Ioane 6
6
1Neko mere ai Iesu Galilaia Ururu ke’enave, Ururu unu nawi Tiberia anu Ere Aura oroiakei’inave.
2A’a aruru ovara e’e’okanave, uku iva veia U liaka maia a’a eiai oro inamu eiaka.
3Iesu akapu inanave, Una aivara kiripai U i‐pa’anave ane.
4Isaraela a’a anu Pasova purai pani arekamu ai kei’inave.
5Iesu urukiaka’ane a’a aruru ovara inamu‐eiaka ane U ai anemakei’inave, U Pilipo erau voa kurunave, Enei pei inaea eka’amalimau ei a’a pei nava’ane‐iai?
6Uku Pilipo onu lai ipia‐miai U erau voa veve’enave: U ipali’inave U liai awkamakei’inave.
7Pilipo erau voa kurunave, Moni pauna 7 mau’u keina pu inaea liai, uku a’a kavakava pei nava’ane‐iai.
8Una aivara monou, nawi Anederea, Simona Petero onu ovaki, erau voa kurunave,
9Ukua monou eu ai pokoina, pu aw 5, nava rere ane, u mi’ina: a ei pei oiana a’a aila awkono avao ai?
10Iesu erau voa kurunave, A’a papa’avai ekine. Pono mo’onu iou ai kei’inave. A’a papa’anave, oro a’a 5,000 akoakei’inave.
11Iesu pu aw mi’inave, U nawki‐awkavaka’ane, pu la’a U aivara ekunave, a’a papa’amakei’inave aivara pu la’a ekunave; orau awku oro nava ekunave orau oro umuli’inave.
12Oro lai aukiakei’inave ane, Una aivara Iesu erau voa kuruenave, Pei kakai roikine, pei paukiakeinavaia.
13Oro pei kakai ie’enave, kekai 12 oro pei kakai evoponave ane, pu aw 5 inu kakai uakei’inave a’a pei navaka’ane.
14A’a aruru inamu‐oiaka’ane iva veia Iesu liaka, oro erau voa kurunave, Ei a’a kurua laikorava a’a kapoi U pani va’au ai aneliviai anelia.
15Iesu inamu‐oimakei’inave oro aneai awkamakei’inave, oro oiniaka‐arekava’?-?ane‐iai amua are’eai, U e akapu moawku inanave.
16Lare eua pani ai Una aivara ve’enave ere aura ai,
17Mapea lakenave, ere aura Kaperanauma i oro ke’enave. Pani muru kei’inave, Iesu oro ai aneakape.
18Uku kavaea ovara evukinave ere aura menono evere’eakei’inave.
19Oro maili 3 pala‐ena?-?vaka’ane, Iesu ere aura upa mere are rokoamakei’inave oro inamu‐oinave, mapea arekamu ai anemakei’inave ane: oro kore kei’inave.
20U erau voa kuruenave, Nai aku, kore pa liai.
21Mapea ai umu‐aiai oro kopaili’inave: mapea omo aki eiei ai emoki pai’inave.
22Namai lare ai, a’a aruru Ururu iou ane mekai oimakei’inave, oro inamu‐oiaka’ane boti monou e i‐keiaka, oro inamu‐oiaka ane Iesu Una aivara kiripai mapea a‐lakenavea, Una aivara e ke’enave:
23(A mapea varomo Tiberia mere manenave ou mako arekamu ai oro pei navaka, Amua nawki‐awkavaka’ane pei eiai: )
24A’a aruru inamu‐oinave Iesu, Una aivara ane, iou ai a‐pokoinavea, oro awku mapea lakenave, Iesu voromakei’inave Kaperanauma ai anenave.
25Oro auiaka’ane iou ane mekai, oro erau voa veve’enave, Rabi e, Ekarapani ai Ni eu ai manenave?
26Iesu erau voa kuruenave, Nai kurunaina kapoi, Noro ivoromakina uku iva veia peo noro inamu‐oinave, a uku pei noro na’anave, noro lai aukiakei’inave ane.
27Pei pomoa li’ina ou pei eiai iaki pa liai, a ou pei uakeina opai rokoa eiai, ou pei eiai iaki li’ine, ou pei A’a anu Mere nakuakana: Uku Eloi Mai U upa mere Una veia aiane euna.
28Oro erau voa veve’enave, Enei oiamalimau enei Eloi inu iaki liane‐iai?
29Iesu erau voa kuruenave, Eloi inu lai eire, noro pirimaroakoane‐iai U okaiviriane euna.
30Oro erau voa veve’enave, Oi iva veia ana Ni li’ina enei inamu‐oiane‐iai, enei Ni pirimaroakoane‐iai? Ni oiamali’i?
31Ene mai‐oro mana na’anave kekepere ai, ei voa erau voa kikiriakeina, Pani muku mere U pei ekunave oro na’ane‐iai.
32Iesu erau voa kuruenave, Nai kurunaina kapoi, Pei pani muku mere Mose a‐nakunavea, a Na Mai pei miki nakumakina pani muku mere.
33Uku Eloi inu pei U ane U pani muku mere kinuna, pani va’au rokoa awkuna ane.
34Oro erau voa kurunave, Amua e, ei pei akune panipani ai.
35Iesu erau voa kuruenave, Nai Rokoa anu pei keina; u ane u Nai ai anena u moawku navai‐navailiapea, u ane u ipirimaroakona kamuri lavere u moawku miapea.
