Mak 8

Chisʋs ʋt pʋska lumbo untuklo, micha nʋni chipunta kanomosi aiena tuk a̱ hatak tahlepa sipokni ushta impʋchi, 1; 11 Falisi ʋhleha ha̱ nan isht ai atokowa ya̱ i̱ haiakʋchi ik bʋnno; 14 mihma nan im ai ithʋna ʋhleha hʋt Falisi ʋhleha, micha Helot aiena i̱ na‐pʋska ishit‐shatʋmmi a̱ ahah! okla im ahna chi̱ ka i̱ miha. 22 Betsaita ya̱ hatak lʋpa yʋt anta tuk o̱, Chisʋs ʋt hoponayochi. 27 Pita yʋt, Chishno ak osh Klaist chia mak oke, atokolit achi ma, Chisʋs ʋt im aiokpanchi; ilap ak o̱ il im antia hosh ile kaiyanchit nana palʋmmi puta ma e pihi̱sa chi̱ hokʋto ik pi nukwaiyo ka hi a̱, Chisʋs ʋt pim abahanchi.

1Nitak yʋmma foka ma okla hʋt laua fehna, micha ʋpa hi ʋt nanasi kia ik im iksho ma, Chisʋs ash osh nan im ai ithʋna ʋhleha hash hoyo mʋt,

2Okla laua ʋt si apehʋt ma̱ya na himak nitak tuchina ka nana ʋpa hi ʋt ik im iksho hatuk o̱, i̱ sa̱ nukha̱kloshke.

3Yohmi kʋt okla ik impo ho̱ in chuka ya̱ pit yuhli li hokma, kanimi kʋt mishema ho̱ minti hatuk okʋt, takla tikamba hinlʋshke, im achi tok.

4Mihma nan im ai ithʋna ʋhleha hash osh, Yakni haiaka ilʋppa katima yak o̱ hatak ʋt pʋska ya̱ ai ishi hosh okla ilʋppa fihobla hinla ho̱? im achi tok.

5Mihma i̱ ponaklot, Pʋska yʋt katohmi ho̱ hʋsh i̱shi ho̱? im achi ma, Untuklo, achi tok.

6Mihma okla hʋt binohla chi̱ ka apesa tok; micha pʋska untuklo kash ishi cha, ʋba pit aiokpʋchi cha boshullichi mʋt, okla ha̱ itikba in talohla chi̱ ho̱ nan im ai ithʋna ʋhleha hash ima ma, yʋmmak ash osh okla hash itikba in talohli tok.

7Micha nʋni chipunta kanomosi ka okla isht a̱ya tok; atuk o̱ yʋmmak ash o̱ ʋba pit isht aiokpʋchi mʋt, yʋmmakma itikba in talohla chi̱ ka apesa tok.

8Yohmi na okla impʋt kaiya tok: mihma ilhpak boshulli atampʋt a̱sha ka kishi untuklo ho̱ okla ishi tok.

9Mihma okla impa tuk ʋt tahlepa sipokni ushta foka tuk a tok; yohmi ma okla hash kanima pit yuhli tok

10Mihmʋt ashali̱ka nan im ai ithʋna ʋhleha hash it api̱hʋt peni pit fohkʋt ia mʋt, Talmanuhla yakni a kaniohmi ho̱ ona tok.

11Mihmi Falisi ʋhleha hʋt a̱yʋt ai ʋla cha, imomaka pisa hosh, nan isht ai atokowa ʋba minti ka okla ai im a hoyo hosh himona isht it im anumpulit aiasha tok.

12Mihmi chitolit chu̱kʋsh ai anu̱kaka hi̱ha mʋt, Na katihma ho̱ hatak himonasi aiasha ilʋppʋt nan isht atokowa ya̱ okla hoyo cho? A̱hli mak o̱ hʋchim achi lishke, Hatak himonasi aiasha ilʋppa nan‐isht atokowa nana hosh in takala he keyu mak oke, im achi tok.

13Mihmʋt issʋt iʋt, peni ash o̱ anonti chukowa mʋt, mish‐tʋnnʋp o̱ ia tok.

14Mihma nan im ai ithʋna ʋhleha hʋt pʋska okla i̱sha he tuk ʋt immihaksi, yohmi mʋt peni a fo̱ka kʋt pʋska achʋfa ka ont ia keyu ho̱ okla isht a̱ya tuk a tok.

15Mihma yʋmmak ash osh achukmalit nan i̱ mihʋt, Falisi ʋhleha i̱ pʋska isht‐shatʋmmi, micha Helot i̱ pʋska isht‐shatʋmmi aiena ka im il anukta̱hlʋt ahah! ahnit hʋsh pihi̱sashke, achi tok.

16Mihma ilap bi̱ka it im anumpulit, Pʋska ʋt ik pim iksho kak oka, achi tok.

17Mihma Chisʋs ʋt akostininchi mʋt, Na katihmi ho̱ pʋska ʋt ik hʋchim iksho kak atuk a̱ hʋsh miha cho? hʋch ik akostinincho, mikmʋt hʋch ik ithano aiena kʋt moma ho? hʋchi chu̱kʋsh ʋt kʋllo kʋt moma ho tuma!

