Mahlu 27
27
Na holitompa isht a̱sha pehlichi ʋhleha hash osh Chisʋs a̱ Pailat Loman i̱ mi̱ko ak o̱ isht im ona, 1; 3 mihma Chutas Iskaliot ʋt ile nuksiteli. 19 Pailat tekchi ʋt Chisʋs a̱ nana ik kanimihcho hok bano im ahni; yohmi kia na holitompa isht a̱sha ʋhleha hʋt nan ahni kak o̱ ʋlhpesa im ahni cha, 26 Balabas ak o̱ peh i̱ hotofi mʋt, Chisʋs ʋto illa chi̱ mak o̱ miha. 27 Loman tʋshka chipota ʋhleha ʋt Chisʋs a̱ ishi cha, kʋti halupa yo̱ noshkobo ha̱ isht iachukolichi. 32 Tʋshka chipota yʋt Chisʋs a̱ ishit Kalkohla ona cha, im ilefoka yash na shoeli isht apesʋt im ishi mʋt, Chisʋs ash iti‐taiyukhʋna ahonʋhlichi ma; 50 Chisʋs ʋt chitoli fehnʋt tahpʋla mʋt, illit kʋnia, illi ma na fehna kʋt ai yʋmohmi. 57 Chosef Alimahlea ʋtta yak osh, Chisʋs ʋt iti‐taiyukhʋna takali tuk a̱ ishit akʋchi, micha hatak illi ai asha himona ilap immi ak inli ho̱ fohkit bohli. 62 Na holitompa isht a̱sha pehlichi ʋhleha hak osh asihi̱hla ma, Pailat ʋt tʋshka chipota ya̱ atoinchi na Chisʋs ahollopi a̱ atoni.
1Ont onnʋt taha ma na holitompa isht a̱sha pehlichi ʋhleha hʋt moma, micha okla i̱ hochitoka ʋhleha aiena kʋt Chisʋs a̱ ʋba chi̱ kʋt isht it im anumpulit ma̱ya tok.
2Micha yʋmmak ash o̱ okla takchi mʋt, ilauelit isht iʋt, nahullo mi̱ko Pantiʋs Pailat ibbak a̱ ont fohki tok.
3Yʋmma foka ma yʋmma ishit okla ha̱ im issa tuk Chutas ash osh yʋmma illi issa na pisa mʋt, inlʋt im anukfila cha, tʋli hʋta boshulli pokoli tuchina kash o̱ falaminchit na holitompa isht a̱sha pehlichi ʋhleha micha hochitoka ʋhleha aiena ka isht om ona mʋt,
4Nan ashʋchi keyu issish o̱ ishit okla ha̱ im issa li hokʋt ashʋchi lishke, achi tok. Mihma, Yʋmmʋt nanta isht pi ahalaia cho? yʋmmak okʋno chishno ak inli hosh ish pisashke, achi tok.
5Mihma tʋli hʋta boshulli a̱ tempel anu̱kaka ya̱ pit fohobli cha, kocha ia mʋt, ont ile nuksiteli tok.
6Yohmi ma na holitompa isht a̱sha pehlichi ʋhleha hash osh tʋli hʋta boshulli ash ishi mʋt, Tʋli holisso ai itahoba holitopa ya̱ pit fohka he ʋlhpesa keyu, issish o̱ isht ʋlhtoba hatuk oka, achi tok.
7Yohmi mʋt okla isht im anumpulit ma̱ya cha, oklushi inla hatak puta ka a hollopa hi ʋt shuti‐tʋna im osapa yo̱ isht chumpa tok.
8Yʋmohmi hatuk o̱ osapa yʋmmʋt, Osapa issish hohchifo tok ʋt himak nitak a̱ moyuma hoke.
9Yʋmohmi ma hopaii Chelemaias ʋt anumpuli mʋt, Islael ushi ʋhleha hʋt ai ʋlhtoba he okla apesa tok mak o̱ ai ʋlhtoba he ʋlhpesa tuk ʋlhtoba tʋli hʋta boshulli pokoli tuchina ka okla ishi tok.
10Micha Chitokaka yʋt ʋm apesa tok mak o̱, shuti‐tʋna atuk im osapa yo̱ isht atobbi tok; achi tok a̱ ont aia̱hli tok.
11Mihma Chisʋs ʋt nahullo mi̱ko itikba ya̱ hikia tok; mihma nahullo mi̱ko ʋt yʋmmak ash o̱ i̱ ponaklot, Chishno ak osh Chu okla ha̱ i̱ mi̱ko chia mak oh cho? achi tok. Mihma Chisʋs ʋt, Ʋlhpesa ho̱ ish mihʋshke, im achi tok.
