Chan 8

Falisi ʋhleha hʋt, ohoyo hosh haui tobʋt ahanta na yʋmmak osh nan im apesa chi̱ ho̱, isht im ona, 1, 12 Chisʋs ʋt ilap ak osh yakni in tohwikeli; yohmi ka yʋmmʋt im aia̱hli ka Iki ʋt atokolit anoli chatuk aiena ka miha. 30 Chu okla hʋt Chisʋs a̱ i̱ sanali; yohmi hatuk o̱ ilapʋt Eblaham ak okʋno isht atiaka ho mʋhli akinli kia, nan ai ashʋchika yokʋno i̱ yuka ʋhleha; micha nan isht ahullo okpulo a̱ im ʋlla ʋhleha aiena hatuk a̱, Chisʋs ʋt im otʋninchi.

1Chisʋs ʋt Alif nʋnih ha̱ ia tok.

2Atuk osh onna‐hinli fehna falamʋt tempel ash ant chukowa ma, okla momʋt im ai itʋnaha tok: mihma aka binilit nan ithʋnanchi tok.

3Mihma na‐holissochi ʋhleha, micha Falisi ʋhleha aiena kʋt, ohoyo hʋt luma̱kʋt anta tuk o̱, isht im ona tok; micha ai iklʋnna ka okla binilichi mʋt,

4Nan‐ithʋnanchi ma! ohoyo ilʋppʋt luma̱kʋt anta, ai yakohmi fehnʋt haiaka na ishi tuk oke.

5Yohmi ka Moses ʋt ilʋppa chohmi hokʋt tʋli isht boa hi o̱, nan‐ʋlhpisa ya̱ isht a pim apesa tok; yohmi ka chishno ʋto nantuk ish achi cho? im achi tok.

6Ilap ak o̱ anumpa onocha hi ʋt ahnit, imomaka pisa hosh ilʋppa okla achi tok. Yohmi kia Chisʋs ash ot ik i̱ haponaklo ho̱ chohmit, aka pit waiahpʋt, ibbak‐ushi a̱ yakni a̱ isht ai o̱ holissochi tok.

7Yohmi ka okla i̱ ponaklo kash ot a moyuma ma, wakaya mʋt, Kanima hosh ai ashʋchika ik im iksho kʋt hʋchi takla hikia hokmʋt, yʋmmak osh na ti̱kba tʋli ya̱ isht ik boli, im achi tok.

8Mihmʋt anonti aka pit waiahpʋt yakni a̱ ai o̱ holissochi tok.

9Mihma okla haklo tuk ash ot, ilap chu̱kʋsh akinli ka nan isht ai il akostininchi mʋt, holitopa i̱ shahli tuk ak osh ti̱kba achʋfa aiyukʋt kohchʋt ihi̱ya mʋt, ik a lauwo ke tuk ʋt momʋt ont taiyaha tok; mihma Chisʋs ak bano hosh hikia ma, ohoyo hash osh ai iklʋnna ash hiki̱a tok.

10Chisʋs ash ot wakaya mʋt, inla yʋt iksho ho̱, ohoyo ak bano ho̱ pisa mʋt, Ohoyo chia ma! anumpa chi onochi ʋhleha mʋto? hatak nana kia anumpa ik chi onocho ke tuk oh cho? im achi tok.

11Mihma, Hatak nana kia anumpa ik si onochoshke, Chitokaka ma! achi tok. Mihma Chisʋs ash ot, Ʋno ak kia anumpa chi onochi li keyushke, ia cha, himmakma ik chi hakso kashke, im achi tok.

12Mihmʋt Chisʋs ash ot anonti okla ha̱ im anumpuli mʋt, Ʋno ak osh yakni im a tohwikeli sia mak oke; kʋna hosh ʋno a̱ siakaiya hokʋt, ai okhlilika yo̱ a̱ya he keyu; amba ai okcha̱ya tohwikeli hʋt in takala he mak oke, im achi tok.

13Yohmi hatuk o̱ Falisi ʋhleha hash ot, Nan ish ai atokoli kʋt chishno akinli hosh ish il ai‐anoli hokʋt, nan ish ai atokoli ka a̱hli keyushke, im achi tok.

