Chan 21

Chisʋs ʋt, nan im ai ithʋna ʋhleha hʋt Tibelias okhʋta ha̱ nʋni hokli hosh ma̱ya ho̱, ont im otʋni, 1; 12 yohmi cha nan‐isht‐hokli a̱ nʋni im alotoli cha, anonti itibai impa. 15 Chisʋs a̱ i̱ hullokmʋt in chukfʋlhpoba, micha in chukfʋlhpobushi aiena ka im ipeta hi a̱ hituchina ha Pita ya̱ i̱ miha; micha Pita yʋt na palʋmmi isht illa hi a̱ tikbanli im anoli. 24 Chan ʋt ilap nana anohonli ka aia̱hli, micha Chisʋs ʋt na fehna ka yʋmihchi tok a̱, inla yʋt lauʋt a̱sha hosh ik holisso ka, miha.

1Ilʋppʋt ai yakohmi ha ya, anonti Chisʋs ʋt nan im ai ithʋna ʋhleha ha̱ Tibelias okhʋta hak o̱ ont a im ile haiakʋchi tok: mihmʋt ilʋppak o̱ ai yakohmi hosh ile haiakʋchi tok.

2Saimon Pita, micha Tamas Titimʋs hohchifo, mikmʋt Nahlanael Kalili yakni Kana ʋtta, micha Sebete ushi tuklo, anonti nan im ai ithʋna inla tuklo aiena kʋt ai itapehʋt ma̱ya tok.

3Saimon Pita yash ot, Nʋni ʋbit ia lishke, im achi ma, Pishno ak kia chi api̱hʋt il iʋshke, im achi tok. Okla kohchʋt iʋt chekosi makinli ho̱ peni a̱ ont ʋlbeha tok; atuk osh ninak yʋmma nana kia okla ik hoklo ki tok.

4Atuk o̱ ont onnʋt taha ma, Chisʋs ʋt alaka ya̱ hiki̱a tok; yohmi kia nan‐ithʋna ʋhleha hʋt Chisʋs ash atuk a̱ ik ithano ki tok.

5Yohmi ma Chisʋs ash ot, Ʋlla ʋto ilimpa hʋchim a̱sha cho? im achi ma, afalaminchit, Ikshoshke, achi tok.

6Mihma, Peni ishtimpak‐imma yak o̱ nʋni‐isht‐hokli a̱ oh okʋchí, micha hʋsh ahayuchashke, im achi tok. Yohmi hatuk o̱ pit okʋchi mʋt, anonti nʋni yʋt laua fehna ka, halʋlli kʋt okla na kanihma he keyu ki tok.

7Yohmi ma nan‐ithʋna Chisʋs ʋt holitobli yatuk, yʋmmak ash ot, Chitokaka mak oke, Pita ya̱ im achi tok. Mihma yʋmmʋt Chitokaka mak atuk o̱, Saimon Pita yʋt haklo mʋt, nipi bano tuk osh nafohkʋt nʋni hokli yatuk ash o̱ ishit il ai ʋskofʋchi mʋt, okhʋta hash pit okatula tok.

8Mihma nan‐ithʋna ʋhleha inla ka yʋto alaka ya̱ pit i̱ hopaki keyu, amba kubit tahlepa tuklo foka ho̱ a̱sha hatuk okʋt, pen‐ushi ash o̱ a̱lhtot nʋn‐isht‐hokli nʋni alota ka halʋllit isht ia tok.

9Atuk osh alaka ya̱ okla ona makinli ho̱, tobaksi luak ʋt yʋmma a̱sha ma, nʋni yʋmma itotonla ma, pʋska ak kia itonla na okla pisa tok.

10Chisʋs ash ot, Nʋni himonasi hʋsh hokli tuk ʋt, ishit ho mintí, im achi tok.

11Saimon Pita yʋt pit chukowʋt nʋn‐isht‐hokli ash nʋni hochito tahlepa achʋfa pokoli tahlapi cha, akocha tuchina aienʋt alota ho̱ halʋllit, alaka isht ona tok: laua hokʋto yakohmi nana kia nʋn‐isht‐hokli ash ot ik okpulo ki tok.

12Chisʋs ash ot, Mintit ant oh i̱mpá, im achi tok. Mihma yʋmmʋt Chitokaka mak atuk a̱ ithana hatuk osh, nan‐ithʋna ʋhleha hʋt achʋfa kia i̱ ponaklot, Kʋta chia ho̱? achi kia iksho ki tok.

