Yohanes 8
8
1Naupawee Yesus rau i Bulu Zaitun. 2Hampepulo ngkiidipi rau muimi Yesus i karawaa Hou Alatala, pade nadea tauna narata hi Hia. Noncuna-'Imi pade nopatudura. 3Bula Yesus nopatudu, naratara to nataualu buku Taurat pade to Farisi nangkeni hi Hia hadua bangkele to lairata kongko nogau hala. Laipopokangkorera bangkele ee mai i lentongo, 4pade iulira hi Yesus, “Rabi, bangkele ei mai lairata kongko bulana nogau hala. 5Rara buku Taurat, Musa notulihi ane bangkele-bangkele to nogau ewa ei mai kana rawunu hante watu duuna mamate. Bewa popantarui-Mu Iko?” 6Patujura nanguli lauria hi Yesus mampehori-'I, bona maria dalara mampotahalai-'I. Naupawee Yesus notungka pade notulihi hante karawe-Na i tana.
7Hangka laipekunera dola-'I, nokangkoremi Yesus pade iulika-Nara, “Hema komi to moma nadoha, hiami to pamulana mampawunu bangkele ei mai hante watu.” 8Napu nanguli lauria, notungka muimi Yesus pade notulihi i tana. 9Hangka iepera to laiuli Yesus, nagaroramo hadua bo hadua, nopamula lako to natua duuna to nangura. Kahuduana naboli Yesus hante bangkele eedimi i hee.
10Lauparia nokangkoremi Yesus pade nangulika bangkele ee mai, “To tina, uma puraramo? Momara hema to nampahukuko?”
11Nehono bangkele ee mai, “Moma hema, Tuama.”
Iuli Yesus, “Aku mui momako Kuhuku. Koimoko, pade mopamula welau wetumo mobabei doha.”]
Yesus ee mai baa dunia
12Napu ee, Yesus nangulikara todea iwei, “Akumi baa dunia. Hema to mantuku-'A, hia mamparata baa to mampawaika'i katuwua pade moma'i momako rara kalimauana.”
13Iulira to Farisi ee hi Hia, “Iko nohabi nangkambelai woto-Mu moto. Napa to iuli-Mu moma nakono.”
14Nehono Yesus hi hira, “Naupa Aku nohabi nangkambelai woto-Ku moto, to iuli-Ku ee nakono, habana laincani-Ku lako rima-'A narata pade rima mei karaua-Ku. Naupawee, moma incanimi lako rima-'A narata pade rau rima-'A mei. 15Komi nampabotuhi tauna nantuku pampekiri manuhia. Naupawee Aku moma naria tauna to laibotuhi-Ku, 16pade ane mebotuhi-'A, pobotuhi-Ku ee mai nakono, habana moma aga hadua-Ku nobotohi, apa Alatala to nampahuro-'A mui naria dohe-Ku. 17Rara buku Tauratmi naria laitulihi, ane maria rodua tauna mohabi pade to iulira nahibali, pohabira ee mai nakono. 18Aku nampojarita woto-Ku moto, pade Tuama-Ku to nampahuro-'A nojarita mui nangkambelai Aku.”
19Iulikara-'I, “I rima Tuama-Mu?”
Nehono Yesus, “Aku bo Tuama-Ku, moma incanimi. Ane ke ncanimi-'A, natantu ami laincanimi mui hema Tuama-Ku.” 20Yesus nanguli humawee lauria tempo-Na nopatudu i karawaa Hou Alatala, i humpii peti pokaletea. Moma hema haduaa to nampahoko-'I, apa poma narata tempona.
Yesus moma-'I narata lako dunia ei mai
21Iulikana muira Yesus todea ee mai, “Rau-'A mei pade komi mampali-'A, naupawee komi mamate rara dohami. I rima karaua-Ku ee mai, moma komi mamala marata.”
22Lauparia hira to pangkeni to Yahudi ee mai nanguli, “Ba mopatehi woto-Na moto-'Idi mei, hampena iuli-Na, i rima karaua-Ku, moma komi mamala marata?”
23Yesus nangulikara, “Komi narata lako dunia, bo Aku lako huruga. Komi todea i dunia ei bo Aku moma-'A lako dunia ei. 24Etu pade iulika-Ku komi, ane komi mei kana mamate rara dohami. Apa ane moma miparahaya ane Akumi Hia, komi kana mamate rara dohami.”
25Iulikara-'I, “Hema-Ko kakonona?”
Nehono Yesus hi hira, “Momami naria bununa Ku'ulika komi. 26Kakonona nadeadipi to kana Ku'uli mampahalai komi, naupawee wuwu napa to laiepe-Ku lako Hia to nampahuro-'A aga to laiulika-Ku hi manuhia i dunia. Pade napa to iuli-Na to nampahuro-'A ee mai nakono.” 27Momara nengkao ane Yesus nojarita hi hira nangkambelai Tuama to i huruga.
28Napu ee Yesus nanguli, “Ane miore mipakalangkodimi mei Ana Manuhia, tempo eedimi pade mengkaoda komi ane Akumi Hia, pade moma naria to ibabei-Ku lako woto-Ku moto. Napa to iuli-Ku, humaweena nantuku napa to laipatuduka-Na-'A Tuama-Ku. 29Pade Hia to nampahuro-'A, laipodohe-Na moto oa-'A. Moma-'A laipalele-Na, habana laibabei-Ku moto oa napa to ipokono-Na.” 30Nahudu Yesus nanguli humawee lauria, nadea tauna to neparahaya hi Hia.
