लूका 6

ईसू आराम दिन कौ पिरभू है

(मत्‍ती 12:1–8; मरकुस 2:23–28)

1एक बार ईसू और वाके चेला यहुदियन के आराम के दिना में खेतन ते हैके जाय रये हते और वाके चेला बाल तोड़ तोरकर और हातन ते मसलकै खावत भये जा रये हते। 2तब फरीसियन में ते कछू लोग कैहबे लगे, “तुम लोग बू काम चौं करतें, जो यहुदियन के आराम के दिना हमारे नियम के अनुसार नांय कर सकते।”

3ईसू नें बिनकूं उत्‍तर दियो, “का तुमने जि नांय पढ़ी। कै जब हमारे पुरखा दाऊद और वाके संगी भूंखे हते, तब दाऊद नें का करौ हतो? 4बू परमेस्‍वर के घर में गयौ और भेंट की रोटी खाईं,और अपने संगिन कूं भी दई जिन रोटीन नें खाबे की इजाजत केवल यहुदी पुरोहितन नें ही हती और काऊए नांय हती।” 5और बानें बिनते कही, “मैं, ‘मनुस्‍य कौ बेटा’ यहुदियन के आराम के दिना कौऊ पिरभू हूं।”

आराम दिना सूखे हात बारे आदमी कूं ठीक करबौ

(मत्‍ती 12:9–14; मरकुस 3:1–6)

6और ऐसो भयौ के एक और दूसरौ यहुदियन के आराम दिना आयौ तब ईसू पिराथना घर में जायकै परमेस्‍वर के वचन की सिछा दैबे लगौ। मांपै एक आदमी हतो वाकौ सीधौ हात सूखौ हतो। 7सास्त्रन कूं सिखाबे बारे और फरीसी बापे दोस लगायबे के मौके ढूँन रये, कै देखें बू यहुदियन के आराम दिन में जाय ठीक करतुए के नांय। 8पर बू बिनके बिचार जानत हतो, जामारै बानें सूखे हात बारे आदमी ते कही कै, “उठ और सबन के सामने खड़ौ है जा।” बू उठकै खड़ौ भयौ। 9ईसू नें बिनते कही, “मैं तुमते जि पूछतूं। कै यहुदियन के आराम के दिना में व्‍यबस्था के अनुसार का सही है? भलौ करनों या बुरौ करनों, पिरान कूं बचायबौ या नास करबौ?” 10और बानें चारौ ओर बिन सबन की ओर देखकै बा आदमी ते कही, अपनों हात बढ़ा बानें ऐसा ही करौ और वाकौ हात पैहले के जैसौ सही है गयौ। 11बे भौत गुस्सा हैकें आपस में बात करबे लगे कै, “हम ईसू के संग का करें?”

बारैह भेजे भये चेला

(मत्‍ती 10:1–4; मरकुस 3:13–19)

12बिन दिनान में ईसू एक पहाड़ पै पिराथना करबे कूं गयौ और परमेस्‍वर ते पिराथना करबे में सबरी रात बिताई। 13जब सबेरौ भयौ, तब बानें अपने चेलान कूं अपने जौरें बुलायौ और बिनमें ते बारह चेला चुन लए और बिनकूं बानें “भेजे भये चेला” कहा। 14और बिनके नाम जि हैं, सिमौन जाकौ नाम बानें पतरस रखौ और वाकौ भईया अन्द्रियास और याकूब और यूहन्‍ना और फिलिपुस और बरतुलमै। 15और मत्‍ती और थोमा और हलफई कौ बेटा याकूब और सिमौन जो देस भक्‍त कहौ जातौ। 16और याकूब कौ बेटा यहूदा और यहूदा इस्करियोती जानें बिसबास घात करकै ईसूए पकरबायौ।

परमेस्‍वर के वचन की सिछा दैबो और ठीक करबौ

(मत्‍ती 4:23–25)