14Chisʋs ash ot afalaminchi mʋt Atokoli kʋt ʋno akinli hosh il ai anoli li akinli kia, nan ai atokoli li ka a̱hli hoke: ʋno ak okʋto kanima yo̱ a minti li tuk: mikmʋt kanima yo̱ atia la he aiena kʋt ithanali hoka; amba hʋchishno ʋto kanima yo̱ a minti li tuk, micha kanima yo̱ atia la he aiena ka hʋsh akostinincha he keyushke.

15Haknip nan isht a kaniohmi chatuk mak o̱ nana hʋsh apesʋshke; ʋno ʋto hatak nana kia nana ak im apesoshke.

16Yohmi kia nana ka apesa li hokma, nan apesa li ka aia̱hli hoke; ʋno ak illa keyu hoka, amba ʋno ʋt auet sa kanchi tok A̱ki a̱ itatuklo li hoke.

17Hatak tuklo hosh nana atokolit anoli ho̱ aia̱hla hi a̱, hʋchi̱ nan‐ʋlhpisa yak kia a holihi̱so hoke.

18Nan isht a si atokowa anoli kʋt ʋno akinli kak osh mihi yo̱ sia hokma, anonti auet sa kanchi tok A̱ki ak osh nana atokowa ka si anoli hoke.

19Yohmi ma Katima ko̱ Chi̱ki ʋto a̱sha hosh? okla im achi tok. Chisʋs ʋt afalaminchi mʋt, Ʋno, mikmʋt A̱ki ita tuklo li ka hʋch ik pithanoshke; ʋno a̱ hʋs sʋthana hatuk okmʋt, A̱ki ma hʋsh ithana he tuk akinli hoke, im achi tok.

20Anumpa ilʋppa Chisʋs ʋt tempel anu̱kaka ya̱ nana ai ithʋnanchi hosh ahantʋt, tʋli holisso abohli yo̱ hiki̱a hosh anumpuli tok: hʋshi kanʋlli isht ai im ʋlhpisa kʋt ik ai ono ki̱sha hatuk o̱, hatak nana kia ibbak a̱ ik onocho ki tok.

21Anonti Chisʋs ash ot, Kanima ia likma, hʋs sa hoyo kia, nan ai‐ashʋchika puta kak o̱ isht hʋchi ai illa hi oke: kanima yo̱ ai ona li ka, hʋchishno ʋto hʋsh ona he keyu, im achi tok.

22Yohmi ma Chu okla hash ot, Kanima yo̱ ai ona li ka, hʋchishno ʋto hʋsh ona he keyu, achi kʋt ilap inli kak osh ile ba chi̱ hoh cho? achi tok.

23Mihma, Hʋchishno ʋto aka yo̱ a minti hʋchia hokma, ʋno ʋto ʋba yo̱ a minti li hoke; hʋchishno ʋto yakni ilʋppak o̱ ai ibachʋfa hʋchia hokma, ʋno ʋto yakni ilʋppa ai ibachʋfa sia keyu hoke.

24Yohmi ka na hʋchim ai‐ashʋchika puta kak o̱ isht hʋchi ai illa hi oke, hʋchim achi li hokʋno; ʋno ak osh mih mak o̱ sia ka ik hʋchi yimmo hokmʋt, na hʋchim ai‐ashʋchika puta kak o̱ isht hʋchi ai illa hi oka, im achi tok.

25Mihma, Chishno ak osh kʋta hak o̱ chia ho̱? okla im achi tok. Mihma Chisʋs ash ot, Ʋmmona ka nana ho̱ hʋchim anoli li kash mih mak o̱ sia hoke.

26Nana ka hʋchi̱ mihʋt, nan isht apesa la hi ʋt lauʋt ʋm a̱shʋshke. Yohmi kia auet sa kanchi tok yʋmmak osh aia̱hli mak oke; mihma ʋno ʋt yʋmmak o̱ nana ka ai im a haklo li tuk mak osh yakni a̱ isht im anumpuli li hoke.

27I̱ki ak o̱ isht im anumpuli hatuk a̱, okla ik akostinincho ki tok.

28Mihma Chisʋs ash ot, Hatak Ushi a̱ ʋba hʋsh takalichi hok mak osh, ʋno ʋt mih mak sia hatuk; micha ʋno akinli ʋm anukfila hosh nanasi ka ai yʋmohmi li keyu; amba A̱ki ak osh nan sʋthʋnanchi tuk mak o̱ ilʋppa puta ka anumpuli li hatuk a̱ hʋsh akostinincha hi oke.

