Chan 17
17
Ishit inla ibbak fohka chi̱ ninak a̱ Chisʋs ʋt ʋba pit anumpuh kʋt, ilapʋt illi tuk ʋt falamʋt tani ha ya, Chihowa hʋt nan im ai ithʋna ʋhleha ha̱ apelahanchi na im anukfila hʋt ai it achʋfa he, 1; 20 Chihowa, Ushi ita tuklo ka im anukfila pit ai itachʋfa he: 24 yohmi cha ilap ʋt ʋba yakni a holitopʋt ahanta ka ont apehʋt ma̱ya he puta ka ʋba isht anumpohonli.
1Anumpa ilʋppa puta ka Chisʋs ʋt anumpohonli mʋt, ʋba pit ʋba chakali cha, A̱ki ma! hʋshi kanʋlli ʋlhpisa yʋt ai onʋshke. Chiso ha̱ ish holitoblichi na anonti chiso mʋt chi holitoblichi akinlashke.
2Laua kʋt kaniohmi ho̱ ish im ihi̱sa tuk ma, yʋmmak ash ai okcha̱yʋt bilia yo̱ yʋmmak ash ot ima hi ʋt, hatak puyuta ma ai imaiya he mak o̱, ish im apihi̱sa tok oke.
3Yohmi ka Chishno ak illa kak osh Chihowa a̱hli chia ka, micha Chisʋs Klaist auet ish kanchi tok ma okla ithaiyana he ak o̱ ilʋppak osh ai‐okcha̱yʋt bilia yoke.
4Yakni paknaka ya̱ a chi holitoblichi lishke. Na‐toksʋli isht ahanta la hi o̱ is sʋm apesa tok a̱, atahli lishke.
5Yohmi ka, A̱ki ma! yakni ʋt iksho mak o̱ na holitopa ka isht chiba holitopa li ya tok mak o̱, himak a̱ chishno a̱ ai il a aieninchit is sa holitoblichashke.
6Hatak puta ka yakni ak o̱ ai ishit is sʋma hatuk a̱, chi̱ hohchifo ha̱ im otʋninchi li hokʋno; yʋmmak okʋt chimmi hatuk o̱, is sʋma hatuk oka, chim anumpa ha̱ okla holitobli tuk oke.
7Nana ka is sʋma tok oklu̱yuha kʋt chishno ak o̱ a minti hatuk a̱ himak okʋno okla akostininchishke.
8Anumpa is sʋma chash yʋmmak o̱ ima li ho̱kʋno; mihma yʋmma okla aiokpʋchi mʋt, ʋno ʋt chishno ak o̱ a chi a minti li hatuk a̱, okla akostininchi, micha chishno ak osh auet is sa kanchi tok aiena ka okla yimmi hatuk oke.
9Yʋmmak o̱ isht chim ilbʋshʋt anumpuli lishke; yakni ak o̱ isht chim ilbʋshʋt anumpuli li keyu, amba ilʋppak o̱ is sʋma tok a̱, yʋmmʋt chimmi ʋhleha hoka, isht chim ilbʋshʋt anumpuli lishke.
10Yohmi ka ʋmmi hʋt momʋt chimmi hokma, anonti chimmi hʋt ʋno a̱ ʋmmi makinli hoke: yohmi hoka ʋno ʋt yʋmma isht a sa holitopa hoke.
11Himak okʋno yakni paknaka ya̱ himmakma ik si ai iksho mak oke; yohmi kia ilʋppak okʋto yakni a̱ ai aha̱shwa na ʋno ʋt chim a̱ya li mak oke. A̱ki holitopa ma! is sʋma tok ʋhleha ilʋppak oka chishno chi̱ hohchifo pulla hatuk mak o̱ ish apesahanchi na yʋmmak mʋt ai itibai achʋfa kʋt pishno a̱ chiyuhmashke.
12Pehliechit yakni paknaka ai ahanta li moma kʋto chi̱ hohchifo pulla ho̱ isht ai apesahanchi li tok: is sʋma tok ʋhleha yʋmmak oka apesahanchi li ma, achʋfa kia ik kʋnio ho̱, amba Holisso Holitopa ʋt ont ai a̱hla chi̱ kak o̱, nan‐okpʋni ushi ak illa tuk oke.