36A orau Nai kurunaiane euna, Noro inamu‐i’iane euna, a noro a‐pirimaroakoanakea.
37A’a kavakava Mai ikuna Nai ai aneakana; u ane u Nai ai anena Nai laoiapea kapoi.
38Uku Nai pani muku ave’eane euna, pani va’au ai kinuane euna ane, uku Una lai kamaialiai, U ane U ikaivirinave, uku Na lai peo.
39Mai ane U ikaiviriane euna Una lai eire, oro uriria U ikuane euna Nai monou paukinavaia, uku ika lare ai Nai uriria la‐ekava’ane‐iai.
40Uku Na Mai inu lai eire, A’a kavakava Mere inamu‐ekiawkana, pirimaroakona ane, u opai rokoa miai liakana, ika lare ai Nai rokoa la‐okavakana ane.
41Isaraela a’a voa momou kurumakei’inave uku U erau voa kurunave, Nai kurua pei keina pani muku mere kinunave.
42Oro erau voa veve’einave, Ei a’a Iosepa anu mere peana? U Iesu peana, Una mekai, mei ane, enei ipali’ina? Una voa anu miki oiana U erau voa kurumakina, Nai pani muku mere kinuane euna?
43Iesu erau voa kuruenave, Voa momou noro pa nakinavai.
44A’a kapeo Nai aneai li’ina, Mai arekavape liane, Mai ane U ikaivirinave; ika lare ai Nai la‐okavakana.
45Laikorava a’a anu buka laru ai ei voa kikiriakeina, I Eloi oro uriria ipekiakeia?-?kana. Ou uku eiai a’a kavakava Mai inu voa virina, i U ipawkiakeina ane, u Nai ai anena.
46A’a kapeo Mai inamu‐oiane euna, U e U Eloi mere keina. U Eloi inamu‐oiane euna.
47Nai kurunaina kapoi, A’a ane u ipirimaroakona u opai rokoa mi’ina.
48Nai rokoa anu pei keina.
49Nomo mai‐oro mana na’anave kekepere ai, oro imuakeina.
50Kurua pei pani muku mere kinuna eu aku, a’a ei pei nava’ane, u imuapea.
51Nai kurua rokoa pei pani muku mere kinunave; a’a ei pei nava’ane u rokoakana opai keiakana. Pei awku Nai awkuakana Na oia keina, Nai awkuakana pani va’au unu rokoa eiai.
52Isaraela a’a iara voa e kevakeva ekinamakei’inave, erau voa veve’eimakei’inave, Ei a’a Una oia enei navai U eka’ama‐aku’i?
53Iesu erau voa kuruenave, Noro A’a anu Mere enu oia navape liane, Una aro ane navape liane, noro laru ai rokoa eria noro mi’ina.
54A’a Na oia, Na aro ane, na’ana, u opai rokoa mi’ina; ika lare ai Nai la‐okavakana ane.
55Uku Na oia pei miki keina, Na aro ane ere miki keina.
56A’a Na oia, Na aro ane, na’ana, u Nai kiripai paikiakeina, Nai awku u kiripai paikiakeina.
57Orau opai rokoa Mai ikaiviriane euna, uku Mai awku Nai rokona, orau u awku u na‐imi’ina uku Nai u rokoakana.
58Ei pei kurua pei pani muku mere kinunave: a’a ei pei na’ana u rokoakana opai keiakana: a nomo mai‐oro mana na’anave, oro imua keina ane.
59Ei voa uriria Iesu omoro marea laru ai kurunave, U ipawkimakei’inave ane Kaperanauma ai.
60Una aivara aila ei voa viriaka’ane, oro erau voa kurunave, Ei voa anu miki koama‐ipali’i?
61Iesu ipalimakei’inave Una aivara voa momou ekina makei’inave uku ei voa eiai, U erau voa veve’einave, Ei voa nomo lai kukupuna amaeka’i?
62Noro inamu‐oiane A’a anu Mere moawku inamakina iou ai U ipokoinave, noro oiama‐laikoramau?
63Avaea rokoa awkuna; oia eria awkuna: voa Nai kurunaina oro avaea keina, rokoa keina ane.
64Nomo a’a varomo a?-?pirimaroakoanakea. Oro ane oro a‐pirimaroakoanavea pinai pani mere Iesu ipa?-?elau’unave, u ane u anai‐aviakana.
65U erau voa kurunave, Ou uku eiai Nai erau voa kurunainave, A’a kapeo Nai ai aneai li’ina, Mai arekavape liane.
66Ou pani mere Una aivara ave’enave, U kiripai oro moawku a’enanavea.
67Iesu aivara 12 erau voa veve’einave, Noro awku ama‐enamau?
68Simona Petero erau voa veve’enave, Amua e, enei eka’ama‐enamau? Opai rokoa anu ipawkia voa Ni ipakina.
69Enei pirimaroakoanake, ipali’inake kapoi, Ni Keriso keina, Eloi rokoa anu Mere ane.
70Iesu erau voa veve’einave, Noro a’a 12 Nai ienaiane euna peana, a nomo a’a monou diabolo a’a keina?
71Iuda Isakariota, Simona anu mere eiai, U kurunave: uku u ane a’a 12 inu a’a monou u Iesu anai‐aviai evere’eakei’inave.
Currently Selected:
Ioane 6: IAR1920
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1920.