29Micha auet sa kanchi tok ʋt sa ta̱kla a̱ya hoke; A̱ki ʋt ilap illʋchit sa kanchi tok keyu; nana kʋt yʋmma yukpali pulla kak o̱ yʋmohmi kʋt a sa bilia chatuk oke, im achi tok.

30Anumpa ilʋppa puta ka anumpohonli ma, i̱ yimmi kʋt laua tok.

31Yohmi ma Chisʋs ash ot i̱ yimmi tuk ʋhleha Chu okla hash o̱, Ʋm anumpa ha̱ hʋsh halʋlli kʋt hʋch ik issokmʋt, nan ʋm ai ithʋna a̱hli fehna hʋchia mak a chi̱ hoke.

32Mikmʋt nan‐aia̱hli ka hʋsh ithana he; mikma nan‐aia̱hlika yash ot yuka keyu hʋch ikba hi oke, im achi tok.

33Okla afalaminchi mʋt, Eblaham ak o̱ isht atiaka pia, yohmi kʋt nitak nan ash o̱ hatak nana kia ai i̱ yuka hosh il anta tok keyu ka, katiohmi ho̱, Yuka keyu hʋchi toba hi oke, ish achi cho? im achi tok.

34Chisʋs ash ot afalaminchi mʋt, A̱hlishke, a̱hli mak o̱ hʋchim achi lishke, Kʋna hosh nan ai ashʋchika ya̱ ai yohmi hokmʋt, nan‐ai‐ashʋchika ya̱ i̱ yuka mak oke.

35Yohmi ka yuka hokʋto chuka ya̱ ai ahantʋt bilia chatuk keyu; amba Ushi yokʋto ahanta na bilia chatuk oke.

36Yohmi hoka Ushi yak osh yuka keyu ka hʋch ikbi hokma, yuka keyu a̱hli mak o̱ hʋchia ha hi oke.

37Eblaham ak o̱ isht atiaka hʋchia hokʋno hʋchim ithana li; yohmi kia ʋm anumpa hak osh hʋchi chu̱kʋsh a̱ ai anukfoyuka keyu kak o̱, sʋbi hʋchi bʋnnʋshke.

38A̱ki a̱ ai iba pi̱sa li tok mak osh ʋno ʋt nana ka isht anumpuli li hoke; mihma hʋchishno ʋt hʋch i̱ki a̱ hʋsh ai iba‐pi̱sa tok mak osh a hʋchi yʋmohmishke, im achi tok.

39Mihma okla afalaminchi mʋt, Eblaham ak osh pi̱ki oke; im achi tok. Chisʋs ash ot, Eblaham ak o̱ ushi hʋchia hatuk okmʋt, Eblaham ʋt nana a kaniohmi tok mak o̱, hʋsh yʋmohma he tuk oke.

40Amba Chihowa ya̱ nana ai im a haponaklo li tuk ʋt nan ai a̱hlika mak o̱ hatak hʋchim anoli li ka, sʋbi hʋchi bʋnnʋshke; Eblaham ʋt ilʋppa yakohmi tok keyu hoke.

41Hʋch i̱ki ʋt nana a kaniohmi tok mak o̱ hʋsh yʋmohmishke, im achi tok. Mihma, I̱ki, ishki ita tuklo kʋt ai ʋlhpesa keyu ho̱ a toba hosh il ʋtta tok keyu: Pi̱ki ʋt achʋfa, Chihowa ak oke, im achi tok.

42Chisʋs ash osh, Chihowa ak osh hʋch I̱ki atuk okma, hʋs sa̱ hulla he tuk oke; ʋno ʋt Chihowa yak o̱ a kohchʋt a̱ya li hosh ʋla li ha tok oka; yohmi kʋt ʋno ʋm anukfila akinli hosh ʋla li tok keyu; amba yʋmmak osh auet sa kanchi tok oke.

43Nanta katiohmi ho̱ ʋm anumpa ha̱ hʋch ik sʋm akostinincho cho? ʋm anumpa ha̱ haponaklo ik hʋchi bʋnno kak okʋt,

44Setan hʋch i̱ki ak o̱ hʋsh a toba hatuk osh, hʋch i̱ki nana ai‐ahni kak o̱ ai yohma hi a̱ hʋchim anukfilʋshke; yʋmmak okʋt ʋmmona kash inli ho̱ hatak ʋbi a tok; micha ilap ak osh nan aia̱hli kʋt anukfo̱ka keyu hatuk osh, nan ai a̱hlika ya̱ a hikia keyu hoke. Holabit anumpuli kʋt ai immi ka mak okʋt anumpuli hoke; ilap ak osh holabi yokʋt anonti na‐holabi i̱ki mak oke.