12Atuk o̱ na holitompa isht asha pehlichi ʋhleha, mikmʋt hochitoka ʋhleha aiena kʋt nan isht mihachi ka, nanasi kia ilapʋt afalaminchit ik miho ki tok.
13Yohmi ma Pailat ash osh, Nana la̱wa ka isht a chi atokoli ka chik haklo ho tuma? im achi tok.
14Yohmi ma yʋmmak ash osh anumpa achʋfa kia ik im afalamincho ki tok; yohmi hatuk o̱ nahullo mi̱ko ash osh nukhlakancha fehna tok.
15Micha ʋbanʋblit ontia impa a̱shakma, kʋna ho̱ okla ahnikma, nahullo mi̱ko ʋt yukʋt talakchi atuk a̱ okla ha̱ imi̱ hotofi chatuk a tok.
16Atuk o̱ yʋmma fehna ma annoho̱wa fehna chatuk yukʋt talakchit Balabas hohchifo hosh okla ha̱ im anta tok.
17-18Yohmi hatuk o̱ Pailat ash osh yʋmma okla isht ik i̱ yukpo kak osh ishit okla ha̱ im issa hatuk a̱, ithana hatuk osh, okla itʋnahʋt taiyaha ma, Kʋta mak o̱ hʋchimi̱ hotofi la he a̱ hʋsh aiahni cho? Balabas ak okmá, keyukmʋt, Chisʋs osh Klaist hohchifo kak okmá, katimampo kak a chi̱ cho? im achi tok.
19Mihmʋt nan‐apesa aiasha ya̱ ont binili ma, tekchi ʋt pit im anolit, Yʋmmak atuk mak o̱ himak nitak a si holhpokunʋt nana isht ik sʋm ai achukmo kʋt an laua hatuk oka, hatak a̱hli achukma yʋmma nana chik kanihcho kashke, achi tok.
20Yohmi kia na holitompa isht a̱sha pehlichi ʋhleha, micha hochitoka ʋhleha aiena hokʋto Balabas ak o̱ okla asilhha cha, Chisʋs ak o̱ ʋba chi̱ ka, okla laua ya̱ atohnochi tok.
21Nahullo mi̱ko ash osh afalaminchi mʋt, Tuklo ka katimampo hʋchim i̱ hotofi la hi a̱ hʋsh aiahni cho? im achi ma, Balabas ak o̱, okla achi tok.
22Pailat ash osh, Yohmikmʋt Chisʋs osh Klaist hohchifo kʋno, nanta hak o̱ katimihchi la hinla cho? im achi ma, Iti‐taiyukhʋna yak o̱ ahonʋhlʋt illashke, momʋt okla achi tok.
23Mihma nahullo mi̱ko ash osh, Katiohmi ho̱? nan okpulo nanta mak o̱ yʋmohmi tuk oh cho? achi tok, Yohmi kia i̱ shahlichit tahpʋlʋt, Iti‐taiyukhʋna yak o̱ ahonʋhlʋt illashke, okla achi tok.
24Pailat ash osh ilapʋt na kanihma he keyu, amba yahapa kak osh i̱ shahlit toba pulla hi a̱ akostininchi mʋt, oka kapʋssa ya̱ ishi cha, okla itikba ya̱ ibbak ai achifa mʋt, Hatak a̱hli achukma ilʋppa im issish a̱ isht si ahalaia keyu mak oke: hʋchishno ak osh isht hʋsh a̱shashke, im achi tok.
25Yohmi ma okla momʋt afalaminchi mʋt, Im issish ʋt pishno, micha pim ʋlla aiena kak o̱ onʋtonlashke, im achi tok.
26Yohmi ma yʋmmak ash osh Balabas ak o̱ okla ha̱ imi̱ hotofi tok: micha Chisʋs ash o̱ fʋmmit issa mʋt, ititaiyukhʋna ahonʋhla chi̱ mak o̱ im issa tok.
27Yʋmma foka ma nahullo mi̱ko in tʋshka chipota ʋhleha hash osh Chisʋs a̱ ishtiʋt nana ai apesa yo̱ isht ona mʋt, tʋshka chipota ʋhleha ha̱ mominchit ont im itʋnahli tok.
28Mihmʋt nafohka ya̱ i̱ shoeli cha tʋshka chipota peh lichi i̱ nafohka humma yo̱ ishit fohkʋchichi tok.
29Micha kʋti iachuka ho̱ okla tʋnʋt tahli mʋt, noshkobo ha̱ iachukolichi cha, anonti ibbak isht impakimma ya̱ ku̱shak o̱ pit fohki tok: mihmʋt itikba ya̱ okla i̱ hʋchukbihlepa cha, isht yopulʋt, Chu okla i̱ mi̱ko ma! na chi yuk pashke, achi tok.
