Matius 24

Hou Alatala rapakaropo

(Mrk. 13:1-2; Luk. 21:5-6)

1Nehuwupi Yesus lako Hou Alatala, narataramo ana guru-Na nampamohuki-'I pade nantudoka-'I kabelo bagia-bagia Hou Alatala ee.

2Yesus nangulikara, “Laihilomi humawee lauria? Mpuu-mpuu Ku'ulika komi, moma maria hangua watu i Hou Alatala mairia to rapalele momeuncu hante watu ntanina. Humaweena rapakaropo.”

Kahehaa to madupa kapoma Yesus marata nculi

(Mrk. 13:3-13; Luk. 21:7-19)

3Napu ee raumi Yesus i Bulu Zaitun. Bula-Na noncuna hadudua-Na i hee, narataramo ana guru-Na nampekune-'I iwei, “Ulikamo kami, bulauma humawee to iuliMu etu madupa? Pade napa mei tanda karata nculi-Mu bo tanda kahudua dunia ei?”

4Nehono Yesus hi hira, “Maingahawo bona nemo maria tauna to mampakahalatara komi! 5Habana madea tauna marata mampake hanga-Ku pade manguli, ‘Akumi Magau to Pepakahalama to laitipa Alatala.’ Pade madea tauna to rapakahalatarara. 6Miepe mei to pohiwali pade kareba-kareba nangkambelai pohiwalia. Naupawee nemo komi maeka. Habana humawee lauria kana madupa, naupawee etu mai poma'i kahudua dunia. 7Habana ngata-ngata mei mome'ewa pade kamagaua mome'ewa hante kamagaua. I rima-rima, maria mei oro mpai pade linu. 8Naupawee humawee lauria pamula kapepaadipi, ewa kapepa hadua bangkele nantodokaha nangote anana.

9Tempo ee mei komi rapopewai hi tauna to mampakaheha komi pade mampatehi komi. Tauna i humangkulili dunia mampodaa komi habana komi to pantuku-Ku. 10Madea mei tauna momaramo meparahaya hi Aku, momepobaluramo hore hira pade momepodaaramo. 11Madea mei nabi to moma nakono meumba pade mopahalatara madea tauna. 12Pade mantambaiki ingku to madaa rababei, hampena madea tauna momaramo momepotowe.

13Naupawee hema to maroho peparahayana duu kahuduana, hia mei rapakahalama. 14Pade Kareba Belo nangkambelai bewa Alatala noparenta halaku Magau raparata i humangkulili dunia, bona humawee manuhia mamala mangepe Kareba Belo ee. Napu ee pade maratadi kahudua dunia.”

Yesus nanguli kahehaa to marata mei ane mamohupi tempo kahudua dunia

(Mrk. 13:14-23; Luk. 21:20-24; 17:23-24)

15 # Dan. 9:27; 11:31; 12:11 “Nabi Daniel owi noparata peboha Alatala, maria mei to Pepatehi to neliu kahekena mokangkore i kamara to nagaha rara Hou Alatala. (Hema-hema to nobaha kana napekiri belo napa batuana.) Ane mihilo to ewa ee madupa, 16tau-tauna to i Yudea kana malai rau i buluna. 17Tauna to bulara i lolo houra dungku mehomporamo pade metibo, nemorapa leba mangala rewa-rewara i rara hou. 18Pade to bulara i pampa, weturamo manculi mangala warura i hou. 19Metoweiramo bangkele to bulara notiana pade to tina to bulara nopahuhu anara tempo ee mai. 20Pohambayamo komi, bona tempomi malai ee mai nemo mambela tempo lengi pade nemo tempo eo Pentuua. 21#Dan. 12:1; Why. 7:14Habana tempo ee mai, maria mei kahehaa to neliu mpuu kapepana, to poma naria nadupa hinungkai dunia laipajadi pade to momami mei maria madupa. 22Pade ane ke moma'i laipakaboko-Na Alatala tempo kahehaa ee mai, humawee to natuwu, moma maria to mahalama. Naupawee habana towe-Na hi tau-tauna to laipelihi-Na, tempo kahehaa ee mai laipakaboko-Na.

23Tempo ee mai ane maria tauna manguli, ‘Hilo, ei-'I Magau to Pepakahalama,’ ba manguli, ‘Ria-'I,’ nemo miparahaya. 24Apa maratara mei to pokalowo mangaku ane hirami Magau to Pepakahalama to laitipa Alatala, pade marata muira mei nabi to moma nakono mobabei tanda-tanda to nabohe pade to nepakahera hampena mampakahalatara tauna. Ane ke mamala, tauna to laipelihi Alatala mui rapakahalatarara. 25Pairara mpuu komi, apa kapomana humawee lauria madupa, iulika-Ku amimo komi.

