Matius 25
25
Porapa nangkambelai toronaa-toronaa to nadea timbara pade to nadoyo
1“Karata-Ku karongkanina halaku Magau nahibali ewa porapa ei. Naria hampulu dua toronaa to nangala poindora pade rau nampotomu pongante balailo. 2Alima lako toronaa ee mai nadoyo, pade alima nadea timbara. 3Toronaa to nadoyo eera mai nangkeni poindo, naupawee momara nangkeni lana, 4bo toronaa to nadea timbara eera mai nangkeni poindo hante lana i butolo. 5Naupawee apa nahae karata pongante balailo ee mai, naroomi matara, pade natepaletaramo.
6Ntongo bengipi, ieperami tauna to nanguli, ‘Naratami pongante balailo, potomumi!’ 7Tempo ee mui nemata puraramo toronaa ee pade nopahadia poindora. 8Toronaa to nadoyo eera mai nangulikara toronaa to nadea timbara, ‘Maikawo hodi lanami, apa para mamatemi poindo kami ei.’
9Naupawee nehonora toronaa to nadea timbara ee mai, ‘Moma. Apa ane kiwai komi, moma muikawo magana hi kami. Aginalau rau komi mangoli hi to pobalu lana.’ 10Naupawee bulara rau nangoli lana, naratami pongante balailo ee. Lauparia toronaa to nahadiami poindora ee nehua hingkani-ngkani hante pongante balailo i rara hou ponikaa, pade laiwuntami womo.
11Napu ee narata muiramohawo toronaa to nadoyo ee pade nekio lako hawalikuna, iulira, ‘Tuama! Tuama! Beaka kamikawo womo!’
12Naupawee pongante balailo ee nehono, ‘Mpuu-mpuu ku'ulika komi, moma komi laincaniku.’ ”
13Nahudupi Yesus nanguli porapa lauria, iuli-Na, “Etumo, maingahawo apa moma incanimi bulauma-'A marata nculi.”
Porapa nangkambelai batua to nobunu pade to moma nobunu
(Luk. 19:12-27)
14“Karata-Ku karongkanina halaku Magau nahibali ewa hadua maradika to mingki rau i ngata ntanina to na'awa. Kapomana neongko, laikiona batua-batuana pade laiwaikanara kaparahayaa mampauruhi doina. 15To hadua laiwaikana alima ncobu doi bulawa#25:15 Alima ncobu doi bulawa rara baha Yunanina laiuli “alima talenta.” , to ntanina laiwaikana roncobu, pade to ntanina mui laiwaikana hancobu, hore-hore nantuku pakuleara. Napu ee neongko'imi. 16Batua to nantarima alima ncobu doi bulawa ee mai, dungku rau nopagoli doi ee hante nodaga pade lairatana kauntuana alima ncobu doi bulawa. 17Batua to nantarima roncobu doi bulawa ee mui nobabei ewa ee pade lairatana kauntua roncobu doi bulawa. 18Naupawee batua to nantarima hancobu doi bulawa ee, rau nokae tana pade noleru doi maradikana i ria.
19Naliu ee, nahae mpuu pade naratadi maradikara nonereke hante hira. 20Batua to nantarima alima ncobu doi bulawa, narata pade nangkeni kauntuana alima ncobu doi bulawa, iulina, ‘Maradika, alima ncobu doi bulawa laiparahayakamu'a. Hilo, laipagoliku doi ei pade lairataku kauntua alima ncobu doi bulawa.’
21Maradikana ee mai nangulika'i, ‘Nabelo mpuu pobagomu etu, iko batuaku to nabelo pade namala raparahaya. Apa namalako laiparahaya nampobago bago to hodi, kuwaikako mei bago to nadea. Maimoko pade kagoemoko doheku.’
22Napu ee narata muimihawo batua to laiwaika roncobu doi bulawa, iulina, ‘Maradika, roncobu doi bulawa laiparahayakamu hi aku. Hilo, laipagoliku doi ei pade lairataku kauntua roncobu doi bulawa.’
23Maradikana ee mai nangulika'i, ‘Nabelo mpuu pobagomu etu, iko batuaku to nabelo pade namala raparahaya. Apa namalako laiparahaya nampobago bago to hodi, kuwaikako mei bago to nadea. Maimoko pade kagoemoko doheku.’
24Napu ee narata muimihawo batua to nantarima hancobu doi bulawa ee, iulina, ‘Maradika, laincaniku ane iko to naheke, to nopuputi wua tinuda to moma laitudamu, pade nosangki to moma laihawumu. 25Apa naeka'a hi iko, etu pade rau laileruku doi bulawa to laiparahayakamu hi aku i rara tana. Ei motokuwo doimu.’
