Ioane 4
4
1Iesu viriaka’ane Parisea a’a erau voa kuruaka, Iesu a’a aila bapatiso‐ekamakina, Ioane a’a ailapea bapatiso‐ekamakina,
2(A Iesu bapatiso‐eka?-?vape, Una aivara bapatiso‐ekanave,)
3U Iudea ave’enave, Galilaia ai vairunave ane.
4Una kapea Samaria eiei vimu ai kei’inave.
5U Sikara ai pai’inave, pai’iri Samaria eiei ai kurua ka’e arekamu ai Iakobo una mere Iosepa awkunave.
6Iakobo onu ere aroa iou ai kei’inave: uku Iesu kape mu’u kei’inave Una aki eiai ere aroa epo ai U pa’anave: pani lare eua kei’inave.
7Samaria a’e monou ere uruai anenave: Iesu a’e erau voa kurunave, Ere ikune.
8(Uku Una aivara pei inaealiai pai’iri ai enavaka.)
9Samaria a’e erau voa veve’enave, Uku oiana Ni Isaraela a’a nai Samaria a’e nawki‐ikana ere nikuai? (Isaraela a’a Samaria a’a pai‐ekavapea.)
10Iesu erau voa kurunave, Ni Eloi inu veruku la’aruku ipaliaka livilia, U ane U erau voa kuruniane euna, Ere ikune; ni nawki‐awkavaka, U ere rokoa nikuaka ane.
11A’e erau voa kurunave, Amua e, Ni vana eria mi’ina ere uruai, aroa awku eporo keina: ei rokoa ere Ni ekei mere mi’ina?
12Ni amua a’a ana, ene mai‐vaki Iakobo rurupu vaki ana, u ane u ei ere aroa akunave, u awku ei aroa mere ere na’anave, una ukua‐mere ane, una animala ane?
13Iesu erau voa kurunave, A’a kavakava ei ere na’ana, kamuri lavere u moawku miakana:
14A a’a kavakava ere navakana Nai awkuakana, kamuri lavere u moawku miapea opai keiakana; a ere Nai awkuakana u laru ai ere aroa keiakana, inamakeia?-?kana opai rokoa eiai.
15A’e erau voa kurunave, Amua e, ei ere ikune, nai kamuri lavere mi’inavaia, eu ai ere uruai nai anenavaia.
16Iesu erau voa kurunave, Enara, ni vaki laeali’?-?ira, norere eu ai anene.
17A’e erau voa kurunave, Nai vaki miape. Iesu erau voa kurunave, voa miki ni kuruane euna, nai vaki miape:
18Uku vaki 5 ni miaka; a kurua vaki ni eai mi’ina u ni vaki peo, voa miki ni kuruane euna u eiai.
19A’e erau voa kurunave, Amua e, Nai inamu‐oina Ni laikorava a’a keina.
20Ene mai‐oro ei akapu ai avioinave; a noro Isaraela a’a kuruna Ierusalema ai a’a avioiai limakina.
21Iesu erau voa kurunave, A’e e, ipirimaroakone, pani aneliviai anelia, ei akapu ai, Ierusalema ai ane, noro Mai avioiapea.
22U ane noro avioina noro ipa‐ulauape; U ane enei avioina enei ipa‐ulauna: uku iawka Isaraela a’a mere anena.
23Pani aneliviai anelia, a eai ei‐anena, avioia miki a’a omo avaea miki mere oro Mai avioiakana: uku Mai avioia a’a orau umu‐elauna.
24Eloi Avaea keina; oro ane oro avioina oro avaea miki mere avioiai limakina.
25A’e erau voa kurunave, Nai ipali’ina Mesia aneliviai anelia, U ane U Keriso oroiakeina: U anea’ane awku uriria U ipakiakana.
26Iesu erau voa kurunave, Nai ane Nai kurunina, Nai U keina.
27Una aivara vairunave, oro varua’anave U a’e kiripai voa kurunave: omo a’a kapeo erau voa veve’enave, Ni oiama‐laikora’i? Uku oiana ei a’e kiripai Ni voa kuruna?
