Yohanes 19
19
1Lauparia, nehuami Pilatus pade laituduna tauna mampacambu Yesus. 2Tantara-tantara nobabei tali patoko lako dunumpu rui pade laibolira i woo Yesus. Napu ee laipakekara mui-'I waru to naungu 3pade nadea ngkanira narata i tingoo-Na nangulika-'I, “Tabe hi Iko, Magau to Yahudi!” Pade laihaparami lence-Na.
4Napu ee, hangkanipi Pilatus nehuwu nangulikara todea ee, iulina, “Hilo komi! Laikeniku-'I Tauna ei nehuwu, bona mincani ane moma naria hodia hala-Na lairataku.” 5Nehuwumi Yesus lako rara hou nampake tali patoko to laibabei lako rui pade waru to naungu.
Nojarita muimi Pilatus hi todea eera, “Hilomi Tauna ei!”
6Hangka imam-imam to i matana pade to nampodoo Hou Alatala ee nampanaa Yesus, nongareramo nanguli, “Salibmi! Salibmi!”
Pilatus nangulikara, “Kenimi Tauna ei. Salib motomo komi. Moma naria hodia hala-Na lairataku.”
7Nehonora to pangkeni to Yahudi ee, “Ane mantuku patudu Taurat kami, kana rahuku mate-'I, apa nangaku Ana Alatala-'I.”
8Pangepena Pilatus pangulira ee, natetambaimi kaekana. 9Nehuami rau i rara houna. Pangkenira Yesus nehua, nepekunemi Pilatus hi Yesus, “Lako rima-Ko?” Naupawee, moma-'I nehono Yesus. 10Aji, Pilatus nangulika mui-'I, “Moma-Ko madota mampojaritaka'a? Apa moma incani-Mu ane aku ei nabaraka mampabakaha-Ko ba mampasalib-Ko?”
11Nehono Yesus, “Ane ke moma Alatala nampawaikako baraka etu, momako mamala hodia moparenta-'A. Aji, tauna to nampopewai-'A hi iko, nadeapi dohana lako iko.”
12Pangepena Pilatus to iuli Yesus lauria, laipehimukuina mampabakaha Yesus.
Naupawee to pangkeni to Yahudi eera nongare nanguli, “Tuama, ane mubakaha-'I, mampobali Magau Boheko#19:12 Magau Bohe biahana mui laiuli Magau Bohe Roma, rara baha Yunanina laiuli ‘Kaisar.’ Tempo ee hia noparenta i Israel pade humangkulili tahi Mediterania., apa Tauna etu nangaku ane Hia magau. Hema to nangaku magau, hia ee mai bali Magau Bohe!”
13Pangepena Pilatus to iulira lauria, laikenina Yesus nehuwu pade noncunami i kadera pobotuhia to laikahangai Daula Watu. Rara baha Ibrani laikahangai Gabata. 14Tempo ee parami tinti hampulu rongu mpoeo. Eo ee mai eo kahadiaa mantarima eo bohe Paskah to Yahudi. Pilatus nangulikara to Yahudi ee, “Eimi Magaumi!”
15Nongareramo todea ee nanguli, “Patehimi! Patehimi! Salibmi!”
Nehono Pilatus, “Hia ei mai magaumi. Bewa pade laitudumi'a mampatehi-'I?”
Imam-imam to i matana eera nehono, “Magau Bohe Roma aga magau kami!” 16aLauparia, Pilatus nampopewai Yesus hi hira bona rasalibra.
Yesus laisalib
(Mat. 27:32-38; Mrk. 15:21-27; Luk. 23:26, 33-43)
16bLaialarami Yesus pade laikenira rau i hawalikuna bona rasalib. 17Yesus moto to nopahaa salib-Na nehuwu lako ngata ee rau i hangu bulu to laikahangai Pobolia Banga Woo. Rara baha Ibrani, laikahangai Golgota. 18I heemi Yesus laisalibra. Naria mui rodua tau ntanina laisalibra dohe-Na. Hadua mali kana-Na pade hadua mali kai-Na. Aji Yesus laiboli lentongo. 19I kau salib Yesus, Pilatus nantudu tantarana moparika tulihia to iwei monina, “Yesus lako Nazaret, Magaura to Yahudi.” 20Nadea to Yahudi nobaha tulihia ee apa Yesus laisalib moma'i na'awa lako ngata. Tulihia ee laitulihi rara baha Ibrani, baha Latin pade baha Yunani. 21Imam-imam to i matana nangulika Pilatus iwei, “Nemo mutulihi ‘Magaura to Yahudi.’ Naupawee tulihimi iwei, ‘Tauna ei nangaku Magaura to Yahudi.’ ” 22Naupawee nehono'i Pilatus, “Napa to laitulihiku, batena moto matetulihi.”