26Aji ane tauna mangulika komi, ‘Hilo, i tongo mpada to nabai ee-'I ria Magau to Pepakahalama,’ nemo komi rau. Ane raulira, ‘Hilo, i rara kamara ei-'I rii,’ nemo miparahaya. 27Habana tempo karata nculi Ana Manuhia kana rahilo i rima-rima i dunia ei, nahibali ewa kila neumba lako mataeo pade nampopewanta baana duu kaholoa. 28Ane maria mihilo tonci kaloaa nopahintobu nantilo, natantu amimi naria binata to namate i hee. Wee moto mui mei ane marata nculi-'A i dunia, natantu amimi mincani moto.”

Tanda karata nculi Ana Manuhia

(Mrk. 13:24-31; Luk. 21:25-33)

29 # Yes. 13:10; 34:4; Yeh. 32:7; Yl. 2:10, 31; 3:15; Why. 6:12-13 “Mahudupi kahehaa ee mai,

‘Eo mawali malimaumi,

pade wula momami mabaa.

Betue-betue marona lako langi,

pade baraka-baraka to naria i langi molengka.’

30 # Dan. 7:13 Napu ee, rahilomi tanda Ana Manuhia i langi, pade manuhia i humangkulili dunia makeo motantangi, pade rahilora mei Ana Manuhia marata i lolo gawu i langi hante humawee baraka-Na bo baa-Na to neliu mpuu pewantana. 31Tarompe to narimboho monina ratawui, pade Natudura malaeka-Na rau mopahiromura tauna to laipelihi-Na lako rima-rima i humangkulili dunia.

32Alami patudu lako porapa nangkambelai kau ara. Ane mohulu pade motawe nguradimi raana, mincanimi ane parami marata tempo eo ngkara. 33Wee moto mui komi, ane mihilo humawee kajadia to iuli-Ku ee mai, mincanimi ane karata-Ku karongkanina namohumi, mamala rauli i tingoo womo-'Amo.

34Mpuu-mpuu Ku'ulika komi, tau-tauna to natuwu tempo ei pomara mamate kapomana humawee lauria madupa. 35Langi bo dunia mei maria kahuduana, naupawee lolita-Ku moma'i maria kahuduana.”

Patudu bona mainga

(Mrk. 13:32-37; Luk. 17:26-30, 34-36)

36“Naupawee nangkambelai eo bo tempo karata nculi Ana Manuhia ee mai, moma hema haduaa to nangincani. Malaeka-malaeka i huruga moma incanira, Ana Alatala mui moma incani-Na. Wuwu Tuama aga to nangincani.

37Apa karata nculi Ana Manuhia mei nahibali hante tempo nabi Nuh owi. 38Habana kapomana narata ue mowo to nampakatala dunia, tau-tauna nangkoni pade nanginu, noncamoko pade nepoponcamoko ewa biaha motora, duuna eo nabi Nuh nehua i rara kapala tahi. 39Naratapi ue mowo ee nampakatala purara, pade laincaniradi napa to nadupa. Wee moto mui mei tempo karata nculi Ana Manuhia. 40Tempo ee mei, ane maria rodua balailo nobago i bone, to hadua rakeni pade to ntanina rapalahi. 41Ane maria rodua bangkele bulara nogili wuli gando, to hadua rakeni pade to ntanina rapalahi.

42Etumo maingahawo, apa moma incanimi bulauma Puemi marata nculi. 43Ku'ulika komi, ane tumpu hou mangincani tinti hangkua to pangio marata ngkawengia, natantu amimi tumpu hou ee mainga, pade moma napalele to pangio mehua rara houna. 44Etumo, komi mui kana mahadia, apa tempo karata nculi Ana Manuhia, moma mincani.”

Porapa nangkambelai batua to namala raparahaya pade batua to nadaa ingkuna

(Luk. 12:41-48)

45“Ane maria hadua batua to namala raparahaya pade nadea timbana, hiami to naongko maradikana ee mawali to pobaha, mampabahaira batua ntanina to i rara hou ee pade mampauruhi pangkonira butu eona. 46Morahi mpuu batua ee ane manculidimi maradikana, narata'i bulana nampobago bago to laiparahayaka hi hia. 47Mpuu-mpuu Ku'ulika komi, maradikana ee mei mampaongko'i mawali to pouruhi humawee gaguna.

48Naupawee ane batua ee mai madaa ingkuna, nauli mei rara bongona, 49‘Mahaedipi maradikaku marata.’ Lako hee mopamulami mampaduahira batua ntanina pade mangkoni bo manginu dohera to nalangu-langu. 50Naupawee bulana magoe-goe dohera, ngkali maratami maradikana i eo bo tempo to moma incanina. 51Maradika ee mei mopatehi batuana ee pade mampatadi'i rau hawalikuna hingkani-ngkani hante tauna to nabelo wongko. I riami potantangia pade kapepaa.”

Currently Selected:

Matius 24: MYL

Highlight

Copy