26Nehono maradikana ee mai hi hia, ‘Iko batua to nadaa ingkumu pade nadea lohemu. Laincanimumi ane aku ei mai to naheke, to nopuputi wua tinuda to moma laitudaku pade nosangki to moma laihawuku. 27Ane wee, napa pade doiku etu mai moma laiwaikamu hi tauna to nobago nopagoli doi, bona ane manculi'a kutarima nculi hante kauntuana?’
28Lauparia iulina maradika ee hi batua ntanina, ‘Alami doi etu lako hi hia pade waika tauna to naria hampulu ncobu doi bulawana etu. 29Apa butu tauna to namala raparahaya mampauruhi napa to laiparahayaka hi hia, ratambaiki mei to naria hi hia, hampena melabi kadeana hi hia. Naupawee hema to moma namala raparahaya mampauruhi napa to laiparahayaka hi hia, humawee to naria hi hia, kana ra'alai nculi. 30Pade batua to moma nobunu etu mai, tenemi rau i kalimauana to nalimau ntoto. I riami potantangia pade kapepaa.’ ”
Pobotuhi to kahuduana
31“Ane Ana Manuhia marata nculi i dunia hante baa baraka-Na pade humawee malaeka mampodohe-'I, Hia mei moncuna i poncunaa kamagaua-Na pade moparenta halaku Magau. 32Humawee tauna i humangkulili dunia rapahiromu i tingoo-Na pade Hia mei mopatanira mawali rongu bagia, nahibali hante to poewu nopatani bimba lako kebe. 33Bimba-bimba Naboli mali pangkana-Na, pade kebe-kebe mali pangkai-Na.
34Napu ee Magau ee mei mangulikara to mali pangkana-Na, ‘Maita hei, komi to laitiroi Tuama-Ku, pehuamo komi i rara poparentaa-Ku. Apa i hei naria po'ohaa to laipahadiaka amimo komi hinungkai dunia laipajadi. 35Habana tempo-Ku naoro, laipakonimi-'A. Tempo-Ku nabai wuu-Ku, laipainumi-'A. Tempo-Ku nawali to rata, laitarimami-'A no'oha i houmi. 36Tempo-Ku moma nowaru, laiwaikami-'A waru. Tempo-Ku nadua, laipodoomi-'A. Tempo-Ku rara tarungku, narata komi nampelongi-'A.’
37Hira to nanoro ingkura i tingoo Alatala ee mei mampahonoi-'I, raulira, ‘Pue, bulauma-Ko laihilo kami naoro pade laipakoni kami-Ko, ba nabai wuu-Mu pade laipainu kami-Ko? 38Bulauma-Ko laihilo kami halaku to rata pade laiwaika kami-Ko po'ohaa i hou kami, ba moma-Ko nowaru pade laiwaika kami-Ko waru? 39Bulauma-Ko laihilo kami nadua ba i rara tarungku pade tulau kami nampodoo bo nampelongi-Ko?’
40Naupawee Magau ee mei mampahonoira, ‘Mpuu-mpuu Ku'ulika komi, hangu hangaa to laibabeimi hi hadua lako ompi-Ku to nakahiahi ei, nahibali hante laibabeimi hi Akumi.’
41Napu ee Naulika muira mei to mali pangkai-Na, ‘Petibomo komi lako tingoo-Ku, komi tauna to laikamo Alatala. Petibomo komi rau i rara apu to moma maria kaoraa baana duu kahae-haena, to laipahadiaka Magau Heta hante malaeka-malaekana. 42Habana tempo-Ku naoro, moma-'A laipakonimi. Tempo-Ku nabai wuu-Ku, moma-'A laipainumi. 43Tempo-Ku halaku to rata, moma-'A laitarimami no'oha i houmi. Tempo-Ku moma nowaru, moma-'A laiwaikami waru. Tempo-Ku nadua pade i rara tarungku, moma-'A laipodoomi ba laipelongimi.’
44Mehono muirahawo mei hi Hia, ‘Pue, bulauma-Ko laihilo kami naoro, ba nabai wuu-Mu, ba halaku to rata, ba moma nowaru, ba nadua, ba rara tarungku pade moma-Ko laitulungi kami?’
45Magau ee mei mampahonoira, ‘Mpuu-mpuu Ku'ulika komi, tempomi moma nadota nantulungi hadua lako ompi-Ku to nakahiahi ei, kakonona moma mui komi nadota nantulungi-'A.’ ”
46Nahudupi Yesus nanguli lauria, iuli-Na, “Hira to nadaa ingkura ee kana mamparata pehuku duu kahae-haena, naupawee hira to nanoro ingkura i tingoo Alatala mehua rara katuwua to moma maria kahuduana.”
Currently Selected:
Matius 25: MYL
Highlight
Share
Copy
Want to have your highlights saved across all your devices? Sign up or sign in
