Luk 1

Luk ʋt Hliopilʋs a̱ pit im anumpuli, 1, 5 Enchil ʋt Sakalias a̱ ont im otʋni: 13 mihmʋt ushi a̱sha hi a̱ i̱ miha; 24 Elisabet ʋt ʋlla shali cha, ile luhmi. 26. Enchil ʋt ohoyo himita Meli a̱ ont i̱ haiaka; yohmi mʋt Shilombish Holitopa yosh nan anukfilli ho̱, Klaist ishki a̱ toba pulla hi a̱ i̱ miha. 39 Meli ʋt Elisabet a̱ ont i̱ nowa mikmʋt ita tuklo kʋt Chihowa ya̱ aiokpahanchi. 57 Chan ʋt ʋtta cha, hakshup tʋpa mʋt hohchifo: 64 mihma Sakalias ʋt falamʋt anumpuli mʋt, 67 na tikbanli anolit Chihowa ha̱ aiokpahanchi.

1-2Nana ka isht a pi yimmi a̱hli fehna ʋmmonʋt isht auehinchi ka nishkin isht pi̱sʋt, nana ka isht aha̱shwa tuk ʋt yʋmma pim anohonli tok mak osh la̱wa kʋt yʋmmak atuk a̱ isht anumpa holisso ha̱ ikbi tuk o̱,

3-4Ʋno ak kia nan ʋmmona isht‐auehinchi ka nana kʋt akaniohmi tok puta ka mominchit asilhhit achukmalit akostininchi li tuk ʋt, chishno ʋt nana ka isht chim annoa tuk a̱ aia̱hli ka ish ithaiyana chi̱ ka, nan‐annoa ma it iakaiyachi hosh pit chi̱ holissochi la hi ʋt ʋm anukfila tuk oke; Hliopilʋs holitopa fehna ma!

5Chutea i̱ mi̱ko Helot ʋt ahanta nitak a̱, na‐holitompa isht ʋtta achʋfa Sakalias hohchifo kʋt, Abia apehlichika ai ibafohka yosh anta tok: mihma tekchi ʋt Aalon ushetik ʋhleha isht‐atiaka yosh, hohchifo kʋt Elisabet a tok.

6Mihi yosh yʋmmʋt tu̱klot Chihowa yʋt pi̱sa ho̱ aia̱hli biekʋt, anumpa ʋlhpisa puta, mikmʋt nan‐ʋlhpisa ilaiyuka Chihowa yʋt apihi̱sa tok a̱ moma ka i̱ shanaiya iksho hosh aha̱shwa tok.

7Yʋmohmi hosh Elisabet ak osh ushiksho yatuk o̱, ʋlla yʋt ik im iksho ket okla hosh, tu̱klot sipoknit taiyaha tok.

8-9Atuk o̱ yakohmi tok: ilap ai itʋpeha yʋt ont im ai ʋlhpiesa ma, yʋmmʋt na holitompa isht a̱sha Chihowa itikba ya̱ isht ai ahanta chi̱ ka, na holitompa isht a̱sha nan im ʋlhpisa chatuk mak o̱, Chihowa in tempel a̱ ont chukowa cha, na‐balama luacha hi ʋt nashoeli ho̱ isht im ʋlhpisa tok.

10Yʋmohmi ma okla laua yʋt na balama lua ta̱kla ka ʋba pit anumpuli hosh kocha ya̱ aiasha tok.

11Yʋmohmi ma Chihowa im enchil ʋt na‐balama a lua alta ishtimpak imma tʋnnʋp o̱ hikiʋt i̱ haiaka tok.

12Mihma Sakalias ʋt pisa mʋt, nukhlakanchʋt nan‐nukshopa mʋt anukfoyuka tok.

13Mihma enchil ash ot, Sakalias ʋt chi nukshopa ná; ʋba pit ish asilhha tok ʋt chim ʋlhpesa mak oke: yohmi ka chi tekchi Elisabet ʋt ʋlla nakni o̱ chi̱ shala he; mikma yʋmma Chan ish hochifa he;

14Yohmikmʋt na chi yukpʋt chim achukma fehna he; yohmikma yʋmmʋt ʋtta ka na yukpa kʋt laua hi oke.

15Yʋmmak okʋt Chihowa ya̱ i̱ holitopa fehna he: mikmʋt oka‐pa̱ki, micha oka homi nana kia ik ishko ka hi oke: micha ishki ikfoka a kohcha mak inli hosh Shilombish Holitopa isht anukfohkʋt alotowa hi oke.

16Yʋmohmikmʋt yʋmmak okʋt Islael isht‐aiunchululi ʋhleha ha̱ lauachit in Chitokaka Chihowa ya̱ im antia hi a̱ anukfohkicha he mak oke.

