ku ratana. 13Mpuu-mpuu Ku'ulika komi, i rima-rima Kareba Belo rakarebai i humangkulili dunia, napa to laibabei bangkele ei mai, rapojarita mui mei bona mampalinga'i.”
Yudas nampobalu Yesus
(Mrk. 14:10-11; Luk. 22:3-6)
14Napu ee hadua lako hampulu rodua ana guru Yesus to laikahangai Yudas Iskariot, rau hi imam-imam to i matana 15pade nampekunera, “Napa to miwaika'a, bona kupopewai Yesus hi komi?” Aji, laibayarirami Yudas tolu mpulu doi halaka. 16Nopamula lako hee, laipalinami Yudas loga belona mampopewai Yesus.
Yesus nangkoni hante ana-ana guru-Na nampalinga eo bohe Paskah to Yahudi
(Mrk. 14:12-21; Luk. 22:7-14, 21-23; Yoh. 13:21-30)
17Eo to pamulana lako eo bohe Roti to Moma Lairagii, narataramo ana guru Yesus pade nampekune-'I, “I rima dota-Mu kipahadia pangkoni eo bohe Paskah?”
18Nehono Yesus, “Koimo komi i ngata Yerusalem, pade rau komi hi hadua tauna. Ulika'i iwei, ‘Peboha Guru: Parami marata tempo-Ku. I rara houmu-'A mingki mangkoni hante ana-ana guru-Ku mampalinga eo bohe Paskah.’ ” 19Lauparia ana-ana guru-Na nobabei ewa to laituduka-Nara Yesus pade laipahadiara pangkoni eo bohe Paskah to Yahudi.
20Ngkawengiapi, Yesus noncuna nangkoni hingkani-ngkani hante hampulu rodua ana guru-Na. 21Bulara nangkoni, Yesus nanguli, “Mpuu-mpuu Ku'ulika komi, hadua lako hi komi mei mampopewai-'A hi hira to nampobali-'A.”
22Lauparia hante juu rarara, hadua bo haduara nepekune hi Hia, “Pue, moma aku to iuli-Mu etu to?”
23Yesus nanguli, “Tauna to hingkani-ngkani hante Aku nolome roti i rara mangko, hiami to mampopewai-'A. 24Nakono ami Ana Manuhia kana mamate ewa to naria amimi laitulihi rara Buku to Nagaha nangkambelai Hia, naupawee mahilakami tauna to mampopewai Ana Manuhia ee. Nabelo laupi hi tauna ee mai ane moma'i laiote i rara dunia.”
25Yudas, to mampopewai-'I ee mai nanguli, “Rabi, moma aku to iuli-Mu etu to?”
Yesus nampahonoi'i, “Iko motomi nanguli.”
Yesus nampawaira ana guru-Na roti pade anggur
(Mrk. 14:22-26; Luk. 22:14-20; 1Kor. 11:23-25)
26Tempora nangkoni, Yesus nangala roti pade nosukuru hi Alatala. Laitubi-tubi-Na roti ee pade laiwaika-Na hi ana-ana guru-Na pade iuli-Na, “Alami roti ei pade konimi, eimi woto-Ku.” 27Napu ee laiala-Na panginua to laikahini ue anggur pade nosukuru hi Alatala. Laiwaika-Nara ue anggur ee pade iuli-Na, “Humaweemi, inumo komi anggur lako panginua ei, 28apa eimi raa-Ku, to rabubu mampakaroho potipa Alatala hante manuhia. Raa-Ku ee mai rabubu bona madea tauna ra'ampuni doha-dohara. 29Ku'ulika komi, mopamula lako welau momami Kuinu ue anggur duuna marata tempona Tuama-Ku moparenta halaku Magau i dunia to nabou. Tempo eedimi mei pade Kuinu anggur to nabou hingkani-ngkani hante komi.”
30Napurapa Yesus hante ana-ana guru-Na noulia nampaune Alatala, rauramo i Bulu Zaitun.
Yesus nanguli ane Petrus mei mampehapuka-'I
(Mrk. 14:27-31; Luk. 22:31-34; Yoh. 13:36-38)
31 #
Za. 13:7 Napu ee Yesus nangulikara ana guru-Na, “Ngkawengia ei mai humaweemi molengka peparahayami habana Aku. Apa naria amimi laitulihi rara Buku to Nagaha iwei,
‘Kupatehi mei to poewu,
pade bimba-bimba to laiewuna magaro.’
32Naupawee ane rapakatuwu nculi-'Apa, Kupoilodokamo komi rau i Galilea.”
33Nangepe lauria, Petrus nangulika Yesus, “Naupa humaweera ei molengka peparahayara habana Iko, aku moma.”
