Yohanes 20
20
Yesus natuwu nculi
(Mat. 28:1-10; Mrk. 16:1-8; Luk. 24:1-12)
1Eo pamulana mingku ee, hampepulo ngkiidipi, raumi Maria Magdalena i dayo. Laihilona watu bohe powunta dayo laiduliami. 2Lauparia nokumeno'i rau nampotomuka Simon Petrus pade ana guru to laipotowe Yesus, iulikanara, “Laiala taunami wataloka Pue lako dayo-Na. Moma ncani kami rima-'I laibolira.”
3Nangepe lauria, raumi Petrus hante ana guru to ntanina ee i dayo. 4Nokumeno hingkanira, naupawee ana guru to ntanina ee nagahi pokumenona hampena hia lodo narata i dayo. 5Laipelongina rara dayo pade laihilonami kae to nabula pobungu wataloka Yesus naboli i hee. Naupawee moma'i nehua rara dayo. 6Naratami Simon Petrus to netuku puri, kapopola nehua i rara dayo. Laihilona kae to nabula pobungu wataloka Yesus naboli i hee. 7Naupawee kae to laipake nopou woo Yesus moma'i namohu hante kae pobungu wataloka'Na, natepahamika ntani moto'i pade natelulumi. 8Napu ee nehua muimihawo ana guru to ntanina to ilodomi narata ee i rara dayo. Laihilonami pade laiparahayanami. 9Apa duu tempo ee, poma laipahara napa to laitulihi rara Buku to Nagaha to nanguli ane kana matuwu nculi-'I lako kamatea. 10Napu ee, nanculiramo ana guru Yesus ee rau i hou.
Yesus nerawa hi Maria Magdalena
11Tempo ee Maria Magdalena nokangkore i hawaliku dayo bulana nakeo. Hamalina nakeo, nelongi'i rara dayo. 12Laihilona rodua malaeka Alatala nowaru nabula noncuna i pobolia wataloka Yesus. Hadua noncuna mali woo-Na, hadua mui noncuna mali paa-Na. 13Malaeka eera nampekune'i, “To tina, napa pade nakeoko?” Nehono Maria, “Pueku laiala tauna. Moma ncaniku rima-'I laibolira.”
14Napu'i nanguli iwee, neilimi mali talikuana pade laihilonami Yesus nokangkore i hee. Naupawee, moma ncanina ane Tauna ee Yesusmi. 15Yesus nampekune'i, “To tina, napa pade nakeoko? Hema to laipalimu?”
Pekirina Maria, Tauna ee to nampodoo pampa ee. Aji iulina, “Tuama, ane Iko noencu-'I lako i hei, kewoka'akuwo rima-'I laiboli-Mu bona rau kuala-'I.”
16Yesus nangulika'i, “Maria!”
Neilimi Maria hi Yesus pade nojarita rara baha Ibrani, “Rabuni!” Batuana: Guru.
17Yesus nangulika'i, “Nemo-'A olu mukakamu, apa poma-'A rau hi Tuama. Naupawee koimoko hi dohe-dohe-Ku pade kewokara ane welau ei rau-'Amo hi Tuama-Ku pade Tuamamu, Alatala-Ku pade Alatalamu.”
18Rau mpuumi Maria nangkewokara ana guru Yesus, iulina, “Laihilokumi Pue.” Pade laipotuturana mui humawee to laiulika-Na'i Pue.
Yesus nerawa hi ana-ana guru-Na
(Luk. 24:36-49)
19Eo pamulana mingku ee mui, nalimaupi, ana-ana guru Yesus nahiromu i hangu hou to laibihoki purami womona apa naekara hi to pangkeni to Yahudi. Ngkali naratami Yesus nokangkore i lentongora pade nanguli, “Katuwu to nanone lako Alatala mampodohe komi.” 20Nahudupi iuli-Na lauria, Yesus nampahiloi pale-Na pade ompeha-Na hi ana guru-Na eera mai. Nagoe mpuura hangka laihilora Pue. 21Lauparia, hangkanipi Yesus nanguli, “Katuwu to nanone lako Alatala mampodohe komi! Ewa Tuama nantudu-'A, wee moto mui Aku mantudu komi welau ei.” 22Nahudupi nanguli lauria, laihowu-Naramo hante inoha-Na pade iuli-Na, “Tarimami Inoha to Nagaha. 23Ane miampuni doha tauna, Alatala mui mampa'ampuni doha tauna to laiampunimi ee. Ane moma miampuni doha tauna, Alatala mui moma mampa'ampuni doha tauna ee.”
Yesus nerawa hi Tomas
24Tomas hadua lako hampulu rodua ana guru Yesus to laikahangai mui Didimus, moma'i naria dohera ana guru tempo Yesus narata. 25Ana-ana guru ntanina nangulika'i, “Laihilo kamimi Pue!”
Naupawee Tomas nangulikara, “Kapomana kuhilo walea paku i pale-Na bo kutobo hante karaweku i walea paku ee pade kutui ompeha-Na, poma'i kuparahaya.”
26Hamingku lako hee, nahiromu muiramo ana guru Yesus i hou ee pade womo hou ee laibihokira purami. Tempo ee nariami Tomas dohera.
Ngkali nokangkoremi Yesus i lentongora pade nanguli, “Katuwu to nanone lako Alatala mampodohe komi!” 27Napu ee, iulika-Nami Tomas, “Hilomi pale-Ku pade bolimi karawemu i hei. Ulumi palemu etu pade tuimi ompeha-Ku ei, pade nemopako moma meparahaya. Naupawee peparahayamoko.”
28Tomas nampahonoi Yesus, “Ikomi Pueku pade Alatalaku!”
29Yesus nangulika'i, “Apa laihilomu-'Amo, etu pade neparahayamoko. Norahi mpuura tauna to neparahaya, naupa moma-'A laihilora.”
Patuju buku ei
30Nadeadipi tanda to nepakahera to laibabei Yesus i tingoora ana guru-Na to moma'i laitulihi rara buku ei. 31Naupawee, patuju buku ei laitulihi bona miparahaya ane Yesus eemi Magau to Pepakahalama, Ana Alatala. Ane meparahaya komi hi Hia, miratami katuwua to moma maria kahuduana.
Currently Selected:
Yohanes 20: MYL
Highlight
Share
Copy
Want to have your highlights saved across all your devices? Sign up or sign in