Bewa dalana bona momatamo napobatua doha
31Iulika-Nara to Yahudi to neparahaya hi Hia, “Ane mipoingkuka dola napa to laipatuduka-Ku komi, komi mpuu-mpuu to pantuku-Ku. 32Ane iwee, mincanimi patudu to nakono, alaana momamo komi rapobatua.”
33Nehonora, “Kami ei mai muli Abraham, pade poma kami naria nawali batua. Bewa pade iuli-Mu, momamo komi rapobatua?”
34Iuli Yesus hi hira, “Mpuu-mpuu Ku'ulika komi, butu tauna to nobabei doha, hia nawali batua doha. 35Batua moma'i natida dola rara hou maradikana, naupawee ana maradika natida dola rara hou tuamana duu kahae-haena. 36Aji ane Ana maradika ee mai mampabakaha komi, komi mpuu-mpuu natebakaha. 37Laincani-Ku ane komi ei mai muli Abraham, naupawee laipehimukuimi mampatehi-'A apa moma komi nadota nantarima lolita-Ku. 38Napa to ihilo-Ku hi Tuama, etumi to iuli-Ku. Wee moto mui komi, nampoingkuka napa to iepemi lako hi tuamami.”
39Nehonora, “Tuama kami Abraham.”
Iuli Yesus hi hira, “Ane ke ana Abraham komi, ke mahibalidi ingkumi hante Abraham. 40Aku noparata hi komi kakonoa to laiepe-Ku lako hi Alatala. Naupawee laipehimukuimi nampali dala mampatehi-'A. Ingku to ewa ingkumi ei moma'i laipoingkuka Abraham. 41Komi nampoingkuka ingku tuamami moto.”
Nehonora, “Ane kami, moma kami laiote lako pogau hala. Hadua aga Tuama kami, Hiami Alatala.”
42Iuli Yesus hi hira, “Ane Alatala Tuamami, ke mipotowe-'Ada, apa Aku narata lako Alatala. Pade narata-'A moma dota-Ku moto, Alatala to nampahuro-'A. 43Moma komi nengkao napa to iuli-Ku, apa moma komi nadota nangepe popatudu-Ku. 44Kakonona, tuamami Magau Heta, pade komi mingki mobabei dota tuamami. Apa tuamami ee mai to nampatehi manuhia lako lomona pade moma'i natuwu rara kakonoa, habana hi hia moma naria kakonoa. Ane manguli kalowo'i, hia nojarita nantuku dotana moto, habana hia to pokalowo pade tuama humawee kalowo. 45Etu pade moma-'A laiparahayami, apa Aku nanguli kakonoa hi komi. 46Hema komi to namala mampahiloi ane nobabei doha-'A? Ane Aku nanguli kakonoa, napa pade moma-'A parahayami? 47Hema to narata lako Alatala, hia nangepe lolita Alatala. Naupawee, komi ei moma komi narata lako Alatala, etu pade moma komi nadota nangepe lolita Alatala.”
Nariami Yesus kapomana Abraham
48Nangepe to iuli Yesus lauria, hira to Yahudi nampahonoi-'I, “Apa moma nakono'i ane kiuli Iko ei mai to Samaria to laipehua heta?”
49Nehono Yesus, “Moma-'A laipehua heta. Aku nampabila Tuama-Ku naupawee komi moma-'A laibilami. 50Naupawee, moma-'A mingki rabila. Naria Hadua to nampehimukui bona rabila-'A. Hia eemi to pobotuhi. 51Mpuu-mpuu Ku'ulika komi, hema to manturuhi lolita-Ku, moma'i mamate duu kahae-haena.”
52Iulira to Yahudi ee hi Yesus, “Welau ei laincani kami mpuumi, ane Iko ei mai laipehua heta. Habana namatemi Abraham, wee mui nabi-nabi, naupawee Iko nanguli, ‘Hema to manturuhi lolita-Ku, moma'i mamate duu kahae-haena.’ 53Iuli-Mu Iko, neliupi pobunu-Mu lako Abraham tuamata to namatemi? Wee mui nabi-nabi, namate puraramo. Hante hema Mupahibali woto-Mu?”
54Nehono Yesus, “Ane ke nampemabohe woto-Ku moto-'A, nau hodia moma naria bununa pampemabohe-Ku woto-Ku ee mai. Tuama-Ku to nampemabohe-'A. Hiami to iulimi Alatalami, 55bo moma-'I laincanimi, naupawee ane Aku, laincani-Ku-'I. Ane Ku'uli moma-'I laincani-Ku, Aku ei mai to pokalowo, nahibali hante komi. Naupawee laincani-Ku-'I, pade laituruhi-Ku lolita-Na. 56Abraham tumpulokomi nagoe mpuu'i apa laincanina ane nahilo mei eo karata-Ku. Laihilonami eo karata-Ku ee mai pade nagoe'i.”
57Iulira to Yahudi ee hi Hia, “Poma nagana umurumu alima mpulu mpae, bewa pade iuli-Mu laihilo-Mumi Abraham?”
58Iuli Yesus hi hira, “Mpuu-mpuu Ku'ulika komi, poma'i laiote Abraham, naria-'Amo.” 59Nangepe lauria laitimara watu mampawunu-'I. Naupawee nengkalipomi Yesus i lentongo todea pade nampalahi Hou Alatala.
Currently Selected:
Yohanes 8: MYL
Highlight
Share
Copy
Want to have your highlights saved across all your devices? Sign up or sign in
