Mak 10

Chisʋs ʋt Chutea yak o̱ nan im ai abʋchit anta, mihmʋt it i̱ kʋnia holisso hak o̱ Falisi ʋhleha ha̱ isht it im anumpuli, 1; 13 ʋlla chipunta ya halʋllit sholi. 17 Chisʋs ʋt hatak himita nan in laua yo̱ aiokpʋchit imomaka pisa: 28 mikmʋt kʋna hosh ilap ak o̱ holitobli pulla hosh nan oklu̱ha ka issʋt a̱ya tuk okʋno im atobba hi ʋt mi ha: 32 ilap ʋt ititaiyukhʋna a takalit illi tuk mʋt anonti, falamʋt tana hi ʋt himmakma Chisʋs ʋt anoli: 35 Chemis Chan ita tuklo kʋt Chisʋs a̱ nana im asilhha; mihma Chisʋs ʋt ilap ma nana ho̱ im achi mʋt; 46 ik hoponayo Batimeʋs a̱ hoponayochi.

1Mihma yʋmmak ash o̱ a̱sht wakayʋt minti mʋt, Chatan hlopullit mish‐tʋnnʋp a̱ a̱yʋt Chutea yakni a̱ ʋla tok: mihma okla hʋt im ai itahoba na ai yakohmi yatuk okʋt, anonti nan im abʋchit ahanta tok

2Mihma Falisi ʋhleha hʋt im ai ʋla mʋt, imomaka pisa hosh, Hatak ʋt tekchi a̱ kancha he ʋlhpesa hoh cho? achit i̱ ponaklo tok.

3Mihma yʋmmak ash osh afalaminchi mʋt, Moses ʋt nanta hak o̱ hʋchim apesa tok o̱? im achi tok.

4Mihma, It i̱ kʋnia holisso hak o̱ ikbi cha, kancha hi o̱ Moses ʋt ahni tok, achi tok.

5Mihmʋt Chisʋs ʋt afalaminchi mʋt, Hʋchishno hʋchi chu̱kʋsh kʋllo pulla kak o̱ nan ʋlhpisa ilʋppa hʋchim ikbi tok.

6Amba nan oklu̱ha toba ʋmmona ka Chihowa hʋt nakni, tek ita tuklo ho̱ ikbi tok.

7Ilʋppa pulla hatuk mak o̱ hatak ʋt i̱ki, micha ishki aiena ka issa cha, tekchi ak o̱ asitia hi oke.

8Yohmikmʋt tuklo yʋmmak atuk ʋt haknip achʋfa hi oke. Yohmi ha mʋt i̱ himmakma tuklo mak a hi o̱ keyu, amba haknip achʋfa hoke.

9Yohmi hoka, Chihowa hʋt nana ka it a halʋllichi ha ya, hatak nana kia ik it i̱ filʋmmicho kashke, im achi tok.

10Atuk o̱ aboha anu̱kaka ma̱ya ho̱ nan im ai ithʋna ʋhleha hash osh anonti na mihi yash inli ho̱ i̱ ponaklo tok.

11Mihma kʋna hosh tekchi a̱ kanchi cha, inla yo̱ it auawaya hokmʋt, haui tobʋt yʋmmak ash o̱ isht ik ʋlhpisalo hoke.

12Mikma ohoyo hʋt i̱ hatak a̱ kanchi cha, inla yo̱ auwaya hokmʋt, haui toba hoke, im achi tok.

13Mihma yʋmmak ash ot potola chi̱ ho̱ ʋlla chipunta ya̱ okla isht im ai ʋla tok: atuk ak o̱ nan im ai ithʋna ʋhleha hʋt nan isht ai ʋla yʋmmak ash o̱ im alʋmmi tok.

14Yohmi kia Chisʋs ʋt yʋmma pisa mʋt, ik im ʋlhpieso fehna cha, Ʋlla chipunta yʋt ʋm ai ʋla hi a̱ hʋsh ahni cha, hʋch ik im alammo kashke: ilʋppa chohmi kak osh Chiho wa apehlichika mak oka.

15A̱hli mak o̱ hʋchim achi lishke, Kʋna hosh ʋlla iskitini ak o̱ chiyuhmit Chihowa apehlichika ya̱ aiokpʋchi ho̱ keyukmʋt, yʋmmak oka chukowa he keyu hoke, im achi tok.

16Mihmʋt yʋmmak ash o̱ ishit sholi cha, ibbak a isht umbitepa mʋt, yukpali tok.

17Mihmʋt kohchʋt iʋt hina ont fohka ma, achʋfʋt malelit mintit ant i̱ hʋchukbihlepa mʋt, Nan‐ithʋnanchi achukma ma! ai okcha̱yʋt bilia ya̱ pisa la he ʋlhpesa kʋto nanta hak o̱ yʋmohmi la chi̱ cho? achit i̱ ponaklo tok.