45Yohmi hatuk o̱ ai a̱hlika yo̱ hʋchim anoli li hatuk o̱, hʋch ik sa̱ yimmoshke.

46Hʋsh katima kak osh nan ai‐ashʋchi li tuk a̱ hʋs sʋm atokola hinla cho? A̱hli mak o̱ miha li hok mak heno, nanta katiohmi ho̱ hʋch ik sa̱ yimmo cho?

47Kʋna kia Chihowa ya̱ immi hokmʋt, Chihowa im anumpa ha̱ haklo hoke; yohmi hoka hʋchishno ʋto Chihowa immi hʋchia keyu hokʋt hʋch ik hakloshke, im achi tok.

48Mihma Chu okla ʋhleha hash ot afalaminchi mʋt, Chishno ʋt Samalitan hatak chia hosh, nan‐isht‐ahullo okpulo a̱ ish il ai eshi hatuk a̱, e chi achi kʋt ʋlhpesa ho̱ e miha keyu cho? im achi tok.

49Chisʋs ʋt afalaminchi mʋt, Nan‐isht‐ahullo okpulo il ai i̱shi li keyushke: amba A̱ki a̱ holitobli li hatuk o̱, hʋchishno ʋto ʋno a̱ hʋch ik sa holitobloshke.

50Micha ʋno akinli isht a sa holitopa hi o̱ ahni li keyu; yʋmma aiahni cha, nan apihi̱sa kʋto achʋfa hosh a̱sha hoke.

51A̱hlishke, a̱hli mak o̱ hʋchim achi lishke; Hatak ʋt nana mihi̱ha li ka ʋm antia hokmʋt, nitak nana ai‐illika ya̱ pisa he keyu hoke, im achi tok.

52Mihma Chu okla hash ot, Nan‐isht‐ahullo okpulo a̱ ish il ai eshi hatuk a̱, himak ʋno il akostininchishke; Eblaham, mikmʋt hopaii ʋhleha aiena kʋt illi tok: yohmi ka hatak ʋt nana mihi̱ha li ka ʋm antia hokmʋt, nitak nana ai illika ya̱ pisa he keyu, ish achishke.

53Pi̱ki Eblaham illi tok a̱ ish i̱ shaiyahli cho? mihma hopaii ʋhleha aiene kʋt illit taha tok. Chishno ok ash kʋta hak o̱ ish il ai apesa hoh cho? im achi tok.

54Chisʋs ʋt afalaminchi mʋt, Ʋno akinli hosh ile holitobli li hokma, na sa holitopa he mak keyu hoke. Hʋchin Chihowa hʋsh miha tuk A̱ki yʋmmak osh sa holitobli hoke.

55Yohmi kia hʋchishno ʋto yʋmma hʋch ik ithanoshke; amba ʋno ʋto yʋmma ithana lishke; yohmi kʋt yʋmma ak ithano hoke; achi li hokmʋt, holabi hʋchishno akinli ho̱ chohmi la chi̱ hoke; yohmi kia yʋmmak oka ithana li mʋt, nana ahanchi ka holitobli lishke.

56Hʋch i̱ki Eblaham ʋt ai ahanta li nitak a̱ pisa hi okʋt na yukpa tok; atuk osh pisa cha, na yukpa chinto fehna tok, achi tok.

57Mihma Chu okla hash ot, Sipokni kʋt afʋmmi pokoli tahlapi ka chik ono ki̱sha hokak osh, Eblaham a̱ ish pi̱sa tok oh cho? im achi tok.

58Mihma Chisʋs ʋt A̱hlishke, a̱hli mak o̱ hʋchim achi lishke, Eblaham ʋt iksho ki̱sha ma, anta li tok oke, im achi tok.

59Yohmi ma ishit bola chi̱ kʋt, tʋli a̱ okla aiowa tok yohmi kia Chisʋs ash ot lumʋt okla ai iklʋnnaka ya̱ hlopullit a̱yʋt tempel a̱ a kohchʋt ont ia tok.

Currently Selected:

Chan 8: CHH

Highlight

Copy