Mak 16
16
Enchil osh Chisʋs ʋt falamʋt tani tuk a̱ ohoyo im anoli, 1, 9 Chisʋs ʋt falamʋt tani ha yʋt Meli Maktalene a̱ im otʋni tuk osh, 12 nan im ai ithʋna ʋhleha ha̱ tuklot i̱ haiaka: 14 atuk o̱sh i̱ himmakma auah‐chʋfa kash ont im otʋni: yohmi mʋt na yimma he keyu tuk a̱ nan isht i̱ miha; 15 micha ʋbanumpa ya̱ kanima moyuma isht ai anumpohonla chi̱ ka im apesa; 19 mihmʋt ʋba ya̱ ia ma, ʋba isht anumpa hʋt anuhumpa.
1Atuk osh nitak hullot issa ma, Meli Maktalene, micha Chemis ishki, mikmʋt Salome aiena kʋt iʋt yʋmmak ash o̱ ont ahʋmma chi̱ kʋt, na‐balama okla chumpa tok.
2Atuk osh wek chukowʋt ia nitak ʋmmona onnahinli fehna hʋshi kohcha ho̱ sepʋlka yash okla ona tok.
3-4Mihmʋt, Kʋta hosh tʋli ʋt chito fehna kash o̱ sepʋlka okhissa a̱ pim a kanʋllicha chi̱ ho̱? ilap bi̱ka it im achi tok: mihmʋt okla pit hopo̱koyo kash osh, a kanʋlli tuk a̱, okla pit pisa tok.
5Micha sepʋlka ya̱ okla pit chukowa mʋt, hatak himita yʋt na‐fohka tohbi falaia fohka hosh, ishtimpak imma tʋnnʋp a̱ binili ho̱, okla pisa cha, nukhlakancha tok.
6Mihma yʋmmak ash ot, Ik hʋchi nukshopo kashke, Chisʋs Nasalet ʋtta yʋt ititaiyukhʋna ahonʋhla tuk ash o̱ hʋsh hoyoshke: tani tuk oke: ilʋppa ikshoshke: okla a bohli tuk a̱, pit ho pesá.
7Yohmi kia hʋsh ia cha, nan im ai ithʋna ʋhleha, Pita aiena ka, yʋmmak okʋt hʋchi ti̱kba Kalili a̱ ia he tuk a̱, ont hʋsh im anolashke: yʋmmak o̱ hʋchi̱ miha tuk mak oka, yʋmmak o̱ hʋsh a pisa chi̱ hoke, im achi tok.
8Mihma tu̱shpʋt pit okla kohcha mʋt, sepʋlka yash a̱shwʋt pit yihlepa tok: nukhlakancha, wʋnihinchi, micha nukshopa aiena hatuk osh, kʋna kia nanasi kia okla pit ik im acho ki tok.
9Micha Chisʋs ʋt wek chukowʋt ia nitak ʋmmona onnahinli fehna ho̱ tani tuk ʋt, Meli Maktalene, yʋmmak o̱ nan‐isht‐ahullo okpulo untuklo ka a kohchi tuk ash nan ti̱kba i̱ haiaka tok.
10Mihma yʋmmak ash osh iʋt apehʋt itʋnowa yatuk ʋt nukha̱klot yaiya hosh ma̱ya ma, ont im anoli tok.
11Mihma yʋmmak ash osh okcha̱ya na yʋmmʋt pisa tuk a̱ okla haklo mʋt, ik yimmo ki tok.
12I̱ himmakma yʋmmak ash osh, tuklo hosh itʋnowʋt a̱yʋt, yakni kocha itonachi ma, anonti ai inlʋt i̱ haiaka tok.
13Mihma itiachi cha, kashapa kash o̱ ont im anoli tok: mihma yʋmmak ash kia okla ik i̱ yimmo ki tok.
14Atuk o̱ i̱ himmakma auah‐chʋfa hash osh impa hosh ma̱ya ho̱ ont i̱ haiaka cha, tani ha ya inla yʋt pisa tuk a̱ okla ik i̱ yimmo hatuk oka, na yimma he keyu, micha chu̱kʋsh kʋllo aiena ka nan isht ai i̱ miha tok.
15Mihmʋt, Yakni moma ka iʋt, ʋbanumpa ha̱ hatak hikia puta isht hʋsh im anumpohonlashke.
16Kʋna hosh yimmi cha baptismokmʋt, okcha̱ya hi oke; amba kʋna hosh ik yimmo hokʋto, issikkopʋt bilia im ʋlhpisa hi oke, im achi tok.
17Micha na‐yimmi ʋhleha hokʋno nan‐isht atokowa yakohmi kak osh a takanlit a̱ya hi oke. Ʋno sa hohchifo ha̱ nan‐isht ahullo okpulo puta isht kocha welikmʋt, anumpa ilaiyuka anumpula hi oke.
18Micha sinti chilita puta ka peh okla aiowa he, mikmʋt ishkot illi nana kia ishko hoh kia, nan ik kanihcho ka he: abeka ya̱ ibbak isht umbitepakma, hlakofa he bano hoke, im achi tok.
19Yohmi mʋt Chitokaka yʋt ant im anumpuli mʋt, ʋba iʋt ʋba yakni a̱ ont chukowa cha, Chihowa im ibbak ishtimpakimma ya̱ a binili tok oke.
20Mihma Chitokaka yʋt apelahanchit anumpa ha̱ nan isht atokowa kʋt a takanlit a̱ya hatuk ash isht aia̱hlichi ma, kanima moma ka ʋba isht ai anumpohonlit itʋnowa tok oke. Amen.
Currently Selected:
Mak 16: CHH
Highlight
Share
Copy
Want to have your highlights saved across all your devices? Sign up or sign in
Published by the American Bible Society 1848-1886, reprinted 1913