18Mihma Chisʋs ash osh, Na katihmi ho̱ achukma is si achi cho? achukma ʋt iksho; amba achʋfa kak illa: yʋm mʋt Chihowa ak oke.

19Anumpa ʋlhpisa, Haui chik tobo kashke: Kʋna kia chik bo kashke: Nana kia chik hu̱kopo kashke: Anumpa ik a̱hlo isht atokolit chik ahanto kashke: Kʋna kia chik haksicho kashke: Chi̱ki, chishki aiena ka ish holitoblashke, achi puta ka ish ithanʋshke, im achi tok.

20Mihma afalaminchi mʋt, Nan ithʋnanchi ma! ʋlla sa tomba kash inli hosh ilʋppa puta ka holitoblit isht mihinti li tuk oke, im achi tok.

21Yohmi ma Chisʋs ʋt pisa kʋt i̱ hullo: mihmʋt, Nana achʋfa hosh ik chim onoshke; ish ia cha, nana hosh chim a̱shakmʋt, ish kampila cha, ilbʋsha puta ka ish imashke: yohmik mak osh na holitompa kʋt ʋba yakni ya̱ chin tonla he mak oke: mikmʋt mintit ititaiyukhʋna ant ish eshi cha, is siakaiyashke, im achi tok.

22Mihma yʋmmʋt nan in laua fehna hatuk osh anumpa yʋmma haklo mʋt, nukha̱klot, kanima ia tok.

23Mihma Chisʋs ʋt filemʋt hopo̱koyo mʋt, nan im ai ithʋna ʋhleha hash o̱, Na palʋmmi nana kʋt a fehna ho̱ nan in laua ʋhleha hʋt Chihowa apehlichika ya̱ chukowa hi oke, im achi tok.

24Mihma nan ithʋna ʋhleha hash osh anumpa yʋmma achi ka okla nukhlakancha tok. Yohmi kia Chisʋs ash ot anonti anumpuli mʋt, Ʋlla ʋhleha ma! im ilayak ai anukchieto hosh ahanta kʋto Chihowa apehlichika ya̱ chukowa kʋno palʋmmi kʋt katiohmi fehna hoh chishba!

25Kamel ʋt chofak ushi nishkin a̱ hlopulli ka palʋmmi kʋt, hatak nan in laua yosh Chihowa apehlichika chukowa ka ik lauwoshke, im achi tok.

26Mihma okla nukhlakancha atampa fehna mʋt, Yohmikma kʋta hosh okcha̱ya hinla cho? ilap bi̱ka it im achit ma̱ya tok

27Mihma Chisʋs ʋt atokolit pisa mʋt, Hatak okmʋno yohma he keyu kia, amba Chihowa hokʋno ai yohmi hoke. Chihowa yak okmʋno nan oklu̱ha kʋt aia̱hli chatuk oka, achi tok.

28Yohmi ma Pita ʋt, Yakeh! pishno ʋto mominchit il issa cha, e chiakaiya tuk oke, im achi tok.

29Mihma Chisʋs ʋt afalaminchi mʋt, A̱hli mak o̱ hʋchim achi lishke, Hatak nana hosh ʋno pulla, micha ʋbanumpa aiena hatuk mak o̱, in chuka, keyukmʋt itibapishi ʋhleha, in tek puta, i̱ki, ishki, keyukmʋt tekchi, mikmʋt ʋlla, micha yakni aiena ka issʋt a̱ya hokʋto,

30Mihi yosh okcha̱ya ta̱kla kʋt chuka, itibapishi ʋhleha, micha in tek ʋhleha, mikmʋt ishki, micha ʋlla, anonti yakni aiena kʋt mihi atuk a̱ ohmi tahlepa achʋfa ho̱ pisa he; mikmʋt nan ishtai i̱ palʋmmi mʋt im aiena tukmʋt, anonti yakni inlakma aiokcha̱yʋt bilia ya̱ pisa hi oke.

31Yohmi kia ti̱kba yatuk ʋt ont ishtaiyopa hi ʋt la̱wakma, anonti ishtaiyopi atuk ʋt ti̱kba ya hi ʋt lauʋt a̱sha hi oke, achi tok.

32Micha Chelusalem ilhkoli hosh hina ʋlhtot a̱sht a̱ya ma, Chisʋs ʋt tikba hikʋt ia ma, okokko! okla ahni mʋt, iakaiya kʋt nukshopʋt okla itʋnowa tok. Mihma auah‐tuklo kash o̱ i̱ howa cha, ilap nana im a kaniohma chi̱ kʋt im anolit,

33Inta! Chelusalem a̱ iloh ilhkolishke; yohmi ka Hatak Ushi ʋt na‐holitompa isht a̱sha pehlichi ʋhleha, micha na‐holissochi ʋhleha aiena ka ibbak fohka chi̱; mikma illa he anumpa onochi cha, Chentail okla ho̱ ibbak fohka chi̱ hoke.

34Mikmʋt yʋmmak ash o̱ okla ishit yopula, micha fʋmmi, mikmʋt on tuftua aiena cha, okla ʋba chi̱ hoke: atukma nitak ont atuchinakma falamʋt tana hi oke, achi tok.

