लूका 20

ईसू के अधिकार पै सबाल

(मत्‍ती 21:23–27; मरकुस 11:27–33)

1एक दिना जब ईसू यहुदियन के बड़े पिराथना घर में परमेस्‍वर के वचन की सिछा देते भये सुभ समाचार सुना रयो, तब यहुदी पिरधान पुरोहित और सास्त्रन कूं सिखाबे बारे और यहुदी नेता वाके जौरें आये। 2और बाते पूछबे लगे, “कै इन कामन नें तू कौन ते अधिकार ते कर रयौ है? बू कौन है जानें तोय जि अधिकार दयौ है?”

3तब ईसू नें बिनते कही, “मैंऊ तुमते एक बात पूँछतूं, तुम मोय बताऔ, 4यूहन्‍ना कूं बपतिस्मा दैबे कौ अधिकार सुरग ते मिलौओ कै आदमी ते मिलौओ?”

5तब बे आपस में कैहबे लगे, “कै अगर हम कैहबे ‘सुरग की ओर ते मिलौओ’, तौ जि कैहबेगौ, ‘तौ तुमनें बापै भरोसौ चौं नांय करौ?’ 6और हम जि कैहबें, ‘आदमिन की ओर ते’ मिलौ हतो तौ लोग हम पै पत्‍थर मारिंगे। चौंकि बे मानते कै यूहन्‍ना परमेस्‍वर की ओर ते बात बताबे बारौ हतो।”

7बिनैं ईसू कूं उत्‍तर दयौ, “कै हम नांय जानत कै बाय अधिकार कौन की ओर ते मिलौ हतो।”

8फिर ईसू नें बिनते कही, “तौ मैंऊ तुमें नांय बता रयौ कै मैं जे काम कौन के अधिकार ते करतूं।”

बुरे किसानन कौ दृस्‍टान्‍त

(मत्‍ती 21:33–46; मरकुस 12:1–12)

9ईसू लोगन ते एक दृस्‍टान्‍त कैहबे लगौ, “एक आदमी नें अंगूरन कौ बगीचा लगायौ और किसानन कूं आद बटाई पै दैकै कछू दिनान के काजै परदेस कूं चलौ गयौ। 10जब फसल कौ समै आयौ तब बानें किसानन के जौरें अंगूरन के बगीचा में ते अपनों हिस्सा लैबे अपनों एक सेबक भेजौ पर किसानन नें बाय पीटकै खाली हातई लौटा दियौ। 11फिर बानें अपनों दूसरों सेबक भेजौ और किसानन नें बाऊऐ पीटकै और वाकौ अपमान करकै खाली हात लौटा दियौ। 12फिर बानें तीसरौ सेबक भेजौ बिन्‍नें बाय अधमरौ करकै बाहर फेंक दियौ।

13“बगीचा कौ मालिक सोचबे लगौ, ‘कै अब मैं का करूं? मैं अपने प्यारे बेटाए भेजुंगो, का पतौ बे जाकौ आदर करै।’

14“जब किसानन नें वाके बेटा कूं देखौ, तौ बे आपस में बिचार करबे लगे कै, ‘जि तौ इकलौतो बारिस है जाये हम मार दिंगे तौ सबरी जायजाद हमारी है जाबेगी।’ 15और बिन्‍नें बाय अंगूरन के बगीचा में ते बाहर निकारकै मार डारौ।

“जापै बगीचा कौ मालिक अब बिन किसानन के संग का करैगौ? 16बू आयकै बिन किसानन कूं मार डारैगौ,और अंगूर के बगीचाए औरन कूं सौंप दैबेगौ।”

जि सुनिकै लोगन नें कही, “परमेस्‍वर ऐसौ ना करै।”

17ईसू नें बिनकी ओर देखकै कही, “धर्मसास्त्र में जि चौं लिखौ है,

“‘कै जा पत्‍थर कूं राज मिस्त्रीन नें बेकार समझकै निकार दयौ हतो,

बुई कोने कौ पत्‍थर बन गयौ’?

18जो कोई जा पत्‍थर पै गिरैगौ बू चकना चूर है जाबेगौ और जापै जि पत्‍थर गिरैगौ बाय पीस डारैगौ।”

यहुदी नेतान की जालसाजी

(मत्‍ती 22:15–22; मरकुस 12:13–17)

19सास्त्रन कूं सिखाबे बारे और यहुदी पिरधान पुरोहित जि समझ गये, कै जि दृस्‍टान्‍त हम पैई कहौ है और बे बाय बाई समै पकड़बौ चाहते, पर बे लोगन ते डरते हते।

20बे ईसू कूं फसाबे की ताक में लगे रहते और बिन्‍नें जासूस भेजे कै बे धरमी हैबे कौ भेस धरकै, वाकी अपनी बातन में फसायकै रोमी राजपाल के हात और अधिकार में सौंप दें। 21बिन्‍नें ईसू ते पूंछते भये कही, “हे गुरू! हम जानतै कै तू जो ठीक है बेई कैहबे और बाई परमेस्‍वर के वचन की सिछा दैबे और काऊ की तरफदारी नांय करत, बल्कि सच्‍चाई ते परमेस्‍वर के रस्ता पै चलबे की सिछा देतै। 22का कैसर राजा कूं कर दैबौ हमारे काजै हमारे नियम के खिलाफ सही है कै नांय?”

