लूका 19

चुंगी लैबे बारौ जकई

1एक बार ईसू यरीहो नगर ते हैके जा रयो। 2और मांपै जकई नाम कौ एक आदमी जो चुंगी लैबे बारेन कौ सरदार हतो और बू भौत धनी हतो। 3बू ईसूए देखबों चाहतौ, “कै बू कैसौ है,” पर भीड़ की बजैह ते बू बाय देख नांय पा रयौ चौंकि बू नाटों हतो और भीड़ भौत जादाई 4तब बू ईसूए देखबे काजै भीड़ ते आगे जायकै एक गूलर के पेड़ पै चढ़ गयौ चौंकि ईसू बाई रस्ता ते जाबे बारौ हतो।

5जब ईसू बा पेड़ के नीचे पौंहचौ, तौ ऊपर देखकै पेड़ पै बैठे जकई ते केहबे लगौ, “जकई, झटपट उतर आ चौंकि आज मोय तेरेई घर में ठहरनों है।” 6बू तुरन्‍त उतर आयौ और आनन्द के संग ईसूए अपने घर लै गयौ।

7जि देखकै सब लोग कुड़ कुड़ायकै कैहबे लगे “जि तौ एक पापी आदमी कै जाँपै ठहरबे जा रयौ है।”

8जकई खड़ौ भयौ और पिरभू ते बोलों, “हे पिरभू देख मैं अपनी आधी सम्पत्‍ती गरीबन कूं दे दुंगा और मैंनें काऊ कौ कछू भी अन्याय करकै लियौ है तौ मैं बाय वाकौ चौगुनों लौटा दुंगो।”

9तब ईसू नें बाते कही, “जा घर में आज उद्धार आयौ है, चौंकि जा आदमी नें भरोसौ करकै जि दिखा दयौ है कै जि आदमीऊं अब्राहम की सच्‍ची सन्‍तान है। 10#मत्‍ती 18:11चौंकि मैं, ‘मनुस्‍य कौ बेटा’ खोए भयेन कूं ढूढ़बे और बिनकूं बचाबे आयौ है।”

परमेस्‍वर जो देता है वाकौ उपयोग करौ

(मत्‍ती 25:14–30)

11जब लोग जि बात सुन रये हते, तब ईसू नें बिनैं एक दृस्‍टान्‍त सुनांयौ, चौंकि ईसू येरूसलेम के जौरें हतो और बे जि सोचते कै परमेस्‍वर कौ राज तुरन्‍त पिरकट हैबे बारौ है। 12जामारै ईसू नें कही, “एक धनी आदमी राज करबे की सिछा लैबे दूर देस कूं चलौ गयौ। 13और बानें अपने दस सेबकन कूं बुलायकै हर एक कूं, एक-एक मौहर दयी और कही, ‘देखौ, मेरे लौटबे तक जाते लेन देन करियौ।’

14“पर बाते नगर के लोग घिरना करते हते, जामारै वाके पीछे दूतन के द्वारा जि कैहला भेजौ कै ‘हम नांय चाहबे कै जि आदमी हम पै राज करै।’

15“पर बू राज की पदवी पायकै लौटौ और बानें जिन सेबकन कूं मौहर दयीं हतीं, बिनैं अपने जौरें बुलायौ कि बू जानें कै बिन्‍नें बिनते कितनों लाभ कमायौ है।

16“पैहले नें आयकै कही, ‘हे स्‍वामी! तेरी एक मौहर ते दस मौहर कमायीं हैं।’

17“जापै वाके मालिक नें बाते कही, ‘साबास अच्‍छे सेबक।’ तू थोड़े में भरोसे योग्‍य निकरौ, ‘जामारै तोय दस नगरन पै अधिकार मिलैगौ।’

18“जाके बाद दूसरे सेबक नें आयकें कही, ‘हे स्‍वामी, तेरी एक मौहर ते पाँच और मौहर कमायीं हैं।’

19“मालिक नें बाते कही, ‘तोय पाँच नगरन पै अधिकार मिलैगौ।’

20“अब तीसरे नें आयकै कही, ‘हे मालिक देख तेरी मौहर जि है जाय मैंनें अगौछे में बांध रखौ हतो। 21मोय तोते डर लगतो चौंकि तू कठोर आदमी है। जो तैनें नांय रखौ बाय उठा लैबे और जो तेने बोयो नांय बाय तू काटतै।’

22“मालिक नें बाते कही, ‘हे दुस्‍ट सेबक, मैं तेरे कहे अनुसार तेरौ न्याय करुंगो। तू जानतौ कै में एक कठोर आदमी हूं। जो मैंनें रखौ नांय बाय उठा लेतूं और जो मैंनें बोयो नांय बाय काटतूं। 23जाते तौ तू जा मौहर कूं ब्याज पै दै देतौ और में बापस आयकै बाय ब्याज समैत लै लेतौ।’

24“मालिक नें मांपै खड़े आदमिन ते कही, ‘जापै ते मौहर लैकै बाय दै देओ जापै दस मोहरें।’

