लूका 11

ईसू नें पिराथना करबौ सिखाऔ

(मत्‍ती 6:9–13; 7:7–11)

1एक दिना ईसू मसीह काऊ जगैह पै पिराथना कर रऔ। जब बू पिराथना कर चुकौ तब वाके चेलान में ते एक चेला नें वाके जौरें आयकै कही “हे पिरभू! हमें पिराथना करबौ सिखा, जैसे कै यूहन्‍ना बपतिस्मा बारे नें अपने चेलान कूं पिराथना करबौ सिखाऔ।”

2तब ईसू मसीह नें बिनते कही, “तुम जब पिराथना करै करौ तौ कहौ,

“‘हे पिता तेरौ पबित्र नाम आदर पाये।

तेरौ राज आबै,

3हमें रोजाना की रोटी रोज दैवौ कर

4जैसे हमनें अपने अपराधिन कूं छमा करौ है,

बैसेई हमारे अपराधन कूं छमा कर,

और हमें परखे जाबे ते दूर रख।’”

मागिंगे तौ तुमें दयौ जाबैगौ

5फिर ईसू मसीह नें बिनते कही, “मानों तुम में ते काऊ कौ एक मित्र आधी रात कूं वाके जौरें आयकै कहै कै, ‘हे मित्र मोय तीन रोटी दै दै, 6चौंकि मेरौ मित्र यात्रा पैते आयोए और मोपै बाय खबायबे काजै कछू नांय हत।’

7“सोचौ कै बू आदमी भीतर तेई जबाब दे कै, ‘मोय परेसान मत करै। मेरौ दरबज्‍जौ बन्द है चुकौए मेरे बालक मेरे संग बिछौना पै है। मैं तोय कछू दैबे काजै मैं नांय उठ सकत।’ 8मैं तुमते कैहतूं कै, अगर बू वाकौ मित्र होत भयेऊ वाके काजै ना तौ उठे और न बाय कछू दैबे। तौऊं वाके गिड़गिड़ाबत रैहबे की बजैह ते बाय जितनी जरूरतै उतनी बाय दैबैगौ।

9“जाई मारे मैं तुमते कह रयौऊं, कै तुम मागिंगे तौ तुमें दयौ जाबैगौ, ढ़ूढौगे तौ पाऔगे,खटखटाओगे तौ तुमारे काजै द्वार खोलौ जाबैगौ। 10चौंकि जो कोई मांगतै बू पाबतै और जो ढूंडतै बाय मिलतै और जो द्वार खटखटाबतै वाके काजै खोलौ जाबैगौ।

11“तुम मेंते ऐसौ कौन सौ बाप है जाकौ बेटा बाते मछली मांगै तौ बाय सांप दैबै#11:11 मछली मांगै तौ बाय सांप दैबै कछू हात ते लिखे भये लेखन में जि लिखौ है, तुम में ते ऐसौ कोनसौ बाप है जाकौ बेटा रोटी मांगे तौ बू बाय पत्‍थर दैबे? 12और अगर बू अन्‍डा मांगे तौ बू बाय बिच्छू दैबै? 13जामारै तुम बुरे होत भऐऊ अपने बालकन कूं अच्‍छी चीज दैबौ जानतौ तौ तुमारौ सुरगीय पिता अपने मांगबे बारेन कूं पबित्र आतमा चौं नांय दैवेगौ?”

ईसू में परमेस्‍वर की सामर्थ

(मत्‍ती 12:22–30; मरकुस 3:20–27)

14एक दिनां ईसू नें एक आदमी में ते गूंगी दुस्‍ट आतमा निकारी, बानें बा आदमी कूं गूंगौ बनांय रखोऔ और जब बू आतमा निकर गई तब गूंगा आदमी बोलबे लगौ जि देखकै लोग भौत अचम्भित भये। 15#मत्‍ती 9:34; 10:25पर बिन आदमिन में ते कछू आदमी कैहबे लगे कै जि तौ दुस्‍ट आतमा के मुखिया बालजबुल की सहायता ते दुस्‍ट आतमा निकारतै, 16#मत्‍ती 12:38; 16:1; मर 8:11तब लोगन नें ईसू कूं परखबे काजै बाते सुरगीय चिन्ह माँगौ। जाते जि पतौ चल सकै कै बू सुरग की ओर ते भेजौ गयौ है।

17बिनके मन की बातन कूं ईसू जानतौ हतो बानें लोगन ते कही, “जा राज में फूट पड़ जाबै बू राज तौ जल्दी अई खतम है जाबै और घर में फूट परबे पै बू घर नस्‍ट है जाबतें, 18अगर सैतानई सैतान कौ बिरोधी है जाय तौ वाकौ राज कहां टिकौ रैहबेगौ वाकौ राज तौ खतमई है जाबैगौ और मैं जि जामारै कैह रयौ हूं कै तुम कैहतौ, कै मैं सैतान के मुखिया बालजबुल की सहायता ते दुस्‍ट आतमाएं निकारतूं। 19अगर मैं बालजबुल की सहायता ते दुस्‍ट आतमांन कूं निकारतूं तौ फिर तुमारे चेलाऊ बालजबुल की सहायता ते दुस्‍ट आतमा निकारते होंगे। जा बात कै काजै बुई तुमें गलत साबित करिंगे। 20यदि में सच मैं परमेस्‍वर की सामर्थ ते दुस्‍ट आतमा निकारतूं तौ समझ लेओ कै परमेस्‍वर कौ राज तुमारे नजदीक आय गयौए।