30Mihmʋt yʋmmak ash o̱ okla on tuftua, micha ku̱shak ash ishi cha, noshkobo ha̱ isht boli aiena tok.
31Mihmʋt yʋmmak ash o̱ okla ishit yopulʋt issa mʋt, tʋshka chipota i̱ nafoka humma yash o̱ i̱ shu̱fi cha, ilap i̱ nafoka yash inli ho̱ fohkʋchichi mʋt, iti‐taiyukhʋna ahonʋhlicha chi̱ hosh ilauelit ishtia tok.
32Atuk osh okla ont kocha wiha fehna mʋt, Saileni hatak Saimon hohchifo ho̱ okla pisa tok: mihmʋt im iti‐taiyukhʋna ya̱ yʋmmak osh shola he a̱ okla atohnochi tok.
33Atuk osh yakni Kalkohla hohchifo yʋmmʋt, Noshkobo foni aiasha, achi mak o̱ ona ma,
34Yʋmmak ash o̱ ishka chi̱ ka wineka yosh basunlʋsh okchi yʋt ibʋlhto ho̱ ipeta tok: mihma yʋmmak ash o̱ ishkot pisa mʋt, ishka he keyu ki tok.
35Mihma yʋmmak ash o̱ iti‐taiyukhʋna okla ahonʋhlichi mʋt, na shoeli o̱ im ilefoka yatuk ash isht iti̱ hopela tok; hopaii ʋt, anumpuli mʋt, Ʋm ilefoka yatuk puta ka okla iti̱ hopela mʋt, anonti ʋm ilefoka lumbo atuk a̱ okla nan‐isht a shoelishke, achi tok ʋt aiahla chi̱ mak a tok.
36Micha okla hash osh yʋmmak o̱ aka binohli cha, yʋmmak ash atoni tok.
37Mihmʋt noshkobo paknaka anumpa onʋtula holisso hʋt, ILƲPPAK OSH CHISƲS CHU OKLA I̱ MI̱KO MAK OKE, achi ho̱ takalichi tok.
38Yohmi ma hatak hu̱kopa tuklo hosh api̱hʋt ititaiyukhʋna ahonʋhla tok; achʋfa kʋt ibbak isht impakimma yo̱ takali ma, anonti achʋfʋt ʋlhfʋbekimma yo̱ takali tok.
39Mihma yʋmma bili̱kasi ont ihi̱ya kʋt yʋmmak ash o̱ ik ahobalot pit i̱ yuchunukli beka tok.
40Mihmʋt, Tempel a̱ okpʋni cha, anonti nitak tuchinakma ikbit tahli chia hʋt, ish ile okchalinchashke, Chihowa a̱ Ushi chia hokmʋt, iti‐taiyukhʋna ya̱ auet akowá, achi tok.
41Na holitompa isht a̱sha pehlichi ʋhleha ak kia na holissochi ʋhleha, micha hochitoka ʋhleha ai itapeha kʋt yʋmmak ash o̱ ishit yopulʋt,
42Inla yokʋno okchalinchi hatuk okak osh, ilap inli kʋto ile okchalincha he keyushke. Ilʋppak osh Islael a̱ i̱ mi̱ko yatuk okmʋt, himonasi ak o̱ iti‐taiyukhʋna ya̱ auet ik akowá, yohmikmak o̱ iloh i̱ yimmashke.
43Chihowa ya̱ anukcheto atuk oka, yʋmmak osh i̱ hullo hatuk okmʋt, himonasi a̱ ant ik hlakofichí; Chihowa Ushi sia hoke, achi hatuk oka achi tok.
44Hatak hu̱kopa tuklo yʋmma api̱hʋt iti‐taiyukhʋna ahonʋhla tuk kak kia ik ahobalo kʋt, yʋmmak inli ho̱, chohmichi tok.
45Yohmi ma hʋshi kanʋlli ʋlhpisa ont isht hannalik fehna ai ʋhlit iʋt, hʋshi kanʋlli ʋlhpisa isht chakkali ona ka, yakni moma ka ai okhlilit kʋnia tok.
46Yohmi ma hʋshi kanʋlli ʋlhpisa ont isht chakkali foka ma, Chisʋs ʋt chitoli fehna hosh tahpʋlʋt, Eli, Eli, lama sabakhlani? achi tok; yʋmmʋt an Chihowa ma! an Chihowa ma! nanta katiohmi ho̱ is sa̱ kanchi cho? achi hoke.
47Mihma yʋmma hiohma̱ya tuk ʋt kanimi kʋt haklo mʋt, Hatak ilʋppʋt Elias a̱ pit i̱ howʋshke, achi tok.
48Mihma mih mak inli ho̱ achʋfʋt malelit ia mʋt, na shatʋmmi o̱ ont ishi cha wineka alotoli mʋt, ku̱shak o̱ takalichi cha, yʋmmak ash o̱ ishka chi̱ ka pit ipeta tok.