25“बिन्‍नें बाते कही, ‘हे मालिक, वाके जौरें तौ पैहले ते दस मोहरें हैं।’

26 # मत्‍ती 13:12; मर 4:25; लूका 8:18 “बानें कही, ‘मैं तुमते कैहतूं, जाके जौरें है बाय और जादा दयौ जाबेगौ और जाके जौरें नांय बा पैते बोऊ जो बापै है छीन लयौ जाबेगौ। 27#मत्‍ती 25:14–30पर बे जो मेरे दुसमन है बे नांय चाहबें कै, में राज करूं बिनें मेरे सामने लायकै मार डारौ।’”

ईसू कौ येरूसलेम में परबेस

(मत्‍ती 21:1–11; मरकुस 11:1–11; यूहन्‍ना 12:12–19)

28जि बात कैहबे के बाद ईसू चेलान ते आगे-आगे येरूसलेम की ओर चल दियौ। 29जब बू जैतून नामक पहाड़ पै बैतफगे और बैतनियां कै जौरें पौहचों, तौ बानें अपने दो चेलान कूं जि कैहकै भेजौ, 30“कै सामने के गांम में जाऔ मांपै तुम्हें एक गधी कौ बच्‍चा बंधौ भयौ मिलैगौ, जापै अबई तक कोई नांय बैठौ। बाय खोलकै याँपै लै आऔ। 31अगर कोई तुमते पूँछै कै, ‘जाय चौं खोल रये हो?’ तौ बाते कहियों, ‘पिरभू कूं जाकी जरूरत है।’”

32जो चेला भेजे गये बिनै मांपै बैसौई मिलौ जैसौ ईसू नें बिनै बतायौ हतो। 33जब बे गधी के बच्‍चा कूं खोल रये, तौ वाके मालिक नें बिनते पूँछी कै, “तुम जाय चौं खोल रये हो?”

34तब बिनैं कही, “पिरभू कूं जाकी जरूरत है।”

35बे बा गधी के बच्‍चा कूं ईसू के जौरें ले आये और अपनी अपनी लोई बा गधा पै डारकै ईसू कूं बापै बैठा दयौ। 36जब ईसू बापै बैठकै जा रयौ हतो तौ भौत ते लोग अपनी लोई रस्ता में बिछाते जा रये।

37ईसू जब जैतून पहाड़ के ढलान पै पौंहचो, तौ चेलान की सबरी भीड़ नें वाके सबरे सामर्थ के काम जो बिन्‍नें देखें हते बिनके काजै, आनन्दित हैके ऊंची अबाज में परमेस्‍वर की स्तुति करबे लगे।

38“धन्य है बू राजा, जो पिरभू के नाम में आबें!

सुरग में सान्‍ती होबें और आकास में परमेस्‍वर की महिमा होबें।”

39भीड़ में कछू फरीसी हते, बिन्‍नें कही, “गुरू, अपने चेलान कूं चुप कर दै।”

40ईसू नें बिनै जबाब दयौ, “में तुमते कैहतूं अगर ये चुप रये, तौ पत्‍थर चिल्ला उठेंगे।”

येरूसलेम पै ईसूए रोनों आयौ

41जब बू नगर के जौरें पौंहचो तौ बा नगर कूं देखकै पै रो परौ। 42और कैहबे लगौ, “कितनों अच्‍छौ होतौ के तू जा अच्‍छे दिना कूं पहचान पातो, कै कौन सी बातन ते तोए सान्‍ती मिलैगी, पर तोए अबऊ बे बात नांय दिख रयी। 43चौंकि बे दिनांऊ आबेंगे जब तेरे बैरी तोए चारौ लंग ते घेर के, मोरचा बांधिंगे और तोपै चारों ओर ते दबाब डारिंगे। 44बे तोय और तेरे संग के लोगन कूं मटियामेट कर दिंगे, बे एक पत्‍थर पै दूसरौ पत्‍थरऊ नांय छोड़िंगे, चौंकि तेने अपने परमेस्‍वर के आयबे के समै कूं नांय पैहचानों।”

ईसू बड़े पिराथना घर में

(मत्‍ती 21:12–17; मरकुस 11:15–19; यूहन्‍ना 2:13–22)

45ईसू बड़े पिराथना घर में गयौ और जो मांपै बौपार कर रये हते बिनैं बाहर निकारबे लगौ। 46बानें बिनते कही, “जि लिखौ भयौ है, ‘कै मेरौ घर पिराथना कौ घर होगौ’, पर तुम लोगन नें तौ जि डाकूंन कौ अड्‍डौ बना डारौ है।”

47 # लूका 21:37 ईसू रोजाना बड़े पिराथना घर में जायकै परमेस्‍वर के वचन की सिछा देतौ हतो। यहुदी पिरधान पुरोहित और सास्त्रन कूं सिखाबे बारे और यहुदी नेता बाय नांस करबे कौ उपाय ढ़ूढ रये हते। 48पर उनैं समझ में नांय आ रयौ कै बू का करैं चौंकि सब लोग मन लगायकै वाकी सिछा सुनते।

Currently Selected:

लूका 19: BRAJ

Highlight

Copy