Apostel isht Anumpa 1
1
Klaist ʋt illi ha ya tok a̱ isht annoa kaniohmi kʋt ʋlbitʋt annoa, 1, 9 Yʋmmʋt ʋba ia isht annoa. 15 Chutʋs ʋlhtoba ho̱ achʋfa ka atokola hi a̱, Pita yʋt isht anumpuli.
1-2Tiafilʋs ma! Chisʋs ʋt ʋmmona, nana puta a kaniohmit nan im abʋchit isht maha̱ya tok osh, ʋba anumpeshi ʋhleha ha̱ ilapo akinli atokoli tok ʋt, nana ʋlhpisa ka Shilombish Holitopa pulla ho̱ isht ai ihi̱ma tok osh, ʋba ia tok nitak fena ka, holisso tikba kash o̱, isht ai ikbi li tok.
3Yʋmmak okʋt ilbʋsha hayʋt okcha̱ya kʋt, nana a̱hli isht ikhaiyana he la̱wa ka, yʋmmak ash o̱ ai isht im ile haiakʋchi cha, nana kʋt Chihowa apehlichika ya̱, pit ai ahalaia puta ka isht anumpohonli ka, okla pi̱sa na nitak pokoli ushta tok.
4Micha itahobit taiyahli mʋt, Chelusalem a̱ okla issʋt ik aiyo hosh; amba I̱ki ʋt nana miha tok, Yʋmma hʋs sʋm a haklo tuk ʋt, pit hoyot hʋsh chieyashke; achit im apesa mʋt,
5Chan ak okʋto oka yo̱ isht baptismochi mʋhli tok; amba hʋchishno ʋto himmak pila ha̱, nitak kanohmi keyukma, Shilombish Holitopa yak o̱ isht hʋchi baptisma chi̱ hoke; achi tok.
6Yʋmohmi na okla itahobʋt chieya mʋt, nan i̱ ponaklot, Chitokaka ma, himak foka hokʋno apehlichika ya̱ falaminchit Islael a̱ ish ema chi̱ cho? achi tok.
7Mihma, Nitak, micha afʋmmi puta ka, I̱ki ʋt ilapo ibbak akinli ho̱ fohkit ieshi ka hʋsh ithana ʋlhpesa keyu hoke.
8Amba Shilombish Holitopa yʋt a̱yʋt hʋchim ʋla ha mʋno, nana ai a̱hlika ya̱, hʋsh esha he: yʋmohmikmʋt Chelusalem, micha Chutia moma, micha Samelia, micha yakni afolota ont ai ʋhli fena aiena ka, atokolit a na si anoli hʋchia ha he mak oke; im achi tok.
9Mihma nana yakohmi ka anumpulit ont in taiyaha ma, oklat pi̱sa na, ʋba ishtia ma, hoshonti hʋt i̱ holhponayo ha̱ ant im a luhmit ishi tok.
10Mihma ʋba ia na, pit aiokchifelit shutik pilla ka pit hopo̱koyot hieli ma, hatak tuklot nafohka tohbi fohka hosh i̱ bili̱kasi hieli tok.
11Mihmʋt yʋmmak ash osh, Kalili hatak hʋchia hʋt, nanta katihmi ho̱ shutik pilla ka pit hopo̱koyot hʋsh hieli cho? Chisʋs ilʋppak ash fehna akinli kʋt hʋchim eshit ʋba ishtia ka, kaniohmit ʋba ia ho̱ hʋsh pi̱sa tuk a̱ yʋmmak inli ho̱ chohmit a̱yʋt ʋla hi oke; achi tok.
12Yʋmohmi ma, nʋnih chaha Alifit hohchifo ho̱, yʋmmak okʋt Chelusalem a̱ pit bili̱ka nitak hullo anowa ʋlhpesa ho̱ a̱sht falamʋt Chelusalem a̱ okla ʋla tok.
13Micha okla ant chukowa mʋt, ʋba potʋlhpo ya̱ yʋmmak o̱ Pita, micha Chemis, micha Chan, mikmʋt Antilu, Filip, micha Tamʋs, Bahlolomu, micha Mahlu, Chemis, Alfiʋs ushi, mikmʋt Saimon Selotis, micha Chutʋs Chemis itibapishi aiena kʋt ai asha tuk o̱ pit oiyat taha tok.