17-18तब ईसू बिनके संग पहाड़ पैते उतरकै चौरस जगह में खड़ौ भयौ, मांपै वाके भौत ते चेला और सबरे यहुदिया, येरूसलेम, सूर, सैदा और समुन्दर के किनारे के भौत ते लोग, वाकी सुनवे और अपनी बीमारिन ते ठीक हैबे के काजै वाके जौरें आये हते। मांपै ईसू नें दुस्‍ट आतमान ते सताए भए लोगन कूं अच्‍छौ करौ। 19और सब बाय छूनों चाहते हते, चौंकि बामें ते सामर्थ निकरकें बिन सबन कूं ठीक करती हती।

दुख और खुसी कौ वचन

(मत्‍ती 5:1–12)

20फिर ईसू नें अपने चेलान की ओर देखके कही, “धन्य हौ तुम जो दीन हो चौंकि सुरग कौ राज तुमारौईए। 21धन्य हो तुम, जो अब भूखे हो, चौंकि तृप्‍त करे जाओगे, धन्य हो तुम, जो अब रोबतौ, चौंकि आनन्द मनाऔगे। 22#1 पत 4:14धन्य हो तुम, जब मुझ, ‘मनुस्‍य के बेटा’ के पीछे चलबे की बजैह ते लोग तुमते बैर करें और तुमें समाज ते निकाल देबें और तुमारी बेज्‍जती करें और तुमारे नाम कूं बुरौ कहबें। 23#प्रेरि 7:52बा दिना खुस हैकें उछलियौ, चौंकि सुरग में तुमारे काजै भौत बड़ौ फल रखौए। याद रखौ कै बिनके पुरखा परमेस्‍वर की ओर ते बात बतायबे बारेन के संगऊ एसौई करौ करते। 24पर बा आदमी के काजै, भौत बुरौ होगौ। जो धनबान हो, चौंकि तुम अपनी सान्‍ती पा चुके। 25हाय है तुम लोगन पै जो अब तृप्‍त हो, चौंकि तुम भूखे होंगे, हाय है तुम लोगन पै जो अब तू आनन्द मनातौ, चौंकि तुम सोक करोगे और रोओगे। 26हाय है तुम लोगन पै, जब सब आदमी तुमें भलौ कहें, चौंकि बिनके पुरखा परमेस्‍वर के बारे में झूंठी बात बताबे बारेन के संगऊ एसौई करौ करते हते।

अपने बैरिन ते पिरेम करौ

(मत्‍ती 5:38–48; 7:12a)

27“पर मैं तुम सुनबे बारेन ते कहतूं, कै अपने बैरिन ते पिरेम रखो, जो तुमते नफरत करें, बिनकौ भलौ करौ। 28जो तुमें स्राप दें, बिन्‍नें आसीस देओ जो तुमारे संग बुरौ व्‍यवहार करें, बिनके काजै पिराथना करौ। 29जो तेरे एक गाल पै थप्पड़ मारै तौ वाके माऊं अपनों दूसरौ गाल कर दियौ और जो तेरी लोई छीन लैबे, तौ बाय कुरता लैबे तेऊ मत रोकौ। 30जो कोई तोते मांगे, बाय दै दे और जो तेरी वस्तु छीन लै, बाते मत मांग। 31#मत्‍ती 7:12और जैसौ तुम दूसरेन ते अपने काजै बरताब चाहतौ बैसेई तुम दूसरेन के संग बरताब करौ।

32“यदि तुम अपने पिरेम करबे बारेन तेई पिरेम करतौ, तौ जामें तुमारी का बड़ाई है? चौंकि पापीअऊ तौ अपने पिरेम रखबे बारेन के संग पिरेम रखतै। 33और अगर तुम अपनी भलाई करबे बारेन के संग भलाई करतौ, तौ जामें तुमारी का बड़ाई है? चौंकि पापीअऊ तौ ऐसौई करतै। 34और अगर तुम काऊऐ उधार देतौ और बा पैते बापस पायबे की आसा रखतौ, तौ जामें तुमारी का बड़ाई है? चौंकि पापीअऊ तौ बिनें उधार देतै, कै उतनोंई फिर पाबें। 35बरन अपने दुसमनन ते पिरेम रखो और भलाई करौ और बापस पाबे की आस ना रखत भये उधार देउ, तौ तुम्हारे काजै बड़ौ फल होगौ और तुम परम पिरधान के सन्‍तान ठहरौगे, चौंकि जो परमेस्‍वर कौ धन्यबाद नांय करत और बिनके काजैऊ कृपालु है। 36जैसा तुमारौ सुरगीय पिता दयावन्‍त है, बैसेई तुमऊ दयावन्‍त बनो।