49Mihma inla ka yash osh, Ik a̱shá, Elias ʋt okchalinchit a̱ya hinlakmá, nanakmá, keho pesá, achi tok.
50Mihma Chisʋs ʋt atukla ma chitoli fehna hosh tahpʋla mʋt, fiopissa tok.
51Yohmi ma nantʋnna tempel anu̱kaka takali tuk ʋt paknaka ak o̱ a hlilafʋt ia mʋt, aka ont taha cha tuklo tok: mihma yakni ʋt winakahanchi ma, tʋli hochito puta kʋt bakahli tok.
52Mihma hatak ahollopi puta kʋt tiwa ma, ʋbanumpuli puta haknip ma̱yʋt nusi tuk ʋt la̱wa kʋt tani tok.
53Atuk osh Chisʋs ʋt illi tuk ʋt falamʋt tani ma, ahollopi puta ka akohcha wihʋt ia mʋt, tʋmaha holitopa ya̱ onʋt la̱wa ka i̱ haiaka tok.
54Sintulion micha api̱hʋt ma̱yʋt Chisʋs a̱ apesʋchi tuk aiena kash osh yakni winakʋchi, mihmʋt nana kʋt ai yakohmi puta na pisa mʋt, okla nukshopa fehna mʋt, Ilʋppak okʋt Chihowa ha̱ Ushi yo̱ mʋhli tuk pullʋshke, achi tok.
55Yokmi ma ohoyo la̱wa Chisʋs a̱ apehʋt Kalili a̱ a̱sht, mintit yʋmma nan im atahli yatuk ʋt yʋmma ma̱ya cha, auet mishema ho̱ pit pisa tok.
56Yʋmma takla ma̱ya kʋt, Meli Maktalene micha Meli, Chemis, mikmʋt Choses aiena ishki, mikmʋt Sebete ushi ʋhleha ha̱ ishki ak osh aiena tok.
57Ont opiʋt taiyaha ma hatak nan in laua Alimahlea ʋtta Chosef hohchifo hosh, yʋmmak kia Chisʋs a̱ nan im ai ithʋna ak inli tuk osh ʋla tok.
58Micha ia mʋt, Chisʋs haknip a̱ Pailat a̱ ont im asilhha tok. Yohmi ma haknip atukma ima he a̱, Pailat ʋt miha tok.
59Mihma Chosef ʋt haknip atuk a̱ ishi mʋt, yʋmmak ash o̱ nantʋnna kashofa linen achukma ho̱ a bonulli tok.
60Mihmʋt yʋmmak ash o̱ ilap i̱ sepʋlka himona tʋli chito yo̱ a kulli hosh ikbi tuk osh ont fohki tok: mihmʋt sepʋlka okhissa ash o̱ tʋli chito yo̱ tonolichit pit isht akamali cha, ia tok.
61Mihma Meli Maktalene, micha Meli achʋfa itatuklo kʋt sepʋlka i chapaka ya̱ chi̱ya tok.
62Yohmi ma nana ai ʋlhtaha nitak atuk auet achakaya nitak o̱ na holitompa isht a̱sha pehlichi ʋhleha, micha Falisi ʋhleha aiena kʋt Pailat a̱ ant im ai itʋnaha cha,
63Pi̱ shahli ma! na haksichi yʋmmʋt okcha̱ya momʋt ahanta mʋt, Nitak ont atuchinakma falamʋt tani la hi oke; achi tok a̱ il ithaiyanʋshke.
64Yohmi hoka ish apesa na sepʋlka ʋt kʋllot ʋlhka̱ma na nitak atuchina ka onashke; yʋmmak keyukma nan im ai ithʋna ʋhleha hʋt ninak a̱ ai ʋlʋt hu̱kopʋt ishit kʋnia cha, Illi tuk ʋt falamʋt tanishke, okla ha̱ im acha hinla hoke: yohmikma ishtaiyopi ka isht haksi kak osh ik ai ʋlhpeso kʋt ʋmmona tuk a̱ i̱ shahla hinla hoke, achi tok.
65Mihma Pailat ash osh, Nan atoni ʋt hʋchim a̱shʋsh ke: oh ilhkoli cha, kanimihchit hʋsh a kʋllocha hinla kʋt hʋsh yʋmihchashke, im achi tok.
66Mihma ilhkoli mʋt, tʋli ash o̱ in chunli cha, nan atoni a̱ ashachit, sepʋlka ash a kʋllochit kaiyanchi tok.
Currently Selected:
Mahlu 27: CHH
Highlight
Share
Copy
Want to have your highlights saved across all your devices? Sign up or sign in
Published by the American Bible Society 1848-1886, reprinted 1913
