Apostel isht Anumpa 4
4
1-2Micha okla ha̱ im anumpulit aha̱shwa ma, na holitompa ish ʋtta ʋhleha, micha tempel atoni, mikmʋt Satusi ʋhleha aiena kʋt, yʋmmʋt hatak illi puta tana hi oka, Chisʋs atuk mak o̱ okla ha̱ nan ikhʋnanchi, micha isht anumpohonli kak o̱, ik im ʋlhpieso hatuk osh, ant i̱ kocha tok.
3Micha okla ibbak isht ieshit, aboha kʋllo apitta na onna tok, opia̱ hosi tok oka.
4Yohmi kia anumpa ha̱ haha̱klo tuk ʋt, laua hosh yimmi tok; yʋmohmi ma hatak holhtina kʋt tahlepa sipokni tahlapi foka tok.
5Ont onna ma yakohmi tok; Okla i̱ pehlichika ʋhleha, micha hatak hochitoka ʋhleha, micha na holissochi ʋhleha,
6Mikmʋt Annas, na holitompa isht a̱sha pehlichi, micha Kaiafʋs, mikmʋt Chan, micha Aliksanta, micha na holitompa isht a̱sha pehlichi i̱ kanomi ʋhleha moma aienʋt, Cheluselem a̱ ai itahoba tok.
7Micha yʋmmak ash o̱ ai iklʋnna hiohlechi mʋt, Kʋta hosh nan apesa tuk o̱, keyukmʋt nanta hohchifo ho̱ ilʋppa isht hʋsh ai yakohmi tuk oh cho? achit ponaklo tok.
8Yohmi ma Pita ʋt Shilombish Holitopa isht anukfohka fehna mʋt, Okla pehlichi ʋhleha micha Islael i̱ hochitoka ʋhleha hʋchia ma!
9Hatak iksitopo ʋt nan isht il ayukpa yʋt im ʋlhtaha tuk a̱, kaniohmi ho̱ isht a hlakofi tuk a̱, himak nitak a̱ pishno ak o̱ pi̱ ponaklo hatuk oka,
10Hʋchishno ʋt hʋsh moma, micha Islael okla moma kʋt hʋsh ithaiyanashke; Chisʋs Klaist Nasalet ai ʋtta hohchifo pulla, yʋmma iti itaiyukhʋna hʋsh a takalichi tok o̱ illi tuk a̱, Chihowa yʋt tanichi tok: yʋmmak fehna kak o̱, hatak ilʋppʋt isht a hlakofi cha hʋchi tikba ya̱, yak hikia hoke.
11Tʋli ilʋppak o̱, chuk‐ikbi ʋhleha hʋchia hʋt, ik ahobalot hʋsh kanchi tok mak o̱, yʋmmak ash ot chukbi ka nutak intola fehna toba hoke.
12Micha ai okcha̱ya mʋt inla kia iiksho: shutik nutaka ya̱ hohchifo inla ma hatak puta ka auet ai ima tok o̱, mihi yo̱ il ai okcha̱ya he ʋlhpesa kʋt iksho hoka; im ahanchi tok.
13Yohmi ma Pita, micha Chan ita tuklo kʋt nukwa̱ya iksho ho̱ okla pihi̱sa, micha yʋmmʋt hatak holisso imponna keyu, micha nan ik ithano aiena yatuk a̱, akostininchi mʋt, okokko! okla aiahni tok; micha yʋmmʋt Chisʋs a̱ apehʋt a̱ya tuk a̱, okla im akostininchi tok.
14Micha hlakofi tuk hatak ashot ibafo̱kʋt hikia na, okla pi̱sa hatuk osh, yʋmma okla nan isht a miha he keyu tok.
15Amba ai itʋnaha ka a kohcha chi̱ ka, okla im apesa ha yokʋto, ilap bi̱ka it im anumpulit ma̱yʋt,
16Hatak ilʋppa nanta ko̱ eho katimihcha chi̱ ho̱? na fehna ithana hinla mak o̱, yʋmma ai isht yʋmohmi mʋhli tuk a̱, Chelusalem ai asha kʋt momʋt akostininchi hoka; anonti pishno ʋt ik a̱hlo, e miha he keyushke.
17Amba okla ha̱ ibai a chukowʋt i̱ shahlit isht ik aiyo ka he a̱, i̱ nokowa fehnʋt, himmak a pilla ma, hatak nana kia hohchifo ilʋppa isht ik im anumpulo ka hi a̱, iloh im apesashke; ahanchi tok.
18Mihmʋt okla pit i̱ howa cha, Chisʋs hohchifo ha̱ isht ik anumpulo kʋmohmikmʋt, anonti nan im abʋchit ik aha̱shwo ka chi̱ ho̱, im apesa tok.
19Yohmi kia Pita, micha Chan ita tuklo kash ot, afalaminchi mʋt, Hʋchishno ak o̱ a hʋchi̱ haponaklo kʋt, Chihowa ya̱, i̱ shahlichi kak okmá, nanta kosh Chihowa itikba ya̱ ai ʋlhpiesa ho̱ anukfillit ho pesá.
20Nana ka e pi̱sa tuk, micha e haha̱klo tuk aiena kʋt, isht kil anumpulo ka he keyu hoka; im achi tok.