13Yohmi ka ʋno pulla hatuk mak o̱ a̱ nan‐isht ilaiyukpa ma ilap inlit okla il ai esha hi o̱, ilʋppa puyuta ka yakni paknaka isht ai anumpohonli li, yohmi tuk osh himak okʋno chim a̱ya li mak oke.
14Chim anumpa ha̱ ima li tuk oke: yohmi ma yʋmmak okʋt yakni a̱ ai immi keyu kʋt, ʋno ʋt yakni a̱ ai immi sia keyu kak inli ho̱ chohmi hatuk o̱, okla i̱ nukkilli hatuk oke.
15Yakni ak o̱ a kohchit ish isha hi o̱ chim asilhha li keyu; amba apesahanchit nan‐okpulo ak o̱ ishit chik ahalaiyacho ka he ak oke.
16Yakni a̱ ai immi keyu kʋt, ʋno ʋt yakni a̱ ai immi sia keyu kak inli ho̱ okla chiyuhmi hoke.
17Yʋmmak oka na chim ai a̱hlika pulla kak o̱ isht ish i̱ kashofichashke; chim anumpa hak osh nan ai a̱hlika yoke.
18Chishno ʋt yakni paknaka ya̱ auet is sa kanchi tok mak o̱, chohmichit ʋno mʋt ilʋppak ma yakni paknaka ya̱ a tihlehinli lishke.
19Micha ilap ak kia nan‐ai a̱hlika ya̱ ai isht a kashofa chi̱ ka, ʋno ʋt ilʋppak pulla hatuk mak o̱ ile kashofichi li hoke.
20Micha ilʋppa illa ho̱ isht asihi̱hla li keyu; amba ilʋppa pulla im anumpa hatuk mak o̱ a̱ yimma he aiena kak oke.
21Moyumʋt ai itib achʋfa kʋt, A̱ki chia hʋt ʋno a̱ is sʋbai acha̱fakma, anonti ʋno mʋt a chibai acha̱fa li kak inli ho̱ okla chiyuhmi cha, yʋmmak mʋt pishno a̱ a pibai acha̱fashke: yohmi na chishno ak osh auet is sa kanchi tok a̱ okla moma kʋt ithaiyanashke.
22Yohmikma ilʋppʋt ai itib achʋfa kʋt pishno il itibai achʋfa kak inli ho̱ chohma hi a̱, nan‐isht aholitopa is sʋma tok a̱ ilʋppa ima lishke.
23Ʋno ʋt ilʋppa ai ibacha̱fa likma, anonti chishno mʋt auet is sʋbai acha̱fa; ai yakohmi ho̱ yʋmmak osh ont ai a̱hli achʋfa ka tobashke; yohmikma chishno ak osh auet is sa kanchi tok; a tok osh ilʋppak oka ish i̱ hullo kʋt ʋno a̱ is sa̱ hullo kak inli ho̱ ish chohmichi ka, yakni ʋt ithaiyanashke.
24A̱ki ma! is sʋma tok ʋhleha hak kia kanima yo̱ ai ahanta likma, si api̱hʋt a̱sha cha, nan‐isht ʋm aholitopa yʋmma is sʋma tok a̱ pisa he ak o̱, ahni lishke: yakni ʋt ik tobo ki̱sha mak o̱ is sa holitobli tok mak oke.
25A̱ki a̱hli achukma ma! yakni ʋt ik chithanoshke; yohmi kia ʋno ʋto chithana li; mihma chishno ak osh auet is sa kanchi tok a̱ ilʋppak okʋto akostininchi hatuk oke.
26Yohmi na ilʋppak o̱ chi hohchifo ha̱ isht im anohonli li tuk osh, anonti anohonli la chi̱ hoke: yohmikma na‐holitobli ai isht is sa̱ hullo hatuk ʋt ilʋppak ma anukfoyuka na, anonti ʋno mʋt ai ibacha̱fa lashke, achi tok.
Currently Selected:
Chan 17: CHH
Highlight
Share
Copy
Want to have your highlights saved across all your devices? Sign up or sign in
Published by the American Bible Society 1848-1886, reprinted 1913