18Hʋchi nishkin ʋt a̱sha kʋt hʋch ik peso cho? micha hʋchi haksobish ʋt hinli kʋt, hʋch ik haponaklo ho̱? mikmʋt hʋch ik ithano cho?

19Pʋska tahlapi ho̱ hatak tahlepa sipokni tahlapi ka in tushahlichi li ma, boshulli ʋt kishi alota katohmi ho̱ hʋsh ishi ha tok o̱? im achi ma, Auah‐tukló, okla achi tok.

20Anonti tahlepa sipokni ushta ma, untuklo tuk a̱ a boshulli ʋt kishi alota katohmi ho̱ hʋsh ishi ha toko? achi ma, Untuklo, im achi tok.

21Yohmi ma, Katiohmi ho̱ na hʋch ik akostinincho hoh cho? im achi tok.

22Atuk osh Betsaita ʋla; yohmi ma hatak lʋpa yo̱ okla isht im ona mʋt, yʋmmak ash potola chi̱ ka im asilhha tok.

23Mihma hatak lʋpa yash o̱ ibbak a̱ halʋlli cha, tʋmaha ha̱ ishit kohcha; yohmi mʋt nishkin a̱ im on tofa cha, ibbak a̱ isht umbitepa mʋt, Nanasi kia ish pisa cho? achit i̱ ponaklo tok.

24Mihma ʋba chakali mʋt, Hatak ʋt iti yak o̱ chohmi hokak osh itʋnowa ho̱ pisa lishke, achi tok.

25Yohmi ma anonti nishkin ash o̱ ibbak isht umbitepa mʋt, ʋba chakalichi tok: mihma hlakofi cha, hatak moma ka pi̱sa achukma tok.

26Mihma in chuka pit chʋffichi mʋt, Tʋmaha ha̱ ont chik chukowokmʋt, anonti tʋmaha a̱sha ka achʋfona kia chik im anolo kashke, achi tok.

27Mihmʋt Chisʋs ʋt nan im ai ithʋna ʋhleha ha̱ ai itapehʋt kohchʋt iʋt, tʋmaha Sesalea Filippi ya̱ ona tok: mihmʋt takla ya̱ nan im ai ithʋna ʋhleha hash i̱ ponaklot, Okla hʋto kʋta sia ho̱ miha cho? im achi tok.

28Mihma afalaminchi mʋt, Chan Baptist; yohmi kia kanimi mʋt, Elias ak o̱ achi; kanimi kʋto Hopaii ʋhleha ha tok achʋfona mak oka, achi hoke, achi tok.

29Mihma, Amba hʋchishno ʋto kʋta ho̱ hʋs si achi ho̱? im achi ma, Pita yʋt afalaminchi mʋt, Chishno ak osh Klaist chia mak oke, im achi tok.

30Mihma yʋmma hatak nana kia ik im anolo ka chi̱ ka kʋllochit i̱ miha tok.

31Mihmʋt Hatak Ushi ʋt nan‐isht ai ilbʋsha in laua chi̱, micha hochitoka ʋhleha, mikmʋt na‐holitompa isht a̱sha pehlichi ʋhleha, anonti na‐holissochi ʋhleha aiena ka ai im a kʋllakshit illa he; atuk mʋt nitak atuchinakma anonti tana hi a̱ isht im abʋchit isht ia tok.

32Mihmʋt anumpa yʋmmak ash o̱ haiakʋchit anumpo honli tok. Mihma Pita yʋt halʋlli cha, im alʋmmit isht ia tok.

33Yohmi ma yʋmmak ash osh filemʋt nan im ai ithʋna ʋhleha hash pisa mʋt, Pita yash im alʋmmit, Setan chia hʋt ʋm ashaka yo̱ ish hikiashke: chishno ʋto Chihowa ai im anukfila hano ish ahninchi keyu, amba hatak ai im anukfila yok mak oka, achi tok.

34Mihmʋt okla ha̱, micha ilap nan im ai ithʋna ʋhleha aiena kash hoyot itʋnahli mʋt, Kʋna hosh siakaiyʋt a̱ya chi̱kmʋt, ik ile holitoblot im ititaiyukhʋna ma sholi cha, siakaiyashke.

35Kʋna hosh ilap im ilhfiopak a̱ okchalinchi ka ahni hokʋt i̱ kʋnia he; amba ʋno pulla, micha ʋbanumpa aiena pulla ho̱ kʋna hosh im ilhfiopak a̱ kanchi hokʋto, mihi yosh okchalincha hi oke.

36Hatak ʋt yakni a̱ mominchit immi ikbi hoh kia, anonti ilap im ishilombish ash osh i̱ kʋnia kʋt, nanta ho̱ isht im ai achukma hinla cho?

37Keyukmʋt, hatak ʋt nanta hak o̱ ilap shilombish a̱ isht atobba hinla cho?

38Yohmi hoka haui shahli, mikmʋt nan‐ashʋchi fehna aiena aiasha ilʋppa kʋna kia ʋno, micha ʋm anumpa aiena ka ai i̱ hofahya atukma, mihi yo̱ Hatak Ushi ʋt I̱ki im aholitopa il ai i̱shit, enchil holitopa ʋhleha aiena pehlichit a̱yʋt ʋlakmʋt, i̱ hofahya ak inla hi oke, im achi tok.

Currently Selected:

Mak 8: CHH

Highlight

Copy