34Yesus nangulika'i, “Mpuu-mpuu Ku'ulikako, ngkawengia ei, kapomana manu motuturua, tolu ngkanimoko mampehapuka-'A.”
35Iuli Petrus hi Hia, “Naupa kana mamate'a hingkani-ngkani hante Iko, moma-Ko kupehapuka.” Humawee ana guru to ntanina mui nanguli iwee.
Yesus nohambaya i Getsemani
(Mrk. 14:32-42; Luk. 22:39-46)
36Napu ee Yesus hante ana-ana guru-Na rau i hangu tampa to laikahangai Getsemani. Karatara i hee iulika-Nara ana guru-Na, “Poncunamo komi i hei, Aku rau mohambaya hamai.” 37Lauparia laikeni-Na Petrus pade rodua ana Zebedeus nampodohe-'I. Nopamulami najuu rara-Na pade nahuha mpuu iepe-Na. 38Laiulika-Nara, “Najuu mpuu rara-Ku, ewa to mamate-'Amo. I heimo komi olu pade mainga komi dohe-Ku.”
39Lauparia nomako-'I bahangkua lempa lako hee pade notingkodu nohambaya, iuli-Na, “Oo Tuama-Ku, ane ke mamala, nemo-'Akuwo mangkolo kahehaa ei#26:39 Ane ke mamala, nemo-'Akuwo mangkolo kahehaa ei. Rara baha Yunani laiuli iwei, “Palelemi hangkiri ei Mupaka'awa lako hi Aku.” Hangkiri ee mai batuana: kahehaa to kana nakolo Yesus mei tempo Alatala mampahuku-'I habana doha manuhia., naupawee moma dota-Ku to mawali, aga dota-Mu.”
40Napu ee nanculi-'I rau hi ana-ana guru-Na, lairata-Nara bulara naleta. Iuli-Na hi Petrus, “Moma komi namalada nainga naupa wuwu hajaa aga hante Aku? 41Maingamohawo pade mohambaya, bona nemo komi manawu i rara pehori. Nakono ane rarami mingki mobabei to nabelo naupawee wotomi nalente.”
42Napu ee rauki mui-'I nohambaya karongkanina, iuli-Na, “Oo Tuama-Ku, ane kahehaa ei momami mamala Kupalewa, palelemi dota-Mu to mawali.”
43Panculiki-Na mui hi ana-ana guru-Na, lairata-Na naletaki motorada, apa naroo mpuumi matara. 44Laipalele-Naramo i hee pade rauki mui-'I nohambaya katolu ngkanina. Hambaya-Na nahibali hante hambaya to laiuli-Na ee moto mui.
45Napu ee raumi hi ana-ana guru-Na pade iulika-Nara, “Paleta oamo komi. Hilo, naratami tempona Ana Manuhia rapopewai i rara mpalera tauna to nadoha. 46Pematamo, etumi tumai tauna to mampopewai-'A. Kitamo rau mampotomu'i.”
Yesus laihoko
(Mrk. 14:43-50; Luk. 22:47-53; Yoh. 18:1-11)
47Bula-Na nojaritadipi Yesus, naratami Yudas, hadua lako hampulu rodua ana guru-Na. Yudas narata hante todea to nangkeni tono lampa pade pato. Hira ee mai laitudu imam-imam to i matana pade totua-totua ngata to Yahudi. 48Laikewokana amiramo Yudas todea ee mai tanda iwei, “Hema to kueki, Hiami to mihoko.” 49Lauparia raumi Yudas nampamohuki Yesus pade nanguli, “Tabe Rabi.” Napu ee laiekinami.
50Naupawee Yesus nangulika'i, “Bale, babeimi napa to laipatujumu narata i hei.”
Lauparia todea ee mai nampamohuki Yesus pade nampahoko-'I. 51Naupawee hadua lako hira to nampodohe Yesus nowutu tono lampana pade nantime batua Imam Bohe hampena naputu talingana.
52Yesus nangulika'i, “Linco nculi tono lampa etu rara polodoana, apa hema to mampake tono lampa, rapatehi mui hante tono lampa. 53Ba iulimu iko moma-'A mamala merapi hi Tuama-Ku bona dungku Natudu melabi lako hampulu roncobu tantara huruga mantulungi-'A?#26:53 melabi lako hampulu roncobu tantara huruga rara baha Yunani laitulihi iwei, “melabi lako hampulu rongu rombonga.” Humawee tantara ee mai maria tolu mpulu ono ncobu hampe pitu mpulu rongu ncobu kadeara. 54Naupawee ane ewa ee Kubabei, moma'i rapaganai napa to laitulihi rara Buku to Nagaha ane humawee lauria kana madupa hi Aku.”