28A’e una ere vana ave’enave, pai’iri ai vairunave ane, pai’iri a’a u erau voa kuruenave,
29Anene, a’a inamu‐oiai, uku awku uriria nai liane euna U ikiane euna: ei a’a Keriso peana?
30Pai’iri mere oro elenave, U ai anenave ane.
31Una aivara nawki‐awkamakei’inave, erau voa kurunave, Amua e, Ni pei nane.
32Kurua pei navai Nai mi’ina noro ipapea.
33Ou voa eiai Una aivara erau voa ekinamakei’inave, A’a pei mi‐anena ana U eiai?
34Iesu erau voa kuruenave, U nai ikaiviriakei’inave, Na pei Una lai kamaialiai, Una iaki oailiai ane.
35Noro erau voa kuruapeana, Ia 4 mo paku ai keina, neko mere ai uru roikia pani aneakana? Nai kurunaina, Akoi’i, inamu‐la‐ekane, ei aura inamu‐ekine; eai uru nepa keina roikia pani eiai.
36Uru ie’ea a’a kavani mi’ina, uru roikina ane opai rokoa eiai: uku uru voea a’a, uru roikia a’a ane, orere kopailiane‐iai.
37Voa anu miki ipawkiakeina ei voa laru ai, A’a monou uru voena, a’a mo uru roikina.
38Uru roikiai noro oivi?-?riape Nai nakaiviriane euna: a’a e uru voenave, omo iaki mere noro roikina.
39Uku a’e erau voa kurunave, Awku uriria nai liane euna U ikiane euna, Samaria a’a aila kurua pai’iri mere pirimaroakoanave.
40Samaria a’a U ai paiaka’ane, U oro kiripai pokoiai oro nawki‐awkanave; lare rere U i‐pokoinave.
41Uku Una voa ane a’a aila mo pirimaroakoanave.
42Oro a’e erau voa kurunave, Enei pirimaroakona uku ni voa e peo; Una voa enei viriane euna, enei ipali’ina ane U pani va’au unu Iawka a’a keina.
43Lare rere periakei’inave U ave’enave, Galilaia ai U enanave ane.
44Iesu verukua kuruaka, laikorava a’a avioia eria miaka una pani va’au ai.
45U Galilaia eiei ai paiaka’ane, Galilaia a’a umu‐ai’inave, uku awku uriria U liaka Ierusalema ai, purai pani ai, oro inamu‐eiaka: uku oro awku purai navai Ierusalema ai inavaka.
46Galilaia anu pai’iri Kana ai Iesu moawku ikirimanenave, iou ai U ere iri uru unu ika evere’enave. Amua a’a monou unu mere maia kei’inave Kaperanauma ai.
47U viriaka’ane Iesu Iudea eiei mere elemaneaka Galilaia ai, u Iesu ai enanave, nawki‐awkanave ane, U ve’eane‐iai una mere aukarikavai: uku mere imua arekamu ai kei’inave.
48Iesu erau voa kurunave, Noro iva veia, momo’ore awku ane, inamu‐oiape liane, noro pirimaroakoapea.
49Amua a’a erau voa kurunave, Amua e, kinune na mere imunavaia.
50Iesu erau voa kurunave, Enara, ni mere uarokona. Voa Iesu kuruaka amua a’a pirimaroakoanave, una marea ai u vairunave ane.
51U ve’emakei’inave una aivara au‐awkunave, erau voa kurunave ane, Ni mere uarokona.
52U voa veve’einave uku pani mere enu maia periakei’inave. Oro erau voa kurunave, Namai lare pani eiei 7 maia ave’enave.
53Mekai ipali’inave kurua pani ai Iesu erau voa kurunave, Ni mere uarokona: u, una marea a’a ane, oro uriria Iesu pirimaroakoanave.
54Iva veia rere eire Iesu liaka U Iudea mere elemaneaka’ane Galilaia eiei ai.
Currently Selected:
Ioane 4: IAR1920
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1920.