17Mikmʋt i̱ki ʋhleha chu̱kʋsh a̱ falaminchit ʋlla puta ka ai it ibafohkit it in nanaiyachikmʋt, anonti nan ik yimmo puta ma hopoyuksa ʋhleha ha̱ im anukfila ha̱ pit ai ibafohkit, okla ha̱ anukfohki na Chihowa hoka im ʋlhtaha chi̱ ka, Elias im anukfila chinto il ai eshi hosh Chitokaka itikba ya̱ ia hi oke, im achi tok.

18Mihma Sakalias ʋt, Nanta hosh katiohmi na ilʋppa isht akostininchi la chi̱ cho? ʋno ʋt hatak sa sipokni, yohmikma sa tekchi mʋt sipoknit taiyaha kʋno, enchil a̱ im achi tok.

19Mihma enchil ash ot afalaminchi kʋt, Ʋno ʋt Chihowa itikba hikia Kebliel sia mak oke: mih hosh ant chit im anumpulit, nan annoa achukma ilʋppa chim anoli la hi ʋt si ʋlhtoka tuk oke.

20Yʋmohmi tuk o̱ ʋm anumpa ha̱ ont im ai ʋlhpiesakmʋt aia̱hla hi oka ik chi yimmo; yohmi hokʋt ik anumpulo ish toba cha, ish anumpula he ik chim ʋlhpeso mak o, nana kash ot ont aia̱hli nitak a̱ onak mak a hi oke, im achi tok.

21Mihma okla hash ot Sakalias a̱ pit hoyot aiasha mʋt, tempel anu̱kaka ya̱ anta na hopaki hatuk o̱, katiohmi cho? okla ahni tok.

22Atuk o̱ yʋmmak ash ot kohcha mʋt, okla hash im anumpula he keyu ki tok: peh abahanchi mʋt, anumpula he keyu hosh hikia hatuk o̱, tempel anu̱kaka ya̱ nana ho̱ a pisa tuk a̱, okla akostininchi tok.

23Atuk o̱ yakohmi tok; ilap na‐holitompa isht ai ahanta he nitak atuk ʋt ont taha makinli ma, in chuka ia tok.

24-25Atuk o̱ nitak yʋmmak atuk a̱ i̱ himmak ha yo̱, tekchi Elisabet ʋt ʋlla i̱ fohka cha, Hatak puta itintakla sa hofahya kʋt a takali tuk a̱ isht kancha chi̱ hosh, auet sa pihi̱sa nitak ʋt Chitokaka yʋt ilʋppak o̱ a̱ yakohmichi tuk oke; achi mʋt ile luyuhmi na hʋshi tahlapi tok.

26-27Atuk o̱ hʋshi ont isht hannalik fehna ohoyo himita yʋt hatak Chosef hohchifo hosh, Lewi in chuka‐chʋfa isht atiaka yo̱, im ʋlhpoa hosh ohoyo himita hohchifo mʋt Meli osh, Kalili yakni tʋmaha Nasalet hohchifo ho̱ anta ho̱, Chihowa yʋt Kebliel a̱ pit i̱ chʋffichi tok.

28Yʋmohmi na enchil ash ot im aboha ha̱ ant chukowa mʋt, Holitopa fehna chia hʋt na chi yʋkpashke; Chihowa hʋt chi halʋlli hoke, holitopa kʋt ohoyo puta moma ka ish imaiyʋshke, achi tok.

29Mihma yʋmmak ash ot pisa mʋt, yʋmmʋt nana ahanchi ka nukhlakancha mʋt, nan isht aiokpʋchi katiohmi hosh yakohma hinla cho? ahnit im anukfila tok.

30Mihma enchil ash ot, Meli ʋt ik chi nukshopo kashke; Chihowa ish i̱ holitopa hi ʋt chim ʋlhpesa tuk oke.

31Yohmi kʋt yakeh! ʋlla yʋt chi̱ fohka cha, ʋlla nakni o̱ ish ishikmʋt, hohchifo ha̱ Chisʋs ish hochifa he mak oke.

32Yʋmmak osh Chitokaka tobʋt ahantʋt, Nana moma i̱ shahli Ushi hohchifa he; yohmikma Chitokaka Chihowa yʋt i̱ki Lewi im ai om binili holitopa ya̱ ima hi oke.

33Yohmikma yʋmmak osh Chekob in chuka chʋfa isht atiaka pehlichi na bilia he: yohmikma yʋmma apehlichika ya̱ ont ataha he mʋt iiksho ka he mak oke, im achi tok.

34Mihma Meli ash ot, Hatak kia ithana li keyu hatuk ano, katiohmit ilʋppʋt yakohma chi̱ cho? enchil ash o̱ im achi tok.