23Napurapa tantara ee nampasalib Yesus, laialarami waru to laipake-Na, pade laibagira nawali opo bagia. Butu duara namparata habagia. Naupawee waru to nanoe to laipake-Na moma laibagira apa moma naria podauana lako wongkona duu nauna. 24#Mzm. 22:19Aji tantara eera noneulika, “Nemo tahia waru-Na ei. Agina tacabu lot bona tancani hema to mamparata.” Lauria nadupa nopaganai to laitulihi rara Buku to Nagaha iwei,
“Laitira-tirara waru to laipake-Ku
pade laicabu lotra waru-Ku to nanoe.”
Pade ewa ee mpuumi laibabeira tantara ee.
25Namohu salib Yesus, nokangkoreramo tina Yesus, ompi tina-Na bangkele, Maria bangkele Klopas pade Maria Magdalena. 26Pampahilo-Na Yesus tina-Na pade ana guru-Na to laipotowe-Na nokangkore i hee, iulika-Nami tina-Na iwei, “Ina, eimi anamu.” 27Iulika-Na mui ana guru-Na ee iwei, “Eimi tinamu.” Lako i heemi ana guru-Na ee nantarima tina Yesus mo'oha i houna.
Yesus nampopewai inoha-Na hi Alatala
(Mat. 27:45-50; Mrk. 15:33-37; Luk. 23:44-46)
28 #
Mzm. 69:22
Ncani-Nami Yesus ane humaweena nahudumi. Pade bona rapaganaimi napa to laitulihi rara Buku to Nagaha, iuli-Nami iwei, “Nabai wuu-Ku.”
29I hee naria mangko to laikahini anggur to naonco. Lauparia, lailomerami hampuhu bunga to ewa tamomo rara ue anggur to naonco ee. Bunga to ewa tamomo ee laiboli i wuntu kau hisop pade laibolira i ngudu Yesus. 30Laihihipi-Napi Yesus ue anggur to naonco ee, iuli-Nami iwei, “Nahudumi!”
Napu ee, nopatungkami pade laipopewai-Nami inoha-Na hi Alatala.
Ompeha Yesus laitohu hante tawala
31Tempo Yesus laisalib, nambela eo kahadiaara to Yahudi mantarima eo Pentuua. To pangkeni to Yahudi momara nahituju ane maria wataloka tauna to laisalib matetoe oa i lolo salib i eo Pentuua to Yahudi. Neparauli eo Pentuua ee moma ewa eo Pentuua to biahana. Etu pade laiperapira to Yahudi hi Pilatus bona tantarana mopui paa tauna to laisalib eera mai pade mampopehompo watalokara lako salib. 32Rau mpuuramo tantara ee nopui paara to laisalib ee. To pamulana laipuikara paana, to laisalib dohe Yesus eera. 33Karatara hi Yesus, laihilora namatemi. Aji momami laipuira paa-Na. 34Naupawee hadua tantara notohu ompeha Yesus hante tawala, hampena nehuwu raa pade ue lako ompeha Yesus. 35Tauna to nampahilo mata kajadia lauria, hiami to nampotutura humaweena ei bona meparahaya mui komikowo. Napa to laituturana ee nakono, pade laincanina mpuu ane to laituturana nakono. 36#Kel. 12:46; Bil. 9:12Lauria nadupa bona rapaganaimi napa to laitulihi rara Buku to Nagaha iwei, “Moma maria hangua wuku-Na to rapakapui.” 37#Za. 12:10Rara Buku to Nagaha mui laitulihi iwei, “Hira mei mampahilo-'I to laitohura hante tawala.”
Yesus laitana
(Mat. 27:57-61; Mrk. 15:42-47; Luk. 23:50-56)
38Napu ee, Yusuf to Arimatea nerapi hi Pilatus bona rapaliu'i mangala wataloka Yesus. Yusuf ee to pantuku Yesus naupawee moma'i nadota rancani ane hia neparahaya hi Yesus apa naeka'i hi to pangkeni to Yahudi. Laipaliuna'i Pilatus. Aji, rau ialanami wataloka Yesus. 39Nikodemus mui narata i hee, nangkeni wongi-wongi to laibabei lako mur pade gaharu. Maria tolu mpulu kilo kantomona. Nikodemus eimi wengi to narata ngkawengia hi Yesus. 40Roduara ee nangala wataloka Yesus, laibungura hante kae to nabula pade laiboliira wongi-wongi ee, mantuku ada popatana to Yahudi. 41Yesus laisalib namohu hante hangu pampa. Rara pampa ee naria hangu dayo to nabou to poma'i naria laipake nopatana to mate. 42Apa eo ee mai eo kahadiaa mantarima eo Pentuua to Yahudi, pade dayo ee namohu moto'i, aji laitanarami Yesus i hee.
Currently Selected:
Yohanes 19: MYL
Highlight
Share
Copy
Want to have your highlights saved across all your devices? Sign up or sign in
