Chan 1

Anumpa achi Chisʋs Klaist yʋmmak osh ʋmmona fehna ka Chihowa ha̱ iba chʋfa, 1; 6 Nan‐tohwikeli ai a̱hli kʋt achʋfa illa ilʋppak atuk a̱ atokowa anola chi̱ mak osh Chan ʋt a̱ya hatok. 15 Chan ʋt Klaist a̱ nan ʋlhtokowa isht ai anoli. 35 Chan nan im ai ithʋna yatuk ʋt tuklot Chisʋs a̱ apeha toba; yʋmmak atuk ʋt achʋfʋt Antilu ak osh itibapishi Pita ya̱ ilauelit Chisʋs a̱ i̱sht im ona.

1Ʋmmona ka Anumpa hʋt ahanta mʋt, Anumpa hʋt Chihowa ya̱ ai iba chʋfa tok: mihmʋt Anumpa hash ot Chihowa ya tok.

2Yʋmmak inli hosh ʋmmona ka Chihowa ya̱ ai iba chʋfa tok.

3Yʋmmak atuk mak o̱ nan oklu̱ha kʋt toba tok; yohmi ka nana kʋt toba tok ʋt yʋmmak o̱ keyu hokʋno ik tobo ki tok.

4Yʋmmak oka isht ai okcha̱ya yʋt a̱sha tok: yohmi ka isht ai okcha̱ya yʋmmak ash ot hatak puta ka in tohwikeli ya tok.

5Mihmʋt tohwikeli hash ot ai okhlilika ya̱ a toho̱mmi; yohmi ka okhlilika yʋt yʋmmak ash o̱ ik akostinincho ki tok.

6Hatak Chan hohchifo hosh, Chihowa nana aiahni ho a̱ya tok.

7Yʋmma pulla tuk mak o̱ hatak ʋt momʋt yimma hi o̱, yʋmmak ash osh nan atokoli osh Nan‐tohwikeli ash atokowa anola chi̱ hosh a̱ya tok.

8Yʋmmak osh Nan‐tohwikeli mih mak a tok keyu; amba Nan‐tohwikeli yʋmma atokowa anola chi̱ mak osh a̱ya tok.

9Yakni pakna hatak ʋt ai ʋtta hoka mominchit in tohwikelichi, yʋmmak osh Nan‐tohwikeli a̱hli mak a tok.

10Yʋmmak atuk mak o̱ yakni ʋt toba tok o̱, yakni a̱ ai ahanta ma, yakni ʋt yʋmmak ash ik ithano ki tok.

11Yʋmmak okʋt a̱yʋt ilap immi ʋhleha ho̱ im ʋla ma, immi ʋhleha hash osh ik i̱ yimmo ki tok.

12Amba laua kaniohmi hosh ahninchit, ilapo hohchifo ha̱ i̱ yimmi hokʋno, Chihowa ushi ʋhleha toba chi̱ mak o̱ isht ai ʋlhpesa ka ima tok;

13Issish ak o̱ keyu, mikmʋt haknip nan ahni keyu, micha hatak osh nan ahni keyu ho̱, yʋmmak okʋt toba tok; amba Chihowa yak a tok.

14Micha Anumpa hash ot nipi yo̱ toba cha, nan isht i̱ kana, micha nana aia̱hlika aienʋt isht alotowa hosh pi takla ahanta tok: yohmi na isht a holitopa ya̱, I̱ki a̱ Ushi ʋt achʋfa illa cha ai isht a holitopa chatuk mak o̱, chiyuhmi ho̱ e pihi̱sa tok.

15Chan ʋt yʋmmak oka atokowa anoli hosh, chitolit anumpulit, Auet siakaiyʋt mihinti kak osh sa ti̱kba ahanta tok mak okʋt, yʋmmak ash holitopa kʋt ʋno a̱ a̱ shahli ho̱, isht anumpohonli li tuk a̱ ilʋppak atuk mak oke, achi tok.

16Micha yʋmmʋt isht alotowa hatuk ash e moma kʋt nan isht i̱ kana yʋt ai itʋlbitkʋchi ho̱, e pisa tok.

17Nan‐ʋlhpisa yokʋto Moses ak atuk mak o̱ ʋlhpihi̱sa tok: amba nan isht i̱ kana, micha nan‐aia̱hlika aiena hokʋto Chisʋs Klaist ak o̱ a minti tok.