35Mihma enchil ash osh anonti afalaminchit, Shilombish Holitopa yak osh chim a̱ya he; yohmikma Nana moma i̱ shahli nan isht im aia̱hlika yʋt chi o̱ hoshontikacha hi oke; yohmi hoka na‐holitopa kʋt chim ʋtta hi ʋt yʋmmak kia Chihowa Ushi hohchifa hi oke.

36Micha yakeh! chi̱ kanomi Elisabet ʋt ushiksho hohchifo chatuk kia, sipoknit taiyaha hosh ʋlla nakni i̱ fohka tuk a̱ himak ʋt hʋshi ont isht i̱ hannali hoke.

37Chihowa ak okʋto nana kʋt ik im aia̱hlo ka hi ʋt iksho hoka, im achi tok.

38Mihma Meli ash osh, Chitokaka immi ohoyo sia ka is sa pesashke: chim anuhumpa tuk mak o̱ nana kʋt ʋm ai ʋlhpiesashke, im achi tok. Mihma enchil ash ot issʋt ia tok.

39Mihma nitak yʋmma foka ma Meli ash ot wakaya cha, tu̱shpʋt iʋt, Chuta yakni nʋnih foka tʋmaha chito mʋt talaia ho̱ ona tok.

40Yohmi mʋt Sakalias in chuka ya̱ ont chukowa cha, Elisabet a̱ aiokpʋchi tok.

41Mihma yakohmi tok; Meli ʋt aiokpʋchi na Elisabet ʋt haklo ma, ʋlla yʋt ikfoka anu̱ka ilhkoli tok; yohmi ma Elisabet ʋt Shilombish Holitopa isht anukfohkʋt alotowa tok.

42Mihmʋt chitoli hosh anumpulit, Holitopa kʋt ohoyo puta moma ka ish imayʋshke: mihma chikfoka anu̱ka a toba mʋt holitopʋshke.

43An Chitokaka ishki ʋt a̱yʋt ʋm ʋla ilʋppʋt katiohmi ho̱ a̱ yakohmi cho?

44Yakeh! is si aiokpʋchi ka anumpa hʋt olʋt sa haksobish a̱ ant fohka mak inli ho̱, ʋlla yʋt na yukpa kʋt sakfoka anu̱ka ya̱ ilhkoli kano.

45Chitokaka yʋt yʋmma nana ho̱ im anoli tuk a̱ ont aia̱hlit taiyaha hi oka, na yimmi tuk yʋmmʋto na yukpʋshke achi tok.

46Mihma Meli ash ot, Sa shilombish ʋt Chitokaka ya̱ holitobli,

47Yohmi ma sa chu̱kʋsh ʋt Chihowa si okchalinchi a̱ ai isht ilaiyukpʋshke.

48Yʋmmak okʋt in tishu ohoyo ilbʋsha ya̱ i̱ nukha̱klot pisa tuk oke: yohmi hoka himak píllʋt ia ka hatak isht ai unchululi puta kʋt na‐yukpa sia hochifa hi oke.

49Yʋmmak osh nana moma imaiya mak osh nafehna chinto ka a̱ yʋmihchi tuk oke: yohmi kʋt hohchifo hʋt holitopa yoke.

50Micha hatak it ai unchululi ia puta ka ilapa im antia ʋhleha ha̱ yʋmmʋt i̱ nukha̱klo kʋt ai in takali mak oke.

51Yʋmmak okʋt ilapo shakba isht imaiyachi chatuk: ilapunla ʋhleha hʋt ilap chu̱kʋsh nan isht im anukfilʋt ma̱yakma, yʋmmak okʋt it a fimibli chatuk oke.

52Yʋmmak okʋt hochitoka ʋhleha im aiasha puta tuk a̱ ai isht akakohlikmʋt, anonti ilbʋsha ʋhleha ak o̱ holitoblichi chatuk oke.

53Hohchʋfo ya̱ yʋmmak okʋt na hochukma puta ka isht fihoblikmʋt, anonti nan in laua yano nana kia ik im ikshochit kanom pit tihleli chatuk oke.

54-55Eblaham, mikmʋt yʋmma isht ai unchululi ka i̱ nukha̱klot a bilia hi ʋt pin tikba ʋhleha ha̱ pim anumpohonli tok ʋt ithaiyana mʋt, in tishu Islael a̱ apelahanchi chatuk oke, achi tok.

56Mihmʋt Meli ʋt yʋmma awant anta na hʋshi tuchi na foka mʋt, falamʋt in chuka ona tok.

57Yohmi ma Elisabet ʋt ʋlla in tonla hi ʋt ont ai im ʋlhpiesa mʋt, ʋlla nakni o̱ sholi tok.

58Mihma in chuka panta a̱sha, micha i̱ kanomi ʋhleha aiena kʋt, Chitokaka yʋt yʋmma i̱ nukha̱klo fehna tuk a̱ okla haklo mʋt, ibai yukpa tok.