35Mihma Sebete ushi Chemis, micha Chan ita tuklo kʋt im ona mʋt, Nan‐ithʋnanchi ma! nana ho̱ il ahnikma, ish pim aiahlichi hokbano il ahnishke, achi tok.

36Mihma, Nanta hak o̱ hʋchi̱ yʋmihchi la hi a̱ hʋsh ahni cho? im achi tok.

37Chim a holitopa ya̱ achʋfʋt chibbak isht impak‐imma a̱shakma, anonti achʋfʋt ʋlhfʋbekimma a̱sha hosh, e chiya hi ak o̱ ik yohmi ish ahnashke, im achi tok.

38Yohmi kia Chisʋs ash osh, Nana ho̱ hʋsh asilhha hokʋt hʋsh akostininchi keyushke: isht‐ishko ʋno ʋt ai ishko la chi̱ ka hʋsh ai ishka hinla cho? mikmʋt baptismo a̱ ʋno ʋt isht baptismo li ka hʋchishno ʋt isht a hʋchi baptisma hinla cho? im achi tok.

39Mihma, Pi yʋmohma hinlʋshke, im achi tok. Mihma Chisʋs ash osh, Isht‐ishko ʋno ʋt ai ishko li ka hʋsh ai ishkokmʋt, anonti baptismo ʋno ʋt isht a baptismo li aiena ka isht a hʋchi baptisma chi̱ ho mʋhli hoke.

40Amba sabbak ishtimpak imma, micha ʋlhfʋbekimma aiena a̱sha hi okʋno ima la hi o̱ keyu; amba kʋna ho̱ im ʋlhtaha mak a he oke.

41Mihma pokoli kash ot haklo mʋt, Chemis, Chan ita tuklo kash okla isht ik i̱ yukpo fehna tok.

42Yohmi kia Chisʋs ʋt yʋmmak ash o̱ hoyo cha, Chentail okla i̱ mi̱ko ʋhleha hʋt ai i̱ shahlit pehlichi chatuk: mikma i̱ hochitoka ʋhleha hʋt nana kʋt im a ʋlhpiesa mak osh okla ha̱ i̱ yʋmihchi chatuk a̱ hʋsh ithaiyanʋshke.

43Yohmi kia hʋchishno yokʋto hʋchi yʋmohma he keyushke: amba hʋchi kanima mʋt i̱ shahli bʋnna hosh hʋch ibafo̱ka hokmʋt, nan‐isht hʋchim ʋtta ya he.

44Mikma hʋchi kanima hosh moma i̱ shahli hʋchi bʋnnakmʋt, moma in tishu hʋchia ha hi oke.

45Hatak Ushi ak kia nan isht im ʋtta hi o̱, a̱ya tok keyu: amba ilapo ak osh nan isht ʋtta he, anonti la̱wa kʋt isht a hlakofa hi a̱ ilap im ilhfiopak a isht atobba he mak a tok oke, im achi tok.

46Mihma Cheliko a̱ okla ai ʋla tok: atuk osh nan im ai ithʋna ʋhleha, micha okla la̱wa fehna aiena ho̱ pelichi cha Cheliko ash a kohchʋt ia ma, Timeʋs ushi Batimeʋs lʋpa yʋt hina lapalika yo̱ a binilit nan asilhha tok.

47Atuk osh yʋmmak ash ot Chisʋs Nasalet minti yatuk o̱ haklo mʋt, tahpʋlʋt, Chisʋs Lewi ushi chia hʋt is sa̱ nukha̱klashke, ahanchi tok.

48Mihma nukchinta chi̱ ka, i̱ miha kʋt laua tok: yohmi kia yʋmmak o̱ i̱ shahlichi fehnʋt tahpʋlʋt, Chisʋs Lewi ushi ma! is sa̱ nukha̱klashke, ahanchi tok.

49Mihma Chisʋs ʋt hikia cha, yʋmmak ash o̱ hoya hi a̱ miha tok. Mihma hatak lʋpa yash o̱ ont hoyot, Chi nuktanla achukmashke, auet chi hoyo hoke; wakayá, im achi tok.

50Mihma im anchi ash o̱ kanima pit bohli mʋt, wakayʋt, Chisʋs a̱ ima ona tok.

51Mihma Chisʋs ʋt afalaminchi mʋt, Nanta mak o̱ chi̱ yʋmihchi la hi a̱ ish ahni cho? im achi tok: mihma hatak lʋpa yash osh, A̱ shahli ma! hoponayo la hi a̱, im achi tok.

52Mihma Chisʋs ash ot, Ish iashke; na chi yimmi hʋt chi hlakofichi hoke, im achi tok. Mihma ashali̱ka ho̱ponayo mʋt, hina fohkʋt Chisʋs a̱ iakaiya tok.

Currently Selected:

Mak 10: CHH

Highlight

Copy