55Napu ee Yesus nangulikara todea, “Iulimi komi Aku ei mai to powao, hampena narata komi nampahoko-'A hante tono lampa pade pato? Butu eona-'A noncuna i karawaa Hou Alatala nopatudu, moma-'A laihokomi. 56Naupawee humawee lauria nadupa nopaganai to laitulihi rara buku nabi-nabi.” Napu ee humawee ana guru-Na nalai nampalahi-'I.
Yesus i tingoo to Pobotuhi Agama Yahudi
(Mrk. 14:53-65; Luk. 22:54-55, 63-71; Yoh. 18:12-14, 19-24)
57Napu ee hira to nampahoko Yesus nangkeni-'I rau i hou Kayafas, Imam Bohera to Yahudi. I hee mai nahiromuramo totua ngata to Yahudi pade to nataualu buku Taurat. 58Petrus nantuku Yesus lako ka'awaana duuna i karawaa hou Imam Bohe. Pehua Petrus i karawaa hou Imam Bohe, noncunami dohera to pojaga bona nahilo bewami mei kahuduana uruhia ee mai.
59Imam-imam to i matana pade humawee to Pobotuhi Agama Yahudi ee mai nampehimukui nampali tauna to mahadia mawali habi to mokalowo nangkambelai Yesus, bona mamala-'I rahuku mate. 60Nadeamo tauna to nohabi hante kalowora, naupawee moma naria lairatara hala-Na to mahipato rahukuka mate-'I.
Kahuduana nokangkoreramo rodua habi 61nanguli iwei, “Naria wengi iuli-Na Tauna ei iwei, ‘Mamala Kupakaropo Hou Alatala pade Kupatuna nculi rarana tolu eo.’ ”
62Nangepe lauria, nokangkoremi Imam Bohe ee mai pade nangulika Yesus, “Moma nariadi honoia-Mu lako to lairaikara-Ko habi ei mai?” 63Naupawee, moma-'I nowotu Yesus.
Napu ee iulina muimi Imam Bohe ee mai hi Yesus, “Ulikamo kami i tingoo Alatala to natuwu, ane mpuu-mpuu Ikomi Magau to Pepakahalama, Ana Alatala!”
64Nehono Yesus, “Iko motomi nanguli. Naupawee, Ku'ulika komi, mopamula lako welau, mihilo motomi mei Ana Manuhia moncuna mali pangkana Alatala to Nabaraka pade manau lako huruga i rara gawu.”
65Pangepena lauria, Imam Bohe ee mai nohia waruna moto pade iulina, “Hia ei mai nampopore Alatala. Napapi bunuta mampali habi? Iepemi motomi pepopore-Na hi Alatala. 66Bewa popantaruimi?”
Tauna eera mai nehono, iulira, “Hia etu mai kana rahuku mate!”
67Napu ee laitailuhira lence Yesus pade laijagurura-'I. To ntanina mui nampahapa-'I, 68pade laipoporera-'I iulira, “He, Magau to Pepakahalama to laitipa Alatala! Ulika kami hema to nampahapa-Ko.”
Petrus nampehapuka Yesus
(Mrk. 14:66-72; Luk. 22:56-62; Yoh. 18:15-18, 25-27)
69Tempo ee mai, Petrus bulana noncuna i karawaa hou Imam Bohe. Naratami hadua batua bangkele nangulika'i, “Iko ei hadua to pantuku Yesus to Galilea ee.”
70Naupawee Petrus nampehapuka to iuli batua bangkele ee mai i tingoo humawee tauna, iulina, “Moma incaniku napa to iulimu etu.”
71Napu ee raumi Petrus i womo pehuaa rau karawaa. Hadua batua bangkele ntanina nampahilo'i, pade laiulikanara tauna to i hee, “Tauna ei mai nodohe oa hante Yesus to Nazaret ee.”
72Pehapukana mui Petrus hante nosumpa, iulina, “Moma incaniku Tauna etu.”
73Poma nahae, tau-tauna to nokangkore i hee narata hi Petrus pade nanguli iwei, “Natantu amimi iko hadua to nantuku Yesus, laiepe kami lako pojaritamu.”
74Lauparia nopamulami Petrus nampakamo wotona moto pade nosumpa, iulina, “Moma incaniku Tauna etu!” Tempo ee mui, notuturuami manu. 75Lailinganami Petrus napa to laiuli Yesus hi hia, “Kapomana manu motuturua, tolu ngkanimoko mampehapuka-'A.” Napu ee nehuwumi Petrus lako karawaa hou ee rau nakeo hante juu rarana.
Currently Selected:
Matius 26: MYL
Highlight
Share
Copy
Want to have your highlights saved across all your devices? Sign up or sign in