21Yʋmohmi ma okla hatuk pulla mak o̱, kanimihchit a fʋmma hinla kʋt, ik akostinincho hatuk osh, achakalit nan i̱ mihʋt tahli mʋt, ant ik a̱yá, okla im ahni tok; nana kʋt a yʋmohmi tuk a̱, hatak moma kʋt, Chihowa ya̱ pit isht holitobli hatuk o̱.
22Hatak ʋt hopahki kʋt afʋmmi pokoli ushta ka atampa ho̱ na fehna nahlakofichi ilʋppʋt ai i̱ yʋmohmi hatuk oka.
23Ant ik a̱yá, im ahni mʋno, iʋt ilap ai itapeha ai asha kash itonachi tok; micha na holitompa isht ʋtta ʋhleha, hochitoka aiena kʋt nana im achi tuk ash mominchit anoli tok.
24Mihma yʋmma okla haklo mʋt, im anukfila ai achʋfʋt, Chihowa ya̱ okla pit im anumpuli mʋt, Chitokaka ma! chishno akosh Chihowa chia hosh, ʋba shutik, micha yakni, mikmʋt okhʋta, micha nana moma yakohmi aiasha ka ikbi tok chia hʋt;
25Lewi chim ʋlla itih ha̱ isht ish ai anumpuli mʋt, Nanta katihmi ho̱ okla nan ik ithano yʋt nokowa ma, anonti okla hʋt nana tok keyu ka anukfillit ai asha tok oh cho?
26Yakni mi̱ko ʋhleha hʋt hieli ma, yohmi na pehlichi ʋhleha hʋt Chitokaka, micha i̱ Klaist aiena ka i̱ sanalit itahomba tok, ish achi tok.
27-28A̱hli mʋhlishke, chiso holitopa Chisʋs, yʋmmak o̱ chishno ʋt ish il a hʋmmichi tuk ash, Helot ʋt Pa̱shis Pailat a̱ ita tu̱klot, okla nan ik ithano ʋhleha, micha Islael okla aiena ka itapehʋt i̱ sanalit nana hosh kaniohma hi a̱, chibbak, micha chim anukfila aiena kʋt, tikbanlit aiahni tok a̱, yʋmihcha chi̱ mak osh, okla itahohomba tok oke.
29-30Yʋmohmi ka himonasi a̱, Chitokaka yʋt okla im anumpa palʋmmi a̱ ish ithaiyanashke, micha hlakoficha chi̱ kʋt, chibbak a̱ auet ish wihinli; micha nan isht ahoba puta, anonti na fehna puta aiena kʋt chiso holitopa Chisʋs hohchifo pulla ka isht a yʋmohmi na, chin tishu ʋhleha hʋt nukwa̱ya iksho hosh chim anumpa ha̱ isht anumpohonla chi̱ ka̱ auet ish im aiahnashke; achi tok.
31Yʋmohmit ʋba pit anumpulit okla in taiyaha ma, itʋnahʋt okla a chieya tuk ash winakahanchi tok: yohmi ma momʋt Shilombish Holitopa yʋt anukfohkʋt kʋnia mʋt, nukwa̱ya iksho hosh Chihowa im anumpa ha̱ okla isht anumpohonli tok oke.
32Okla laua na yimmi tuk ʋhleha hashot chu̱kʋsh achʋfa mʋt, Shilombish mʋt achʋfa hosh ai asha tok; micha achʋfona kia nana im aiasha kʋt kaniohmi ka ilʋppa ʋno ʋmmi fena, achi tok keyu; amba nana moma ai i̱ moma hosh aiasha tok.
33Ʋbanumpeshi ʋhleha hash ot nan a̱hlika chinto ka il aieshi hosh, Chitokaka Chisʋs ʋt tani tok a̱ atokowa okla anohonli tok: yʋmohmi ma ayukpa chinto kʋt mominchit onʋtoyula tok.
34Micha achʋfona kia nana kʋt ik im iksho mʋt ibafo̱ka tok keyu; amba osapa, micha chuka kia in talohma̱ya aiyukali atuk ʋt, kampila cha, nana hosh nana kanchi ka it ʋlhtoba tuk puta ka, okla isht ai ʋla tok.
35Micha yʋmmak ash ʋbanumpeshi ʋhleha iyi ituma ya̱, ant ashachi tok; yohmi na hatak ʋt nana ka ba̱nna ka aiyukali tuk a̱ isht i̱ holhpila tok oke.
36Yohmi ma Choses atuk o̱, ʋbanumpeshi ʋhleha hʋt Banabas hochifo tok, yʋmmʋt toshowakmʋt Nana im abʋchi ushi achi hoke, Lefait hatak Saiplʋs yakni ʋtta ʋt,
37Osapa in talaia tuk osh, kanchi cha, tʋli holisso a̱ isht ʋla cha, ʋbanumpeshi ʋhleha iyi ituma ya̱, ant ashachi tok oke.
Ananaiʋs, Safaila itatuklo kʋt, Pita yʋt nan i̱ miha ma, illit aka kaha, 1, 12 Ʋbanumpeshi ʋhleha hʋt na fehna puta yʋmihinchi tok.
Currently Selected:
Apostel isht Anumpa 4: CHH
Highlight
Share
Copy
Want to have your highlights saved across all your devices? Sign up or sign in
Published by the American Bible Society 1848-1886, reprinted 1913
