Yohanes 9
9
Tauna to naburo hinungkaina laiote
1Tempo Yesus noliu, laihilo-Na hadua tauna to naburo amimi hinungkaina laiote. 2Ana-ana guru Yesus nepekune hi Yesus, “Rabi, hema kakonona to nadoha, tauna ei motodi, ba totuanadi hampena laiote naburo'i?”
3Nehono Yesus, “Moma hia, moma mui totuana. Ei mai nadupa bona baraka Alatala mamala rahilo i rara katuwuana. 4Lawina mpoeodipi, kana tapobago bago Alatala to nampahuro-'A, apa ane malimaudimi momami hema haduaa to mamala mobago. 5Tempo-Ku i rara dunia, Akumi baa dunia.”
6Napupi iuli-Na humawee lauria, notailumi i tana, pade laigalo-Na ilu-Na ee mai hante tana, laigerei-Na i mata tauna to naburo ee mai 7pade iulika-Na'i, “Koimoko mopinou i wuhu Siloam.” (Siloam batuana: to Laihuro.) Rau mpuumi tauna ee mai nopinou i wuhu Siloam. Nanculi'ipi, namalami nenaa.
8Tongki-tongkina pade hira to nangincani ane hia ee mai to nerapi-rapi, nanguli, “Apa moma hia eimi to naharo nerapi-rapi?”
9Naria to nanguli, “Nakono, hia eimi.” Naria mui to nanguli, “Moma. Nahibali lencera aga.”
Tauna to ilodo naburo ee moto mui nanguli, “Nakono. Akumi to buro, to nerapi-rapi etu.”
10Iulira hi hia, “Bewa pade namalamoko nenaa?”
11Nehono'i, “Tauna to ikahangai Yesus ee rau nobabei rege pade laigerei-Na i mataku pade iulika-Na'a, ‘Koimoko mopinou i wuhu Siloam.’ Napu ee rau mpuu'amo pade napu'apa nopinou, namala'amo nenaa.”
12Lauparia laipekunera'i, “I rimami Tauna etu?”
Nehono'i, “Moma incaniku.”
13Napu ee tauna to naurimi matana ee mai, laikenira rau hi hira to Farisi. 14Tempo Yesus nogalo ilu-Na hante tana pade nampakauri mata tauna ee mai, nambela eo Pentuua to Yahudi. 15Etu pade hira to Farisi nepekune hi tauna ee mai, bewa pade namalami nenaa.
Nehono'i, “Hia nogerei mataku hante rege, pade rau'a nopinou, pade namala'amo nenaa.”
16Hantongora to Farisi ee mai nanguli, “Tauna ee rau moma-'I narata lako Alatala, apa moma'i laibila-Na eo Pentuua to Yahudi.”
Hantongo mui nanguli, “Bewa tauna to nadoha mamala mobabei tanda to nepakahera ewa ei?” Lauparia neumbami pomebilira to Farisi ee mai.
17Napu ee iulikara'i to naburo ee mai, “Ane iko, napa mu'uli nangkambelai Hia? Apa laipakauri-Nami matamu.”
Nehono'i, “Hia ee rau hadua nabi.”
18Naupawee hira to pangkeni to Yahudi ee mai moma iparahayara ane naburo amimi tauna ee pade lako namala'i nenaa. Etu pade laipokiora totuana 19pade laipekunera, “Eimi anami to iulimi naburo lako iote? Ane wee bewa pade namalami nenaa?”
20Nehono totuana, “To incani kami, hia ei mai ana kami, pade hia ei mai laiote naburo. 21Naupawee bewa pade namalami nenaa, moma incani kami, pade hema to nampakauri matana moma mui incani kami. Pekune motomi hi hia. Nabohe'imi, mamalami manguli nangkambelai wotona moto.” 22Pade iwee iulira totuana habana naekara hi to pangkeni to Yahudi, apa nahintuwuramo to pangkeni to Yahudi ee, ane maria tauna to mampangaku Yesus halaku Magau to Pepakahalama, tauna ee mai momami rapaliu mehua rara hou pepuea. 23Etu pade totuana nanguli, “Nabohe'imi, pekune motomi hi hia.”
24Lauparia hangkanipi laikiora to buro to naurimi ee mai pade iulikara'i, “Ulimi to nakono i tingoo Alatala. Laincani kami ane Tauna ee rau to nadoha.”
25Nehono'i, “Ba to nadohadi Tauna ee rau ba moma, moma incaniku. Hangaa aga to incaniku, ilodo'a naburo, welau ei namala'amo nenaa.”
26Iulira hi hia, “Napa to ibabei-Na hi iko? Bewa-'I nampakauri matamu?”
27Nehono'i, “Iulikakumo komi he, naupawee moma iepemi. Napa pade mingki miepeki muipi? Ba mingki mawali to pantuku-Na muida komikowo?”
28Lauparia laipoporera'i pade iulikara'i, “Iko aga to pantuku Tauna ee rau, naupawee kami ei to pantuku Musa. 29Laincani kami ane nololitami Alatala hi Musa, naupawee nangkambelai Hia ee rau moma incani kami lako rima-'I narata.”
30Nehono tauna ee hi hira, “Neherai mpuu ane moma incanimi lako rima-'I narata, bo namala'amo nenaa laibabei-Na. 31Laincanita ane Alatala moma laiepe-Na hambayara tauna to nadoha. Hira to nengkoru hi Hia pade nampoingkuka dota-Na aga to laiepe-Na. 32Lako lodo duu ei mai, poma naria laiepe ane naria tauna to namala nampopenaa to naburo hinungkaina laiote. 33Tauna ee rau, moma-'I mamala mobabei napa-napa ane moma-'I narata lako Alatala.”
34Nehonora, “Iko ei to nadoha hinungkaimu laiote. Bewa pade mupatudu kami?” Napu ee laipopalairami tauna ee.
35Iepe-Na Yesus ane tauna ee mai laipopalairami lako hou pepuea to Yahudi. Lauparia Yesus rau nampotomuka tauna ee mai, pade iulika-Na'i, “Parahayamu Ana Manuhia?”
36Nehono tauna ee mai, “Hema to laipatuju-Mu etu Tuama? Bona meparahaya'a hi Hia.”
37Iuli Yesus hi hia, “Laihilomu-'Imi pade Hiami to bula-Na nampojaritakako!”
38Iulina tauna ee mai, “Parahayaku Pue!” Napu ee notingkodumi nampasombaa Yesus.
39Iuli Yesus, “Aku narata i dunia tumai-'A mampahungke humawee doha manuhia, bona hema to naburo, mamala menaa, pade hema to mamala menaa mawali maburo.”
40To laiuli Yesus lauria laiepera bahangkua dua to Farisi to naria i hee, pade iulikara-'I, “Batuana to iuli-Mu etu mai, kami ei mui naburo?”
41Nehono Yesus hi hira, “Ane ke naburo komi, moma komi rahuku habana nobabei doha. Naupawee apa iulimi nenaa komi, kana rahuku komi mei habana nobabei doha.”
Currently Selected:
Yohanes 9: MYL
Highlight
Share
Copy
Want to have your highlights saved across all your devices? Sign up or sign in
