Chan 9

Hatak ʋt lʋpa yosh ʋtta tok a̱, Chisʋs ʋt hoponayochi, 1: 13 hatak ash o̱ ilauet Falisi ʋhleha ha̱ isht im ona ma, Falisi ʋhleha hash ot hatak ash sinakak a̱ a kohchichi. 35 Chisʋs ʋt ilap ak osh Chihowa ha̱ Ushi mak atuk ʋt hatak yʋmmak ash im il otʋninchi ma, hatak ash ot i̱ yimmi cha, aiokpʋchi.

1Micha Chisʋs ʋt ont ia cha a̱ya mʋt, hatak ʋt lʋpa imoma yosh ʋtta tok osh a̱sha na pisa tok.

2Mihma nan im ai ithʋna ʋhleha hʋt, Pi̱ shahli ma! hatak ilʋppak okmá, keyukmʋt i̱ki, ishki itatuklo ka a katima kak osh nan ashʋchi tok o̱, hatak ilʋppʋt lʋpa imoma yosh ʋtta tok oh cho? achit i̱ ponaklo tok.

3Chisʋs ash ot afalaminchi mʋt, Hatak ilʋppak okmá, keyukmʋt i̱ki, ishki ita‐tuklo ka a kanima kak osh nana ashʋchi tok o̱ keyu hoke; amba Chihowa nan‐isht im ai a̱hlika yʋt ilʋppak o̱ isht ai otʋna he mak o̱, ai yakohmi tok oke.

4In toksʋli la he mak o̱ auet sa kanchi tok oka nita̱ki moma kak o̱ isht im ahanta li pullashke; ninak ʋt ʋla ha yokmʋno, hatak nana kia pilesa he keyushke.

5Yakni a̱ ai ahanta li takla hokʋto, yakni a̱ in tohwikeli sia hoke, im achi tok.

6Ilʋppa mak achit ont issa mʋt, yakni a̱ on tofʋt, lukfi a̱ itukchi ishit yʋmʋslit tahli mʋt, hatak lʋpa nishkin a̱ lukfi ash o̱ isht im apolusli tok.

7Mihmʋt, Oka talaia Siloam, yʋmmʋt toshowakmʋt, Pila, achi ho̱ ia cha, ont okamí, im achi tok. Yohmi ma ia cha ont okami mʋt, pi̱sa hosh ʋla tok.

8Yohmi hatuk o̱ chuka panta hatak ʋhleha, micha yʋmmʋt lʋpa yo̱ tikba ka pisa beka tuk ʋhleha yʋmmak ash ot, Ilʋppʋt a̱shʋt nana asihi̱hla chokʋsh mak o̱ keyu̱? achi ma,

9Kanimi kʋt, Ilʋppʋt mihi yoka, achi ma, inla mʋt, Peh holba hoka, achi tok: yohmi kia ilap ʋto, Mihi yo̱ sia hoke, achi tok.

10Yohmi hatuk o̱, Katiohmi hosh chi nishkin ʋto fatuma tuk oh cho? im achi tok.

11Mihma afalaminchi mʋt, Hatak Chisʋs hohchifo kak osh lukfi a̱ yʋmʋslit, sa nishkin a̱ isht ʋm apolusli cha, Oka talaia Siloam a̱ ia cha, ont okamí, ʋm achi ma, iʋt ont akami li hosh, hoponayo li tuk oke, achi tok.

12Mihma, Atuk osh mih mʋto? okla im achi ma, Ak akostininchoshke, achi tok.

13Mihma lʋpa yo̱ beka tuk yʋmmak ash o̱ ilauinlit Falisi ʋhleha ha̱ isht im ona tok.

14Yohmi ka nitak hullo nitak o̱ Chisʋs ʋt lukfi a̱ yʋmʋsli cha, nishkin a i̱ fatummi tuk a tok.

15Yohmi hatuk o̱ anonti Falisi ʋhleha hʋt kaniohmit hopanayo tuk a̱, im asilhhʋchi akinli tok. Lukfi yʋmʋska yo̱ sa nishkin a̱ isht a lapohlechi na okami li tuk osh, hoponayo lishke, im achi tok.

16Yohmi hatuk o̱ Falisi ʋhleha kanimi kʋt, Hatak yʋmmʋt nitak hullo nitak a̱ holitobli keyu hokʋt, Chihowa ak o̱ a minti keyushke, achi tok. Inlaka yokʋto, Hatak ʋt nan ashʋchi atuk ʋt katiohmi hosh na‐fehna puta yakohmi ka yʋmihcha hinla cho? achi tok: yohmi mʋt ilap bi̱ka okla ai ita kashapʋt ma̱ya tok.

17Hatak lʋpa yatuk ash o̱ anonti, Chishno ʋto chi nishkin a̱ chi̱ fatummi tuk a̱, yʋmmak oka nanta isht ish achi cho? okla im achi ma, Yʋmmak ash ot hopaii yoke, achi tok.

18Yohmi kia Chu okla hash ot hoponayo tuk ash i̱ki, ishki ita tuklo ka hoyot ik im asilhhacho ki̱sha kʋt, yʋmmʋt lʋpa yatuk osh hoponayo tuk a̱, ik yimmo ki tok.

19Atuk osh yʋmmak ash o̱ okla i̱ ponaklot, Ilʋppʋt hʋch iso lʋpa yosh ʋtta tok hʋsh achi chokʋsh oh cho? Yohmi hokak osh katiohmi ho̱ himak ano hoponayo cho? okla achi tok.