18Hatak nana hosh Chihowa ya̱ nitak nan ash o̱ pisa tok keyu: Ushi holitopa achʋfa illa I̱ki shakba ya̱ afoyuka, yʋmmak atuk okʋto yʋmmak oka otʋninchi tok oke.

19Mihma yʋmmak ash o̱, Kʋta chia hoh cho? achit ont i̱ ponakla chi̱ ka, Chu okla hʋt na‐holitompa isht a̱sha, micha Lefait okla aiena ka Chelusalem a̱ a kohchit pit tihleli na Chan ʋt atokowa anoli tok a̱ ilʋppak oke.

20Yohmi kʋt yʋmmak ash ot atokolit anoli kʋt, Mih sia hoke, achi tok keyu; amba atokolit, Ʋno ak osh Klaist o̱ sia keyu hoke, achi tok.

21Mihma okla i̱ ponaklot, Mih kʋto kʋta hak o̱? Elias ak o̱ chia ho̱? achi tok: mihma, Mih sia keyu, achi tok. Hopaii mih mak o̱ chia ho̱? achi ma; afalaminchi mʋt, Keyú, achi tok.

22Mihma, Kʋta chia hak o̱? ish pim anoli na auet pi tihleli tuk ʋhleha ha̱ anumpa falama ka ont il imashke: chishno akinli kʋto, Kʋta ho̱ ish ile miha cho? im achi tok.

23Mihma yʋmmak ash ot, Achʋfa hosh yakni haiaka yo̱ ai anumpohonlit, Chitokaka ata̱ya hi a̱ oh apissʋlichí, ahanchi ho̱ hopaii Esaias ʋt isht anumpohonli tok mak o̱ mih sia mak oke, achi tok.

24Mihma okla ʋlhtokʋt ilhkoli tuk ash ot Falisi ʋhleha ha tok.

25Atuk osh yʋmmak ash o̱ okla i̱ ponaklot, Chishno ak osh Klaist mih mak o̱ chia keyu; Elias a̱ chia keyu; anonti hopaii mih mak o̱ chia keyu hokak osh, nanta katiohmi ho̱ ish baptismochi cho? im achi tok.

26Chan ash osh yʋmmak ash o̱ im afalaminchi mʋt, Ʋno ʋto oka yo̱ ishit baptismochi lishke; amba achʋfa kʋt hʋchi ta̱kla hiki̱a yʋmmak okʋno hʋch ik ithanoshke.

27Yʋmmak osh siakaiyʋt minti kʋt holitopa kʋt a̱ shahli ka, i̱ shulush isht‐talakchi a̱ hotofi la he si ahoba keyu mak oke, achi tok.

28Chatan misha Behlabala yʋmmak o̱ Chan ʋt a baptismochi hosh ahanta hatuk o̱, ilʋppa puta kʋt ai yakohmi tok.

29Atuk o̱ ont onna ma Chan ʋt, Chisʋs ʋt i̱ minti na pisa mʋt, Chihowa in Chukfʋlhpoba ushi, yʋmmak osh yakni im ai‐ashʋchika isht kanchi a̱, ho pesá.

30Hatak ʋt auet siakaiyʋt minti kʋt, yʋmmak osh sa ti̱kba ahanta tuk osh holitopa kʋt a̱ shahli hoke; achi li tuk a̱ ilʋppak osh mih mak oke.

31Yohmi kʋt ilʋppa ithana li tuk keyu; yohmi kia ilʋppak osh Islael okla ha̱ im otʋna chi̱ kak o̱, ʋno ʋt oka ya̱ ishit baptismochit a̱ya li hatuk oke, achi tok.

32Mihmʋt Chan ʋt atokowa anolit, Shilombish okʋto pʋchi yoshuba yo̱ chiyuhmi hosh ʋba ya̱ ʋttʋt mintit, yʋmmak ash ant o̱ binili na pisa li tok.

33Yohmi ka yʋmmak ash o̱ ak ithano ki tok; yohmi kia oka ishit baptismochi la chi̱ ho̱, sa tohno tuk yʋmmak osh, Kʋna ho̱ Shilombish ak osh aka mintit ant o̱ binili na ish pisa chi̱ ka, mihi yosh Shilombish Holitopa ya̱ ishit baptismocha chi̱ mak oke, im achi tok.

34Atuk o̱, Ilʋppak osh Chihowa ha̱ Ushi pulla hatuk a̱ pi̱sʋt, atokowa anoli li tuk oke, achi tok.