14Ilʋppak osh momʋt ohoyo puta, micha Meli Chisʋs ishki, micha itibapishi ʋhleha hatuk aiena ka ai itapehʋt im anukfila ai achʋfʋt ʋba pit anumpulit, nana asilhha aiena kʋt ik isso hosh aiasha tok.
15Atuk o̱ nitak yʋmma foka ma! nan ithʋna ʋhleha hohchifo holhtina kʋt tahlepa achʋfa cha pokoli tuklo foka hosh itʋnahʋt chieya ho̱, Pita yʋt iklʋnna wakayʋt hikia cha,
16Hatak itibapishi li ʋhleha ma! Shilombish Holitopa yʋt tikbanli, Lewi ash itakha ai isht Chutʋs a̱ isht anumpuli tok o̱, Chisʋs okla ishi ka in tikba hika tuk a̱, ik kaniohmi kia holisso ilʋppʋt ai a̱hli tuk pulla hoke.
17Yʋmmak okʋt hʋp iba holhtiena cha, anonti nan isht ʋtta ilʋppa pit ahalaia ka ieshi hatuk,
18Micha hatak ilʋppʋt yoshoba isht ʋlhtoba tuk a̱ osapa yo̱ ishit chumpa tuk; micha itihpelʋt akiʋt, iklʋnna mitafa na, iskuna puta kashot momʋt kocha pit fohopa tok.
19Yʋmohmi ka Chelusalem okla aiasha kʋt momʋt akostininchi tuk; yohmi hatuk o̱ osapa yʋmmʋt ilap im anumpa ya̱, Esiltama hohchifo, yʋmmʋt osapa issish achi hoke.
20Micha ataloa holisso ha̱ a holisso kʋt, Yʋmmʋt ai ahanta yatuk a̱ ik chukilissá, yohmikma hatak nana kia yʋmmak ash ik ai ahanto kashke; micha, Nana ai isht ʋtta yatuk a̱, inla yosh ishashke; achishke.
21-22Yʋmohmi hoka, Chitokaka Chisʋs ʋt pi takla ʋttʋt a̱ya, Chan a̱ im a baptismo chash, ʋhlit mintit a hʋpim eshi na ʋba ia nitak fehna ai ʋla ka, hatak yakohmi kʋt pi apehʋt, a̱ya na bilia tok okʋt, yʋmmʋt falamʋt tani tuk a̱, atokowa pib ai anola chi̱ kʋt, achʋfʋt ʋlhtoka pullashke; achi tok.
23Mihma hatak tuklot, Chosef osh Basabʋs hohchifo hosh, hochifo apunta kʋt Chʋstʋs o̱, anonti Mathlaiʋs aiena ho̱, okla hiohlichi tok.
24Micha okla ʋba pit anumpuli mʋt, Chitokaka hatak moma chu̱kʋsh a̱ ithaiyana chia hokʋt, tuklo ilʋppa kanimampo kak o̱, ish atokoli hatuk okmʋt ish otʋninchi na,
25Nan isht ʋtta ilʋppa, micha ʋba anumpa isht ʋtta pit ahalaia aiena, yʋmmak atuk o̱, Chutʋs ʋt ilap ai ʋtta ya̱ ia chin cha, yoshoba cha issa tuk oka, ieshashke; okla achi tok.
26Micha okla nashoeli bohli tok; mihma nashoeli ash ot Mathlaiʋs ak o̱ onʋtula na, yʋmmak osh ʋbanumpeshi auah‐chʋfa kash iba holhtiena tok oke.
Ʋbanumpeshi ʋhleha hʋt Shilombish anukfohka fehna mʋt, anumpa ilaiyuka anumpuli, 1, 14 Pita yʋt ʋbanumpa isht anumpuli.
Currently Selected:
Apostel isht Anumpa 1: CHH
Highlight
Share
Copy
Want to have your highlights saved across all your devices? Sign up or sign in
Published by the American Bible Society 1848-1886, reprinted 1913