13Mihma Chisʋs ash ot onʋt, pʋska ya̱ ishi cha, i̱ hopela mʋt, nʋni ma yʋmihchi akinli tok.

14Chisʋs ʋt illi tuk osh falamʋt tani ha yʋt, ilʋppʋt ont atuchina mak o̱ nan im ai ithʋna ʋhleha ha̱ im ile haiakʋchi tok.

15Atuk o̱ impʋt okla issa ma, Chisʋs ash ot Saimon Pita ya̱, Saimon, Chonas ushi chia hʋt is so̱ hullo kʋt, ilʋppa puta ka chim i̱ shahli cho? im achi ma, A̱hlishke, Chitokaka ma! chi̱ hullo li hoka chishno ʋt ish ithanʋshke, im achi ma, An chukfʋlhpoba ushi puta ka pehlichit ish ipihintashke, im achi tok.

16Anonti atukla ma, Saimon, Chonas ushi chia hʋt is sa̱ hullo cho? im achi ma, A̱hlishke, Chitokaka ma! chi̱ hullo li hoka, chishno ʋt ish ithanʋshke, im achi tok: mihma, An chukfʋlhpoba puta ka pehlichit ish ipihintashke, im achi tok.

17Ont atuchina ma, Saimon, Chonas ushi chia hʋt is sa̱ hullo cho? im achi ma; ont atuchina mak o̱, Is sa̱ hullo cho? im achi hatuk o̱, Pita yash osh nukha̱klot taha tok. Yohmi mʋt, Chitokaka ma! nan oklu̱ha ka ish ithanʋshke, chi̱ hullo li hoka chishno ʋt ish ithanʋshke, im achi tok. Mihma Chisʋs ʋt, An chukfʋlhpoba puta ka pehlichit ish ipihintashke, im achi tok.

18A̱hlishke, a̱hli mak o̱ chim achi lishke, Chi himita mʋto chishno inlit il ai ʋskofachechit, chishno ish ahni hosh kanima ish a̱ya beka tok: yohmi kia ont a chi sipokni hayokmʋto, chibbak a̱ ish wakeli na inla hosh chi ʋskofachechi cha, kanima ish aiahni keyu kia, chisht a̱ya hi oke, im achi tok.

19Ai illi kaniohmi ho̱ Chihowa ha̱ isht a holitoblicha he ak o̱, anoli hosh ilʋppa anumpuli tok. Mihmʋt ilʋppa anumpuli mʋt, Is siakaiyashke, im achi tok.

20Mihma Pita yʋt filemʋt, nan‐ithʋna achʋfa Chisʋs ʋt holitobli chatuk opiaka impʋt ma̱ya ka ikkishi ha̱ pit ʋtayʋt a̱shʋt, Chitokaka ma! chishit inla ibbak chi fohki kʋto, katima kak oh cho? achi tok ash osh awant a̱ya na pisa tok.

21Pita yʋt yʋmma pisa mʋt, Chisʋs ash o̱, Chitokaka ma! yohmikmʋno hatak ilʋppak amo katiohma chi̱ cho? im achi tok.

22Chisʋs ash osh, Ʋno ak osh ahni li hokma, ilʋppak okʋt ahanta tuk o̱ ʋla la he, yʋmmʋt nanta isht chi ahalaia cho? Is siakaiyashke, im achi tok.

23Yohmi ma itibapishi ʋhleha hʋt, nan‐ithʋna yʋmmʋt ik illo ka he yatuk a̱, it im anolit ma̱ya tok; yohmi kia Chisʋs ʋt, Yʋmmʋt ik illo ka hi a̱ i̱ miha tok keyu; amba ʋno ahni li hokma, ahanta tuk o̱ ʋla la he, yʋmmʋt nanta isht chi ahalaia cho? achi tok.

24Nan‐ithʋna ilʋppak a tok mak osh ilʋppa puta ka atokoli cha, anonti yakohmi ka holissochi tok: yohmi ka yʋmmʋt nana atokolit anoli ka ai a̱hli ka il ithaiyanʋshke.

25Micha nana inla Chisʋs ʋt a kaniohmi tok a̱ lauʋt a̱sha, yʋmmak osh momʋt holisso hokma, holihi̱so kʋt yakni ak oh kia holisso hʋt ai itola hi ʋt iksho ka hinla, ʋm ahobʋshke. Amen.

Currently Selected:

Chan 21: CHH

Highlight

Copy