35Anonti ont onna ma Chan ʋt ilap, nan im ai ithʋna tuklo aienʋt hinli tok.

36Micha Chisʋs ash ot nowʋt a̱ya na pisa mʋt, Chihowa in Chukfʋlhpoba ushi a̱ ho pesá, im achi tok.

37Mihma nan im ai ithʋna tuklo kash ot, yʋmmak ash ot anumpuli na haklo mʋt, Chisʋs a̱ iakaiyʋt okla tok.

38Mihma Chisʋs ash ot filema cha, iakaiyʋt okla kash o̱ pisa mʋt, Nanta ho̱ hʋsh hoyo cho? im achi ma, Labbai ma! yʋmmʋt ʋlhtoshowakmʋt, nan‐ithʋnanchi ma! achi, Katima ko̱ ish ai ʋtta yoh cho? im achi tok.

39Mihma, Mintit ant ho pesá, im achi tok. Mihma itʋlachit kanima ai‐ʋtta yatuk a̱ ant pisʋt okla mʋt, hʋshi kanʋlli ʋlhpisa ont isht pokoli foka hatuk oka, nitak yʋmmʋno apehʋt a̱shwa tok.

40Tuklot Chan ʋt anumpuli na haklo cha, yʋmma iakaiyʋt okla tuk ash, achʋfa kʋt Antilu, Saimon Pita itibapishi ha tok.

41Yʋmmak ash ot na ti̱kba ilapo itibapishi akinli Saimon ak o̱ pisa mʋt, Messias ash, yʋmmʋt ʋlhtoshowakmʋt, Klaist achi ho̱ il ahayuchishke, im achi tok.

42Mihma yʋmmak ash o̱ ilauelit Chisʋs a̱ im ʋla tok. Mihma Chisʋs ʋt yʋmmak ash o̱ pisa mʋt, Chona ushi Saimon chia hʋt Sefas, yʋmmʋt toshowakmʋt, tʋli achi hoke, yʋmmak o̱ chi hohchifashke, achi tok.

43Atuk osh ont onna ka Chisʋs ʋt Kalili a̱ ia hi atuk osh Filip a̱ pisa mʋt, Is siakaiyashke, im achi tok.

44Filip ʋt Antilu, micha Pita ita‐tuklo in tʋmaha Betsaita yak o̱ ai ʋtta ya tok.

45Filip ʋt Nahlanael a̱ pisa mʋt, Chisʋs Nasalet ʋtta, Chosef ushi, yʋmmak o̱ nan ʋlhpisa ya̱ Moses ʋt, micha hopaii puta kʋt isht a holissohonchi tok mak o̱, e pisʋshke, im achi tok.

46Mihma Nahlanael ash osh, Nana achukma kʋt Nasalet a̱ ai itolʋt kohcha hinla ho̱? im achi ma, Filip ash osh, Minti cha, ant pisá, im achi tok.

47Chisʋs ʋt Nahlanael ʋt i̱ minti na pisa mʋt, Yakeh! Islael hatak a̱hli fehna kʋt nana ilahobi keyu mak oke, achi tok.

48Mihma Nahlanael ash ot, Katiohmit is sʋthana cho? im achi ma, Chisʋs ʋt afalaminchi mʋt, Filip ʋt ont ik chi hoyo ki̱sha ho̱, fik ʋpi nuta ya̱ ish a̱sha kak o̱, chi pi̱sa li kamo, im achi tok.

49Mihma Nahlanael ash ot afalaminchi mʋt, Labbai ma! chishno ak osh Chihowa Ushi chiʋshke; chishno ak osh Islael okla i̱ mi̱ko chiʋshke, im achi tok.

50Chisʋs ʋt afalaminchi mʋt, Fik ʋpi nuta ya̱ ish a̱sha ho̱ chi̱ pi̱sa li tuk achi li kak o̱, chi yimmi há cha? nana kʋt ilʋppa i̱ shahli fehna ka ish pisa hi oke, im achi tok.

51Mihma, A̱hlishke, a̱hli mak o̱ chim achi lishke, Himak a pilla ʋba yʋt tiwa na Chihowa im enchil ʋhleha hʋt Hatak Ushi a̱ auet ai akoho̱wa, anonti ʋba pit ai ihi̱ya aiena ka, ish pisa hi oke, im achi tok.

Currently Selected:

Chan 1: CHH

Highlight

Copy