दूसरेन पै दोस मत लगाऔ

(मत्‍ती 7:1–5)

37“तुम काऊ कौ भलौ बुरौ कैहके न्याय मत करौ जाते कै तुमारौऊ न्याय ना करौ जाबेगौ। दोस मत लगाऔ, तौ तुम पैऊ दोस नांय लगायौ जाबैगौ। छमा करौ, तौ तुमेंऊ छमा करौ जाबेगौ। 38दयौ करो, तौ तुमेऊं दयौ जाबैगौ पूरौ दबाय दबाय कै और हिलाय हिलायके ऊपर तक निकरतौ भयौ तुमें दयौ जाबेगौ चौंकि जिस नाप ते तुम नापतौ, बाई नाप ते तुम्हारे काजैऊ नापौ जाबैगौ।”

39 # मत्‍ती 15:14 फिर बानें बिनते एक दृस्‍टान्‍त कहौ, “का एक अंन्धौ, अन्धे कूं रस्ता दिखा सकतै? अगर बू ऐसौ करिगें तौ दोनोंई गढ्‍ढा में गिरेंगे। 40#मत्‍ती 10:24,25; यूह 13:16; 15:20चेला अपने गुरू ते बड़ौ नांय, पर जो कोई सिद्ध होगौ, बू अपने गुरू के समान होगौ।

41“तोए तेरे भईया की छोटी-छोटी बुराई तौ देखतै पर तोए अपनी ही बडी-बडी बुराई नांय दीखत? 42और जब तोए अपनी ही बडी-बडी बुराई नांय दीखत, तौ तू अपने भईया ते चौं कैहते कै ‘हे भईया’ रुक जा मैं तेरी बुराई नें दूर करूं? हे कपटी, पैहले तू अपनी बुराई दूर कर जाके बाद तू अपने भईया की बुराई दूर कर सकेगौ।

जैसौ पेड़ बैसौई फल

(मत्‍ती 7:16–20; 12:33–35)

43“अच्‍छे पेड़ पै अच्‍छे फल आबतै और बुरे पेड़ पै बुरे फल आबतै। 44#मत्‍ती 12:33हर एक पेड़ अपने फलन ते पहचानौ जाते, चौंकि लोग झाड़ियन ते अंजीर नांय तोड़त और न झड़बेरी ते अंगूर। 45#मत्‍ती 12:34भलौ आदमी अपने मन के भले भन्‍डार ते भली बात निकारतै और बुरौ आदमी अपने मन के बुरे भन्‍डार ते बुरी बातें निकारतै, चौंकि जो वाके मन में भरौए बेई वाके मौंह ते बाहर आवते।

दो तरैह के लोग

(मत्‍ती 7:24–27)

46“जब तुम मेरौ कहनों नांय मानतई, तौ चौं मोय, ‘हे पिरभू, हे पिरभू,’ कहते हो। 47जो कोई मेरे जौरें आवतै और मेरी बातें सुनकें बिनैं मानतै, मैं तुमें बताबतूं कै बू कौन के समान है। 48बू बा आदमी के जैसौए जानें अपनों घर बनाते समै गैहरी नींव खोदी और बू नींव चट्टान पै डारी और जब बाढ़ आई तौ धारा बा घर ते टकराई, पर बा घर कूं हिला नांय सकी, चौंकि बू पक्‍कौ बनों हतो। 49पर जो सुनिकै मान्‍त नांय, बू बा आदमी के समान है, जानें मट‍्टी पै बिना नींव के घर बनांयौ। जब बापै धारा टकराई, तौ बू तुरन्‍त गिर पड़ौ और बू गिरकै सत्‍यानांस है गयौ।”

Currently Selected:

लूका 6: BRAJ

Highlight

Copy