59Atuk o̱ yakohmi tok: nitak ont isht untuchina ma ʋlla ya̱ hakshup tʋblit itʋnowa tok; atuk osh i̱ki a hochifochit yʋmmak ash Sakalias hochifo tok.

60Mihma ishki ash osh anumpuli mʋt, Yohma he keyu; amba Chan ak o̱ hohchifa chi̱ hoke, achi tok.

61Mihma Chi̱ kanomi hʋt kanima mʋt hohchifo ilʋppa isht a hohchifo kʋt iikshoshke, okla im achi tok.

62Mihmʋt i̱ki ak osh nana ho̱ hohchifa hi a̱ ahnik mak a chi̱ ka, okla pit abʋchi tok.

63Mihma yʋmmak ash ot aholissochi a̱ hoyo cha, Hohchifo hʋt Chan oke, achit holissochi tok. Mihma, Na katihmi ho̱? momʋt okla ahni tok.

64Mihma yʋmmak ash ot itih hʋt ashali̱ka wakama ma, isunlush ʋt yuhapa na anumpuli mʋt, Chihowa ya̱ aiokpahanchi tok.

65Yʋmohmi ma yʋmma ai i̱ bili̱ka fullota aiasha tuk ash ot momʋt nukshumpa tok: yohmi ma ilʋppa yakohmi tuk ʋt momʋt annoʋt Chutea yakni nʋnih foka yash mominchit a hlopulli tok.

66Mihma okla yʋmma haklo tuk ʋt moyumʋt, Ʋlla katiohma chi̱ hosh ilʋppʋt yakohmi cho? ahanchit chu̱kʋsh anu̱kaka okla isht anukfihinli tok. Mihma Chitokaka ibbak ʋt yʋmmak ash o̱ apelahanchi tok.

67Mihma i̱ki Sakalias ash ot Shilombish Holitopa isht anukfohkʋt alotowʋt, tikbanli nana anolit pit aiokpahanchit,

68-71Islael in Chitokaka Chihowa hʋt holitopashke: yʋmmak okʋt yakni toba tok taiyakla ka i̱ hopaii hochukma aiashʋt isht‐auehinchi ka itih isht ai anumpohonli tok mak osh, pishno ʋt pin tʋnʋp ʋhleha, mikmʋt pi̱ nukkilli ʋhleha ibbak ma mominchit il ai o̱ hlakofa hi o̱, im okla talaia ka i̱ nukha̱klot pihi̱sa cha, nan isht ʋlhtoba he im atahlit, isht ai‐okcha̱ya chinto fehna ka ilap in tishu Lewi in chuka‐chʋfa a pi̱ hilechi tok.

72-75Yohmi kʋt pishno ʋt pin tʋnʋp ʋhleha ibbak ma il ai in hlakofikmʋt, pi okcha̱yʋt nitak il ai ahanta kʋt, nukshumpa iksho hosh nan‐ashʋchi ikshot ai ʋlhpiesa hosh im antiʋt, itikba ma il aha̱shwa he mak o̱, auet pim aiahna hi ʋt ilap i̱ nan‐ʋlhpisa holitopa anumpa kʋllo aiena ka pin tikba Eblaham a̱ isht ai im il onochi tok ʋt ithaiyana cha, anonti nan i̱ nukha̱kla he anumpa ha̱ pin tikba ʋhleha ha̱ ihi̱ma tok ʋt aia̱hlichi mak oke.

76-79Yohmikma, Ʋlla chishno ʋt Chitokaka yʋt ata̱ya chi̱ puta ma apoksiachit, anonti hʋpin Chihowa nan‐isht i̱ nukha̱klo chinto pulla hatuk mak o̱, ilap nan im ai ashʋchika yʋt i̱ kashofa hosh isht‐ai okcha̱ya ma im okla ha̱ ish ithʋnahancha chi̱ hosh Chitokaka itikba ish ia chi̱ hokʋt, Moma imaiya i̱ hopaii chi hohchifa hi oke. Yʋmmak atuk pulla mak o̱ ai okhlilika, mikmʋt ai‐illi ai o̱ hoshonti aiena anu̱kaka aiasha tuk a̱ in tohwekelicha chi̱, mikmʋt hʋp iyi yʋt ai itin‐nanaiya hina foyuka chi̱ ka apelʋcha chi̱ mak o̱ onna tohwikeli ʋba minti kʋt auet pi on tommishke.

80Yʋmohmi tuk o̱ ʋlla yash ot asʋnot iʋt, im anukfila mʋt kʋllot i̱ shahlit ia; yohmi hosh yakni haiaka ya̱ ahanta na Islael a̱ i̱ haiaka he nitak ʋt ai ona tok.

Currently Selected:

Luk 1: CHH

Highlight

Copy