Mathiu 20
20
1Mero in ka niko le neai rol koma ierem ramos nimwa, an lakapnipin aken rier moma teros neremim to nasuman to vain tahan.
2An netereni to neremim ka moma terofen kam ilar peni ker le nian ker, an neterhalipen ilar to nasuman to vain tahan.
3An neterier le aur kisil neterahm nevin mun imaim kamailil mesaisuman.
4Netereni to ilar, Kamiar mun aruan le nasuman to vain an tiapofena kam kamiar nemrin matu.
5An netakaruan. An neterier mun le aur katilum mekarena mene le aur katilum mekuer an neterol am nar karena.
6An le aur katilum katilum mekarena neterier neterahm nevin mun kamailil; an netereni to ilar, Retol nakamailil ikenuk le nian min petum mesaisuman?
7Ilar netakani ton, mama, Mero in ka ieremim ker resosan kamar. Netereni to ilar, Kamiar mun aruan le nasuman to vain.
8An lehnaiu neterua an ieremera te nasuman to vain netereni to iolatkkokun nar tahan, Aunin nerem kamaisum an mero ilar le nemrin, an merwowun le ierem ramoatisig an meroatis le ierem ramaupan.
9An nerem remaunin ilar le aur katilum katilum mekarena netakarua, netakaros peni rauker le ilar.
10An nerem kamaiupan karua, an nekin ilar neterakahmo moma takaros asul; an ilar mun karos peni rauker le ilar.
11An netakoras, an netakameitat ieremera, mama,
12Nerem uk kamaiuatisig kamaisum le aur karena am, an ik neknol ilar kama kamar mene iemaisum le nian min petum mene le nemenkuat asul.
13Mero neteraram menipen to karena le ilar, Takiel, iesoletetan lam. Ik nemesenian moma tenakasum to peni?
14Os taham nar mier. To iakolkeikei moma tiakaro iawatisig uk kama ik mene.
15Resmatuan moma tiakol nar iakolkeikei le nar tahak? Wa nakanemram retat mero in ka io iakavit?
16Rol mok lan nerem kamaiuatisig tepaiupan, an nerem kamaiupan tepaiuatisig.
17An Iesu neteret muan Jerusalem, an neterir tan ieremim min katilum katilum mekiu ilar pusen am, netereni to ilar le suatu,
18Ahm ru, tiakaret maruan Jerusalem, an Neri Ieremim tapauraipen kam neremera le nuhwasigenan mene nerem kamatikun, an tepani nemisan ton.
19An tepaiuraipen in kam nerem Jentail mama takaiusan lan, an mamahro in, an mamaruit in, an le nepenian kisil terepermig.
20An inen neri Zebedi mil neterua ton ihlel neri mil, neterohwak kam in mamehrapkin pen ton nar ker.
21An netereni ton, Nakolkeikei neta? Netereni ton, Ani moma in uk neruk mil kuowata ker le nelimam matu an ker le nelimam mul le niko taham.
22Mero Iesu neteraram meni, Nakhatiktik am moma neta tenakheihrapkin. Nukuasanen muoma tenukuamnum le nevige kap io tiapamnum lan?
23Netukuani ton, Iakuasanen. Netereni to ilau, Tenukuamnum parhien le nevige kap tahak; mero nowatean le nelimok matu mene le nelimok mul, resolan moma tahak tiakofena, mero taha narem kenolita to ilar le Tata le neai.
24An ilar katilum katilum netakairo an niehma rametik ilar le ilau pian.
25Mero Iesu neteraunin pen ilar ton mameni, Kamiar nakarhinatin mama neremera te Jentail kamairemera atu le ilar, an nerem asul tenilar takani nowa to ilar.
26Tepesolan mok lan le kamiar. Mero ierem terama ribor le nekimiar terol atkokun nar to kamiar.
27An ierem rama teraupan le nekimiar iolatkokun nar temiar.
28Rolkoma Neri Ieremim remesuean moma takol atkokun nar ton, mero moma terol atkokun nar, an moma terofen nemihwan tahan nemrin neremim rapus.
29An netakarier le Jeriko, an nahuto puk netakairoupen.
30An ahm ru, iemnou kiu kamuowata le nikali suatu, an netakuaro muoma Iesu reknua makavan, netukuasak, muoma, Ieremera, asitu le kamlau, ik Neri Devid.
31An nahuto netakameinhiau ilau, mama, Asuasakan: mero ilau netakamuasak apam mun, muoma, Ieremera, asitu le kamlau, ik Neri Devid.
32An Iesu neterail maunin ilau, mameni, Neta nikiaolkeikei muoma tiakol kam kamilau?
33Netukuani ton, muoma, Ieremera, iakiaolkeikei muoma tekatita nakanemrimlau.
34An Iesu nekin netertat to liau, neteriap nemrin ilau, an ihwe am netukuahm mun nar, netakamuaraupen in.
Currently Selected:
Mathiu 20: LEN1902
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1902, reprinted in 1935.