20I̱ki, ishki ita‐tuklo kash ot afalaminchi mʋt, Ilʋppʋt piso, micha lʋpa yosh ʋtta tok okʋno il ithanʋshke.

21Amba nana hosh kaniohmi ho̱ himak ano pi̱sa kʋno, kil akostininchoshke; mikmʋt kʋna hosh nishkin a̱ i̱ fatummi tuk aiena kʋno, kil ithanoshke; ʋlla keyu hoka, ilap ak o̱ hʋsh i̱ ponaklokma, ilap inli hosh isht il ai anumpula hinla hoke, achit okla tok.

22Hatak nana hosh, yʋmmʋt Klaist oke, achi hokmʋt, sinakak a̱ a kohcha hi o̱, Chu okla hʋt ai it ibachʋfʋt taha ma̱shko hatuk o̱, i̱ki, ishki itatuklo kʋt Chu okla hak o̱ i̱ nukshopa hatuk osh, anumpa ilʋppa achit okla tok.

23Yohmi hatuk osh i̱ki, ishki itatuklo kash ot, Ʋlla keyu hoka, ilap ak o̱ oh i̱ ponakló, achit okla tok.

24Yohmi ma atu̱kla ma hatak lʋpa yatuk ash o̱ okla hoyo mʋt, Chihowa yak o̱ pit holitoblichí, hatak ilʋppak okʋto nan ashʋchi a̱ il im ithana hoke, im achi tok.

25Mihma afalaminchi mʋt, Yʋmmak okʋt nana ashʋchi yokmá, keyukmá, nana hokʋno ak im ithanoshke; nana achʋfa kʋno ithana li; yohmi kʋt lʋpa sia ha tuk kia, himak ano hoponayo li kak oke.

26Mihma anonti, Nanta ho̱ a chi̱ katimichi tuk o̱? Katimihchi hosh chi nishkin a̱ fatummi tuk oh cho? okla im achi tok.

27Mihma im afalaminchi mʋt, Hʋchim anolit taiyahi li kia, hʋch ik haponaklo ke tuk ʋt, nanta katiohmi ho̱ atuklanchit haklo ka hʋsh ahni cho? hʋchishno ak kia nan im ai ithʋna toba hʋchi bʋnna ho̱? achi tok.

28Yohmi ma okla ishtukhlakafʋt, Chishno ak osh yʋmma nan im ai ithʋna chia hoke; amba pishno ʋto Moses ak o̱ nan im ai ithʋna pia hoke.

29Moses ak okʋno Chihowa yʋt im anumpuli beka tok a̱ il ithana; amba ilʋppak okʋto kanima yo̱ a minti ma, il ai im ithana keyushke, okla im achi tok.

30Mihma hatak ash osh afalaminchi mʋt, Yʋmmʋt kanima yo̱ a minti tuk a̱ hʋch ik im akostinincho ho̱, anonti sa nishkin a̱ a̱ fatummi hoka, ilʋppʋt na‐fehnʋshke.

31Mihmʋt Chihowa yʋt nan ashʋchi ʋhleha hokʋno i̱ haponaklo keyu chatuk; amba hatak nana hosh Chihowa ya̱ aiokpʋchi, micha nan ahni ka im antia aiena yok mak o̱ mihi yo̱ i̱ haponaklo chatuk a̱ iloh ithanʋshke

32Yakni ʋt toba tok a taiyakla ka lʋpa imoma yosh ʋtta tok a̱ hatak nana kia nishkin ash i̱ fatummi tok a̱ annoa chatuk keyushke.

33Hatak ilʋppʋt Chihowa yak o̱ a minti hatuk keyu hokmʋt, nana ho̱ yʋmihcha he keyushke, im achi tok.

34Mihma okla afalaminchi mʋt, Nana ai ashʋchika bieka mak osh ish ʋtta tok ak na̱ka nan ish pim abʋchi hotuma? im achi mʋt, a kohchichi tok.

35Yʋmma a kohchichi tuk a̱, Chisʋs ʋt haklo tok; atuk osh yʋmmak ash o̱ pisa mʋt, Chihowa Ushi a̱ ish i̱ yimmi cho? im achi tok.

36Afalaminchi mʋt, Chitokaka ma! i̱ yimmi la hinla yʋmmak osh kʋta ho̱? achi tok.

37Mihma Chisʋs ash osh, Yʋmmak oka ish pi̱sa tuk o̱, anonti mihi yosh chit im anumpohonli hoke, im achi tok.

38Mihma, Chitokaka ma! sai yimmishke, achi mʋt, yʋmmak ash aiokpʋchi tok.

39Ik hoponayo atuk ʋt hopona̱yo yokma, anonti hoponayo tuk ʋt lʋpa yo̱ toba he, yakohmit nan isht im ʋlhpisa hi o̱, yakni ilʋppa a̱ya li hatuk oke.

40Mihma Falisi ʋhleha kanimi kʋt yʋmma apeha tuk ash ot anumpa ilʋppa puta ka haklo mʋt, Pishno ak kia lʋpa pia hoh cho? im achi tok.

41Chisʋs ash ot, Lʋpa hʋchia hatuk okmʋto, nan ai ashʋchika yʋt ik hʋchim iksho ka he tuk; amba, E hoponayo, himak a̱ hʋsh achi; yohmi hokʋt hʋchim ai ashʋchika vʋt takanli moma hoke, im achi tok.

Currently Selected:

Chan 9: CHH

Highlight

Copy