21“जब कोई तागतबर आदमी हतियार बांधकै अपने घर की रखबारी करतुए तौ वाकी सम्पत्‍ती बची रैहबैगी। 22अगर बाऊते जादा तागतबर आदमी आयकै बापै चढ़ाई करके बाय जीत लैबे और जिन हतियारन पै बाय भरोसौए बिनें छीनके वाकी सम्पत्‍तीऐ बांट दैबे।

23 # मर 9:40 “जो मेरे संग नांय बू मेरौ बिरोधी है और जो मेरे संग इकठ्‌ठौ नांय करत, बू बाय बिखेरतै।

दुस्‍ट आतमा कौ लौटबौ

(मत्‍ती 12:43–45)

24“जब कोई दुस्‍ट आतमा काऊ आदमी में ते निकरतै तौ बू आराम करबे काजै बेहड़न में भटकती फिरतै, जब बाय कहूं जगह नांय मिलै तौ बू कैहबे कै, ‘मैं तौ बाई घर में जाऊगीं।’ 25जब बू बापस बा घर में आबतै और बा घर कूं साफ सुथरौ और सजौ सजायौ पाबतै। 26तौ फिर बू जायकै अपने तेऊ जादा सात बुरी दुस्‍ट आतमान कूं अपने संग लैके आबतै और बामें घुस जातै और बा आदमी की दसा पैहले तेऊ जादा बुरी है जाबतै।”

धन्य कौन है

27जब ईसू जि बात कैह रयौ तबई भीड़ मेंते एक औरत नें ऊंची अबाज में कही कै धन्य है बू माँ जानें तोय जनम दयौ और धन्य है बू माँ जानें तोकूं अपनों दूध पिलायौ।

28पर ईसू नें बिनते कही कै, “बाते जादा तौ तुम लोग धन्य हो जो परमेस्‍वर कौ वचन सुन्‍तें और बिनकूं मानतें।”

चिन्ह की मांग

(मत्‍ती 12:38–42)

29 # मत्‍ती 16:4; मर 8:12 जब ईसू के चारौं ओर भीड़ इकठ्‌ठी है गयी तब बिनैं देखकै ईसू नें कही कै, “जा युग के लोग बुरे हैं जो चिन्ह मागतएं पर इनकूं परमेस्‍वर की बात बतायबे बारे योना कूं छोड़ और कोई चिन्ह नांय दयौ जाबेगौ 30चौंकि जैसे योना नीनबे कै लोगन के काजै एक चिन्ह बन गयौ बैसेई मैं, ‘मनुस्‍य कौ बेटा’ जा युग के लोगन के काजै चिन्ह ठहरैगौ। 31परमेस्‍वर के न्याय के दिनान में दछिन की रानी सीबा खड़ी हैके जा युग के लोगन पै दोस लगाबैगी चौंकि बू सुलेमान की ग्‍यान की बात सुनबे के काजै धरती के जा छोर ते बा छोर तक गयी। पर देखौ मैं तुमते कैहतूं, याँपै एसौऊ कोई है जो सुलेमान तेऊ जादा महान है। 32न्याय के दिना में नीनबे के लोगऊ जा युग के बिरोध में जि उठिंगे और बिनपै दोस लगायेंगे,चौंकि बिन्‍नें योना की परमेस्‍वर के वचन की सिछा सुनिकै पापन ते मन फिरायौ हतौ। और में तुमते कैहतूं, याँपै एसौऊ कोई है जो योना तेऊ महान है।

संसार के उजीते बनों

(मत्‍ती 5:15; 6:22–23)

33 #मत्‍ती 5:15; मर 4:21; लूका 8:16“कोई आदमी दीये कूं जरायकै छुपाके नांय रखत और ना परात के नीचे रखे पर बाय दीबट के ऊपर रखतें, जाते भीतर आबे जाबे बारे उजीते में देख सकें। 34ऐसेई तुमारे सरीर कौ दीया तुमारी आँख है, जामारै तुमारी आँख साफ हैं तौ तुमारौ सरीर उजीते में भरौ रैहबेगौ,अगर तुमारी आँख साफ नांय तौ तेरौ सरीर अंधेरे ते भरौ रेहबैगौ। 35जामारै तुम सावधान रहीयौ कै जो तुमारे भीतर कौ उजीतौ है अंधेरे में नांय बदल जाबे। 36अगर तुमारौ सबरौ सरीर उजीते ते भरौए और सरीर में कोई अंग अंधेरे में नांय है तौ बू पूरी तरैह ते चमकेगौ,जैसे कोई दीया अपनी किरनन ते चमक रयौ होय।”