23ईसू नें बिन लोगन की चालाकी कूं जानकै बिनकी ते कही, 24“मोय एक दीनार दिखाओ, जापै कौन की सकल छपीऐ और किनकौ नाम लिखौ है?”

बिन्‍नें कही, “कैसर राजा कौ।”

25ईसू नें बिनते कही, “जो कैसर राजा कौ है बाय कैसर कूं देओ और जो परमेस्‍वर कौ है बाय परमेस्‍वर कूं देओ।”

26बे ईसू कौ उत्‍तर सुनिकै अचम्भे में पड़कै चुप है गये और बे लोगन के सामने वाकी बातन में दोस नांय निकार सके।

ईसू कूं पकरबे काजै सदूकिअन की चाल

(मत्‍ती 22:23–33; मरकुस 12:18–27)

27 # प्रेरि 23:8 जाके बाद कछू सदूकी ईसू के जौरें आये जो जिनकौ जि माननों हतो, कै मरे भयेन में ते कोई फिर ते जीबित नांय है सकत, बिनमें ते कछुन नें ईसू के जौरें आयकै बाते पूंछी, 28“हे गुरू, मूसा नें हमारे काजै लिखौ है कै यदि काऊ आदमी कौ भईया अपनी औरत के रहते भये बिना औलाद के मर जाबें तौ वाकौ भईया अपने वाकी बिधबा औरत ते ब्याह करकै अपने भईया के काजै बाते बच्‍चा पैदा करे। 29एक बार कोई सात भईया हते, पैहले नें ब्याह करौ और बिना सन्‍तान के मर गयौ। 30फिर दूसरे नें बाई औरत ते ब्याह करौ और बोऊ बिना सन्‍तान के मर गयौ। 31और ऐसे ही तीसरे नें और सातो भईयन नेंऊं बा औरत ते ब्याह करौ और सबके संग एक जैसो भयौ बे सबई बिना सन्‍तान के मर गये। 32सबके बाद बू औरतऊ चल बसी। 33अब सबन के जी उठबे के बाद बू कौन की औरत होगी चौंकि बानें तौ सातन तेऊ ब्याह करौ हतो?”

34ईसू नें बिनते कही, “जा युग के लोगन में ब्याह सादी होबें, 35पर जो लोग बा सुरगीय युग के बारिस और मरे भयेन में ते फिर ते जी उठबे काजै ठहराये गये हैं बिनमें ब्याह सादी नांय हुंगी। 36और बे लोग फिर कबऊ नांय मरते चौंकि बे सुरग दूतन की तरैह ते हुंगे और मरे भयेन में ते जी उठबे की वजह ते बे परमेस्‍वर कीऊ सन्‍तान होंगे। 37मूसा नें झाड़ि की कथा में, जि पिरगट करौ है कै मरे भये जीन्दे करे गये हैं और बानें जि कही हती पिरभू, ‘अब्राहम कौ परमेस्‍वर है, इसहाक कौ परमेस्‍वर और याकूब कौ परमेस्‍वर है।’ 38परमेस्‍वर मरे भयेन कौ नांय, पर जीबतेन कौ परमेस्‍वर है चौंकि परमेस्‍वर के सब लोग वाके काजै जीन्दे हैं।”

39जि सुनिकै सास्त्रन कूं सिखाबे बारेन में ते कछुन नें बाते कही, “हे गुरू, तैनें सही कही है।” 40जाके बाद बिनकी लोगन कूं ईसू ते और कछू पूछबे की हिम्मत नांय भयी।

मसीह कौन कौ बेटा है

(मत्‍ती 22:41–46; मरकुस 12:35–37)

41ईसू नें बिनते कही, “तुम कैहतौ कै मसीह दाऊद कौ बेटा है। ऐसौ कैसै है सकते? 42दाऊद नें खुदई भजन संहिता की किताब में कहौ है,

“ ‘पिरभू परमेस्‍वर नें मेरे पिरभू ते कही,

“मेरे सीदे हात माऊं बैठो रैह,

43जब तक कै मैं तेरे बैरीयन कूं

तेरे पामन के नीचें ना कर दऊं।” ’

44जा तरैह ते दाऊद मसीह कूं ‘पिरभू’ कैहबें, तौ मसीह दाऊद कौ बेटा कैसै है सकैं?”

सास्त्रन कूं सिखाबे बारेन ते सावधान रहो

(मत्‍ती 23:1–36; मरकुस 12:38–40)

45जब सबरे लोग सुन रये हते तब ईसू नें अपने चेलान ते कही, 46“सास्त्रन कूं सिखाबे बारेन ते सावधान रहो, जिनें लम्बे लम्बे चोगे पहनकै य्हां वहाँ घूमबो, बजारन में लोगन के जरिये नमस्‍कार पाबो, पिराथना घरन में मुख्‍य आसन और दाबत में सबनते आगे बैठबो बिनकूं अच्‍छौ लगतै। 47और बे लोग बिधबान की सम्पंत्‍तीऐ खा जाबें और दिखाबे के काजै बड़ी देर तक लम्बी लम्बी पिराथना करतै इन लोगन कूं भौत दन्‍ड भुगतनों पड़ेंगौ।”

Currently Selected:

लूका 20: BRAJ

Highlight

Copy