ईसू नें फरीसी और सास्त्रन कूं सिखाबे बारेन कूं फटकारौ

(मत्‍ती 23:1–36; मरकुस 12:38–40)

37ईसू जब इन बातन्‍ने कर चुकौ तब एक फरीसी नें ईसू कूं अपने घर खाने पै बुलायौ और बू भीतर जायकै खानों खायबे बैठ गयौ। 38पर फरीसियन्‍नें देखौ, कै ईसू नें खानों खायबे ते पैहले बिनकी रीति के अनुसार हात नांय धोए तौ बिनै बड़ौ अचम्भौ भयौ।

39जापे पिरभू नें बिनते कही कै, “तुम फरीसी थाली लौटा कटौरा केबल बाहर ते तौ मांज देतौ पर भीतर ते तुम लोग लालच दुस्‍टता ते भरे भये हैं। 40हे मूर्ख लोगो जानें बाहर कौ भाग बनांयौ है का बानें भीतर को भाग नांय बनांयौ? बेई भीतर केऊ भाग कूं बनाबतै। 41जामारै अपने मन कूं साफ करकै तुम अपनी चीजन कूं गरीबन में बांट देओ, फिर तुमारे काजै सब कछू पबित्र हे जाबैगौ।

42“हे फरीसियो, तुमारे काजै धिक्‍कारै, चौंकि तुम पुदीना साग पात और जड़ी बूटियों का दसमों हिस्सा तौ परमेस्‍वर कूं देतौ,पर तुम लोगन के संग पछपात करते हो और परमेस्‍वर के पिरेम कूं टाल दैतौ भलौ तौ जि होतौ कै तुम लोगन के संग पछपात ना करते और तुम परमेस्‍वर के पिरेम कूं दिखाते और दसमों हिस्साऊ देतै।

43“हे फरीसियो तुमें धिक्‍कारै, तुम पिराथना घरन में ऊंची ऊंची जगह पै बैठबे ते पिरेम करतौ और बजारन में नमस्‍कार करबाबौ तुमें अच्‍छौ लगतै।

44“तुम लोगन कूं धिक्‍कार चौंकि तुम बिन छिपी भयी कबरन के समान हो जिनपै अनजाने मेंईं लोग चलतै।”

45तब सास्त्रन कूं सिखाबे बारे नें ईसू ते कही हे, “गुरू ऐसी बात करके तू हमारौ अपमान करतए।”

46जापे ईसू नें कही, “अरे सास्त्रन कूं सिखाबे बारेऔ तुमकूं धिक्‍कारै चौंकि तुम लोगन पै इतनौ बोझ लाद दैतौ कै जिनें बू उठाय नांय सके और तुम बा बौझ कूं उठाबे में एक ऊंगलीऊ नांय लगाबो चाहत।”

47“तुमें धिक्‍कारै के तुमने परमेस्‍वर की ओर ते बात बतायबे बारेन कूं कब्र बनाबतौ जो तुमारे पुरखई हते जिन्‍ने बिनकी हत्‍या करी हती। 48जाते तुम जि दिखाबतौ कै तुम अपने पुरखन कोई समर्थन कर रयेऔ चौंकि बिन्‍नें तौ बिनकूं मारौ और तुम बिनकी कब्र बनांय रयेऔ। 49जामारै परमेस्‍वर के ग्‍यान नैऊ कही ‘मैं परमेस्‍वर की ओर ते बात बतायबे बारेन नें और भेजे भये चेलान नैऊ बिनके जौरें भेजुंगो फिर बिनमें ते कितने नें तौ मार दिंगे और कितने नैऊ सताबिंगे।’ 50जाई मारे में तुमते कैहतूं कै संसार के सुरू ते परमेस्‍वर की ओर ते बात बतायबे बारेन कौ खून बहाबे बारेन कौ हिसाब जा युग के लोगन ते लयो जाबेगौ, 51जाकौ मतलब जि है कै, हाबिल ते लैके जकरयाह की हत्‍या तक कौ हिसाब जो परमेस्‍वर के बड़े पिराथना घर और बेदी कै बीच में करी गई हती। हाँ, मैं तुम लोगन ते कैहतूं कै, जाकौ लेखा-जोखा जा युग के लोगन ते लयो जाबेगौ।

52“हे सास्त्रन कूं सिखाबे बारेऔ तुमें धिक्‍कार चौंकि तुम लोगन नें ग्‍यान के दरबाजे की तारी तौ लै लयी पर तुम खुद ही बामें नांय घुस पाये और जो घुसबौ चाँहते बिन्‍नेऊं तुम जाबे ते रोक देतौ।”

53और जब ईसू मांते चलौ गयौ तब सास्त्रन कूं सिखाबे बारे और फरीसी बाते भौत दुसमनी रखबे लगे। और बाते भौत ते सबाल जबाब पूछबे लगे। 54और बे बाय फसायबे के मौके की तलास में लगे रैहते बे वाके मौंह की कोई बात पकरकै फसा दैबे पर बिनें कोई मौकों नांय मिलौ बे वाके मौंह की कोई बात पकरकै फसा दैबे।

Currently Selected:

लूका 11: BRAJ

Highlight

Copy